ግዕዝ
Home Formaciones Libros Biblioteca Ge'ez Contacto
Sinaxario · Megabit

10 de Megabit

አመ፡፲፡ለመጋቢት
1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፲፡ለመጋቢት፡በዛቲ፡ዕለት፡ኮነ፡አስተርእዮተ፡መስቀል፡ክቡር፡ዘእግዚእነ፡ኢየሱስ፡ክርስቶስ፡ሎቱ፡ስብሐት፡ክልኤተ፡ጊዜያተ።
2ቀዳሚ፡በእደ፡እሌኒ፡ንግሥት፡እሙ፡ለቈስጠንጢኖስ፡ንጉሥ፡ጻድቅ።እስመ፡በጽ፡ዓት፡ብፅዓተ፡ለእግዚአብሔር፡ለእመ፡ቦአ፡ወልዳ፡ቈስጠንጢኖስ፡ውስተ፡ሃይማኖተ፡ክርስቲያን፡ከመ፡ተሐውር፡ኢየሩሳሌም፡ወትከሥቶ፡ለዕፀ፡መስቀል፡እምኀበ፡ተኀብአ፡ወተሐንፆን፡ለአብያተ፡ክርስቲያናት፡ወለመካናት፡ቅዱሳት፡እለ፡ውስተ፡ኢየሩሳሌም።
3ወሶበ፡አምነ፡ወልዳ፡ቈስጠንጢኖስ፡በእግዚእነ፡ኢየሱስ፡ክርስቶስ፡ሎቱ፡ስብሐት። ወተጠምቀ፡ጥምቀተ፡ክርስትና፡ሖረት፡ቅድስት፡እሌኒ፡ኀበ፡ሀገረ፡ኢየሩሳሌም፡ወምስሌሃ፡ሠራዊት፡ብዙኅ፡ወሐተተት፡በእንተ፡መስቀል፡ክቡር፡ዘእግዚእነ።
4ወሶበ፡ኢረከበት፡ዘያጤይቃ፡መካኖ፡ነሥአት፡ብእሲ፡አረጋዊ፡አይሁዳዊ፡ወአመንደበቶ፡በረኀብ፡ወጽምእ፡ወሶበ፡ተመንደበ፡ነገራ፡ለእሌኒ፡ንግሥት፡ወይቤላ፡ኰስትሪ፡መካነ፡ጎልጎታ።
5ወሶቤሃ፡አዘዘቶሙ፡ለአይሁድ፡ከመ፡ይኰስትሩ፡መካነ፡ጎልጎታ፡እስመ፡እምቅድመ፡ዝኒ፡ተማከሩ፡አይሁድ፡ወአዘዙ፡ከመ፡ኵሉ፡ሰብእ፡ዘይኰሰትር፡ቤቶ፡ይውግር፡ጕድፎ፡ውስተ፡ጎልጎታ፡ላዕለ፡መቃብረ፡እግዚእነ።
6ወነበሩ፡እንዘ፡ይዌግሩ፡መጠነ፡፪ቱ፡፻ት፡ዓመት፡ወዘይፈደፍድ፡እምኔሁ፡እስከ፡በጽሐት፡እሌኒ፡ንግሥት፡ኀበ፡ኢየሩሳሌም፡ወኮነ፡ወግረ፡ዐቢየ፡ውእቱ፡ጕድፍ።
7ወሶበ፡ኰስተርዎ፡አይሁድ፡አስተርአዩ፡፫ቱ፡መስቀላት፡ወሶበ፡ተስእኖሙ፡ሌልዮተ፡መስቀሉ፡ለክርስቶስ፡አምጽኡ፡፩፡ምዉተ፡ወአንበሩ፡ዲቤሁ፡፩ደ፡መስቀለ፡ወካልእ፡ወኢተንሥአ፡ወእምዝ፡አንበሩ፡ላዕሌ፡ሣልሳየ፡መስቀለ፡ሶቤሃ፡ተንሥአ፡ወአእመረት፡እሌኒ፡ከመ፡ውእቱ፡መስቀሉ፡ለክርቶስ፡ወሰገደት፡ሎቱ፡ወኵሎሙ፡ሕዝብ፡መሃይምናን።
8ወተረክበ፡በካልእ፡መጽሓፍ፡ዘፈነወ፡ለወልዳ፡ከመ፡ውእቱ፡መስቀል፡ክፍለ፡የማን፡መዝራዕት፡ምስለ፡ቅንዋት።
9ወሐነፀት፡አብያተ፡ክርስቲያናት፡ወመካናተ፡ቅድሳተ፡እለ፡ጽሑፍ፡ሥርዓቶሙ፡ወሕንፀቶሙ፡አመ፡፲ወ፯፡ለመስከረም።
10ወኮነ፡በመዋዕሊሁ፡ለሕርቃል፡ንጉሠ፡ሮም፡ሶበ፡ሰብአ፡ፋርስ፡በብሔረ፡ግብፅ፡ሀለወ፡ወፈቀዱ፡ሰብአ፡ፋርስ፡ይግብኡ፡ኀበ፡ብሐሮሙ።
11ወ፩ዱ፡እመኳንንቲሆሙ፡ፈለሰ፡ወኀለፈ፡ወበጽሐ፡ሀገረ፡ኢየሩሳሌም፡ወቦአ፡ውስተ፡ቤተ፡ክርስቲያን፡ዘመስቀል፡ክቡር፡ወርእየ፡ብርሃነ፡ዐቢየ፡እንዘ፡ይበርህ፡በቅድመ፡መስቀል።
12ወሰፍሐ፡እዴሁ፡ከመ፡ይንሥኦ፡ወፅአት፡እሳት፡ወአውዓየቶ፡እዴሁ፡ወነገርዎ፡ክርስቲያን፡ግብሮ፡ለመስቀል፡ክቡር፡ከመ፡መኑሂ፡ኢይክል፡የአኀዞ፡ዘእንበለ፡ክርስቲያን፡ወነሥአ፡፪ተ፡ዲያቆናተ፡ወአዘዞሙ፡ይፁሩ፡መስቀለ፡ክቡረ፡ወፄወወ፡ብዙኃነ፡ሰብአ፡ወገብአ፡ሀገሮ።
13ወሶበ፡ሰምዐ፡ንጉሠ፡ሮም፡ሕርቃል፡ከመ፡ሰብአ፡ፋርስ፡አመዝበርዋ፡ለኢየሩሳሌም፡ወፄወወ፡ብዙኀነ፡ሰብአ፡ወነሥኡ፡ዕፀ፡መስቀል፡ክቡር፡ኀዘነ፡ፈድፋደ፡ወሖረ፡ኀበ፡ፋርስ፡ወተሃብዐ፡ምስለ፡ንጉሠ፡ፋርስ፡ወቀተሎው፡ወሞዖሙ፡ለፋርስ፡ወዖደ፡ውስተ፡ኵሉ፡ደወሎሙ፡እንዘ፡የኀሥሦ፡ለመስቀል፡ክቡር፡ወኢረከቦ።
14እስመ፡ውእቱ፡መኰንን፡ዘነሥኦሙ፡ለዲያቆናት፡አብጽሖሙ፡ኀበ፡፩፡መካን፡እም፡ውስተ፡አዕዋድ፡በአንፃረ፡ቤቱ፡አዘዞሙ፡ይክርዩ፡ዐዘቅተ፡ዕሙቀ፡ወይቅብሩ፡ዕፀ፡መስቀል፡ክቡር፡ወድኅረ፡ቀበርዎ፡ቀተሎሙ፡ለእሉ፡ዲያቆናት።
15ወኮነት፡አሐቲ፡ወለት፡እምአዋልደ፡ካህናት፡ዘተፄወወት፡ወይእቲ፡ትነብር፡ውስተ፡ቤቱ፡ለመኰንን፡ሶበ፡ቀተሎሙ፡ለ፪ቱ፡ዲያቆናት፡ትኔፅር፡እመስኮተ፡ቤቱ፡ለመኰንን፡ወሶበ፡ቀበሮ፡ለመስቀል፡ክቡር፡ወሐዊራ፡ነገረቶ፡ለሕርቃል፡ንጉሠ፡ሮም፡ዘከመ፡ገብረ፡መኰንን።
16ወሰሚዖ፡ንጉሠ፡ሮም፡ተፈሥሐ፡ፈድፋደ፡ወመርሐቶ፡ይእቲ፡ወለት፡ለንጉሥ፡ምስለ፡ሠራዊቱ፡ኤጲስቆጶሳት፡ወካህናት፡ምስሌሁ፡ወአብጽሐቶሙ፡ኀበ፡ውእቱ፡መካን፡ወከረዩ፡ወረከብዎ፡ለዕፀ፡መስቀል፡ክቡር፡ወአዕረግዎ፡እምዐዘቅት፡ወሰገዱ፡ሎቱ፡ወጠብለሎ፡ንጉሥ፡ለዕፀ፡መስቀል፡በአልባሰ፡መንግሥቱ፡እንዘ፡ይትፌሣሕ፡ፈድፋደ።
17ወኮነ፡አስተርእዮቱ፡ወተረክቦቱ፡ዳግማየ፡አመ፡፲ሩ፡ለመጋቢት፡ወእምዝ፡ነሥኦ፡ንጉሥ፡ለዕፀ፡መስቀል፡ምስሌሁ፡ኀበ፡ሀገረ፡ቍስጥንጥንያ። በረከተ፡መስቀሉ፡የሀሉ፡ምስሌነ፡ለዓለመ፡ዓለም፡ኣሜን።
ሰላም፡እብል፡ዕፀ፡ኢድንኖ፡ልምሉመ፤እንተ፡ተሠቅየ፡ወረወየ፡እምገቦ፡መለኮት፡ደመ፤በዛቲ፡ዕለት፡እንበለ፡ይዕዱ፡ጌሠመ፤መስቀል፡ተረክበ፡እምዘተኀብአ፡ወገብረ፡መድምመ፤በኢየሩሳሌም፡ቅድመ፡ወበፋርስ፡ዳግመ።

ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።