23 de Hamle
አመ፡፳ወ፫፡ለሐምሌ፩)፡በስመ፡አብ፡ወወልድ፡ወመንፈስ፡ቅዱስ፡፩ዱ፡አምላክ። አመ፡፳ወ፫፡ለሐምሌ፡በዛቲ፡ዕለት፡ኮነት፡ሰማዕተ፡ቅድስት፡መሪና።
፪)፡ለዛቲ፡ቅድስት፡ስመ፡አቡሃ፡ዳኬዎስ፡ሊቀ፡ገነውተ፡አማልክት፡ውእቱ፡ዘሀገረ፡አንጾኪያ፡ወአሜሃ፡ነግሠ፡ዳኬዎስ፡ወሶበ፡ኮና፡፭ቱ፡ዓመት፡ለቅድስት፡መሪና፡ሞተት፡እማ፡ወወሀባ፡አቡሃ፡ለሐፃኒት፡ዘትነብር፡አፍአ፡ሀገር፡ወይእቲ፡ክርስቲያናዊት፡ወመሀረታ፡ሃይማኖተ፡እግዚእነ፡ኢየሱስ፡ክርስቶስ፡በኅቡእ።
፫)፡ወሶበ፡በጽሐት፡መጠነ፡፲ወ፭፡ዓመት፡ሞተ፡አቡሃ፡ወአሐተ፡ዕለተ፡ሰምዓታ፡እንዘ፡ትትናገር፡ሐፃኒታ፡ፃማ፡ገድሎሙ፡ለሰማ፡ዕታት፡ወሶቤሃ፡ቦአ፡ውስተ፡ልባ፡ፍቅረ፡ክርስቶስ። ወሖረት፡እንዘ፡ተኀሥሥ፡ከዊነ፡ስምዕ፡ወበጽሐት፡ውስተ፡አሐቲ፡ሀገረ፡መኰንን፡ዓላዊ።
፬)፡ወሶበ፡ርእያ፡መኰንን፡አዘዘ፡ያምጽእዋ፡ኀቤሁ፡ወይቤላ፡እምአይቴ፡አንቲ፡ወመኑ፡ስምኪ፧ ወትቤሎ፡አነ፡እምሰብአ፡ኢየሱስ፡ክርስቶስ፡ሎቱ፡ስብሐት፡ወስምየ፡መሪና፡ወርእዮ፡መኰንን፡ሥና፡ወላህያ፡ስእነ፡ተዓግሦ፡ወኄጣ፡በኵሉ፡ነገር፡ከመ፡ኦሆ፡ትበሎ፡ወይእቲ፡ረገመቶ፡ወፀረፈት፡ላዕለ፡አማልክት፡ወአዘዘ፡ከመ፡ይቅሥፍዋ፡በበትረ፡ሐፂን፡ወይምትሩ፡መለያልይሃ፡ወይስትሩ፡ሥጋሃ፡እስከ፡ይውኅዝ፡ደማ፡ከመ፡ማይ። ወካዕበ፡አዘዘ፡ከመ፡ይስትሩ፡አባላቲሃ፡በመስትረ፡ሐፂን፡ወጸለየት፡ኀበ፡እግዚአብሔር፡ወመጽአ፡ቅዱስ፡ሚካኤል፡ወፈወሳ።
፭)፡ወካዕበ፡አዘዘ፡ያብእዋ፡ውስተ፡ቤተ፡ሞቅሕ፡ዘምሉእ፡ጽልመተ፡ወእንዘ፡ትጼሊ፡ቅድስት፡መሪና፡መጽአ፡ኀቤሃ፡ቅዱስ፡ሚካኤል፡ሊቀ፡መላእክት፡ወአብርሀ፡በቤተ፡ሞቅሕ፡ወአዕረጋ፡ውስተ፡ሰማይ፡ወአርአያ፡ማኅደረ፡ቅዱሳን፡ሰማዕት፡ወጻድቃን፡ወሜጣ፡ውስተ፡መካና።
፮)፡ወበሣኒታ፡አዘዘ፡መኰንን፡ይስትሩ፡ሥጋሃ፡በመስትረ፡ሐፂን፡ወይጥብሑ፡ገበዋ፡ቲሃ፡በመጣብሕ፡ወይደይዋ፡ውስተ፡ቤተ፡ሞቅሕ፡ወመጺኦ፡ቅዱስ፡ሚካኤል፡ፈወሳ።
፯)፡ወእምዝ፡ካዕበ፡እንዘ፡ትጼሊ፡ቀዊማ፡መጽአ፡ኀቤሃ፡እማዕዘንተ፡ቤተ፡ሞቅሕ፡ዓቢይ፡ተመን፡ወሶበ፡ርእየቶ፡ደንገፀት፡ጥቀ፡ወርዕደት፡ኵለንታሃ፡ወስእነት፡ነቢበ፡ወቀርበ፡ኀቤሃ፡ወውኅጣ፡እንዘ፡ስፉሕ፡እደዊሃ፡በአም፡ሳለ፡መስቀል፡ወውእተ፡ጊዜ፡ተሠጥቀ፡ከርሡ፡ወወፅአት፡እምኔሁ፡ዘእንበለ፡ሙስና፡ወአእኰ፡ተቶ፡ለእግዚእነ።
፰)፡ወሶበ፡ተመይጠት፡አንፃረ፡ቤተ፡ሞቅሕ፡ርእየቶ፡ለሰይጣን፡ነቢሮ፡በአምሳለ፡ብእሲ፡ጸሊም፡ወጽቡጣት፡እደዊሁ፡ዲበ፡ብረኪሁ፡ወዓቲባ፡ገጻ፡በትእምርተ፡መስቀል፡አኀዘቶ፡በሥዕርተ፡ርእሱ፡ወዘበጠቶ፡በበትረ፡መቅሠፍት።
፱)፡ወአሜሃ፡ተከሥተ፡ላቲ፡ዕፀ፡መስ፡ቀሉ፡ለክርስቶስ፡ሎቱ፡ስብሐት። ወዲቤሁ፡ትነብር፡ርግብ፡ፀዓዳ፡ወነበበታ፡እንዘ፡ትብል። ተፈሥሒ፡ኦ፡መሪና፡ቅድስት፡እስመ፡ትትዓሠዪ፡ዓረቦነ፡ጸጋ፡መንፈስ፡ቅዱስ። ወበሳኒታ፡አዘዘ፡መኰንን፡ያዕርቅዋ፡ልብሳ፡ወይስቅልዋ፡ቍልቍሊተ፡ወያውዕይዋ፡በእሳት፡ወይደይዋ፡ውስተ፡ጽሕርት፡ዘምሉእ፡ማየ፡ፍሉሐ።
፲)፡ወእምዝኒ፡ድኅነት። ወእንዘ፡ትጼሊ፡ቀዊማ፡ናሁ፡ወረደ፡ውእቱ፡ርግብ፡እምሰማይ፡ዘውስተ፡አፉሁ፡አክሊል፡ፈቲሖ፡ማእሰሪሃ፡ወአጥመቃ፡ሠለስተ፡ጊዜ፡በስመ፡አብ፡ወወልድ፡ወመንፈስ፡ቅዱስ፡፩ዱ፡አምላክ። ወወፅአት፡እማይ፡እንዘ፡ትሴብሖ፡ለእግዚአብሔር።
፲፩)፡ወሶበ፡ርእየ፡መኰንን፡ከመ፡ሐይወት፡አዘዘ፡ይምትሩ፡ርእሳ፡በሰይፍ፡ወበጺሓ፡ውስተ፡መካነ፡ስምዕ፡ጸለየት፡ኀበ፡እግዚእነ፡ከመ፡ይትወከፍ፡ነፍሳ፡በሰላም። ወመጽአ፡ሶቤሃ፡እግዚእነ፡ኀቤሃ፡ወወሃባ፡ኪዳነ፡ለዘይ፡ጼውዕ፡ስማ፡ወይገብር፡ተዝካራ፡ወለዘይጽ፡ሕፍ፡ገድላ፡ወለዘይሰምዖ፡ከመ፡ይሠሪ፡ሎቱ፡ኃጢአቶ፡ወይጼግዎ፡ላቲ፡ኪያሁ። ወእምዝ፡መተሩ፡ርእሳ፡በሰይፍ፡ወአስተርአዩ፡እምኔሃ፡ተአምራት፡ብዙኃት፡ዕውራን፡ርእዩ። ወሐንካሳን፡ሖሩ፡ርቱዓ። ወጽሙማን፡ሰምዑ። ወበሃማን፡ነበቡ። ወብዙኀን፡አምኑ፡በክርስቶስ፡እለ፡አልቦሙ፡ኍልቍ። በረከታ፡ይኩን፡ምስሌነ፡ለዓለመ፡ዓለም፡አሜን።
፲፪)፡ወበዛቲ፡ዕለት፡ኣዕረፈ፡ቅዱስ፡ለንጊኖስ፡በከዊነ፡ስምዕ፡ወውእቱ፡እምሀገረ፡ቀጰዶቅያ፡ወዮናኒ፡ውእቱ። ወሶበ፡ነግሠ፡ጢባርዮስ፡ቄሣር፡ወሤሞ፡ለጲላጦስ፡ላዕለ፡ምድረ፡ይሁዳ፡ወተውህበ፡ዝንቱ፡ለንጊኖስ፡ምስለ፡ሐራ፡ለጲላጦስ።
፲፫)፡ወሶበ፡ፈቀደ፡እግዚእነ፡ከመ፡ይኩን፡መድኃኒተ፡በሥምረቱ፡ወሶበ፡በጽሐ፡ጊዜ፡ሕማሙ፡ወአብሖሙ። ለአይሁድ፡ይግበሩ፡ዘንተ፡ወኮነ፡ዝንቱ፡ለንጊኖስ፡፩ደ፡እምነ፡ሐራ፡እለ፡አዘዞሙ፡ጲላጦስ፡ከመ፡ይስቅልዎ፡ለእግዚእነ፡አሜሃ፡ረዝዞ፡ገቦሁ፡ድኅረ፡መጠወ፡ነፍሶ፡ሶቤሃ፡ውኅዘ፡ደም፡ወማይ፡ወርእዮ፡ዘንተ፡መንክረ፡አንከረ፡ፈድፋደ፡ወእምቅድመ፡ዝኒ፡ርእየ፡ጊዜ፡ስቅለቱ፡ከመ፡ፀሐይ፡ጸልመ፡ወወርኅኒ፡ተመሰለ፡ደመ፡ወተሠጠ፡መንጦላዕተ፡ምኵራብ፡ወተሠጥቀ፡ኰኵሕ፡ወተንሥኡ፡ምዉታን።
፲፬)፡ወሶበ፡ነሥአ፡ሥጋሁ፡ለእግዚእነ፡ዮሴፍ፡ጻድቅ፡ወገነዞ፡ወአንበሮ፡ውስተ፡መቃብር፡ወኀተምዎ፡ህየ፡ነበረ፡ምስለ፡ሠገራት። ወሶበ፡ተንሥአሂ፡እግዚእነ፡እንዘ፡ኀቱም፡ውእቱ፡መቃብሩ፡ርእዮ፡ደንገፀ። ወሰአሎ፡ለእግዚአብሔር፡ከመ፡ይክሥት፡ሎቱ፡ምሥጢሮ፡ወፈነወ፡ሎቱ፡ጴጥሮስሃ፡ሐዋርያሁ፡ወረከቦ፡በሰሙነ፡ትንሣኤሁ፡ለመድኃኒነ፡ወአምሐሎ፡ከመ፡ይንግሮ፡ኵሎ፡ዜናሁ፡ለመድኃኒነ፡ወነገሮ፡ኵሎ፡ዘተነበዩ፡ነቢያት፡በእንቲአሁ፡ከመ፡ይትቀተል፡ወከመ፡ውእቱ፡ወልደ፡እግዚአብሔር፡ሕያው፡ወአምነ፡ዝንቱ፡ቅዱስ፡ለንጊኖስ፡በእደዊሁ፡ለቅዱስ፡ጴጥሮስ።
፲፭)፡ወኀደገ፡መልእክተ፡ንጉሥ፡ምድራዊ፡ወሖረ፡ኀበ፡ሀገረ፡ቀጰዶቅያ፡ወሰበከ፡ውስቴታ፡በስሙ፡ለእግዚእነ፡ኢየሱስ፡ክርስቶስ፡ሎቱ፡ስብሐት፡በከመ፡ሐዋርያት።
፲፮)፡ወሶበ፡ሰምዐ፡ንጉሥ፡ከመ፡ኀደገ፡መልእክቶ፡ተምዐ፡ላዕሌሁ፡ወአብጽሖ፡ኀቤሁ፡ወኰነኖ፡ኵነኔ፡ዓቢየ። ወእምዝ፡አምተሮ፡ርእሶ፡በሰይፍ፡ወነሥአ፡አክሊለ፡ስምዕ። በረ፡ከቱ፡ትኩን፡ምስሌነ፡ለዓለመ፡ዓለም፡አሜን።
ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።