Sinaxario · Hamle
22 de Hamle
አመ፡፳ወ፪፡ለሐምሌ1በስመ፡አብ፡ወወልድ፡ወመንፈስ፡ቅዱስ፡፩ዱ፡አምላክ፡አመ፡፳ወ፪፡ለሐምሌ፡በዛቲ፡ዕለት፡ኮነ፡ሰማዕተ፡ቅዱስ፡መቃርስ፡ወልደ፡ፋሲለደስ፡ርእሰ፡ሐራ።
2ወለዝንቱ፡ቅዱስ፡ሶበ፡አስተዋደ፡ይዎ፡ኀበ፡ንጉሥ፡ዲዮቅልጥያኖስ፡ከመ፡ውእቱ፡መቃርስ፡ኢያመልክ፡ጣዖታተ፡ወጸሐፈ፡ከመ፡ይሰድዎ፡ኀበ፡ሀገረ፡እስክንድርያ፡ወበህየ፡ይኰንንዎ፡ወተአምኆሙ፡ለአዝማዲሁ፡ወአዘዞሙ፡ከመ፡ይለብዉ፡ላዕለ፡ነዳያን፡ወምስኪናን፡ወወፅአ፡ምስለ፡መልእክቱ፡ለንጉሥ።
3ወአስተርአዮ፡እግዚእነ፡በራእይ፡ወአፅንዖ፡ወአስተዓገሦ፡ወኣይድዖ፡ዘይበጽሖ፡ወሶበ፡በጽሐ፡ሀገረ፡እስክንድርያ፡ቆመ፡ቅድመ፡መኰንን፡ኅርማኖስ፡ወአእመሮ፡መኰንን፡ከመ፡ውእቱ፡ወልደ፡ፋሲለደስ፡ሊቀ፡ሐራ፡ወኄጦ፡ብዙኀ፡ወሰአሎ፡ከመ፡ይትመየጥ፡እምክሩ፡ሠናይ፡ወኢሰምዖ፡ወኢተአዘዘ፡ሎቱ፡ወእምዝ፡ኰነኖ፡ኵነኔ፡ዓቢየ፡በዘዘዚአሁ፡ኵነኔ።
4ወተመሥጠት፡ነፍሱ፡እንዘ፡ሀሎ፡ውስተ፡ኵነኔ፡ወአርአዮ፡እግዚእነ፡ማኅደሮሙ፡ለቅዱሳን፡ሰማዕት፡ወማኅደረ፡አቡሁ፡ወእ፡ኍሁ።
5ወእምድኅረዝ፡ፈነዎ፡መኰንን፡ኀበ፡ሀገረ፡ነቂዮስ፡ወበህየ፡ኰነንዎ፡ኵነኔ፡ዓቢየ፡ወመተሩ፡ልሳኖ፡ወመዝራዕቶ፡ወወደዩ፡ውስተ፡ገበዋቲሁ፡ቅንዋተ፡ሐፂን፡ዘአርሰንዎ፡በእሳት፡ወእግዚእነሂ፡ያፀንዖ፡ወያስተዔግሦ፡ወያነሥኦ፡ጥዑየ፡ዘእንበለ፡ሙስና።
6ወገብረ፡ዲበ፡እደዊሁ፡እግዚእነ፡ተአምራተ፡ወመንክራተ፡ብዙኀተ፡ወአሐቲ፡እምኔሆሙ፡ሶበ፡ኀለፉ፡ሰብእ፡በቅድሜሁ፡እንዘ፡ይፀውሩ፡፩፡ምውተ፡ከመ፡ይቅብርዎ፡ወኵሎሙ፡ሕዝብ፡ይኔፅርዎ፡ወአስተብቍዐ፡ቅዱስ፡መቃርስ፡ኀበ፡እግዚእነ፡በእንተ፡ውእቱ፡ምውት፡ወሰአሎ፡ከመ፡ይክሥት፡ስብሐቲሁ፡ላዕሌሁ። ወእምዝ፡ተንሥአ፡ውእቱ፡ምውት፡ወተናገሮሙ፡ዘከመ፡ርእየ፡ወይቤሎሙ፡እስመ፡ኢየሱስ፡ክርስቶስ፡ዘተሰቅለ፡ለመድኃኒተ፡ውሉደ፡ሰብእ፡እግዚአ፡ሰማይ፡ወምድር፡ወአምላከ፡ኵሉ፡ዓለም፡ውእቱ። ወበዝንቱ፡አምኑ፡ብዙኀን፡ሕዝብ፡በእግዚእነ፡ዘሎቱ፡ስብሐት።
7ወሰሚዖ፡መኰንን፡አዘዘ፡ይምትሩ፡አርእስቲሆሙ፡በሰይፍ፡ወከመዝ፡ፈጸሙ፡ስምዖሙ፡ወነሥኡ፡አክሊለ፡ስምዕ፡በመንግሥተ፡ሰማያት።
8ወበህየ፡ነበረ፡አርያኖስ፡መኰንነ፡እንዴናው፡ወሶበ፡ተመይጠ፡ብሔሮ፡ነሥኦ፡ለቅዱስ፡መቃርስ፡ምስሌሁ፡ወሶበ፡በጽሑ፡ኀበ፡ሀገረ፡ሰጥኑፍ፡ቆመት፡ሐመር፡ወኢክህለት፡ተሐውሶ። ወአስተርአዮ፡እግዚእነ፡በራእይ፡ለቅዱስ፡ወይቤሎ፡እስመ፡በዝንቱ፡መካን፡ትፌጽም፡ገድለከ፡ወበህየ፡ይነብር፡ሥጋከ።
9ወበጺሖ፡ሀገረ፡እንዴናው፡አዘዘ፡መኰንን፡ከመ፡ያዕርግዎ፡መልዕልተ፡ወግር፡ወይምትሩ፡ርእሶ፡በሰይፍ፡ወገብሩ፡ቦቱ፡ወፈጸመ፡ገድሎ፡ወነሥአ፡አክሊለ፡ስምዕ።
10ወሶበ፡ነግሠ፡ቈስጠንጢኖስ፡ጻድቅ፡ወፅአ፡እምኀቤሁ፡መኰንን፡ዘስሙ፡አውሎጊዮስ፡መሃይምን፡ወአዘዘ፡ከመ፡ያርኁ፡አናቅጸ፡ቤተ፡ክርስቲያን፡ወይሕንፆን፡ለእለ፡ተንህላ፡አብያተ፡ክርስቲያናት፡ወያንህል፡አብያተ፡ጣዖታት፡አሜሃ፡አስተርአዮ፡ቅዱስ፡መቃርስ፡ወአይድዖ፡ኀበ፡ሀሎ፡ሥጋሁ፡ወተንሥአ፡አውሎጊዮስ፡ወበጽሐ፡ኀበ፡ውእቱ፡መካን፡ወረከበ፡ሥጋሁ፡ውስቴቱ፡ወነሥኦ፡እምህየ፡ወሐነፀ፡ሎቱ፡ቤተ፡ክርስቲያን፡ሠናይተ፡ወአንበሩ፡ሥጋሁ፡ውስቴታ፡ወአስተርአዩ፡እምኔሁ፡ተአምራት፡ወመንክራት፡ዓበይት። ወእግዚአብሔር፡ይምሐረነ፡በጸሎቱ፡ለዓለመ፡ዓለም፡አሜን።
ሰላም፡ለመቃርስ፡ዕንቈ፡ፋሲለደስ፡ሰርዲኖ፤ዛኀለ፡ኃጢአት፡ዘኢያደመኖ፤ሐራዊ፡ተባዕ፡በውስተ፡ስምዕ፡ከዊኖ፤እንዘ፡ይመትሩ፡መዝራዕቶ፡ወያወቅዩ፡ልሳኖ፤እምፍቅረ፡ክርስቶስ፡መኑሂ፡ኢክህለ፡ያጽንኖ።
11ወበዛቲ፡ዕለት፡ኮነ፡ሰማዕተ፡ቅዱስ፡ለውንትዮስ፡ወዝንቱ፡ቅዱስ፡ክርስቲያን፡እም፡አቡሁ፡ወውእቱ፡እምሀገረ፡ጠራብሎስ፡እም፡ሠራዊቱ፡ለንጉሥ፡ከሐዲ፡ወሠናይ፡ፈድፋደ፡አርአያሁ፡ወፍጹም፡በገድሉ፡ወያነብብ፡መጻሕፍተ፡ዘመለኮት፡ወአፅንፆሙ፡ወእምኔሆሙ፡መዝሙረ፡ዳዊት፡እስመ፡ውእቱ፡ኮነ፡ያነብቦሙ፡ወትረ፡በእንተዝ፡አፅንዖሙ።
12ወኮነ፡ወትረ፡ይጌሥዖሙ፡ለአብያጺሁ፡ሐራ፡ወይሜህሮሙ፡ፈሪሃ፡እግዚአብሔር፡ወይብሎሙ፡ኢታኅጕሉ፡መዋዕሊክሙ፡ውስተ፡አምልኮ፡ጣዖት፡ከንቱ፡ወቦ፡እምኔሆሙ፡እለ፡ሰምዕዎ፡ወተመይጡ፡እምአምልኮ፡ጣዖት፡ወእምዕልወቶሙ፡ርኵስተ፡ዘነበሩ፡ባቲ።
13ወቦ፡እምኔሆሙ፡ዘቦአ፡ውስቴቶሙ፡ሰይጣን፡ወሖሩ፡ኀበ፡ሊቆሙ፡ወይቤልዎ፡እስመ፡ለውንትዮስ፡አስተሐቀሮሙ፡ለአማልክት፡ወይሜህር፡ከመ፡ክርስቶስ፡ውእቱ፡አምላከ፡ሰማይ፡ወምድር፡ወኵሉ፡ዘውስቴቶሙ፡ወአብጽሖ፡መኰንን፡ኀቤሁ፡ወተሰአሎ፡በእንተዝ፡ወተአመነ፡በእግዚእነ፡ኢየሱስ፡ክርስቶስ፡ሎቱ፡ስብሐት። ወይቤሎ፡በከመ፡ይቤ፡ጳውሎስ፡መኑ፡ይፈልጠኒ፡እምነ፡ፍቅሩ፡ለክር፡ስቶስ፡አምላኪየ፡ዘኪያሁ፡አመልክ፡እምን፡እስየ፡ወእሰግድ፡ሎቱ።
14ወተምዐ፡ውእቱ፡መኰንን፡ወአዘዘ፡ከመ፡ይእስርዎ፡እደዊሁ፡ወእገሪሁ፡ወይደ፡ይዎ፡ውስተ፡ቤተ፡ሞቅሕ፡ወገብሩ፡ቦቱ፡ወካዕበ፡ይቤሎ፡መኰንን፡በአይ፡ኃይል፡ትደፍር፡ወትትዓደው፡ትእዛዘ፡ንጉሥ፧ ወትመይጦሙ፡ለሰብእ፡እምአምልኮ፡አማልክት። ወአውሥኦ፡ቅዱስ፡ወይቤሎ፡በአማን፡አነ፡እፈቅድ፡ከመ፡ይባኡ፡ኵሎሙ፡ሰብእ፡ውስተ፡ሃይማኖተ፡እግዚእነ፡ኢየሱስ፡ክርስቶስ፡ሎቱ፡ስብሐት። ወይረሱ፡መንግሥተ፡ዘለዓለም። ወእምዝ፡ረገሞሙ፡ለአማልክቲሁ፡ርኩሳን፡ወአዘዘ፡መኰንን፡ይቅሥፍዎ፡መቅሠፍተ፡ዓቢየ፡እስከ፡ይውኅዝ፡ደሙ፡ከመ፡ማይ፡ወውእቱሰ፡ይሴብሖ፡ወይቄድሶ፡ለእግዚአብሔር።
15ወአሐዱ፡ሐራ፡ኀዘነ፡ሎቱ፡ወአልኆሠሠ፡ውስተ፡ዕዝኑ፡ወይቤሎ፡አንሰ፡አኀዝን፡ለከ፡ወእምህክ፡ውርዙተከ፡ተናገር፡አሐተ፡ቃለ፡ባሕቲታ፡ወበሎ፡ለመኰንን፡ከመ፡አንተ፡ትሠውዕ፡ለአማልክት፡ወአነ፡እትሀበየከ፡ወአድኅነከ፡ወረገሞ፡ቅዱስ፡እንዘ፡ይብል፡ሑር፡እምኔየ፡ሰይጣን።
16ወሶበ፡ርእየ፡መኰንን፡ትዕግሥቶ፡ወፅንፆ፡አመክዓበ፡ላዕሌሁ፡ኵነኔ፡እስከ፡ተበትከ፡ሥጋሁ፡ወተክዕወ፡ደሙ፡ዲበ፡ምድር፡ወእምዝ፡አዘዘ፡ከመ፡ያሥጥምዎ፡ውስተ፡ባሕር፡ወይስሐብዎ፡በእገሪሁ፡ወይግድፍዎ፡ውስተ፡ቤተ፡ሞቅሕ፡እስከ፡ካዕበ፡ይሔሊ፡ዘይገብር፡ላዕሌሁ፡ወሶበ፡ገብሩ፡ቦቱ፡ዘንተ፡ኣዕረፈ፡ውስተ፡ቤተ፡ሞቅሕ።
17ወመጽአት፡አሐቲ፡ብእሲት፡መሃይምንት፡ወወሀበቶሙ፡ንዋየ፡ብዙኀ፡ለዓቃብያነ፡ቤተ፡ሞቅሕ፡ወለሐራ፡ወነሥአት፡ሥጋሁ፡ለቅዱስ፡ለውንትዮስ፡ወገነዘቶ፡በአልባስ፡ሠናያት፡ወረሰየት፡መልዕልተ፡መግነዙ፡ልብሰ፡ወርቅ፡ወአንበረቶ፡ለሣፁን፡በውስተ፡ቤት፡ወአሥዓለት፡ሥዕሎ፡ወሰቀለት፡ቅድሜሁ፡ወሤመት፡ማኅቶተ፡ዘያበርህ፡ወትረ። እግዚአብሔር፡ይምሐረነ፡በጸሎቱ፡ወበእንተ፡ገድሉ፡ለኵልነ፡ሕዝበ፡ክርስቲያን፡ለዓለመ፡ዓለም፡አሜን።
ሰላም፡ለከ፡ለጠራብሎስ፡ማኅቶታ፤ለውንትዮስ፡ፈጻሚ፡ሥቃያተ፡ስምዕ፡ዘበበፆታ፤ዕሤተ፡ብእሲት፡ትፍዲ፡ዘኀብአተከ፡በቤታ፤እንዘ፡ትገብር፡ለበድንከ፡ዓራዘ፡ወርቅ፡ትርሢታ፤ውስተ፡ዓውደ፡ንጉሥ፡ሮፅከ፡ታድኅኖ፡ለምታ።ሰላም፡ሰላም፡እንበለ፡ይብጻሕ፡ጊዜሁ፤ለበድነ፡ሥጋከ፡ግዱፍ፡በማእከለ፡ፍኖት፡ዘጼሑ፤በዕለተ፡አንሥኦ፡ክርስቶስ፡ለተክለ፡ሃይማኖት፡በእዴሁ፤ናሁ፡ናሁ፡በከመ፡ስምከ፡ናሁ፤እግዚአብሔር፡ላዕሌከ፡አርአየ፡ጸጋሁ።
18ወበዛቲ፡ዕለት፡ተዝካሩ፡ለመርኮሮስ። በረከቱ፡ትኩን፡ምስሌነ፡ለዓለመ፡ዓለም፡አሜን።
ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።