ግዕዝ
Home Formaciones Libros Biblioteca Ge'ez Contacto
Sinaxario · Ginbot

29 de Ginbot

አመ፡፳ወ፱፡ለግንቦት
1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፳ወ፱፡ለግንቦት፡በዛቲ፡ዕለት፡ኮነ፡ተዝካረ፡ልደቱ፡ለእግዚእነ፡ኢየሱስ፡ክርስቶስ፡ሎቱ፡ስብሐት። ወያብዕሉ፡ኵሎሙ፡ደቂቀ፡ቤተ፡ክርስቲያን፡ለለወርኁ፡ወይስእሉ፡ሥርየተ፡ኃጢአቶሙ። ሣህሉ፡ወምሕረቱ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለልደትከ፡እግዚኦ፡እግዚእነ፤ድንጋሌ፡ማርያም፡እምከ፡እንበለ፡ታርኁ፡ክዱነ፤ዝንቱ፡መንከር፡ዘበኀቤከ፡ዘኮነ፤እስመ፡ፈጠርከ፡ቀዳሚ፡እንዘ፡ታርኢ፡ሥልጣነ፤ዘበአርምሞ፡ጽልመተ፡ወበቃል፡ብርሃነ።
2ወበዛቲ፡ዕለት፡አዕረፈ፡አባ፡ስምዖን፡ዘደብረ፡አንጾኪያ።
3ለዝንቱ፡ቅዱስ፡ኮነ፡ስመ፡አቡሁ፡ዮሐንስ፡ወስመ፡እሙ፡ማርታ፡ወኮኑ፡በእንቲአሁ፡ተአምራት፡ወመንክራት።
4ውእቱኬ፡እምቅድመ፡ትጽንሶ፡መጽአ፡ኀቤሃ፡ቅዱስ፡ዮሐንስ፡መጥምቅ፡በንዋማ፡ወዜነዋ፡በእንተ፡ልደቱ፡ለዝንቱ፡ቅዱስ፡ስምዖን፡ዘዓምድ፡ወከሠተ፡ላቲ፡ዘይከውን፡እምኔሁ።
5ወሶበ፡ተወልደ፡ወኮነ፡መዋዕሊሁ፡፯ተ፡ዓመተ፡ወሖረ፡ኀበ፡ደብረ፡አንጾኪያ፡ወአብአ፡ርእሶ፡ታሕተ፡ኣርዑተ፡ምንኵስና፡ተፀምደ፡ወተጋደለ፡ተጋድሎ፡ዐቢየ።
6ወአስተርአዩ፡ሎቱ፡መላእክት፡ብዙኀ፡ጊዜያተ፡በለያልይ፡ወመሀርዎ፡ገድለ፡ምንኵስና፡ከመ፡አስተርአይዎ፡ወመሀርዎ፡ለአባ፡ጳኵሚስ፡ወከሠተ፡ሎቱ፡ግብረ፡ዘኢይማስን።
7አጽንዐ፡ወተጋደለ፡ዘይትሌዓል፡ወዘይፈደፍድ፡እምእለ፡ለብሱ፡ሥጋ፡እስመ፡መላእክት፡ያመጽኡ፡ሎቱ፡ሲሳየ፡መንፈሳዌ፡ኵሎ፡ጊዜ።
8ወእምብዝኃ፡ተጋድሎቱ፡ዐርገ፡መልዕልተ፡ዓምድ፡ወቆመ፡ዲቤሃ፡፯፡ዓመተ፡ወእምድኅረዝ፡ፈለሰ፡ኀበ፡ደብር፡ወነበረ፡ውስቴታ፡፳፡ዓመተ፡ውስተ፡አእባን፡ዘገብረ፡ሎቱ፡ወኢወፅአ፡እምኔሁ፡እስከ፡ተፍጻሜተ፡፳፡ዓመት።
9ወእምዝ፡ዐርገ፡መልዕልተ፡ርእሰ፡ደብር፡ዘየዓቢ፡ወቆመ፡ዲቤሁ፡፵ወ፭ተ፡ዓመተ።
10ወኮነ፡ኵሉ፡መዋዕለ፡ሕይወቱ፡፹ወ፰፡ዓመት፡ውስተ፡ቤተ፡አቡሁ፡ሰብዓቱ፡ዓመት፡ወበገድለ፡ምንኵስና፡፹ወ፩።
11ወለተአምራቲሁሰ፡አልቦ፡ዘይኌልቆሙ፡እስመ፡በመጽሐፈ፡ገድሉ፡ሀሎ፡ጽሑፈ፡ወደረሰ፡ድርሳናተ፡ብዙኃተ፡ወተግሣፃተ፡ወቃላተ፡በቍዔት፡ለምንኵስና፡ወለመድኃኒተ፡ነፍስ፡ወተርጐመ፡ብዙኃተ፡እመጻሕፍተ፡ቤተ፡ክርስቲያን፡ወአዕረፈ፡በሰላም። በረከቱ፡ተሀሉ፡ምስሌነ፡ለዓለመ፡ዓለም፡አሜን።
ሰላም፡ለስምዖን፡ዘተበሥረ፡ጽንሱ፤በአፈ፡ዮሐንስ፡መጥምቅ፡እንተ፡ኢይሔሱ፤እንዘ፡ይትለአክዎ፡ዘልፈ፡መላእክት፡ለማኀሠሡ፤ፈጸመ፡ምግባረ፡እንተ፡ወጠነ፡እምንእሱ፤እምአመ፡ተወልደ፡በዓመት፡ስሱ።
12ወበዛቲ፡ዕለት፡ተዝካሮሙ፡ለአባ፡አፍፄ፡ወአባ፡ጉባ፡ዘእምተስዓቱ፡ቅዱሳን፡እንግልጋ፡ወይስሐቅ፡መነኮስ፡ወዕረፍተ፡እስክንድር፡ንጉሥ፡ወልደ፡ፊልጶስ። እግዚአብሔር፡ይምሐረነ፡በጸሎቶሙ፡ለዓለመ፡ዓለም፡አሜን።

ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።