ግዕዝ
Home Formaciones Libros Biblioteca Ge'ez Contacto
Sinaxario · Ginbot

28 de Ginbot

አመ፡፳ወ፰፡ለግንቦት
1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፳ወ፰፡ለግንቦት፡በዛቲ፡ዕለት፡ሰማዕተ፡ኮኑ፡አባ፡ጌርሎስ፡፵ወ፭፡ደቂቁ።
2ወዓዲ፡ተዝካሮሙ፡ለአበው፡ክቡራን፡አብርሃም፡ወይስሐቅ፡ወያዕቆብ። በረከቶሙ፡ቅድስት፡ተሀሉ፡ምስሌነ፡ለዓለመ፡ዓለም፡አሜን።
ሰላም፡እብል፡ጌርሎስሃ፡ልኂቀ፤ወዘዚአሁ፡ደቂቀ፤በኲናተ፡ብእሲ፡ዓላዊ፡እመዓርጊሁ፡ዘወድቀ፤ፈለሱ፡ቅዱሳን፡ብሔረ፡አጋቢስ፡ርኁቀ፤ኅብስተ፡ቍርባን፡ገቢሮሙ፡ስንቀ።ሰላም፡ለክሙ፡ለወልደ፡ማርያም፡አበዉ፤አብርሃም፡ይስሐቅ፡ወያዕቆብ፡ሠራዕያነ፡ሕግ፡በበመትልዉ፤እስመ፡ሐመምኩ፡ፈድፋደ፡ለዓለም፡በመናስዉ፤ውስተ፡ሕፅንክሙ፡እምእለ፡ቅዱሳን፡ሀለዉ፤ዘይፌውሰኒ፡፩ደ፡ፈንዉ።
3ወበዛቲ፡ዕለት፡አዕረፈ፡አባ፡መርቆሬዎስ፡ዘእምኔተ፡አባ፡ጳኵሚስ።
4ይቤ፡በእንቲአሁ፡አባ፡እንጦንዮስ፡ሊቀ፡ምኔት፡በውእቱ፡ደብር፡መጽኡ፡ኀቤየ፡አኀው፡መነኮሳት፡እንዘ፡ይብሉ፡ናሁ፡ቀርበ፡ፍልሰቱ፡ለእኁነ፡መርቆሬዎስ።
5ወሖርኩ፡ምስሌሆሙ፡ኀቤሁ፡ከመ፡እንሣእ፡በረከቶ፡ወረከብክዎ፡እንዘ፡ውእቱ፡ምሡጥ፡ወኢተፈልጠት፡ነፍሱ፡እምሥጋሁ፡ወነበርነ፡ኀቤሁ፡ሠለስተ፡ለያልየ፡እንዘ፡ኢንጥዕም፡እክለ።
6ወበሣልስት፡ዕለት፡ገብአት፡መንፈሱ፡ወከሢቶ፡አዕይንቲሁ፡ሶበ፡ርእየነ፡ይቤለነ፡ምንት፡ውእቱ፡ተጋብኦትክሙ፡ዝየ፡ወነገርኖ፡ኵሎ፡ግብሮ፡ወሰአልኖ፡ከመ፡ያጠይቀነ፡ዘር፡እየ።
7ወነገረነ፡ከመ፡መጽአ፡ኀቤሁ፡ብእሲ፡ግሩም፡ወነሥአ፡መንፈሶ፡ወአርአዮ፡ሥቃዮሙ፡ለኀጥአን፡ወዕሤቶሙ፡ለጻድቃን።
8ወእምዝ፡አስቆቀወ፡ላዕለ፡ነፍሱ፡ወወረወ፡ገጾ፡ዲበ፡ምድር፡ወይቤለነ፡ኦ፡አኀውየ፡ሑሩ፡ኀበ፡ማኅደሩ፡ለአባ፡ጊዮርጊስ፡ዘገዳመ፡ሐራፂት፡እስመ፡ሰማዕክዎ፡ለመልአክ፡ዘምስ፡ልየ፡እንዘ፡ይብል፡ሚጥዎ፡ለመርቆሬዎስ፡ወአምጽእዎ፡ለጊዮርጊስ፡ዘነበረ፡እንዘ፡ይትጋደል፡ውስተ፡በዓት፡ንስቲት፡እንተ፡ይእቲ፡ገዳመ፡ፄው፡እስከ፡ተቈጽረ፡ሥጋሁ።
9ወሶበ፡ሖሩ፡አኀው፡ረከብዎ፡ምውተ፡ወአምጽእዎ፡ኀበ፡ምኔት፡ወቀበርዎ፡ህየ።
10ወዝንቱሰ፡እኍ፡መርቆሬዎስ፡አፃመወ፡ሥጋሁ፡ጥቀ፡እስከ፡ኮነ፡ከመ፡ዕፅ፡ይቡስ።
11ወእምዝ፡ተሠነዓለኒ፡ከመ፡ይሑር፡ገዳመ፡ወይቤለኒ፡አመ፡፲ወ፬፡ለነሐሴ፡ነዐ፡ኀቤየ፡እስመ፡ትረክበኒ።
12ወበዕለተ፡ዓደመኒ፡ሖርኩ፡ኀቤሁ፡ወረከብክዎ፡ወይቤለኒ፡አነ፡አዐርፍ፡ወአሐውር፡ኀበ፡አበው፡ወይመጽኡ፡ኀቤከ፡ሠለስቱ፡ቶራት፡ወአፁር፡ሥጋየ፡ዲበ፡ዘባናቲሆሙ፡ወእሙንቱ፡ይመርሑከ፡ኀበ፡ምኔትየ፡በፈቃደ፡እግዚአብሔር፡ወድፍኑኒ፡ውስተ፡ማኅደርየ፡ወኮነ፡በከመ፡ቃሉ።
13ወተከሠቱ፡እመቃብሪሁ፡ተአምር፡ወመንክር፡ዘአልቦ፡ኍልቍ።
14በረከቱ፡ተሀሉ፡ምስሌነ፡ለዓለመ፡ዓለም፡አሜን። ወበዛቲ፡ዕለት፡አዕረፈት፡ቅድስት፡አመተ፡ክርስቶስ፡ተጋዳሊት፡መናኒተ፡ዓለም፡ወመዋዒተ፡ፍትወት፡በከመ፡ዜነወነ፡አባ፡ዳንኤል።
15ወይቤ፡እንዘ፡እነብር፡ገዳመ፡ከመ፡አዕርፍ፡አንሶሰውኩ፡ገዳመ፡ሌሊተ፡በብርሃነ፡ወርኅ፡ወርኢኩ፡ሰብአ፡እንዘ፡ይነብር፡ዲበ፡ደብር፡ወሥዕርቱ፡ይከድኖ፡ኵለንታሁ፡ወእቤ፡በልብየ፡እሑር፡ኀቤሁ፡ምንትኑዝ፡ወሖርኩ፡ኀቤሁ፡እርኣዮ።
16ወሶበ፡ርእዩኒ፡ቦአ፡ውስተ፡ንቅዓተ፡እብን፡ወሶቤሃ፡አእመርኩ፡ከመ፡ሰብእ፡ውእቱ፡ወእቤሎ፡አስተበቍዓከ፡ኦ፡ብእሴ፡እግዚአብሔር፡ከመ፡ትምጻእ፡ኀቤየ፡እንሣእ፡በረከተከ፡ውእቱሰ፡አርመመ።
17ወአፈድፈድኩ፡ስኢለ፡ወእምዝ፡ይቤለኒ፡ሥረይ፡ሊተ፡አባ፡እስመ፡ኢይወፅእ፡ወእቤሎ፡ለምንት፡ወይቤለኒ፡እስመ፡ብእሲት፡አነ፡ወዕራቅየ፡ሀሎኩ።
18ወዘንተ፡ሰሚዕየ፡ከላእኩ፡ክዳንየ፡እምላዕሌየ፡ወወገርኩ፡ላቲ፡ወለቢሳ፡ወፅአት፡ወጸለይነ፡ወእቤላ፡ንግርኒ፡ኦ፡እምየ፡በእንተ፡ፀአትኪ፡ዝየ፡ወእፎ፡ረከብኪ፡ዘንተ፡ንቅዓተ፡ወትቤለኒ፡ድንግል፡አነ፡ውስተ፡ቤተ፡አበው፡ወእነብር፡ኢየሩሳሌም።
19ወሀሎ፡መነኮስ፡ዘይሔውፀኒ፡ወይትናገር፡ምስሌየ፡ዘልፈ።
20ወእምድኅረ፡ኅዳጥ፡መዋዕል፡ሖርኩ፡ኀቤሁ፡ወረከብክዎ፡እንዘ፡ይበኪ፡ወይትአመን፡ኃጢአቶ፡ቅድመ፡እግዚአብሔር፡ወሶበ፡ጐድጐድኩ፡ኢያርኀወ፡ሊተ፡ወአንኀ፡ብካየ፡እንዘ፡ይኔስሕ።
21ወሶበ፡ርኢክዎ፡እቤ፡በልብየ፡በእፎ፡ኢይበኪ፡ወኢይኔስሕ፡በእንተ፡ኀፍረትየ፡ወኀሣርየ፡ወሖርኩ፡ፍጡነ፡ኀበ፡ማኅደርየ፡ወለበስኩ፡ሠቀ፡ወነሣእኩ፡ዓተረ፡በአስፈሬዳ፡ወማየ፡በጽዋዕ።
22ወጸለይኩ፡ኀበ፡መቃብሩ፡ለእግዚእነ፡ኢየሱስ፡ክርስቶስ፡እንዘ፡እብል፡ኦ፡እግዚኦ፡ጽኑዕ፡ወኃያል፡ወመንክር፡ዘለዓለም፡ዘታድኅኖሙ፡ለኅጉላን፡ወታነሥኦሙ፡ለውዱቃን፡ወትሰምዖሙ፡ለእለ፡ይጸርሑ፡ኀቤከ፡ፈኑ፡ሣህለከ፡ወጽድቀከ፡ከመ፡ታድኅና፡ለአመትከ፡እንተ፡ተወከለት፡ብከ፡ወሐውፀኒ፡ለአመትክ፡ነዳይ፡ወተወከፍ፡ንስሐየ።
23ወባርኮ፡ለዝንቱ፡ስንቅ፡ዓተር፡ወማይ፡ከመ፡ይኩነኒ፡ለኑኀ፡መዋዕል፡በእንተ፡ከርሥየ፡ኢያስትት፡ዘሐለይኩ፡በእንተ፡መድኀኒተ፡ነፍስየ፡ወዘንተ፡ብሂልየ፡ሖርኩ፡ጎልጎታ፡ወዘንተ፡ጸሎተ፡ጸለይኩ፡ወገደፍኩ፡ነፍስየ፡ላዕለ፡እግዚአብሔር፡ወወፃእኩ፡ገዳመ፡ወሖርኩ፡ወበጻሕኩ፡እስከ፡ባሕረ፡ኤርትራ፡ወእምህየ፡መጻእኩ፡ውስተ፡ዝንቱ፡ገዳም፡ወረከብኩ፡ዘንተ፡ንቅዓተ፡እብን፡ወእቤ፡ዝንቱ፡ማኅደርየ፡ዘአስተ፡ዳለወ፡ሊተ፡እግዚአብሔር።
24ወናሁ፡፴ወ፰፡ዓመትየ፡ውስተ፡ዝንቱ፡ገዳም፡ወኢርኢኩ፡ብእሴ፡ዘእንበሌከ።
25ወዝንቱ፡አስፈሬዳ፡ወጽዋዕ፡እንዘ፡እሴሰይ፡እምኔሆሙ፡ሠላሳ፡ወሰመንተ፡ዓመተ፡ኢኀልቁ፡ወኢነትጉ፡ወልብስየሰ፡በልየ፡ወዝንቱ፡መካን፡ኮነኒ፡ምሥዋረ፡ህየንተ፡ልብስ፡ወኢያፃመወኒ፡ዋዕየ፡ፀሐይ፡ዘሐጋይ፡ወኢቍረ፡ክረምት፡በኵሉ፡መዋዕልየ።
26ወእምዝ፡አስተብቍዓተኒ፡ከመ፡እብላዕ፡ወእስተይ፡እምውእቱ፡አስፈሬዳ፡በላዕኩ፡ወሰተይኩ፡እምጽዋዕ፡ወኢነትገ፡ወአእኰትክዎ፡ለእግዚአብሔር።
27ወፈቀድኩ፡እኅድግ፡ላቲ፡ክዳንየ፡አበየተኒ፡እንዘ፡ትብል፡አምጽእ፡ሊተ፡ዘይሤኒ።
28ወእምዝ፡ሖርኩ፡ኀበ፡ደብር፡ወነገርክዎ፡ለአበ፡ምኔት፡ወከልሐ፡እንዘ፡ይብል፡ዘቦ፡፪፡ክዳናት፡የሀብ፡አሐደ፡ለዘአልቦቱ፡ወአምጽኡ፡ዘቦሙ፡ወነሢእየ፡ሖርኩ፡ሶቤሃ፡ከመ፡አሀባ፡ወፃመውኩ፡ብዙኀ፡እንዘ፡አኀሥሥ፡ኪያሃ፡ወኢረከብክዋ።
29ወእምድኅረ፡ኅዳጥ፡መዋዕል፡መጽኡ፡አዕሩግ፡ወይቤሉኒ፡እንዘ፡ነሐውር፡ፍኖተ፡ባሕረ፡ኤርትራ፡በገዳመ፡ጣኔዎስ፡ርኢነ፡ብእሲተ፡እንዘ፡ትነብር፡ኀበ፡ዖላዕት፡ፍና፡ሠርክ፡ወሮፅነ፡ኀቤሃ፡ከመ፡ንትባረክ፡እምኔሃ፡ወጐየት፡ወቦአት፡ውስተ፡በዓት፡ወቀረብነ፡ኀበ፡አፈ፡በዓት፡ወኢርኢናሃ።
30ወረከብነ፡ዓተረ፡ውስተ፡አስፈሬዳ፡ወማየ፡በጽዋዕ፡በላዕነ፡ወሰተይነ፡ወኀልቀ፡ሶቤሃ፡ወቤትነ፡እስከ፡ጌሠም፡ውኀሠሥናሃ፡ለቅድስት፡ከመ፡ንትባረክ፡እምኔሃ፡ወረከብናሃ፡በዘአዕረፈት፡ወሥዕርታ፡ይከድን፡ሥጋሃ፡ወሰገድነ፡ወቀበርናሃ፡ውስተ፡በዓት፡ወአተውነ፡እንዘ፡ንባርኮ፡ለእግዚአብሔር፡እስመ፡ረሰየነ፡ድልዋነ፡ንንሣእ፡በረከታ፡ለቅድስት።
31ወሰሚዕየ፡ዘንተ፡አእመርኩ፡ከመ፡ይእቲ፡እንተ፡ረከብክዋ፡ቀዳሚ፡ወነገርክዎሙ፡ዘነገረተኒ፡ወሰብሕዎ፡ለእግዚአብሔር፡ዘይረድኦ፡ለነዳይ፡ድኩም፡ከመ፡ይማዖ፡ለጸላኢ፡ወለኵሎሙ፡አጋንንቲሁ። በረከታ፡ተሀሉ፡ምስሌነ፡ለዓለመ፡ዓለም፡አሜን።
ሰላም፡ለአመተ፡ክርስቶስ፡መንበርተ፡ዓለም፡መኒና፤እንተ፡ረሰየት፡ይእቲ፡ንቅዓተ፡ኰኵሕ፡መካና፤ሠላሳ፡ወስምነ፡ዓመታተ፡እስከ፡ኮና፤ይቤሉ፡ነጋድያን፡ሶበ፡ምውተ፡ረከብና፤ውሣጤ፡በዓት፡ኅቡረ፡ቀበርና።
32ወበዛቲ፡ዕለት፡በጽሐ፡ሥጋሁ፡ለቅዱስ፡ኤጲፋንዮስ፡ኀበ፡ሀገረ፡ቆጵሮስ። ውእቱኬ፡ቅዱስ፡ሶበ፡አዕረፈ፡አመ፡፲ወ፮፡ለግንቦት፡እንዘ፡ሀሎ፡ውስተ፡ሐመር፡እምቅድመ፡ይብጻሕ፡ሀገረ፡ቆጵሮስ፡በከመ፡ተነበየ፡ላዕሌሁ፡ቅዱስ፡ዮሐንስ፡አፈ፡ወርቅ፡ከመ፡ኢይበጽሕ፡ኀበ፡መንበረ፡ሢመቱ።
33ወሶበ፡አዕረፈ፡በፍኖት፡ፆርዎ፡በሐመር፡ወአብጽሕዎ፡ሀገረ፡ቆጵሮስ፡ወመጽኡ፡ካህናት፡ወኵሉ፡ሕዝብ፡ምስለ፡ወንጌላት፡ወመስቀላት፡ወመኀትዋት፡ወማዕጠንታት፡እንዘ፡ይዌድሱ፡ወይዜምሩ፡ፆሩ፡ሥጋሁ፡በማኅሌት፡እስከ፡ኣንበርዎ፡ውስተ፡ቤተ፡ክርስቲያን።
34ወፈቀዱ፡ካህናት፡ከመ፡ይክርዩ፡መቃብረ፡ውስተ፡ቤተ፡ክርስቲያን፡ወተቃረንዎሙ፡ክልኤቱ፡ዲያቆናት፡እኩያን፡ዘኮነ፡ቀዳሚ፡አውገዞሙ፡ቅዱስ፡በእንተ፡እከየ፡ምግባሮሙ፡ወአኅደግዎሙ፡ከርየ፡ወከመዝ፡ነበረ፡ውስተ፡ቤተ፡ክርስቲያን፡፵፡መዋዕለ፡ወኢተወለጠ፡ፄናሁ፡ከመ፡ምውታን፡አላ፡ኮነ፡ከመ፡ዘይነውም።
35ወተንሥአ፡አሐዱ፡ዲያቆን፡ቅዱስ፡ወይቤሎ፡ለሥጋ፡ቅዱስ፡ኤጲፋንዮስ፡አእምር፡ከመ፡ብከ፡ሞገስ፡በኀበ፡እግዚአብሔር፡ወአንተ፡ከሀሊ፡ወትመውዖሙ፡ለኵሎሙ፡መስተ፡ቃርናን፡እኩያን፡ወእምዝ፡አኀዘ፡እዴሁ፡ወዘበጠ፡ባቲ፡ምድረ።
36ወናሁ፡እሉ፡፪ቱ፡ዲያቆናት፡እኩያን፡ወድቁ፡በገጾሙ፡ወአልፀቁ፡ለመዊት፡ወፆርዎሙ፡ውስተ፡አብያቲሆሙ።
37ወለቅዱስሰ፡ገነዝዎ፡ካህናት፡በዕፍረታት፡ምዑዛት፡ወጠብለልዎ፡በአልባስ፡ክቡራት፡ወአንበርዎ፡ውስተ፡ሣፁን፡ዘእብን፡ክቡር፡ወቀበርዎ፡ውስተ፡ቤተ፡ክርስቲያን፡ወአስተርአዩ፡እምኔሁ፡ተአምራት፡ወመንክራት፡በከመ፡ኮነ፡ቀዳሚ፡ይገብር፡እምቅድመ፡ዕረፍቱ። በረከቱ፡ተሀሉ፡ምስሌነ፡ለዓለመ፡ዓለም፡ኣሜን።
ሰላም፡ለብጽሐተ፡ሥጋከ፡ኀበ፡ቆጵሮስ፡ሀገር፤ኤጲፋንዮስ፡ክቡር፤ ዲያቆናት፡፪ቱ፡እኩያነ፡ምግባር፤ኢይትሐነፅ፡ዘተቃረኑ፡ዘዓፅምከ፡ዝዏር፤በገጾሙ፡ወድቁ፡ወሞቱ፡በፃዕር።
38ወበዛቲ፡ዕለትተዝክሮሙ፡ለአባ፡ሰንጣ፡ወአጋቦስ፡ሰማዕት። በረከቶሙ፡ተሀሉ፡ምስሌነ፡ለዓለመ፡ዓለም፡አሜን።

ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።