Sinaxario · Ginbot
22 de Ginbot
አመ፡፳ወ፪፡ለግንቦት1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፳ወ፪፡ለግንቦት፡በዛቲ፡ዕለት፡አዕረፈ፡ሐዋርያ፡ቅዱስ፡እንድራኒቆስ።
2ለዝንቱ፡ቅዱስ፡ኀረዮ፡እግዚእነ፡ወመድኀኒነ፡ኢየሱስ፡ክርስቶስ፡ሎቱ፡ስብሐት። ወውእቱ፡እምኍልቆሙ፡ለ፸ወ፪፡አርድእት፡ወእሉ፡ዘፈነዎሙ፡ቅድመ፡ሕማማቲሁ፡ይስብኩ፡መንግሥተ፡እግዚአብሔር፡ወወረደ፡ላዕሌሁ፡ጸጋ፡መንፈስ፡ቅዱስ፡በጽርሐ፡ጽዮን፡ወሰበከ፡ምስለ፡ሐዋርያት፡ውስተ፡ኵሉ፡አህጉር፡ብዙኃት።
3ወእምድኅረዝ፡አንበሩ፡እደዊሆሙ፡ሐዋርያት፡ላዕሌሁ፡ወሤምዎ፡ኤጲስቆጶሰ፡ኀበ፡ሀገረ፡ኒውብያስ፡ወሰበከ፡ውስቴታ፡ወሜጠሙ፡ለብዙኃን፡አረማውያን፡ወአብኦሙ፡ውስተ፡ሃይማኖተ፡እግዚእነ፡ኢየሱስ፡ሎቱ፡ስብሐት።
4ወእምድኅረዝ፡ነሥኦ፡ለዮልዮስ፡ሐዋርያ፡ወዖዱ፡ውስተ፡አህጉር፡ብዙኃት፡እለ፡ሀለዉ፡ውስተ፡ጽልመተ፡ክሕደት፡ሰበኩ፡ወኣጥመቁ፡ብዙኀ፡ሰብአ፡ዘኢይትኌለቍ፡ወገብሩ፡ተአምራተ፡ወሰደዱ፡ሰይጣናተ፡እምላዕለ፡ሰብእ፡ወፈወስዎሙ፡ለብዙኃን፡ድውያን፡ወአንኀሉ፡አብያተ፡ጣዖታት፡ወሐነፁ፡አብያተ፡ክርስቲያናት።
5ወሶበ፡ፈጸሙ፡ሩፀቶሙ፡ፈቀደ፡እግዚእነ፡ያፍልሶሙ፡እምብዙኀ፡ፃማ፡ወኀዘን፡ዘዝንቱ፡ዓለም፡ወያብኦሙ፡ውስተ፡ትፍሥሕት፡ዘለዓለም፡ወእምዝ፡ሐመ፡ንስቲተ፡እንድራኒቆስ፡ሐዋርያ፡ወአዕረፈ፡በዛቲ፡ዕለት፡ወገነዞ፡ዮልዮስ፡ሐዋርያ፡ወአንበሮ፡ውስተ፡መቃብር፡ወአዕረፈ፡ውእቱኒ፡በሣኒታሁ። በረከቱ፡ትኩን፡ምስሌነ፡ለዓለመ፡ዓለም፡አሜን።
ሰላም፡ሰላም፡ለእንድራኒቆስ፡እብሎ፤ውኂዘ፡መንፈስ፡ዘሰትየ፡ምስለ፡ሐዋርያት፡በአመድብሎ፤ኀበ፡ሖረ፡ይስብክ፡አህጉራተ፡አድያም፡ኵሎ፤አብያተ፡ክርስቲያን፡ሐኒፆ፡አብያተ፡ጣዖታት፡አንሒሎ፤ዕሤተ፡ተስፋሁ፡አድምዐ፡በሰማይ፡ዘሀሎ።
6ወበዛቲ፡ዕለት፡ተዝካሩ፡ለያዕቆብ፡ምሥራቃዊ። በረከቱ፡ትኩን፡ምስሌነ፡ለዓለመ፡ዓለም፡አሜን።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።