Biblia Etíope · Biblia Etíope en Ge'ez

Salmos 6

መዝሙራት፡ዘዳዊት።

1ፍጹሜ፡ዘስብሐት፡በእንተ፡ሳምንት፤ መዝሙር፡ዘዳዊት።

2እግዚኦ፡በመዐትከ፡ኢትቅሥፈኒ፤ ወበመቅሠፍትከ፡ኢትገሥጸኒ።

3ትሣሀለኒ፡እግዚኦ፡እስመ፡ድውይ፡አነ፤ ወፈውሰኒ፡እስመ፡ተሀውከ፡አዕጽምትየ።

4ወነፍስየኒ፡ተሀውከት፡ፈድፋደ፤ ወአንተኒ፡እግዚኦ፡እስከ፡ማእዜኑ።

5ተመየጥ፡እግዚኦ፡ወባልሓ፡ለነፍስየ፤ ወአድኅነኒ፡በእንተ፡ምሕረትከ።

6እስመ፡አልቦ፡በውስተ፡ሞት፡ዘይዘከረከ፤ ወበሲኦልኒ፡መኑ፡የአምነከ።

7ሰራሕኩ፡በምንዳቤየ፡ወአኀፅብ፡ኵሎ፡ሌሊተ፡ዐራትየ፤ ወበአንብዕየ፡አርሐስኩ፡ምስካብየ።

8ወተሀውከት፡እመዐት፡ዐይንየ፤ ወበለይኩ፡በኀበ፡ኵሎሙ፡ጸላእትየ።

9ረሐቁ፡እምኔየ፡ኵልክሙ፡ገበርተ፡ዐመፃ፤ እስመ፡ሰምዐኒ፡እግዚአብሔር፡ቃለ፡ብካይየ።

10ወሰምዐኒ፡እግዚአብሔር፡ስእለትየ፤ ወተወክፈ፡እግዚአብሔር፡ጸሎትየ።

11ለይትኀፈሩ፡ወይኅሰሩ፡ኵሎሙ፡ጸላእትየ፤ ለይገብኡ፡ድኅሬሆሙ፡ወይትኀፈሩ፡ፈድፋደ፡ወፍጡነ።