Biblia Etíope · Biblia Etíope en Ge'ez
Salmos 5
መዝሙራት፡ዘዳዊት።1ፍጻሜ፡በእንተ፡ተወርሶ፤ መዝሙር፡ዘዳዊት።
2ቃልየ፡አፅምእ፡እግዚኦ፡ወለቡ፡ጽራኅየ።
3ወአፅምአኒ፡ቃለ፡ስእለትየ፤ ንጉሥየኒ፡ወአምላክየኒ።
4እስመ፡ኀቤከ፡እጼሊ። እግዚኦ፡በጽባሕ፡ስምዐኒ፡ቃልየ።
5በጽባሕ፡እቀውም፡ቅድሜከ፡ወኣስተርኢ፡ለከ። እስመ፡ኢኮንከ፡አምላከ፡ዘዐመፃ፡ያፈቅር፡ወኢየኀድሩ፡እኩያን፡ምስሌከ።
6ወኢይነብሩ፡ዐማፅያን፡ቅድመ፡አዕይንቲከ፡
7ጸላእከ፡እግዚኦ፡ኵሎሙ፡ገበርተ፡ዐመፃ፤ ወትገድፎሙ፡ለኵሎሙ፡እለ፡ይነቡ፡ሐሰተ። ብእሴ፡ደም፡ወጕሕላዌ፡ይስቆርር፡እግዚአብሔር።
8ወአንሰ፡በብዝኀ፡ምሕረትከ፡እበውእ፡ቤተከ፤ ወእሰግድ፡ውስተ፡ጽርሐ፡መቅደስከ፡በፍሪሆትከ።
9እግዚኦ፡ምርሐኒ፡በጽድቅከ፤ ወበእንተ፡ጸላእትየ፡አርትዕ፡ፍኖትየ፡ቅድሜከ።
10እስመ፡አልቦ፡ጽድቀ፡ውስተ፡አፉሆሙ፤ ወልቦሙኒ፡ከንቱ።
11ከመ፡መቃብር፡ክሡት፡ጐራዒቶሙ፤ ወጸልሕዉ፡በልሳናቲሆሙ። ኰንኖሙ፡እግዚኦ፡ወይደቁ፡በውዴቶሙ፤ ወበከመ፡ብዝኀ፡ሕብሎሙ፡ስድዶሙ፤ እስመ፡አምረሩከ፡እግዚኦ።
12ወይትፌሥሑ፡ብከ፡ኵሎሙ፡እለ፡ይትዌከሉከ፡ለዓለም፡ይትሐሠዩ፡ወተኀድር፡ላዕሌሆሙ። ወይትሜክሑ፡ብከ፡ኵሎሙ፡እለ፡ያፈቅሩ፡ስመከ።
13እስመ፡አንተ፡ትባርኮ፡ለጻድቅ፤ እግዚኦ፡ከመ፡ወልታ፡ሥሙር፡ከለልከነ።