Biblia Etíope · Biblia Etíope en Ge'ez
Reyes III 2
መጽሐፈ፡ነገሥት፡ሣልሳዊ።1ወበጽሐ፡መዋዕሊሁ፡ለዳዊት፡ለመዊት፡ወአዘዞ፡ለሰሎሞን፡ወልዱ፡ወይቤሎ፤
2አንሰ፡ሖርኩ፡በኵሉ፡ፍኖተ፡ምድር፡ወአንተ፡ባሕቱ፡ጽናዕ፡ወትባዕ፡ወኩን፡ብእሴ።
3ወዕቀብ፡ትእዛዞ፡ለአምላክከ፡እግዚአብሔር፡ከመ፡ትሖር፡በፍኖቱ፡ወትዕቀብ፡ትእዛዞ፡ወኵነኔሁ፡ወፍትሖ፡ዘጽሑፍ፡ውስተ፡ሕገ፡ሙሴ፡ከመ፡ታእምር፡ዘከመ፡ትገብር፡ኵሎ፡ዘእኤዝዘከ፤
4ከመ፡ያቅም፡እግዚአብሔር፡ቃሎ፡ዘከመ፡ነበበ፡ወይቤ፡ለእመ፡ዐቀቡ፡ደቂቅከ፡ፍኖቶሙ፡ይሖሩ፡ቅድሤየ፡በጽድቅ፡ወበኵሉ፡ልቦሙ፡ይቤ፡ኢይሜረው፡ለከ፡ብእሲ፡እምነ፡መልዕልተ፡መንበረ፡እስራኤል።
5ወለሊከ፡ታአምር፡ኵሎ፡ዘከመ፡ረሰየኒ፡ኢዮአብ፡ወልደ፡ሶርህያ፡ወኵሎ፡ዘከመ፡ገብረ፡ላዕለ፡፪መላእከተ፡ኀይሎሙ፡ለእስራኤል፡ላዕለ፡አቤኔር፡ወልደ፡ኔር፡ወላዕለ፡አሜሳይ፡ወልደ፡ኢያቴር፡ወቀተሎሙ፡ወአግብአ፡ደመ፡ፀሩ፡ላዕለ፡ሕይወቱ፡ውስተ፡ሐቌሁ፡ወበአሣእኑ፡ዘውስተ፡እግሩ።
6ወትገብር፡ዘከመ፡ጥበብከ፡ወአንተ፡ታወርድ፡ሢበቲሁ፡በደም፡ውስተ፡መቃብር።
7ወለደቂቀ፡ቤርዜሊ፡ገለዓዳዊ፡ግበር፡ምሕረተ፡ወይኩኑ፡ምስለ፡እለ፡ይበልዑ፡ውስተ፡ማእድከ፡እስመ፡ውእቱ፡ቀርበኒ፡አመ፡እትኀጣእ፡እምቅድመ፡ገጸ፡አቤሴሎም፡እኁከ።
8ወናሁ፡ኀቤከ፡ሳሚ፡ወልደ፡ጌራ፡ወልደ፡ኢያሚን፡ዘእምነ፡ባቱሪም፡ወውእቱ፡ረገመኒ፡መርገመ፡እኩየ፡አመ፡መዋዕለ፡አሐውር፡በትዕይንት፡ወእምዝ፡ወረደ፡ውስተ፡ዮርዳኖስ፡ወተቀበለኒ፡ወመሐልኩ፡ሎቱ፡በእግዚአብሔር፡እንዘ፡እብል፡ከመ፡ኢይቅትልከ፡በኀፂን።
9ወአንተ፡ኢታንጽሖ፡እስመ፡ብእሲ፡ጠቢብ፡አንተ፡ወአእምር፡ዘከመ፡ትሬስዮ፡ወታወርድ፡ሢበቲሁ፡በደም፡ውስተ፡መቃብር።
10ወስከበ፡ዳዊት፡ምስለ፡አበዊሁ፡ወተቀብረ፡ውስተ፡ሀገረ፡ዳዊት።
11ወመዋዕሊሁ፡ዘነግሠ፡ዳዊት፡ላዕለ፡እስራኤል፡(በኢየሩሳሌም፡) ፵ዓመተ፤ በኬብሮን፡ነግሠ፡፯ዓመተ፡ወበኢየሩላሌም፡፴ወ፫ዓመተ።
12ወሰሎሞን፡ነበረ፡ውስተ፡መንበረ፡ዳዊት፡አቡሁ፡ወጸንዐ፡መንግሥቱ፡ፈድፋደ።
13ወቦኦ፡አዶንያስ፡ኀበ፡ቤርሳቤሕ፡እሙ፡ለሰሎሞን፡ወሰገደ፡ላቲ፡ወትቤሎ፡ሰላም፡ለምጽአትከ፡ወይቤላ፡ሰላም፡ለኪ።
14ትካዘ፡ብየ፡ኀቤኪ፡ወትቤሎ፡ንግረኒ።
15ወይቤላ፡ለሊኪ፡ታአምሪ፡ከመ፡ሊተ፡ይእቲ፡መንግሥት፡ወኀቤየ፡ንብአ፡ገጾሙ፡ለኵሉ፡እስራኤል፡ከመ፡ያንግሡኒ፡ወተመይጠት፡መንግሥት፡ወኮነት፡ለእኁየ፡እስመ፡እምኀበ፡እግዚአብሔር፡ኮነት፡ሎቱ።
16ወይእዜኒ፡አሐተ፡ስእለተ፡እስእል፡አነ፡እምኀቤኪ፡ወኢትሚጢ፡ገጸኪ፡ወትቤሎ፡ቤርሳቤሕ፡በል።
17ወይቤላ፡በልዮ፡ለሰሎሞን፡ንጉሥ፡እስመ፡ኢይመይጥ፡ገጾ፡እምኔኪ፡ወየሀበኒ፡አቢሳሃ፡ሰሜናዊተ፡ትኩነኒ፡ብእሲተ።
18ወትቤሎ፡ቤርሳቤሕ፡ሠናይ፤ አነ፡እነግሮ፡ለንጉሥ፡በእንቲአከ።
19ወቦአት፡ቤርሳቤሕ፡ኀበ፡ንጉሥ፡ሰሎሞን፡ከመ፡ትንግሮ፡በእንተ፡አዶንያስ፡ወተንሥአ፡ንጉሥ፡ቅድሜሃ፡ወተአምኃ፡ወነበረ፡ውስተ፡መንበሩ፡ወአንበሩ፡መንበረ፡ለእሙ፡ለንጉሥ፡ወነበረት፡በየማኑ፡ለንጉሥ።
20ወትቤሎ፡አሐተ፡ስእለተ፡አነ፡እስእል፡እምኀቤከ፡ወኢትሚጥ፡ንጸከ፡እምኔየ፡ወይቤላ፡ንጉሥ፡ሰአሊ፡እም፡ዳእሙ፡ወኢይመይጥ፡ገጽየ፡እምኔኪ።
21ወትቤሎ፡የሀብዎ፡አቢሳሃ፡ሰሜናዊት፡ለአዶንያስ፡እኁከ፡ትኩኖ፡ብእሲቶ።
22ወተሰጥዋ፡ሰሎሞን፡ንጉሥ፡ወይቤላ፡ለእሙ፡ወለምንት፡ትስእሊ፡ሎቱ፡አቢሳሃ፡ሰሜናዊተ፡ለአዶንያስ፡ወሰአሊ፡ሎቱ፡መንግሥተ፡እስመ፡ውእቱ፡እኁየ፡ዘይልህቀኒ፡ወምስሌሁ፡አብያታር፡ካህን፡ወምስሌሁ፡ኢዮአብ፡ወልደ፡ሶርህያ፡ካልእ፡መልአከ፡ኀይል።
23ወመሐለ፡ንጉሥ፡ሰሎሞን፡በእግዚአብሔር፡እንዘ፡ይብል፡ከመዝ፡ለይረስየኒ፡እግዚአብሔር፡ወከመዝ፡ለይቅትለኒ፡ከመ፡ላዕለ፡ነፍሱ፡ነበበ፡አዶንያስ፡ዘንተ፡ነገረ።
24ወይእዜኒ፡ሕያው፡እግዚአብሔር፡ዘሤመኒ፡ወአንበረኒ፡ውስተ፡መንበረ፡ዳዊት፡አቡየ፡ወውእቱ፡ገብረ፡ሊተ፡ቤተ፡በከመ፡ይቤ፡እግዚአብሔር፡ከመ፡ዮም፡[ይመውት፡] አዶንያስ።
25ወለአከ፡ሰሎሞን፡ንጉሥ፡ምስለ፡ብንያስ፡ወልደ፡ዮዳሔ፡ወቀተሎ፡ወሞተ፡አዶንያስ፡ይእተ፡አሚረ።
26ወለአብያታር፡ካህን፡ይቤሎ፡ሰሎሞን፡ንጉሥ፡እቱ፡አንተኒ፡ውስተ፡አናቶት፡ውስተ፡ሐቅልከ፡እስመ፡ብእሴ፡ደም፡አንተ፡ዮም፡ወኢይቀትለክ፡እስመ፡አንሣእከ፡ታቦተ፡ሕጉ፡ለእግዚአብሔር፡ቅድሜሁ፡ለአቡየ፡ወእስመ፡ሐመምከ፡በኵሉ፡ሕማሙ፡ለአቡየ።
27ወሰዐሮ፡ሰሎሞን፡ለአብያታር፡ከመ፡ኢይኩን፡ካህኖ፡ለእግዚአብሔር፡ከመ፡ይብጻሕ፡ቃለ፡እግዚአብሔር፡ዘነበበ፡ላዕለ፡ቤተ፡ኤሊ፡በሴሎም።
28ወሰምዐ፡ኢዮአብ፡ወልደ፡ሶርህያ፡እስመ፡ኢዮአብ፡ኀብረ፡ምስለ፡አዶንያስ፡ወተለዎ፡ወምስለ፡ሰሎሞን፡ኢኀብረ፡ወኢተለዎ፡ወጐየ፡ኢዮአብ፡ውስተ፡ቤተ፡እግዚአብሔር፡ወአኀዘ፡አቅርንተ፡ምሥዋዕ።
29ወኦይድዕዎ፡ለሰሎሞን፡ወይቤልዎ፡ጐየ፡ኢዮአብ፡ወቦአ፡ቤተ፡እግዚአብሔር፡ወአኀዘ፡አቅርንተ፡ምሥዋዕ፡ወለአከ፡ሰሎሞን፡ኀበ፡ኢዮአብ፡እንዘ፡ይብል፡ምንተአ፡ኮንከአ፡ዘተማኅፀንከአ፡በምሥዋዕአ፡ወይቤ፡ኢዮአብ፡እስመ፡ፈራህኩአ፡ተማኅፀንኩአ፡በእግዚአብሔርአ፡ወለአኮ፡ሰሎሞን፡ለብንያስ፡ወልደ፡ዮዳሔ፡ኀበ፡ኢዮአብ፡ወይቤሎ፡ሖር፡ቅትሎ፡ወቅብሮ።
30ወመጽአ፡ብንያስ፡ወልደ፡ዮዳሔ፡ኀበ፡ኢዮአብ፡ወይቤሎ፡ከመዝ፡ይቤ፡ንጉሥ፡ፃእ፡ወይቤ፡ኢዮአብ፡ኢይወፅእ፡አላ፡በዝየ፡እመውት፡ወገብአ፡ብንያስ፡ወልደ፡ዮዳሔ፡ወይቤሎ፡ለንጉሥ፡ከመዝ፡ይቤ፡ኢዮአብ፡ወከመዝ፡ይቤለኒ።
31ወይቤሎ፡ንጉሥ፡ሖር፡ወግበሮ፡በከመ፡ይቤ፡ወቅትሎ፡ወቅብሮ፡ወታሴስል፡እምኀቤየ፡ዮም፡ደመ፡ዘበከንቱ፡ከዐወ፡ኢዮአብ፡ወእምነ፡ቤተ፡አቡየ።
32ወአግብአ፡እግዚአብሔር፡ደመ፡ዐመፃሁ፡ላዕለ፡ርእሱ፡በከመ፡ገብረ፡ላዕለ፡፪ዕደው፡ጻድቃን፡ወኄራን፡እለ፡ይኄይሱ፡እምኔሁ፡ወቀተሎሙ፡በኀፂን፡ወአቡየሰ፡ዳዊት፡ኢያእመረ፡በደሞሙ፡አቤኔርሃ፡ወልደ፡ኔር፡መልአከ፡ኀይሎሙ፡ለእስራኤል፡ወአሜሳይሃ፡ዘኢያቴር፡መልአከ፡ኀይሎሙ፡ለይሁዳ።
33ወገብአ፡ደሞሙ፡ላዕለ፡ርእሱ፡ወላዕለ፡ርእስ፡ዘርኡ፡እስከ፡ለዓለም፡ወለዳዊትሰ፡ወለዘርኡ፡ወለቤቱ፡ወለመንበሩ፡ይኩን፡ሰላም፡እምኀበ፡እግዚአብሔር፡እስከ፡ለዓለም።
34ወዐርገ፡ብንያስ፡ወልደ፡ዮዳሔ፡ወአኀዘ፡ወቀተሎ፡ወቀበሮ፡ውስተ፡ቤቱ፡ውስተ፡ሐቅል።
35ወሤሞ፡ንጉሥ፡ለብንያስ፡ወልደ፡ዮዳሔ፡መልአከ፡ሰራዊቱ፡ወጸንዐት፡መንግሥቱ፡በኢየሩሳሌም፤ ወለሳዶቅ፡ካህን፡ሤሞ፡ንጉሥ፡ሊቀ፡ከህናት፡ህየንተ፡አብያታር፤ ወወህቦ፡እግዚአብሔር፡ለሰሎሞን፡ጥበበ፡ወአእምሮ፡ብዙኀ፡ፈድፋደ፡ወሰፍሐ፡ልሱ፡ከመ፡ኆፃ፡ዘኀበ፡ሐይቀ፡ባሕር።