Biblia Etíope · Biblia Etíope en Ge'ez
Reyes III 1
መጽሐፈ፡ነገሥት፡ሣልሳዊ።1ወዳዊትሰ፡ንጉሥ፡ልህቀ፡ወኀለፈ፡መዋዕሊሁ፡ወይከድንዎ፡አልባሰ፡ወኢያመውቆ።
2ወይቤሉ፡ደቁ፡ለዳዊት፡ይኅሥሡ፡ለእግዚእነ፡ለንጉሥ፡ወለተ፡ድንግለ፡ወያምጽእዋ፡ኀበ፡ንጉሥ፡ወትሰክብ፡ምስሌሁ፡ወተሐቅፎ፡ወታስተማውቆ፡ወይመውቅ፡እግዚእነ፡ንጉሥ።
3ወኀሠሡ፡ወለተ፡ሠናይተ፡እምነ፡ኵሉ፡ደወለ፡እስራኤል፡ወረከቡ፡አቢሳሃ፡ሰሜናዊት፡ወወሰድዋ፡ኀበ፡ንጉሥ።
4ወነበረት፡ትትለአኮ፡ወንጉሥሰ፡ኢያእመራ።
5ወአዶንያስ፡ወልደ፡አጊት፡ተንሥአ፡ወይቤ፡አነ፡እነግሥ፡ወገብረ፡ሎቱ፡ሰረገላተ፡ወአፍራሰ፡ወ፡፶ብእሴ፡እለ፡ይረውጹ፡ቅድሜሁ።
6ወግሙራ፡ኢከልኦ፡ኦቡሁ፡ወኢይቤሎ፡ለምንት፡ትገብር፡ከመዝ፡ወሠናይ፡ውእቱ፡ወላሕይ፡ንጹ፡ፈድፋደ፡ወኪያሁ፡ወለደ፡እምድኅረ፡አቤሴሎም።
7ወኵሉ፡ምክሩ፡ምስለ፡ኢዮአብ፡ወልደ፡ሶርህያ፡ወምስለ፡አብያታር፡ካህን፡ወተለውዎ፡ለአዶንያስ፡ወረድእዎ።
8ወሳዶቅ፡ካህን፡ወብንያስ፡ወልደ፡ዮዳሔ፡ወዮናታን፡ነቢይ፡ወሳሚ፡ወሬሲ፡ደቂቀ፡ኀይሉ፡ለዳዊት፡ኢተለውዎ፡ለኦዶንያስ።
9ወጠብሐ፡ኦዶንያስ፡አበግዐ፡ወአጣሌ፡ወአልህምተ፡በኀበ፡ኤቲ፡ዘዝኤልቲ፡ዘእምእኃዘ፡ምድረ፡ሮጌል፡ወጸውዐ፡ኵሎ፡አኀዊሁ፡ደቂቀ፡ንጉሥ፡ወኵሎ፡ጽኑዓነ፡ይሁዳ፡ደቂቀ፡ንጉሥ፤
10ወናታንሃ፡ነቢይ፡ወብንያስ፡ወጽኑዓኒሆሙ፡ወሰሎሞንሃ፡እኁሁ፡ኢጸውዖሙ።
11ወይቤላ፡ናታን፡ለቤርሳቤሕ፡እሙ፡ለሰሎሞን፡እንዘ፡ይብል፡ኢሰማዕሊኑ፡ከመ፡ነግሠ፡አዶንያስ፡ወልደ፡አጊት፡ወእግዚእነሰ፡ዳዊት፡ኢያእመረ።
12ወይእዜኒ፡ንዒ፡ኣምክርኪ፡ምክረ፡ወታድኅኒ፡ነፍሰሊ፡ወነፍሰ፡ሰሎሞን፡ወልድኪ።
13ንዒ፡ሖሪ፡ኀበ፡ዳዊት፡ንጉሥ፡ወትብልዮ፡አንተ፡እግዚእየ፡መሐልከ፡ለአመትከ፡እንዘ፡ትብል፡ወልድኪ፡ሰሎሞን፡ይነግሥ፡እምድኅሬየ፡ወውእቱ፡ይነብር፡ዲበ፡መንበርየ፡ወእፎ፡ከመ፡ነግሠ፡አዶንያስ።
14ወእንዘ፡አንቲ፡ትትናገሪ፡ምስለ፡ንጉሥ፡በህየ፡እበውእ፡አነሂ፡እተልወኪ፡ወእፌጽም፡ነገርኪ።
15ወቦአት፡ቤርሳቤሕ፡ኀበ፡ንጉሥ፡ውስተ፡ጽርሕ፡ወንጉሥሰ፡ልህቀ፡ጥቀ፡ወአቢሳ፡ሰሜናዊት፡ትትለአኮ፡ለንጉሥ።
16ወደነነት፡ቤርሳቤሕ፡ወሰገደት፡ለንጉሥ፡ወይቤላ፡ንጉሥ፡ምንተ፡ኮንኪ።
17ወትቤሎ፡እግዚእየ፡ንጉሥ፡አንተ፡መሐልከ፡በአምላክከ፡ለአመትከ፡እንዘ፡ትብል፡ከመ፡ወልድኪ፡ሰሎሞን፡ይነግሥ፡እምድኅሬየ፡ወውእቱ፡ይነብር፡ዲበ፡መንበርየ።
18ወናሁ፡ይእዜ፡ነግሠ፡አዶንያስ፡ወአንተ፡እግዚእየ፡ንጉሥ፡ኢያእመርከ።
19ወጠብሐ፡አልህምተ፡ወአባግዐ፡ወአጣሌ፡ብዙኀ፡ወጸውዐ፡ኵሎ፡ደቂቀ፡ንጉሥ፡ወአብያታር፡ካህን፡ወኢዮአብ፡መልአከ፡ኀይል፤ ወሰሎሞንሂ፡ገብርከ፡ኢጸውዐ።
20ወኪያከ፡እግዚእየ፡ንጉሥ፡አዕይንተ፡ኵሉ፡እስራኤል፡ይሴፈዋከ፡ታይድዖሙ፡መኑ፡ይነብር፡ውስተ፡መንበርከ፡እግዚእየ፡ንጉሥ፡እምድኅሬከ።
21ወእምከመ፡ሰከበ፡እግዚእየ፡ንጉሥ፡ምስለ፡አበዊሁ፡ወንከውን፡አነ፡ወወልድየ፡ሰሎሞን፡ኃጥኣነ።
22ወእንዘ፡ዓዲ፡ትትናገር፡ይእቲ፡ምስለ፡ንጉሥ፡ወቦአ፡ናታን፡ነቢይ፡ቅድመ፡ንጉሥ፡
23ወሰገደ፡ለንጉሥ፡በገጹ፡ውስተ፡ምድር።
24ወይቤሎ፡ናታን፡ነቢይ፡እግዚእየ፡ንጉሥ፡አንተኑ፡ትቤ፡አዶንያስ፡ይነግሥ፡እምድኅሬየ፡ወውእቱ፡ይነብር፡ውስተ፡መንበርየ።
25እስመ፡ወረደ፡ዮም፡ወሦዐ፡አልህምተ፡ወአባግዐ፡ወአጣሌ፡ብዙኀ፡ወጸውዖሙ፡ለኵሎሙ፡ደቂቀ፡ንጉሥ፡ወመላእክተ፡ኀይል፡ወአብያታር፡ካህን፡ወሀለዉ፡ይበልዑ፡ወይሰትዩ፡በቅድሜሁ፡ወይቤልዎ፡ሕያው፡አበ፡ነጋሢ፡አዶንያስ።
26ወኪያየሰ፡ገብርከ፡ወሳዶቅሃ፡ካህን፡ወብንያስሃ፡ወልደ፡ዮዳሔ፡ወሰሎሞንሃ፡ገብርከ፡ኢጸውዐ።
27ለእመ፡እምኀበ፡እግዚእየ፡ንጉሥ፡ኮነ፡ዝንቱ፡ነገር፡ወኢነገርኮ፡ለገብርከ፡መኑ፡ይነብር፡ውስተ፡መንበርከ፡አግዚእየ፡ንጉሥ፡እምድኅሬሁ።
28ወአውሥአ፡ዳዊት፡ወይቤ፡ንጉሥ፡ጸውዕዋ፡ለቤርሳቤሕ፡ወቦአት፡ቅድመ፡ንጉሥ፡ወቆመት፡ቅድሜሁ።
29ወመሐለ፡ንጉሥ፡ወይቤ፡ሕያው፡እግዚአብሔር፡ዘቤዘዋ፡ለነፍስየ፡እምነ፡ኵሉ፡ምንዳቤ፤ 30 ከመ፡በከመ፡መሐልኩ፡ለኪ፡በእግዚአብሔር፡አምላከ፡እስራኤል፡እንዘ፡እብል፡ከመ፡ሰሎሞን፡ወልድኪ፡ይነግሥ፡እምድኅሬየ፡ወውእቱ፡ይነብር፡ውስተ፡መንበርየ፡ህየንቴየ፡ከመ፡ከማሁ፡እገብር፡ዮም፡በዛቲ፡ዕለት።
31ወደነነት፡ቤርሳቤሕ፡በገጻ፡ውስተ፡ምድር፡ወሰገደት፡ለንጉሥ፡ወትቤ፡ሕያው፡እግዚእየ፡ንጉሥ፡ዳዊት፡ለዓለም።
32ወይቤ፡ዳዊት፡ንጉሥ፡ጸውዑ፡ሊተ፡ሳዶቅሃ፡ካህነ፡ወብንያስ፡ወልደ፡ዮዳሔ፡ወቦኡ፡ኀበ፡ንጉሥ፡ወናታን፡ነቢይ።
33ወይቤሎሙ፡ንጉሥ፡ንሥኡ፡አግብርተ፡እግዚእክሙ፡ምስሌክሙ፡ወአጽዕንዎ፡ለወልድየ፡ሰሎሞን፡ዲበ፡በቅልየ፡ወአውርድዎ፡ውስተ፡ግዮን።
34ወቅብእዎ፡በህየ፡ሳዶቅ፡ካህን፡ወናታን፡ነቢይ፡ወአንግሥዎ፡ላዕለ፡እስራኤል፡ወንፍሑ፡ቀርነ፡ወበሉ፡ሕያው፡አበ፡ነጋሢ፡ሰሎሞን።
35ወዕርጉ፡ወትልውዎ፡ወይባእ፡ወይንበር፡ውስተ፡መንበርየ፡ወውእቱ፡ይነግሥ፡ህየንቴየ፡ወአነ፡አዘዝኩ፡ይንግሥ፡ላዕለ፡እስራኤል፡ወይሁዳ።
36ወአውሥኦ፡ብንያስ፡ወልደ፡ዮዳሔ፡ለንጉሥ፡ወይቤሎ፡ወይኩን፡ከማሁ፡ምእመነ፡ወይረሲ፡እግዚአብሔር፡ለእግዚእየ፡ለንጉሥ።
37በከመ፡ሀለወ፡እግዚአብሔር፡ምስለ፡እግዚእየ፡ንጉሥ፡ከማሁ፡ምስለ፡ሰሎሞንሂ፡የሀሉ፡ወይዕበይ፡መንበሩ፡እምነ፡መንበረ፡እግዚእየ፡ንጉሥ፡ዳዊት።
38ወወረዱ፡ሳዶቅ፡ካህን፡ወናታን፡ነቢይ፡ወብንያስ፡ወልደ፡ዮዳሔ፡ወኬርቲ፡ወፌልቲ፡ወአጽዐንዎ፡ለሰሎሞን፡ላዕለ፡በቅለ፡ንጉሥ፡ዳዊት፡ወወሰድዎ፡ውስተ፡ግዮን።
39ወነሥአ፡ሳዶቅ፡ካህን፡ወአምጽአ፡ቀርነ፡ቅብእ፡እምነ፡ደብተራ፡ወቀብኦ፡ለሰሎሞን፡ወነፍሐ፡ቀርነ፡ወይቤሉ፡ኵሉ፡ሕዝብ፡ሕያው፡አበ፡ነጋሢ፡ሰሎሞን።
40ወዐርጉ፡ኵሉ፡ሕዝብ፡ወተለውዎ፡ወዘበጡ፡ከበሮ፡ወመሰንቆ፡ወተፈሥሑ፡ዐቢየ፡ትፍሥሕተ፡ወደንገፀት፡ምድር፡እምነ፡ቃሎሙ።
41ወሰምዐ፡አዶንያስ፡ወኵሎሙ፡ኅሩያኒ[ሁ]፡ወእሙንቱሰ፡አኅለቁ፡መሲሐ፡ወሰምዐ፡ኢዮአብ፡ቃለ፡ቀርን፡ወይቤ፡ምንት፡ውእቱ፡ዝንቱ፡ድምፀ፡ሀገር።
42ወእንዘ፡ዓዲ፡ይትናገር፡ወናሁ፡ዮናታን፡ወልደ፡አብያታር፡ካህን፡ቦአ፡ወይቤሎ፡አዶንያስ፡ባእ፡እስመ፡ብእሲ፡ኀይል፡አንተ፡ወሠናየ፡ትዜኑ።
43ወአውሥአ፡ዮናታን፡ወይቤ፡አንግሦ፡እግዚእነ፡ንጉሥ፡ዳዊት፡ለሰሎሞን።
44ወፈነወ፡ንጉሥ፡ምስሌሁ፡ሳዶቅሃ፡ካህን፡ወናታንሃ፡ነቢይ፡ወብንያስ፡ወልደ፡ዮዳሔ፡ወኬርቲ፡ወፌልቲ፡ወአጽዐንዎ፡ዲበ፡በቅለ፡ንጉሥ።
45ወቀብእዎ፡ሳዶቅ፡ካህን፡ወናታን፡ነቢይ፡ወአንገሥዎ፡በግዮን፡ወዐርጉ፡እምህየ፡እንዘ፡ይትፌሥሑ፡ወደምፀት፡ሀገር፡ወዝንቱ፡ውእቱ፡ነገር፡ዘሰማዕክሙ።
46ወነበረ፡ሰሎሞን፡ውስተ፡መንበረ፡መንግሥት።
47ወቦኡ፡አግብርተ፡ንጉሥ፡ያእኵትዎ፡ለንጉሥ፡ለእግዚእነ፡ዳዊት፡ወይቤልዎ፡ያሠኒ፡እግዚአብሔር፡ላዕለ፡ስሙ፡ለሰሎሞን፡ወልድከ፡ፈድፋደ፡እምነ፡ስምከ፡ወያዕብዮ፡እግዚአብሔር፡ለመንበሩ፡እምነ፡መንበርከ፤ ወሰገደ፡ንጉሥ፡በውስተ፡ምስካቡ።
48ወንጉሥኒ፡ከመዝ፡ይቤ፡ይትባረክ፡እግዚአብሔር፡አምላከ፡እስራኤል፡ዘወሀበ፡ዮም፡እምነ፡ዘርእየ፡ዘይነብር፡ዲበ፡መንበርየ፡እንዘ፡ይሬእያ፡አዕይንትየ።
49ወተንሥኡ፡ኵሎሙ፡ኅሩያኒሁ፡ለአዶንያስ፡ወሖሩ፡ብእሲ፡ብእሲ፡ፍኖቶ።
50ወአዶንያስ፡ፈርሀ፡እምነ፡ቅድመ፡ገጹ፡ለሰሎሞን፡ወተንሥአ፡ወሖረ፡ወአኀዘ፡አቅርንተ፡ምሥዋዕ።
51ወአይድዕዎ፡ለሰሎሞን፡ወይቤልዎ፡ናሁ፡አዶንያስ፡ፈርህ፡እምነ፡ገጸ፡ንጉሥ፡ሰሎሞን፡ወአኀዘ፡አቅርንተ፡ምሥዋዕ፡ወይቤ፡ይምሐል፡ሊተ፡ሰሎሞን፡ዮም፡ከመ፡ኢይቅትለኒ፡በኀፂን።
52ወይቤ፡ሰሎሞን፡እመ፡ኮነ፡ወልደ፡ኀይል፡ኢትወድቅ፡እምነ፡ሥዕርቱ፡ውስተ፡ምድር፡ወእመሰ፡ተረክበት፡እኪት፡በላዕሌሁ፡ይመውት።
53ወለአከ፡ሰሎሞን፡ንጉሥ፡ወአውረድዎ፡እምነ፡መልዕልተ፡ምሥዋዕ፡ወቦአ፡ወሰገደ፡ለሰሎሞን፡ወይቤሎ፡ሰሎሞን፡እቱ፡ቤተከ።