Biblia Etíope · Biblia Etíope en Ge'ez
Reyes III 11
መጽሐፈ፡ነገሥት፡ሣልሳዊ።1ወሰሎሞንሰ፡ንጉሥ፡መፍቀሬ፡እንስት፡ውእቱ፤ ወ፯፻አንስቲያሁ፡ወዕቁባቲሁ፡፫፻፤ ወነሥአ፡አንስተያ፡እምነ፡ነኪር፡ሕዝብ፡ወለተ፡ፈርዖንሂ፡ወሞአባውያትሂ፡ወአሞናዊያትሂ፡ወእምነ፡ሶርያ፡ወእምነ፡ኤዶምያስ፡ወእምነ፡ኬጤዎን፡ወእምነ፡አሞሬዎን፤
2ወእምውስተ፡አሕዛብ፡ዘይቤሎሙ፡እግዚአብሔር፡ለደቂቀ፡እስራኤል፡ኢትባኡ፡ኀቤሆሙ፡ከመ፡ኢይሚጡ፡ልበክሙ፡ወኢያትልዉክሙ፡ኀበ፡አማልክቲሆሙ፡ወኪያሆሙ፡ተለወ፡ሰሎሞን፡ወአፍቀሮሙ።
3ወእምዝ፡አመ፡መዋዕለ፡ልህቀ፡ሰሎሞን፡ኢኮነ፡ልቡ፡ምስለ፡እግዚአብሔር፡አምላኩ፡ከመ፡ልበ፡ዳዊት፡አቡሁ።
4ወሜጣሁ፡ልቦ፡አንስቲያሁ፡እለ፡አውሰበ፡እምነኪር፡ወአትለዋሁ፡ኀበ፡አማልክቲሆን።
5ወሐነጸ፡ሰሎሞን፡ቤተ፡ለኮሞሰ፡አምላከ፡ሞአብ፡ወለአምላከ፡ንጉሦሙ፡ለደቂቀ፡አሞን፤
6ወለአስጠራጤ፡ርኵሶሙ፡ለሲዶና።
7ወከመዝ፡ገብረ፡ለኵሉ፡አንስቲያሁ፡እለ፡እምነኪር፡ወሦዐ፡ወዐጠነ፡ለአማልክቲሆን።
8ወገብረ፡ሰሎሞን፡እኩየ፡ቅድመ፡እግዚአብሔር፡ወኢተለዎ፡ለእግዚአብሔር፡ከመ፡ዳዊት፡አቡሁ።
9ወተምዕዐ፡እግዚአብሔር፡መዐተ፡ላዕለ፡ሰሎሞን፡እስመ፡ሜጠ፡ልቦ፡እምነ፡እግዚአብሔር፡አምላከ፡እስራኤል፡ዘአስተርአዮ፡ካዕበ።
10ወአዘዞ፡በእንተዝ፡ነገር፡ከመ፡ለዝሉፉ፡ኢይሖር፡ኀበ፡አማልክተ፡ባዕድ፡ወከመ፡ይዕቀብ፡ወይግበር፡ኵሎ፡ዘአዘዞ፡እግዚእ፡እግዚአብሔር፡ወኢኮነ፡ልቡ፡ፍጹመ፡ምስለ፡እግዚአብሔር፡ከመ፡ልበ፡ዳዊት፡አቡሁ።
11ወይቤሎ፡እግዚአብሔር፡ለሰሎሞን፡እስመ፡ዘንተ፡ገበርከ፡ወኢዐቀብከ፡ትእዛዝየ፡ወሕግየ፡ዘአዘዝኩከ፡ነፂረ፡እኔፅራ፡ለመንግሥትከ፡እምነ፡እዴከ፡ወእሁቦ፡ለገብርከ።
12ወባሕቱ፡በመዋዕሊከሰ፡ኢይገብሮ፡ለዝንቱ፡በእንተ፡ዳዊት፡አቡከ፤ እምነ፡እዴሁ፡ለወልድከ፡እነሥእ።
13ወባሕቱ፡አኮ፡ኵሎ፡መንግሥቶ፡ዘእነሥእ፤ አሐተ፡በትረ፡እሁቦ፡ለወልድከ፡በእንተ፡ዳዊት፡ገብርየ፡ወበእንተ፡ኢየሩሳሌም፡ሀገርየ፡እንተ፡ኀረይኩ።
14ወአቀመ፡እግዚአብሔር፡ሰይጣነ፡ላዕለ፡ሰሎሞን፡አዴርሃ፡ኤዶማዊ፡ወኤሴሮም፡ወልደ፡ኤልያዳሔ፡ዘእምነ፡ረምማቴር፡ወአድረዓዘር፡ንጉሠ፡ሱባ፡እግዚኡ ወተጋብኡ፡ምስሌሁ፡ዕደው፡ወውእቱ፡መልአከ፡ማዕሌት፡ወአስተጋብኣ፡ለደማስቆ፡ወኮነ፡ሰይጣን፡ላዕለ፡እስራኤል፡በኵሉ፡መዋዕለ፡ሰሎሞን፡ወአዴር፡ኤዶማዊ፡እምነ፡ዘመደ፡መንግሥት፡ዘኤዶምያስ፡ውእቱ።
15ወአመ፡ሠረዎሙ፡ዳዊት፡ለኤዶም፡አመ፡ሖረ፡ኢዮአብ፡መልአከ፡ኅይሉ፡ለዳዊት፡ከመ፡ይቅብሮሙ፡ለቅቱላን፡ቀተለ፡ኵሎ፡ተባዕቶሙ፡ለኤዶምያስ።
16እስመ፡፮አውራኀ፡ነበረ፡ህየ፡ኢዮአብ፡ወኵሉ፡እስራኤል፡ምስሌሁ፡ውስተ፡ኤዶምያስ፡እስከ፡ሠረወ፡ኵሎ፡ተባዕቶሙ፡ለኤዶምያስ።
17ወአምሠጠ፡ውእቱ፡አዴር፡ወኵሉ፡ደቀ፡አቡሁ፡ምስሌሁ፡ሰብአ፡ኤዶምያስ፡ወቦኡ፡ውስተ፡ግብጽ፡ወአዴርሰ፡ሕፃን፡ንኡስ፡ውእቱ።
18ወተንሥኡ፡ዕደው፡እምነ፡ኤዶምያስ፡ሀገር፡ወሖሩ፡ውስተ፡ፋራን፡ወነሥኡ፡ዕደወ፡ምስሌሆሙ፡ወሖሩ፡ኀበ፡ፈርዖን፡ንጉሠ፡ግብጽ፡ወቦአ፡አዴር፡ኀበ፡ፈርዖን፡ወወሀቦ፡ቤተ፡ወአዘዘ፡ሎቱ፡ሲሳዮ።
19ወረከበ፡አዴር፡ሞገሰ፡በቅድመ፡ፈርዖን፡ፈድፋደ፡ወወሀቦ፡ብእሲት፡እኅታ፡ለብእሲቱ፡እንተ፡ትልህቃ፡ለቴቄምናስ።
20ጋንሌትሃ፡ወለደት፡ወሐጸነቶ፡ቴቄምናስ፡ምስለ፡ደቂቀ፡ፈርዖን፡ወነበረ፡ጋኔቤት፡ማእከሎሙ፡ለደቂቀ፡ፈርዖን።
21ወሰምዐ፡አዴር፡ከመ፡ሰከበ፡ዳዊት፡ምስለ፡አበዊሁ፡ወከመ፡ሞተ፡ኢዮአብኒ፡መልአከ፡ኀይሉ፡ወይቤሎ፡አዴር፡ለፈርዖን፡ፈንወኒ፡ወእእቱ፡ብሔርየ።
22ወይቤሎ፡ፈርዖን፡ምንተ፡አኀጣእኩከ፡እምአመ፡ምስሌየ፡ሀለውከ፡ከመ፡ተፍቅድ፡ትሖር፡እምነ፡ብሔርየ፡ተአቱ፡ብሔረከ፡ወይቤሎ፡አዴር፡አልቦ፤ ዳእሙ፡ፈንዎ፡ፈንወኒ፡ወአተወ፡አዴር፡ብሔሮ፡ወዛቲ፡ይእቲ፡እኪት፡እንተ፡ገብረ፡አዴር፡ተዐገሎሙ፡ለእስራኤል፡ወነግሠ፡ላዕለ፡ምድረ፡ኤዶም።
26ወኢዮርብዓም፡ወልደ፡ናባጥ፡ኤፍራታዊ፡ዘእምነ፡ሶርያ፡ወልደ፡ብእሲት፡መበለተ፡ገብረ፡ሰሎሞን።
27ወዝንቱ፡ውእቱ፡ግብር፡ዘገብረ፡አንሥአ፡እዴሁ፡ላዕለ፡ሰሎሞን፡ወሰሎሞንሰ፡ንጉሥ፡ሐነጸ፡ጸናፌ፡ጥቅመ፡ወፈጸመ፡ቅጽረ፡ሀገረ፡ዳዊት፡አቡሁ።
28ወኢዮርብዓም፡ብእሲ፡ጽኑዕ፡ውእቱ፡ወኀያል፡ወርእዮ፡ሰሎሞን፡ለውእቱ፡ወልድ፡ከመ፡ውእቱ፡ብእሲ፡ውስተ፡ግብር፡ወሤሞ፡ላዕለ፡አርሶስ፡በቤተ፡ዮሴፍ።
29ወእምዝ፡ወፅአ፡ኢዮርብዓም፡እምኢየሩስሌም፡በእማንቱ፡መዋዕል፡ወረከቦ፡አኪያ፡ሴሎናዊ፡ነቢይ፡በውስተ፡ፍኖት፡ወአግኀሦ፡እምነ፡ፍኖት፡ወአኪያሰ፡ይለብስ፡ልብሰ፡ሐዲሰ፡ወክልኤሆሙ፡ውስተ፡ሐቅል፡ሀለዉ።
30ወነሥአ፡አክያ፡ልብሰ፡ሐዲሰ፡በላዕሌሁ፡ወሠጠጦ፡፲ወ፪ሥጠተ።
31ወይቤሎ፡ለኢዮርብዓም፡ንሣእ፡ለከ፡፲ሥጠተ፡እስመ፡ከመዝ፡ይቤ፡እግዚአብሔር፡አምላከ፡እስራኤል፡ናሁአ፡አነአ፡እኔፅራ፡ለመንግሥት፡እምነ፡እደ፡ሰሎሞን፡ወእሁበከ፡፲በትረ።
32ወሎቱሰ፡፪በትር፡ይኩኖ፡በእንተ፡ዳዊት፡ገብርየ፡ወበእንተ፡ኢየሩሳሌም፡ሀገር፡እንተ፡ኀረይኩ፡ኪያሃ፡እምነ፡ኵሉ፡አህጉረ፡እስራኤል።
33እስመ፡ኀደገኒ፡ወገብረ፡ለአስጠራጤ፡ርኵሶሙ፡ለሲዶና፡ወለከሞስ፡አማልክተ፡ሞአብ፡ወለንጉሦሙ፡ለደቂቀ፡አሞን፡ኀስረ፡ወኢሖረ፡በፍናዊየ፡ከመ፡ይግበር፡ጽድቀ፡በቅድሜየ፡ከመ፡ዳዊት፡አቡሁ።
34ወኢይነሥእ፡ኵሎ፡መንግሥተ፡እምነ፡እዴሁ፡እስመ፡ግዘተ፡እትዋገዝ፡በኵሉ፡መዋዕለ፡ሕይወቱ።
35ወእነሥእ፡መንግሥተ፡እምነ፡እደ፡ወልዱ፡ወእሁበከ፡ለከ፡፲በትረ።
36ወእሁብ፡ለወልዱ፡፪በትረ፡ከመ፡ይኩን፡ንብረቱ፡ለዳዊት፡ገብርየ፡በቅድሜየ፡በኵሉ፡መዋዕል፡በኢየሩሳሌም፡ሀገር፡እንተ፡ኀረይኩ፡ከመ፡እሢም፡ስምየ፡ህየ፡ውስቴታ።
37ወኪያከ፡ኣነሥእ፡ወኣነግሥ፡ላዕለ፡እለ፡ተርፋ፡በነፍስከ፡ወአንተ፡ትከውን፡ንጉሠ፡ላዕለ፡እስራኤል።
38ወእመ፡ዐቀብከ፡ኵሎ፡ዘአዘዝኩከ፡ወሖርከ፡በፍኖትየ፡ወገበርከ፡ጽድቀ፡በቅድሜየ፡ከመ፡ትዕቀብ፡ሕግየ፡ወትእዛዝየ፡በከመ፡ገብረ፡ዳዊት፡ገብርየ፡ወእሄሉ፡ምስሌከ፡ወአሐንጽ፡ለከ፡ቤተ፡ምእመነ፡በከመ፡ሐነጽኩ፡ለዳዊት።
40ወፈቀደ፡ሰሎሞን፡ይቅትሎ፡ለኢዮርብአም፡ወሖረ፡ወተኀጥአ፡ብሔረ፡ግብጽ፡ኀበ፡ሱስቀም፡ንጉሀሠ፡ግብጽ፡ወነበረ፡ውስተ፡ግብጽ፡እስከ፡ሞተ፡ሰሎሞን።
41ወኵሉ፡ነገሩ፡ለሰሎሞን፡ወኵሎ፡ዘገብረ፡ወኵሉ፡ጥበቡ፡ወዘሂ፡ተረፈ፡ናሁ፡ዝንቱ፡ውእቱ፡ዘጽሑፍ፡ውስተ፡መጽሐፈ፡ነገረ፡መዋዕሊሁ።
42ወመዋዕለ፡ነግሠ፡ሰሎሞን፡በኢየሩሳሌም፡፵ዓመተ።
43ወሰከበ፡ሰሎሞን፡ምስለ፡አበዊሁ፡ወቀበርዎ፡ውስተ፡ሀገረ፡ዳዊት፡አቡሁ። ወኮነ፡ሶበ፡ሰምዐ፡ኢዮርብዓም፡ወልደ፡ናባጥ፡እንዘ፡ዓዲሁ፡ውስተ፡ግብጽ፡ሀለወ፡በከመ፡ጐየ፡እምገጹ፡ለሰሎሞን፡ወነበረ፡ውስተ፡ግብጽ፡ይትመሐፀን፡ወተንሥአ፡ወመጽአ፡ውስተ፡ሀገሩ፡ውስተ፡ምድረ፡ሳሪራ፡እንተ፡በደብረ፡ኤፍሬም።
44ወንጉሥ፡ሰሎሞን፡ሰከበ፡ምስለ፡አበዊሁ፡ወነግሠ፡ሮብዓም፡ወልዱ፡ህየንቴሁ።