Biblia Etíope · Biblia Etíope en Ge'ez
Reyes II 18
መጽሐፈ፡ነገሥት፡ዳግማዊ።1ወአስተፋቀዶሙ፡ዳዊት፡ለሕዝብ፡እለ፡ምስሌሁ፡ወሤመ፡ላዕሌሆሙ፡መሳፍንተ፡ወመኳንንተ።
2ወፈነዎሙ፡ዳዊት፡ለሕዝብ፡[ሣልስተ፡እዴሆሙ፡ምስለ፡ኢዮአብ፡ወ]ሣልስተ፡እዴሆሙ፡ምስለ፡አቢሳ፡ወልደ፡ሶርህያ፡እኁሁ፡ለኢዮአብ፡ወሣልስተ፡እዴሆሙ፡ምስለ፡ሴቲ፡ጌትያዊ፡ወይቤሎሙ፡ዳዊት፡ለሕዝብ፡እወፅእ፡አነሂ፡ምስሌክሙ።
3ወይቤልዎ፡ኢትወፅእ፡እስመ፡እመቦ፡ከመ፡ጐየይነ፡ኢይትልወነ፡ልቦሙ፡እስመ፡አንተ፡ከመ፡ኵልነ፡ከመ፡እልፍ፡ወይእዜኒ፡ይኄይስነ፡ሶበ፡ትሄሉ፡ለነ፡ውስተ፡ሀገር፡ረዳኢተ፡ከመ፡ትርድአነ።
4ወይቤሎሙ፡ንጉሥ፡ኵሎ፡ዘይኤድመክሙ፡ቅድመ፡አዕይንቲክሙ፡እገብር፡ወቆመ፡ንጉሥ፡ኀበ፡አንቀጸ፡ሀገር፡ወወፅእ፡ኵሉ፡ሕዝብ፡በበ፻ወበበ፡፲፻።
5ወአዘዞሙ፡ለኢዮአብ፡ወለአቢሳ፡ወለሴቲ፡እንዘ፡ይብል፡መሐኩ፡ሊተ፡ወልድየ፡አበሴሎምሃ፡ወኵሉ፡ሕዝብ፡ሰምዑ፡እንዘ፡ይኤዝዞሙ፡ንጉሥ፡ለኵሉ፡መላእክት፡በእንተ፡አበሴሎም።
6ወወፅኡ፡ኵሉ፡ሕዝብ፡ውስተ፡ገዳም፡ወተቀበልዎሙ፡ለእስራኤል፡ወተቃተልዎሙ፡በውስተ፡ሐቅለ፡ኤፍሬም።
7ወወድቁ፡በህየ፡ሰብአ፡እስራኤል፡ቅድመ፡ሰብአ፡ዳዊት፡ወኮነ፡ዐቢየ፡ቀትለ፡በይእቲ፡ዕለት፡ወሞቱ፡፪፼ብእሲ።
8ወተዘርወ፡ቀትል፡ውስተ፡ኵሉ፡ምድር፡ወበዝኁ፡እለ፡ሞቱ፡በበድው፡እምነ፡እለ፡ተቀትሉ፡በኲናት፡ይእተ፡አሚረ።
9ወተራከቦሙ፡አበሴሎም፡ቅድሜሆሙ፡ለሰብአ፡ዳዊት፡ወአበሴሎምሰ፡ይጼዐን፡ውስተ፡በቅሎ፡ወቦአ፡ውእቱ፡በቅሉ፡ታሕተ፡ዕፅ፡ዐቢይ፡ወተሰቅለ፡ርእሶ፡በዕፅ፡ወተሰቅለ፡ማእከለ፡ሰማይ፡ወምድር፡ወኀለፈ፡በቅል፡እምታሕቴሁ።
10ጠርእዮ፡፩ብእሲ፡ወአይድዖ፡ለኢዮአብ፡ወይቤ፡ርኢክዎ፡ለአበሴሎም፡ኀበ፡ተሰቅለ፡ዲበ፡ዕፅ።
11ወይቤሎ፡ኢዮአብ፡ለውእቱ፡ብእሲ፡ዘአይድዖ፡ናሁ፡ርኢኮ፡ለምንት፡ኢቀተልኮ፡ውስተ፡ምድር፡ወእምወሀብኩከ፡አነ፡፲ብሩረ፡ወዘትቀንት፡አሐደ።
12ወይቤሎ፡ውእቱ፡ብእሲ፡ለኢዮአብ፡ወሶበ፡፲፻ሰቅለ፡ብሩር፡ትደሉ፡ሊተ፡ውስተ፡እዴየ፡እመ፡ኢያውረድኩ፡እዴየ፡ላዕለ፡ወልደ፡ንጉሥ፡እስመ፡ለሊነ፡ሰማዕነ፡በእዘኒነ፡እንዘ፡ይኤዝዞሙ፡ንጉሥ፡ለአቢሳ፡ወለሴቲ፡ወይቤሎሙ፡ተዐቀቡ፡ሊተ፡ወልድየ፡አበሴሎምሃ።
13ኢትግበሩ፡ላዕለ፡ነፍሱ፡ሰይአ፡ሕሡመ፡ወኵሉ፡ቃል፡ኢይትረሳዕ፡በኀበ፡ንጉሥ፡ወአንተስ፡ትቀውም።
14ወይቤ፡ልኢዮአብ፡አነ፡እገብር፡ዘንተሰ፡አኮ፡ከመዝ፡ዘእነብር፡ቅድሜከ፡ወነሥእ፡ኢዮአብ፡፫አሕገ፡ውስተ፡እዴሁ፡ወነደፎ፡በቱ፡ለአበሴሎም፡ውስተ፡ልቡ፡እንዘ፡ዓዲሁ፡ሕያው፡ወሀሎ፡ውስተ፡ማእከለ፡ዕፅ።
15ወዐገትዎ፡፲ደቀ፡ኢዮአብ፡እለ፡ይጸውሩ፡ንዋየ፡ሐቅሉ፡ወረገዝዎ፡ለአበሴሎም፡ወቀተልዎ።
16ወአንፍሐ፡ቀርነ፡ኢዮአብ፡ወሜጦሙ፡ለሕዝብ፡ከመ፡ኢይዴግንዎሙ፡ወኢይቅትልዎሙ፡ለእስራኤል፡እስመ፡መሐኮሙ፡ለሕዝብ፡ኢዮአብ።
17ወነሥኦ፡ለአበሴሎም፡ወወገሮ፡ውስተ፡ጸድፍ፡ዐቢይ፡ውስተ፡ማዕምቅ፡ዘውስተ፡ገዳም፡ወአቀሙ፡ህየ፡ሐውልተ፡እብን፡ዐቢይ፡ጥቀ፡ወኵሉ፡ሰብአ፡እስራኤል፡ጐዩ፡ወአተዉ፡አብያቲሆሙ።
18ወአበሴሎምሰ፡ሞተ፡ወአቀሙ፡ላዕሌሁ፡ሐውልተ፡ዘእምነ፡ቁላተ፡መንግሥት፡እስመ፡ይቤ፡አልቦ፡ውሉደ፡እንከ፡በዘቦቱ፡ይዜክርዎ፡ስሞ፡ወሰመይዋ፡ለይእቲ፡ሐውልት፡እደ፡አበሴሎም፡እስከ፡ዮም።
19ወይቤ፡አኪማሐስ፡እሩጽኑ፡ወእዜንዎ፡ለንጉሥ፡ከመ፡ፈትሐ፡ሎቱ፡እግዚአብሔር፡እምነ፡እደ፡ፀሩ።
20ወይቤሎ፡ኢዮአብ፡ኢኮንከ፡ብእሴ፡ዜና፡አንተ፡ዮም፡በዛቲ፡ዕለት፡ወኢትዜኑ፡በእንተ፡ወልደ፡ንጉሥ፡ከመ፡ሞተ።
21ወይቤሎ፡ኢዮአብ፡ለኵሲ፡ሖር፡ወዜንዎ፡ለንጉሥ፡ኵሎ፡ዘርኢከ፡ወሰገደ፡ኵሲ፡ለኢዮአብ፡ወወፅአ።
22ወደገመ፡ብሂሎቶ፡አኪማሐስ፡ወልደ፡ሳዶቅ፡ለኢዮአብ፡እሩጽኑ፡አነኒ፡ወእትልዎ፡ለኵሲ፡ወይቤሎ፡ኢዮአብ፡ለምንት፡ለከ፡ትረውጽ፡ወልድየ፡ግባእ፡እስመ፡ኢትከውነከ፡ዛቲ፡ዜና፡ለበቍዒትከ፡እመ፡ሖርከ።
23ወይቤሎ፡ወምንትኑ፡እመ፡ሮጽኩ፡ወይቤሎ፡ኢዮአብ፡ሩጽ፡ወሮጸ፡አኪማሐስ፡ፍኖተ፡ኬርቃ፡ወተዐደዎ፡ለኵሲ።
24ወዳዊትሰ፡ይነብር፡ማእከለ፡ክልኤ፡ኆኀት፡ወዐርገ፡ናሕሰ፡ዘይሬኢ፡ዲበ፡ተድባበ፡ዴዴ፡ወአልዐለ፡ዐይኖ፡ወይሬኢ፡ወናሁ፡ብእሲ፡ይረውጽ፡ባሕቲቱ፡ቅድሜሁ።
25ወጸርኀ፡ውእቱ፡ዘይሬኢ፡ወአይድዖ፡ለንጉሥ፡ወይቤሎ፡ንጉሥ፡አመሰ፡ባሕቲቱ፡ውእቱ፡ዜናቦ፡ምስሌሁ፡ወይረውጽ፡ወእንዘ፡ይረውጽ፡ቀርበ።
26ወዓዲ፡ርእየ፡ውእቱ፡ዘይሔውጽ፡ካልአ፡ብእሴ፡እንዘ፡ይረውጽ፡ወጸርኀ፡ውእቱ፡ዘይሔውጽ፡እመልዕልተ፡ዴዴ፡ወይቤ፡ናሁ፡ብእሲ፡ካልእ፡ይረውጽ፡ባሕቲቱ፡ወይቤ፡ንጉሥ፡ወዝንቱኒ፡ዜና፡መጽአ።
27ወይቤ፡ውእቱ፡ዘይሔውጽ፡አንሰ፡እሬኢ፡ሩጸቱ፡ለቀዳማዊ፡ከመ፡ሩጸተ፡አኪማሐስ፡ወልደ፡ሳዶቅ፡ወይቤ፡ንጉሥ፡ብእሲ፡ቡሩክ፡ውእቱ፡ወበእንተ፡ዜና፡ሠናይ፡ይመጽእ።
28ወጸርኀ፡አኪማሐስ፡ወይቤሎ፡ለንጉሥ፡ሰላም፡ለከ፡ወሰገደ፡ሎቱ፡ለንጉሥ፡በገጹ፡ውስተ፡ምድር፡ወይቤሎ፡ይትባረክ፡እግዚአብሔር፡አምላክከ፡ዘዐፀዎሙ፡ለዕደው፡እለ፡ይጸልኡ፡እደዊሆሙ፡በእንተ፡እግዚእየ፡ንጉሥ።
29ወይቤሎ፡ንጉሥ፡ዳኅንኑ፡ወልድየ፡አበሴሎም፡ወይቤሎ፡አኪማሐስ፡ርኢኩ፡ብዙኀ፡ሰብአ፡ከመ፡ይፌኑ፡ገብረ፡ንጉሥ፡ኢዮአብ፡ወገብርከሰ፡ኢያእመርኩ፡ምንተ፡ኮነ፡በህየ።
30ወይቤሎ፡ንጉሥ፡ሖር፡ወቁም፡ዝየ፡ወተግኅሠ፡ወቆመ።
31ወበጽሐ፡ኵሲ፡ወይቤሎ፡ለንጉሥ፡ይዜንዎ፡ለእግዚእየ፡ንጉሥ፡ከመ፡ፈትሐ፡ሎቱ፡እግዚአብሔር፡እምእደ፡ኵሎሙ፡እለ፡ይትነሥኡ፡ላዕሌሁ።
32ወይቤሎ፡ንጉሥ፡ዳኅንኑ፡ወልድየ፡አበሴሎም፡ወይቤሎ፡ኵሲ፡ከመ፡ወልድከ፡ለይኩኑ፡ጸላእቱ፡ለእግዚእየ፡ንጉሥ፡ወኵሎሙ፡እለ፡ይትነሥኡ፡ላዕሌሁ፡ለእኪት።
33ወደንገፀ፡ንጉሥ፡ወዐርገ፡ውስተ፡ጽርሑ፡ዘመልዕልተ፡ዴዴ፡ወበከየ፡ወከመዝ፡ይብል፡እንዘ፡የሐውር፡ወልድየ፡አበሴሎም፡ወልድየ፡አበሴሎም፡መኑ፡እምረሰየኒ፡ሊተ፡ከመ፡አነ፡እሙት፡ህየንቴከ፡ወአነ፡ቤዛከ፡ለእኩን፡ወልድየ፡አበሴሎም።