Biblia Etíope · Biblia Etíope en Ge'ez
Mateo 21
ወንጌል፡ዘማቴዎስ።ዘከመ፡ቦአ፡እግዚእ፡ኢየሱስ፡ኢየሩሳሌም
1ወቀሪቦ፡እግዚእ፡ኢየሱስ፡ኢየሩሳሌም፡በጽሐ፡ቤተ፡ፋጌ፡እንተ፡ገቦ፡ደብረ፡ዘይት፡ወእምዝ፡ፈነወ፡እግዚእ፡ኢየሱስ፡ክልኤተ፡እምአርዳኢሁ።
2ወይቤሎሙ፡ሑሩ፡ሀገረ፡ዘቅድሜክሙ፡ወይእተ፡ጊዜ፡ትረክቡ፡እድግተ፡እስርተ፡ምስለ፡ዕዋላ፡ፍትሕዎሙ፡ወአምጽእዎሙ፡ሊተ።
3ወእመቦ፡ዘይቤለክሙ፡ምንተ፡ትገብሩ፡በሉ፡እግዚኦሙ፡ይፈቅዶሙ፡ወበጊዜሃ፡ይፌንዉክሙ።
4ወዝ፡ኵሉ፡ዘኮነ፡ከመ፡ይትፈጸም፡ዘተብህለ፡በነቢይ።
5«በልዋ፡ለወለተ፡ጽዮን፡ነዋ፡ንጉሥኪ፡ይመጽእ፡ኀቤኪ፡ጻድቅ፡ወየዋህ፡እንዘ፡ይጼዐን፡ዲበ፡እድግት፡ወዲበ፡ዕዋላ።»
6ወሐዊሮሙ፡አርዳኢሁ፡ገብሩ፡በከመ፡አዘዞሙ፡እግዚእ፡ኢየሱስ።
7ወአምጽኡ፡እድግተ፡ወዕዋላ፡ወረሐኑ፡አልባሲሆሙ፡ላዕሌሆሙ፡ወተጽዕነ፡እግዚእ፡ኢየሱስ፡ዲቤሆሙ።
8ወዘይበዝኁ፡ሕዝብ፡ነጸፉ፡አልባሲሆሙ፡ውስተ፡ፍኖት፡ወካልኣንሂ፡መተሩ፡አዕጹቀ፡እምውስተ፡ዕፀው፡ወነጸፉ፡ውስተ፡ፍኖት።
9ወሕዝብሰ፡እለ፡የሐውሩ፡ቅድሜሁ፡ወእለሂ፡ይተልዉ፡ይጸርሑ፡ወይብሉ፡ሆሣዕና፡ለወልደ፡ዳዊት፡ቡሩክ፡ዘይመጽእ፡በስመ፡እግዚአብሔር፡ሆሣዕና፡በአርአያም።
10ወበዊኦ፡እግዚእ፡ኢየሱስ፡ኢየሩሳሌም፡ተሀውከት፡ኵላ፡ሀገር፡እንዘ፡ትብል፡መኑ፡ውእቱ፡ዝንቱ።
11ወይቤሉ፡አሕዛብ፡ዝ፡ውእቱ፡ኢየሱስ፡ነቢይ፡ዘእምናዝሬት፡ዘገሊላ።
12ወቦአ፡እግዚእ፡ኢየሱስ፡ቤተ፡መቅደስ፡ወሰደደ፡ኵሎ፡እለ፡ይሠይጡ፡ወይሣየጡ፡በቤተ፡መቅደስ፡ወገፍትዐ፡ማእዳቲሆሙ፡ለመወልጣን፡ወመናብርቲሆሙ፡ለእለ፡ይሠይጡ፡ርግበ።
13ወይቤሎሙ፡ጽሑፍ፡ዘይብል፡ቤትየሰ፡ቤተ፡ጸሎት፡ይሰመይ፡ወአንትሙሰ፡ረሰይክምዎ፡በኣተ፡ፈያት፡ወሰረቅት።
በእንተ፡ዕዉራን፡ወሐንካሳን
14ወመጽኡ፡ኀቤሁ፡ዕዉራን፡ወሐንካሳን፡በቤተ፡መቅደስ፡ወአሕየዎሙ።
15ወሶበ፡ርእዩ፡ሊቃነ፡ካህናት፡ወጸሐፍት፡መንክረ፡ዘገብረ፡ወደቂቅኒ፡እንዘ፡ይጸርሑ፡በቤተ፡መቅደስ፥ ወይብሉ፡ሆሣዕና፡ለወልደ፡ዳዊት፡ኢሐወዞሙ፡አላ፡አንጐርጐሩ።
16ወይቤልዎ፡ኢትሰምዕኑ፡ዘይብሉ፡እሉ፡ደቂቅ፡ወይቤሎሙ፡እግዚእ፡ኢየሱስ፡እወ፡አልቦሁ፡አመ፡አንበብክሙ፡ዘይቤ፡«እምአፈ፡ደቂቅ፡ወሕፃናት፡አስተዳሎከ፡ስብሐተ።»
17ወኀደጎሙ፡ወወፅአ፡አፍኣ፡እምሀገር፡ወቦአ፡ቢታንያ፡ወቤተ፡ህየ።
በእንተ፡በለስ፡እንተ፡አልባቲ፡ፍሬ
18ወጸቢሖ፡እንዘ፡የዐርግ፡እግዚእ፡ኢየሱስ፡ሀገረ፡ርኅበ።
19ወርእየ፡ዕፀ፡በለስ፡በፍኖት፡ወሖረ፡ኀቤሃ፡ይንሣእ፡ፍሬ፡እምኔሃ፡ወኢረከበ፡ውስቴታ፡ዘእንበለ፡ቈጽል፡ባሕቲቱ፡ወይቤላ፡ኢይኩን፡እንከ፡ፍሬ፡እምውስቴትኪ፡ለዓለም፡ወየብሰት፡በጊዜሃ፡ይእቲ፡በለስ።
20ወርእዮሙ፡አርዳኢሁ፡አንከሩ፡ወይቤሉ፡እፎ፡በጊዜሃ፡የብሰት፡ዛቲ፡በለስ።
21ወአውሥአ፡እግዚእ፡ኢየሱስ፡ወይቤሎሙ፡አማን፡እብለክሙ፡እመ፡ብክሙ፡ሃይማኖት፡ወኢትናፍቁ፡አኮ፡ክመ፡ዕፀ፡ባሕቲቶ፡ዘትገብሩ፡አላ፡ለዝንቱ፡ደብር፡ለእመ፡ትብልዎ፡ተንሥእ፡ወተወረው፡ውስተ፡ባሕር፡ይከውን፡ለክሙ።
22ወኵሎ፡ዘሰአልክሙ፡በጸሎት፡እንዘ፡ትትአመኑ፡ትነሥኡ።
ዘከመ፡ተስእልዎ፡ካህናት፡ወረበናት፡ለእግዚእ፡ኢየሱስ
23ወበዊኦ፡ቤተ፡መቅደስ፡እንዘ፡ይሜህር፡ቀርቡ፡ኀቤሁ፡ሊቃነ፡ካህናት፡ወመላህቅተ፡ሕዝብ፡እንዘ፡ይብሉ፡በመባሕተ፡መኑ፡ትገብር፡ዘንተ፡ወመኑ፡ወሀበከ፡ዘንተ፡ሥልጣነ።
24ወአውሥአ፡እግዚእ፡ኢየሱስ፡ወይቤሎሙ፡እሴአለክሙ፡አነሂ፡አሐተ፡ቃለ፡ወእምከመ፡ነገርክሙኒ፡አነሂ፡አየድዐክሙ፡በአይ፡ሥልጣን፡እገብር፡ዘንተ።
25ጥምቀቱ፡ለዮሐንስ፡እምአይቴ፡ውእቱ፡እምሰማይኑ፡ወሚመ፡እምሰብእ፡ወኀለዩ፡በበይናቲሆሙ፡ወይቤሉ፡እመ፡ንብሎ፡እምሰማይ፡ይብለነ፡በእፎኬ፡ዘኢአመንክምዎ።
26ወእመሂ፡ንብሎ፡እምሰብእ፡ንፈርሆሙ፡ለሕዝብ፡እስመ፡ከመ፡ነቢይ፡ይሬእይዎ፡ለዮሐንስ።
27ወአውሥእዎ፡ለእግዚእ፡ኢየሱስ፡ወይቤልዎ፡ኢነአምር፡ወይቤሎሙ፡ውእቱኒ፡አነሂ፡ኢያየድዐክሙ፡በአይ፡ሥልጣን፡እገብር፡ዘንተ።
ምሳሌ፡በእንተ፡ክልኤቱ፡አኀው
28ወምንተ፡ትብሉ፡አሐዱ፡ብእሲ፡ቦቱ፡ክልኤቱ፡ደቂቅ፡አኀው፡ወይቤሎ፡ለቀዳማዊ፡ወልድየ፡ሑር፡ተቀነይ፡ዮም፡ውስተ፡ዐጸደ፡ወይንየ።
29ወአውሥአ፡ወይቤ፡ኦሆ፡እግዚእየ፡ወኢሖረ።
30ወለካልኡኒ፡ዘይንእስ፡ይቤሎ፡ከማሁ፡ወአውሥአ፡ወይቤ፡እንብየ፡ወእምድኅረዝ፡ነስሐ፡ወሖረ።
31መኑ፡እንከ፡እምክልኤሆሙ፡ዘገብረ፡ፈቃደ፡አቡሁ፡ወይቤልዎ፡ደኃራዊ፡ወይቤሎሙ፡እግዚእ፡ኢየሱስ፡አማን፡እብለክሙ፡ከመ፡ኃጥኣን፡ወመጸብሓን፡ወዘማውያን፡ይቀድሙክሙ፡በዊአ፡ውስተ፡መንግሥተ፡እግዚአብሔር።
32እስመ፡መጽአ፡ኀቤክሙ፡ዮሐንስ፡በፍኖተ፡ጽድቅ፡ወኢአመንክምዎ፡ወመጸብሓንሰ፡ወዘማውያን፡አምንዎ፡ወአንትሙሰ፡ርእየክሙሂ፡ኢነሳሕክሙ፡ጥቀ፡ድኅረ፡ለአሚን፡ቦቱ።
ምሳሌ፡በእንተ፡ዐጸደ፡ወይን
33ወይቤሎሙ፡ካእልተ፡ምሳሌ፡ስምዑ፡ብእሲ፡በዓለ፡ቤት፡ተከለ፡ዐጸደ፡ወይን፡ወገብረ፡ሎቱ፡ጸቈነ፡ወከረየ፡ውስቴቱ፡ምክያደ፡ወሐነጸ፡ማኅፈደ፡ወወሀቦሙ፡ለዐቀብት፡ወነገደ።
34ወአመ፡በጽሐ፡ጊዜ፡ፍሬሁ፡ፈነወ፡አግብርቲሁ፡ኀበ፡ዐቀብት፡ከመ፡ያምጽኡ፡ሎቱ፡እምፍሬ፡ወይኑ።
35ወአኀዝዎሙ፡እሉ፡ዐቀብት፡ለአግብርቲሁ፡ቦ፡ዘቀሠፉ፡ወቦ፡ዘወገሩ፡ወቦ፡ዘቀተሉ።
36ወእምዝ፡ፈነወ፡ካልኣነ፡አግብርተ፡እለ፡ይበዝኁ፡እምቀደምት፡ወኪያሆሙኒ፡ከማሆሙ፡ረሰይዎሙ።
37ወድኅረ፡ፈነወ፡ኀቤሆሙ፡ወልዶ፡እንዘ፡ይብል፡የኀፍርዎ፡ለወልድየሰ።
38ወሶበ፡ርእይዎ፡እሉ፡ዐቀብት፡ለወልዱ፡ይቤሉ፡በበይናቲሆሙ፡ነዋ፡ዝ፡ውእቱ፡ወራሲሁ፡ንዑ፡ንቅትሎ፡ወንርከብ፡ርስቶ።
39ወነሥእዎ፡ወአውፅእዎ፡አፍኣ፡እምዐጸደ፡ወይን፡ወቀተልዎ።
40ወአመ፡መጽአ፡በዓለ፡ዐጸደ፡ወይን፡ምንተ፡እንከ፡ይሬስዮሙ፡ለእሉ፡ዐቀብት።
41ወይቤልዎ፡በእኪት፡ይቀትሎሙ፡ለእኩያን፡ወወይኖሂ፡ይሁብ፡ለካልኣን፡ዐቀብት፡እለ፡ይሁብዎ፡ፍሬሁ፡በበጊዜሁ።
42ወይቤሎሙ፡እግዚእ፡ኢየሱስ፡አልቦሁ፡አመ፡አንበብክሙ፡ውስተ፡መጻሕፍት፡«እብን፡እንተ፡መነንዋ፡ነደቅት፡ይእቲ፡ኮነት፡ውስተ፡ርእሰ፡ማዕዘንት፡እምኀበ፡እግዚአብሔር፡ኮነት፡ዛቲ፡ወነካር፡ይእቲ፡ለአዕይንቲነ።»
43በእንተ፡ዝንቱ፡እብለክሙ፡ከመ፡ትትሀየድ፡እምኔክሙ፡መንግሥተ፡እግዚአብሔር፡ወትትወሀብ፡ለካልኣን፡እለ፡ይገብሩ፡ፍሬሃ።
44ወዘሰ፡ወድቀ፡ዲበ፡ይእቲ፡እብን፡ይትቀጠቀጥ፡ወለዘሂ፡ወድቀት፡ዲቤሁ፡ተሐርጾ።
45ወሰሚዖሙ፡ሊቃነ፡ካህናት፡ወፈሪሳውያን፡ምሳልያቲሁ፡አእመሩ፡ከመ፡በእንቲኣሆሙ፡ይብል፤
46ወእንዘ፡ይፈቅዱ፡የአኀዝዎ፡ፈርህዎሙ፡ለሕዝብ፡እስመ፡ከመ፡ነቢይ፡ውእቱ፡በኀቤሆሙ።