Biblia Etíope · Biblia Etíope en Ge'ez
Mateo 20
ወንጌል፡ዘማቴዎስ።በእንተ፡ምሳሌ፡ዐቀብተ፡ወይን
1እስመ፡ትመስል፡መንግሥተ፡ሰማያት፡ብእሴ፡በዓለ፡ቤት፡ዘወፅአ፡በነግህ፡ይትዐሰብ፡ገባእተ፡ለዐጸደ፡ወይኑ።
2ወተካሀሎሙ፡ዐስቦሙ፡በበ፡ዲናር፡ለዕለት፡ወፈነዎሙ፡ውስተ፡ዐጸደ፡ወይኑ፡ይትቀነዩ።
3ወወፂኦ፡ጊዜ፡ሠለስቱ፡ሰዓት፡ርእየ፡ካልኣነ፡እንዘ፡ይቀውሙ፡ውስተ፡ምሥያጥ፡ፅሩዓነ።
4ወሎሙኒ፡ይቤሎሙ፡ሑሩ፡አንትሙኒ፡ውስተ፡ዐጸደ፡ወይንየ፡ተቀነዩ፡ወዘረትዐኒ፡እሁበክሙ፡ወእሙንቱሂ፡ሖሩ።
5ወካዕበ፡ወፂኦ፡ጊዜ፡ስሱ፡ወተስዑ፡ሰዓት፡ገብረ፡ከማሁ፡ክመ።
6ወጊዜ፡ዐሥሩ፡ወአሐዱ፡ሰዓት፡ወፂኦ፡ረከበ፡ካልኣነ፡እንዘ፡ይቀውሙ፡ወይቤሎሙ፡ምንትኑ፡ዘአቀመክሙ፡ዝየ፡ኵሎ፡ዕለተ፡ፅሩዓኒክሙ።
7ወይቤልዎ፡እስመ፡አልቦ፡ዘተዐሰበነ፡ወይቤሎሙ፡ሑሩ፡አንትሙኒ፡ውስተ፡ዐጸደ፡ወይንየ፡ወተቀነዩ፡ወዘረትዐኒ፡እሁበክሙ።
8ወመስዮ፡ይቤሎ፡በዓለ፡ዐጸደ፡ወይን፡ለመጋቢሁ፡ጸውዖሙ፡ለገባእት፡ወሀቦሙ፡ዐስቦሙ፡ወአኀዝ፡ቅድመ፡እምደኀርት፡እስከ፡ቀደምት።
9ወመጽኡ፡እለ፡ዐሥሩ፡ወአሐዱ፡ሰዓት፡ወነሥኡ፡በበ፡ዲናር።
10ወመጽኡ፡ቀደምት፡ወመሰሎሙ፡ዘያፈደፍዱ፡ነሢአ፡እምእሉ፡ወነሥኡ፡በበ፡ዲናር፡እሙንቱሂ።
11ወነሢኦሙ፡አንጐርጐሩ፡ላዕሌሁ፡ለበዓለ፡ቤት።
12እንዘ፡ይብሉ፡ለእሉ፡ደኀርት፡ዘአሐተ፡ሰዓተ፡ተቀንዩ፡አስተዓረይኮሙ፡ምስሌነ፡ለእለ፡ጾርነ፡ክበዳ፡ወላህባ፡ለዕለት።
13ወአውሥአ፡ወይቤሎ፡ለአሐዱ፡እምኔሆሙ፡ኢዐመፅኩከ፡ዐርክየ፡አኮኑ፡በዲናር፡ተካሀልኩከ።
14ንሣእ፡ዘይረክበከ፡ወሑር፡ወፈቀድኩ፡አነ፡ለዝንቱ፡ደኃራዊ፡አሀቦ፡ከማከ።
15ወሚመ፡ኢይከውነኒሁ፡እግበር፡ዘፈቀድኩ፡በንዋይየ፡አው፡ዐይንከኑ፡ሐማሚ፡ውእቱ፡እስመ፡አነ፡ኄር፡አነ።
16ከማሁኬ፡ይከውኑ፡ደኀርት፡ቀደምተ፡ወቀደምትኒ፡ደኀርተ፡እስመ፡ብዙኃን፡ጽዉዓን፡ወኅዳጣን፡ኅሩያን።
ዘከመ፡ነገሮሙ፡በእንተ፡ሕማሙ፡ወሞቱ
17ወእንዘ፡የዐርግ፡እግዚእ፡ኢየሱስ፡ኢየሩሳሌም፡ነሥኦሙ፡ለዐሠርቱ፡ወክልኤቱ፡አርዳኢሁ፡እንተ፡ባሕቲቶሙ፡ወአግኀሦሙ፡እምፍኖት፡ወይቤሎሙ።
18ናሁ፡ነዐርግ፡ኢየሩሳሌም፡ወይእኅዝዎ፡ለወልደ፡ዕጓለ፡እመሕያው፡ወያገብእዎ፡ኀበ፡ሊቃነ፡ካህናት፡ወጸሐፍት፡ወይኴንንዎ፡በሞት።
19ወይሜጥውዎ፡ለሕዝብ፡ወይሣለቁ፡ላዕሌሁ፡ወይቀሥፍዎ፡ወይሰቅልዎ፡ወበሣልስት፡ዕለት፡ይትነሣእ።
በእንተ፡ደቂቀ፡ዘብዴዎስ
20ወእምዝ፡መጽአት፡ኀቤሁ፡እሞሙ፡ለደቂቀ፡ዘብዴዎስ፡ምስለ፡ደቂቃ፡ወሰገደት፡ሎቱ፡እንዘ፡ትስእል፡እምኀቤሁ።
21ወይቤላ፡ምንተ፡ትፈቅዲ፡እግበር፡ለኪ፡ወትቤሎ፡ረሲ፡ሊተ፡ከመ፡ይንበሩ፡እሉ፡ደቂቅየ፡ክልኤሆሙ፡አሐዱ፡በየማንከ፡ወአሐዱ፡በጸጋምከ፡በመንግሥትከ።
22ወአውሥአ፡እግዚእ፡ኢየሱስ፡ወይቤ፡ኢተአምሩ፡ዘትስእሉ፡ትክሉኑ፡ሰትየ፡ጽዋዕ፡ዘአነ፡እሰቲ፡ወጥምቀትየኒ፡ዘአነ፡እጠመቅ፡ትጠመቁኑ፡ወይቤልዎ፡እወ፡ንክል።
23ወይቤሎሙ፡ጽዋዕየሰ፡ትሰትዩ፡ወጥምቀትየኒ፡ትጠመቁ፡ወነቢረሰ፡በየማንየ፡ወበጸጋምየ፡አኮ፡አነ፡ዘእሁብ፡ዘእንበለ፡ለእለ፡አስተዳለወ፡ሎሙ፡አቡየ፡ዘበሰማያት።
24ወሰሚዖሙ፡ዐሠርቱ፡አንጐርጐሩ፡ላዕለ፡ክልኤቱ፡አኀው።
25ወጸውዖሙ፡እግዚእ፡ኢየሱስ፡ወይቤሎሙ፡ኢተአምሩኑ፡ከመ፡መኳንንቲሆሙ፡ለአሕዛብ፡ይኴንንዎሙ፡ወዐበይቶሙ፡ይሤለጡ፡ላዕሌሆሙ።
26ወለክሙሰ፡አኮ፡ከማሁ፡ወባሕቱ፡ዘይፈቅድ፡እምኔክሙ፡ይኩን፡ዐቢየ፡ይኩንክሙ፡ገብረ።
27ወዘሂ፡ይፈቅድ፡እምኔክሙ፡ይኩን፡ሊቀ፡ይኩንክሙ፡ላእከ።
28እስመ፡ኢመጽአ፡ወልደ፡ዕጓለ፡እመሕያው፡ከመ፡ይትለአክዎ፡ዘእንበለ፡ዳእሙ፡ከመ፡ይትለአክ፡ወየሀብ፡ነፍሶ፡ቤዛ፡ብዙኃን።
በእንተ፡ክልኤቱ፡ዕዉራን
29ወወፂኦ፡እምኢያሪሆ፡ተለውዎ፡ሰብእ፡ብዙኃን።
30ወናሁ፡ክልኤቱ፡ዕዉራን፡ይነብሩ፡ጥቃ፡ፍኖት፡ወሰሚዖሙ፡ከመ፡እግዚእ፡ኢየሱስ፡የኀልፍ፡ጸርሑ፡እንዘ፡ይብሉ፡ተሣሀለነ፡እግዚኦ፡ወልደ፡ዳዊት።
31ወሰብእሰ፡ይጌሥጽዎሙ፡ከመ፡ያርምሙ፡ወአፈድፈዱ፡ጸሪሐ፡እንዘ፡ይብሉ፡ተሣሀለነ፡እግዚኦ፡ወልደ፡ዳዊት።
32ወቆመ፡እግዚእ፡ኢየሱስ፡ወጸውዖሙ፡ወይቤሎሙ፡ምንተ፡ትፈቅዱ፡እግበር፡ለክሙ።
33ወይቤልዎ፡እግዚኦ፡ከመ፡ይትከሠታ፡አዕይንቲነ።
34ወአምሐርዎ፡ለእግዚእ፡ኢየሱስ፡ወገሠሦሙ፡አዕይንቲሆሙ፡ወበጊዜሃ፡ነጸሩ፡ወተለውዎ።