ግዕዝ
Home Formaciones Libros Biblioteca Ge'ez Contacto
Biblia Etíope · Biblia Etíope en Ge'ez

Marcos 8

ወንጌል፡ዘማርቆስ።

በእንተ፡ሰብዑ፡ኅብስት

1ወይእተ፡አሚረ፡ካዕበ፡ብዙኅ፡ሰብእ፡ሀሎ፡ወአልቦሙ፡ዘይበልዑ፡ወጸውዖሙ፡ለአርዳኢሁ፡ወይቤሎሙ።
2ያምሕሩኒ፡እሉ፡ሰብእ፡ናሁ፡ሣልሶሙ፡ዮም፡እንዘ፡ይጸንሑኒ፡ወአልቦሙ፡ዘይበልዑ።
3ወእመኒ፡ሰዐርክዎሙ፡ርኁባኒሆሙ፡ይእትዉ፡አብያቲሆሙ፡ይደክሙ፡በፍኖት፡እስመ፡ቦ፡እምኔሆሙ፡እምርኁቅ፡ዘመጽኡ።
4ወይቤልዎ፡አርዳኢሁ፡መኑ፡ዘይክል፡በዝየ፡በገዳም፡አጽግቦቶሙ፡ኅብስተ፡ለዝንቱ፡ኵሉ፡ሕዝብ።
5ወይቤሎሙ፡ሚመጠን፡ኀባውዝ፡ብክሙ፡ወይቤልዎ፡ሰብዑ።
6ወአዘዞሙ፡ለሰብእ፡ይርፍቁ፡ዲበ፡ምድር፡ወነሥኦን፡ለሰብዑ፡ኅብስት፡ወአእኰተ፡ወፈተተ፡ወወሀቦሙ፡ለአርዳኢሁ፡ያቅርቡ፡ሎሙ፡ወአቅረቡ፡ለሰብእ።
7ወቦሙ፡ዓሣኒ፡ኅዳጥ፡ወባረከ፡ኪያሁኒ፡ወይቤሎሙ፡አቅርቡ፡ሎሙ፡ዘኒ።
8ወበልዑ፡ወጸግቡ፡ወዘአግኀሡ፡ዘተርፈ፡ፍተታት፡መልአ፡ሰብዐተ፡አስፈሬዳተ።
9ወእለሰ፡በልዕዎ፡የአክሉ፡አርብዓ፡ምእት፡ወእምዝ፡ፈነዎሙ፡ሶቤሃ፡ይሑሩ።
10ወእምዝ፡ዐርገ፡ሐመረ፡ምስለ፡አርዳኢሁ፡ወበጽሐ፡ውስተ፡ደወለ፡ድልማኑታ።

በእንተ፡እለ፡የኀሥሡ፡ትእምርተ፡እምሰማይ

11ወወፅኡ፡ፈሪሳውያን፡ወአኀዙ፡ይትኀሠሥዎ፡ወይሰአልዎ፡ትእምርተ፡እምሰማይ፡እንዘ፡ያሜክርዎ።
12ወተከዘ፡በመንፈሱ፡ወይቤ፡ምንትኑ፡ተኀሥሥ፡ትእምርተ፡ዛቲ፡ትውልድ፡አማን፡እብለክሙ፡ከመ፡ኢይትወሀባ፡ለዛቲ፡ትውልድ፡ትእምርት።
13ወኀደጎሙ፡ወዐርገ፡ካዕበ፡ሐመረ፡ወሖረ፡ማዕዶተ።

በእንተ፡ብኁአ፡ፈሪሳውያን

14ወረስዑ፡ነሢአ፡ኅብስት፡ወአልቦሙ፡ዘእንበለ፡አሐቲ፡ኅብስት፡ምስሌሆሙ፡ውስተ፡ሐመር።
15ወአዘዞሙ፡ወይቤሎሙ፡ዑቁ፡ወተዐቀቡ፡እምነ፡ብኁኦሙ፡ለፈሪሳውያን፡ወእምነ፡ብኁኦሙ፡ለሄሮድሳውያን።
16ወኀለዩ፡በበይናቲሆሙ፡ወይቤሉ፡እስመሁ፡እንጋ፡ኅብስተ፡ኢነሣእነ፡ይብለነ።
17ወአእመሮሙ፡እግዚእ፡ኢየሱስ፡ወይቤሎሙ፡ምንተኑ፡ትኄልዩ፡በልብክሙ፡እስመሁ፡ኅብስት፡አልብክሙ፡ዓዲኑ፡ኢተአምሩ፡ወኢትሌብዉ፡ልብክሙኑ፡ጽሉል።
18አዕይንት፡ብክሙ፡ወኢትሬእዩ፡ወእዝን፡ብክሙ፡ወኢትሰምዑ፡ወኢትዜከሩኑ።
19ዘአመ፡ኀምሰ፡ኅብስተ፡ፈተትኩ፡ለኀምሳ፡ምእት፡ብእሲ፡ሚመጠነ፡አግኀሥክሙ፡አክፋረ፡ዘመልአ፡ፍተታተ፡ዘተርፈ፡ወይቤልዎ፡ዐሠርተ፡ወክልኤተ።
20ወይቤሎሙ፡አመሰኬ፡ሰብዑ፡ኅብስተ፡ለአርብዓ፡ምእት፡ብእሲ፡ሚመጠነ፡አግኀሥክሙ፡አስፈሬዳተ፡ዘመልአ፡ፍተታተ፡ዘተርፈ፡ወይቤልዎ፡ሰብዑ።
21ወይቤሎሙ፡እፎ፡እንከ፡ዘኢትሌብዉ።

በእንተ፡ዕዉር፡ዘቤተ፡ሳይዳ

22ወበጽሑ፡ቤተ፡ሳይዳ፡ወአምጽኡ፡ኀቤሁ፡ዕዉረ፡ወአስተብቍዕዎ፡ይግሥሦ።
23ወአኀዞ፡በእዴሁ፡ለውእቱ፡ዕዉር፡ወአውፅኦ፡አፍኣ፡እምሀገር፡ወተፍአ፡ውስተ፡አዕይንቲሁ፡ወገሠሦ፡ወይቤሎ፡ምንተ፡ትሬኢ።
24ወነጸረ፡ወይቤ፡እሬኢ፡ሰብአ፡ከመ፡ዕፀው፡ያንሶስዉ።
25ወገሠሦ፡አዕይንቲሁ፡ካዕበ፡ወርእየ፡ዳኅነ፡ወነጸረ፡ኵሎ፡ብሩሀ።
26ወፈነዎ፡ቤቶ፡ወይቤሎ፡ኢትባእ፡ውስተ፡አዕጻዳት፡ወአልቦ፡ዘትነግር፡በውስተ፡ሀገርኒ።

ዘከመ፡ተስእሎሙ፡ለሐዋርያት፡እግዚእ፡በቂሳርያ

27ወሖረ፡እግዚእ፡ኢየሱስ፡ወአርዳኢሁ፡ውስተ፡አህጉረ፡ቂሳርያ፡ዘፊልጶስ፡ወተስእሎሙ፡ለአርዳኢሁ፡በፍኖት፡ወይቤሎሙ፡መነ፡ይብለኒ፡ሰብእ።
28ወይቤልዎ፡ዮሐንስሃ፡መጥምቀ፡አው፡ኤልያስሃ፡አው፡አሐዱ፡እምነቢያት።
29ወይቤሎሙ፡አንትሙኬ፡መነ፡ትብሉኒ፡ወተሰጥዎ፡ጴጥሮስ፡ወይቤሎ፡አንተ፡ውእቱ፡ክርስቶስ።
30ወገሠጾሙ፡ከመ፡ኢይንግሩ፡ወኢለመኑሂ፡በእንቲኣሁ።

ዘከመ፡መሀረ፡በእንተ፡ሕማሙ

31ወአኀዘ፡ይምሀሮሙ፡ከመ፡ሀለዎ፡ለወልደ፡ዕጓለ፡እመሕያው፡ብዙኀ፡ያሕምምዎ፡ወያመክርዎ፡ረበናት፡ወሊቃነ፡ካህናት፡ወጸሐፍት፡ወይቀትልዎ፡ወይትነሣእ፡በሣልስት፡ዕለት።
32ወገሀደ፡ነገሮሙ፡ዘንተ፡ነገረ፡ወቀርበ፡ጴጥሮስ፡ወአኀዘ፡ይክልኦ።
33ወተመይጠ፡ወነጸረ፡ኀበ፡አርዳኢሁ፡ወገሠጾ፡ለጴጥሮስ፡ወይቤሎ፡ሑር፡እምድኅሬየ፡ሰይጣን፡እስመ፡ኢትኄሊ፡ዘእግዚአብሔር፡ዘእንበለ፡ዘዕጓለ፡እመሕያው።

በእንተ፡እለ፡ይፀመድዎ፡ለእግዚእ፡ኢየሱስ

34ወጸውዖሙ፡ለሕዝብ፡ምስለ፡አርዳኢሁ፡ወይቤሎሙ፡ዘይፈቅድ፡ይፀመደኒ፡ይጽልኣ፡ለነፍሱ፡ወያጥብዕ፡ወይጹር፡መስቀለ፡ሞቱ፡ወይትልወኒ።
35ወዘይፈቅድ፡ያድኅና፡ለነፍሱ፡ለይግድፋ፡ወዘሰ፡ገደፋ፡ለነፍሱ፡በእንቲኣየ፡ወበእንተ፡ወንጌል፡ይረክባ።
36ወምንተ፡ይበቍዖ፡ለሰብእ፡ለእመ፡ኵሎ፡ዓለመ፡ረብኀ፡ወነፍሶ፡ኀጕለ።
37ወምንተ፡እምወሀበ፡ሰብእ፡ቤዛሃ፡ለነፍሱ።
38ወለዘኒ፡ኀፈረኒ፡ወኀፈረ፡ቃልየ፡በዛቲ፡ትውልድ፡ዘማ፡ወኃጥእት፡ወልደ፡ዕጓለ፡እመሕያውኒ፡የኀፍሮ፡አመ፡ይመጽእ፡በስብሐተ፡አቡሁ፡ምስለ፡መላእክቲሁ፡ቅዱሳን።