Biblia Etíope · Biblia Etíope en Ge'ez
Marcos 7
ወንጌል፡ዘማርቆስ።በእንተ፡ፈሪሳውያን፡ወሥርዐቶሙ
1ወተጋብኡ፡ኀቤሁ፡ጸሐፍት፡ወፈሪሳውያን፡መጺኦሙ፡እምኢየሩሳሌም።
2ወርእይዎሙ፡ለአርዳኢሁ፡እንዘ፡ይበልዑ፡እክለ፡ዘእንበለ፡ይትኀፀቡ፡እደዊሆሙ።
3እስመ፡ፈሪሳውያንሰ፡ወኵሎሙ፡አይሁድ፡ለእመ፡በሕቁ፡ኢተኀፅቡ፡እደዊሆሙ፡ኢይበልዑ፡እክለ፡እስመ፡የዐቅቡ፡ሥርዐቶሙ፡ለረበናት።
4ወዘሂ፡ተሣየጡ፡እምሥያጥ፡ኢይበልዑ፡ለእመ፡ኢያጥመቅዎ፡በማይ፡ወባዕደኒ፡ብዙኀ፡ሕርመተ፡ዘይትዐቀቡ፡ወያጠምቁ፡ጽዋዓተኒ፡ወቈሳቍሳተኒ፡ወጽህርታተኒ፡ወዐራታተኒ።
5ወይቤልዎ፡ጸሐፍት፡ወፈሪሳውያን፡ለምንት፡ኢየሐውሩ፡አርዳኢከ፡በከመ፡ሠርዑ፡ረበናት፡ወዘእንበለ፡ይትኀፀቡ፡እደዊሆሙ፡ይበልዑ፡እክለ።
6ወአውሥአ፡እግዚእ፡ኢየሱስ፡ወይቤሎሙ፡ኦ፡መደልዋን፡ሠናየ፡ተነበየ፡ኢሳይያስ፡ላዕሌክሙ፡በከመ፡ጽሑፍ፡«ዝንቱ፡ሕዝብ፡በከናፍሪሆሙ፡ያከብሩኒ፡ወበልቦሙሰ፡ነዋኀ፡ይርኅቁ፡እምኔየ።
7ወከንቶ፡ያመልኩኒ፡ወይሜህሩ፡ሥርዐታተ፡ትእዛዛተ፡ሰብእ።»
8ወየኀድጉ፡ትእዛዘ፡እግዚአብሔር፡ወየዐቅቡ፡ትእዛዛተ፡ዕጓለ፡እመሕያው፡ጥምቀታተ፡ቈሳቍሳት፡ወጽህርታት፡ወጽዋዓት፡ወባዕደኒ፡ብዙኀ፡ዘይመስሎ፡ለዝንቱ፡ይገብሩ።
9ወይቤሎሙ፡ርቱዕኑ፡ትዕልዉ፡ትእዛዘ፡እግዚአብሔር፡ከመ፡ትዕቀቡ፡ትእዛዘ፡ርእስክሙ።
10ወሙሴ፡ይቤለክሙ፤ «አክብር፡አባከ፡ወእመከ፡ወዘአሕሠመ፡ቃለ፡ላዕለ፡አቡሁ፡ወእሙ፡ሞተ፡ለይሙት።»
11ወአንትሙሰ፡ትብሉ፡ዘይቤሎ፡ለአቡሁ፡አው፡ለእሙ፡ቍርባን፡ዘረባኅከ፡እምኔየ፡ብሂል።
12ወኢታበውሕዎ፡ይግበር፡ምንተኒ፡ለአቡሁ፡ወለእሙ።
13ወትስዕሩ፡ቃለ፡እግዚአብሔር፡በእንተ፡ትእዛዝ፡ዘሠራዕክሙ፡ወዓዲ፡ብዙኀ፡በአምሳለ፡ዝንቱ፡ዘትገብሩ።
14ወጸውዖሙ፡ካዕበ፡ለሕዝብ፡ወይቤሎሙ፡ስምዑ፡ኵልክሙ፡ወለብዉ።
15አልቦ፡ዘይበውእ፡እምአፍኣ፡ውስተ፡አፉሁ፡ለሰብእ፡ዘይክል፡አርኵሶቶ፡ዘእንበለ፡ዳዕሙ፡ዘይወፅእ፡እምልቡ፡ለሰብእ፡ውእቱ፡ያረኵሶ፡ለሰብእ።
16ዘቦ፡እዝን፡ሰሚዐ፡ለይስማዕ።
17ወበዊኦ፡ቤተ፡እምኀበ፡ሕዝብ፡ተስእልዎ፡አርዳኢሁ፡ዘንተ፡አምሳለ።
18ወይቤሎሙ፡ከመዝኑ፡አንትሙሂ፡ኢትሌብዉ፡ኢተአምሩኑ፡ከመ፡ኵሉ፡ዘእምአፍኣ፡ይበውእ፡ውስተ፡ሰብእ፡ኢይክል፡አርኵሶቶ።
19እስመ፡ኢይበውእ፡ውስተ፡ልቡ፡ዘእንበለ፡ዳእሙ፡ውስተ፡ከርሡ፡ክመ፡ወጽመ፡ይትከዐው፡እንዘ፡ያነጽሕ፡ኵሎ፡መባልዕተ።
20ወይቤሎሙ፡ዘይወፅእ፡እምኔሁ፡ለሰብእ፡ውእቱ፡ያረኵሶ፡ለሰብእ።
21እስመ፡እምውስጠ፡ልቡ፡ለሰብእ፡ይወፅእ፡ኵሉ፡ኅሊና፡እኩይ፡ዘውእቱ፡ዝሙት፡ወስርቅ፡ወቀቲል።
22ወሐዊረ፡ብእሲተ፡ብእሲ፡ወትዕግልት፡ወእከይ፡ወጕሕሉት፡ወጽልሑት፡ወምርዓት፡ወፅርፈት፡ወትዕቢት፡ወሕመሜ፡ዐይን፡ወእበድ።
23ዝንቱ፡ኵሉ፡እኩይ፡ዘይወፅእ፡እምውስጥ፡ወያረኵሶ፡ለሰብእ።
24ወተንሢኦ፡እምህየ፡ሖረ፡ብሔረ፡ጢሮስ፡ወሲዶና፡ወቦአ፡ቤተ፡ወኢፈቀደ፡ያእምሮ፡መኑሂ፡ወስእነ፡ተከብቶ።
በእንተ፡ብእሲት፡ሲሮፊኒቂሳዊት
25ወእምዝ፡ሰምዐት፡ብእሲት፡በእንቲኣሁ፡እንተ፡ጋኔን፡እኩይ፡አኀዘ፡ባቲ፡ወለታ፡ወቦአት፡ወሰገደት፡ሎቱ፡ታሕተ፡እገሪሁ።
26ወአረማዊት፡ይእቲ፡ብእሲት፡ወሲሮፊኒቂሳዊት፡ወሰአለቶ፡ያውፅእ፡ጋኔነ፡እምወለታ።
27ወይቤላ፡እግዚእ፡ኢየሱስ፡ኅድጊ፡ቅድመ፡ምዕረ፡ይጽገቡ፡ውሉድ፡እስመ፡ኢኮነ፡ሠናየ፡ነሢአ፡ኅብስተ፡ውሉድ፡ወውሂብ፡ለከለባት።
28ወተሰጥወቶ፡ወትቤሎ፡እወ፡እግዚኦ፡ከለባትኒ፡ይበልዑ፡በታሕተ፡ማእድ፡ፍርፋራተ፡ዘያወድቁ፡ደቂቅ።
29ወይቤላ፡በእንተዝ፡ቃልኪ፡ሑሪ፡ወፅአ፡ውእቱ፡ጋኔን፡እምወለትኪ።
30ወአተወት፡ቤታ፡ወረከበታ፡ለወለታ፡ልብስታ፡ወትነብር፡ዲበ፡ዐራታ፡ወኀደጋ፡ጋኔና።
31ወኀሊፎ፡ካዕበ፡እምጢሮስ፡ሖረ፡እንተ፡ሲዶና፡ላዕለ፡ገሊላ፡ማእከለ፡ዐሠርቱ፡አህጉር።
በእንተ፡በሃም፡ወጽሙም
32ወአምጽኡ፡ኀቤሁ፡በሃመ፡ወጽሙመ፡ወአስተብቍዕዎ፡ከመ፡ይደይ፡እዴሁ፡ላዕሌሁ።
33ወአግኀሦ፡እምኀበ፡ሰብእ፡በባሕቲቱ፡ወወደየ፡አጻብዒሁ፡ውስተ፡እዘኒሁ፡ወተፍአ፡ወገሠሠ፡ልሳኖ።
34ወነጸረ፡ሰማየ፡ወአስተምሐረ፡ወይቤ፡ኤፍታሔ፡ኤፍታሔ፡ተረኀው፡ብሂል።
35ወሶቤሃ፡ተከሥታ፡እዘኒሁ፡ወተፈትሐ፡ማእሰረ፡ልሳኑ፡ወተናገረ፡ርቱዐ።
36ወገሠጾሙ፡ኢይንግሩ፡ወኢለመኑሂ፡ወአምጣነ፡ይከልኦሙ፡ውእቱ፡ፈድፋደ፡ይነግሩ፡ሎቱ።
37ወፈድፋደ፡ያነክሩ፡እንዘ፡ይብሉ፡ሚ፡ሠናይ፡ኵሎ፡ሠናየ፡ገብረ፡ለጽሙማንሂ፡ያሰምዖሙ፡ወለበሃማንሂ፡ያነብቦሙ።