Biblia Etíope · Biblia Etíope en Ge'ez
Lucas 21
ወንጌል፡ዘሉቃስ።በእንተ፡ጸሪቀ፡መበለት
1ወነጸረ፡ወርእየ፡አብዕልተ፡ዘያበውኡ፡መባኦሙ፡ውስተ፡ሙዳየ፡ምጽዋት።
2ወርእየ፡ዕቤረ፡መበለተ፡እንዘ፡ታበውእ፡ክልኤ፡ጸራይቀ።
3ወይቤሎሙ፡አማን፡እብለክሙ፡ከመ፡ዛቲ፡ዕቤር፡ነዳይት፡አብዝኀት፡አብኦ፡መባአ፡ለእግዚአብሔር።
4እስመ፡እሉ፡ኵሎሙ፡እምተረፎሙ፡አብኡ፡መባአ፡ለእግዚአብሔር፡ወዛቲሰ፡እምተጽናሳ፡ኵሎ፡ጥሪታ፡ዘባ፡አብአት።
በእንተ፡ንሥተተ፡ቤተ፡መቅደስ፡ወሙስናሃ፡ለኢየሩሳሌም
5ወቦ፡እለ፡ይቤልዎ፡በእንተ፡ቤተ፡መቅደስ፡ሠናይ፡እበኒሁ፡ወሥርግው፡ንድቁ።
6ወይቤሎሙ፡ትሬእዩኑ፡ዘንተ፡ይመጽእ፡መዋዕል፡አመ፡ኢይትኀደግ፡ዝየ፡እብን፡ዲበ፡እብን፡ዘኢይትነሠት።
7ወተስእልዎ፡ወይቤልዎ፡ሊቅ፡ማእዜ፡ይከውን፡ዝንቱ፡ወምንት፡ተአምሪሁ፡አመ፡ይከውን፡ዝንቱ።
8ወይቤሎሙ፡ዑቁ፡ኢያስሕቱክሙ፡ብዙኃን፡ይመጽኡ፡በስምየ፡እንዘ፡ይብሉ፡አነ፡ውእቱ፡ክርስቶስ፡ወበጽሐ፡ዕድሜሁ፡ወኢትሑሩ፡ወኢትትልውዎሙ።
9ወአመ፡ሰማዕክሙ፡ቀትለ፡ወሀከከ፡ኢትደንግፁ፡እስመ፡ይከውን፡ቅድመ፡ከመዝ፡ወባሕቱ፡አኮ፡ሶቤሃ፡ዘየኀልቅ።
10ወይቤሎሙ፡ይትነሥኡ፡ሕዝብ፡ዲበ፡ሕዝብ፡ወነገሥት፡ዲበ፡ነገሥት።
11ወይመጽእ፡ዐቢይ፡ድልቅልቅ፡ወረኃብ፡በበብሔሩ፡ወፍርሀት፡ላዕለ፡ሰብእ፡ወተኣምር፡ዐቢይ፡ይከውን፡እምሰማይ።
12ወእምቅድመ፡ዝንቱ፡ኵሉ፡ይእኅዙክሙ፡ወይወስዱክሙ፡አዕዋዳተ፡ወይሰድዱክሙ፡ወይሞቅሑክሙ፡ወይወሰዱክሙ፡ኀበ፡ነገሥት፡ወመሳፍንት፡በእንተ፡ስምየ።
13ወዝንቱ፡ይረክበክሙ፡ከመ፡ይኩን፡ስምዐ፡ላዕሌሆሙ።
14ዑቁ፡ኢተኀልዩ፡በልብክሙ፡ዘትብሉ።
15አነ፡እሁበክሙ፡አፈ፡ወጥበበ፡በዘኢይክሉ፡ተዋሥኦተክሙ፡ወተዋቅሦተክሙ፡እለ፡ይትነሥኡ፡ላዕሌክሙ
16ወያገብኡክሙ፡አዝማዲክሙ፡ወአኀዊክሙ፡ወአዕርክቲክሙ፡ወቢጽክሙ።
17ወኵሉ፡ይጸልአክሙ፡በእንተ፡ስምየ፡ወይቀትሉክሙ።
18ወኢትትኀጐል፡አሐቲ፡እምሥዕርተ፡ርእስክሙ።
19ወበትዕግሥትክሙ፡ታጠርይዋ፡ለነፍስክሙ።
20ወአመ፡ርኢክሙ፡እምዘ፡የዐገትዋ፡ሠራዊት፡ለኢየሩሳሌም፡አእምሩ፡ከመ፡በጽሐ፡ሙስናሃ።
21ወይእተ፡አሚረ፡እለ፡ውስተ፡ይሁዳ፡ይጐዩ፡ውስተ፡አድባር፡ወእለሂ፡ማእከላ፡ይወፅኡ፡እምኔሃ፡ወእለሂ፡ውስተ፡በሐውርቲሃ፡ኢይበውእዋ።
22እስመ፡ዕድሜሃ፡ውእቱ፡በዘይትቤቀልዋ፡ከመ፡ይብጻሕ፡ኵሉ፡ዘጽሑፍ፡ላዕሌሃ።
23ወባሕቱ፡አሌ፡ሎን፡ለፅኑሳት፡ወለእለ፡የሐፅና፡በውእቱ፡መዋዕል፡እስመ፡ይከውን፡ዐቢይ፡ምንዳቤ፡ዲበ፡ምድር፡ወመቅሠፍት፡ዲበ፡ዝንቱ፡ሕዝብ።
24ወይወድቁ፡በኲናት፡ወይፄወዉ፡ውስተ፡ኵሉ፡አሕዛብ፡ወይከይድዋ፡አሕዛብ፡ለኢየሩሳሌም፡እስከ፡ይበጽሕ፡ዕድሜሆሙ፡ለአሕዛብ።
በእንተ፡ዳግም፡ምጽአቱ፡ለእግዚእ፡ኢየሱስ
25ወይከውን፡ተአምር፡ውስተ፡ፀሓይ፡ወወርኅ፡ወከዋክብትኒ፡ይወድቁ፡እምሰማይ፡ዲበ፡ምድር፡ወይትመነደቡ፡አሕዛብ፡ወየኀሥሩ፡እምድምፀ፡ባሕር፡ወባሕርኒ፡ትደምፅ፡ወትትከወስ።
26ወትወፅእ፡ነፍሰ፡ዕጓለ፡እመሕያው፡እምፍርሀት፡ወእምትሕዝብት፡ዘይመጽእ፡በዓለም፡እስመ፡ይትከወስ፡ኀይለ፡ሰማያት፡ይእተ፡አሚረ።
27አሜሃ፡ይሬእይዎ፡ለወልደ፡ዕጓለ፡እመሕያው፡እንዘ፡ይመጽእ፡በደመና፡ሰማይ፡ምስለ፡ኀይል፡ብዙኅ፡ወስብሐት።
28ወአመ፡ኮነ፡ዝንቱ፡ኵሉ፡ስግዱ፡ወአንሥኡ፡ርእሰክሙ፡እስመ፡በጽሐ፡ዘያድኅነክሙ።
29ወመሰለ፡ሎሙ፡ወይቤሎሙ፡ርእዩ፡በለሰ፡ወኵሎ፡ዕፀወ።
30ወእም፡ከመ፡ርኢክሙ፡ከመ፡ሠረጹ፡ተአምሩ፡ከመ፡አልጸቀ፡ማእረር።
31ከማሁ፡አንትሙኒ፡እምከመ፡ርኢክሙ፡ከመ፡ኮነ፡ዝንቱ፡አእምሩ፡ከመ፡በጽሐት፡መንግሥተ፡እግዚአብሔር።
32አማን፡እብለክሙ፡ከመ፡ኢተኀልፍ፡ዛቲ፡ትውልድ፡እስከ፡ይከውን፡ዝንቱ፡ኵሉ።
33ሰማይ፡ወምድር፡የኀልፍ፡ወቃልየሰ፡ኢየኀልፍ።
ዘከመ፡ይደሉ፡ተዐቅቦ፡ወተጊህ፡ለጸሎት፡በኵሉ፡ጊዜ
34ዑቁ፡ርእሰክሙ፡ኢታክብዱ፡ልበክሙ፡በበሊዕ፡ወበስታይ፡ወበፈጊዕ፡ወበኀልዮ፡መንበርት፡ወትበጽሐክሙ፡ይእቲ፡ዕለት፡ግብተ።
35ከመ፡መሥገርት፡እንተ፡ትወርድ፡ዲበ፡ኵሎሙ፡እለ፡ይነብሩ፡ዲበ፡ምድር።
36ትግሁ፡እንከ፡በኵሉ፡ጊዜ፡ከመ፡ትክሀሉ፡አምሥጦ፡በጸሎትክሙ፡እምነ፡ዝንቱ፡ኵሉ፡ዘይመጽእ፡ወትቁሙ፡ቅድሜሁ፡ለወልደ፡ዕጓለ፡እመሕያው።
37ወኮነ፡መዓልተ፡ይሜህር፡በምኵራብ፡ወሌሊተ፡ይወፅእ፡ወይበይት፡ውስተ፡ደብረ፡ዘይት፡ዘስሙ፡ኤሌዎን።
38ወኵሉ፡ሕዝብ፡ይገይሡ፡ኀቤሁ፡ውስተ፡ምኵራብ፡ያፅምዕዎ፡ቃሎ።