ግዕዝ
Home Formaciones Libros Biblioteca Ge'ez Contacto
Biblia Etíope · Biblia Etíope en Ge'ez

Lucas 20

ወንጌል፡ዘሉቃስ።

ዘከመ፡ተስእልዎ፡ለእግዚእ፡ኢየሱስ፡ሊቃነ፡ካህናት

1ወእምዝ፡አሐተ፡ዕለተ፡እንዘ፡ይሜህሮሙ፡ለሕዝብ፡በምኵራብ፡ወይነግሮሙ፡ቆሙ፡ላዕሌሁ፡ሊቃነ፡ካህናት፡ወጸሐፍት፡ወረበናት።
2ወይቤልዎ፡ንግረነ፡በመባሕተ፡መኑ፡ትገብር፡ዘንተ፡ወመኑ፡አብሐከ፡ትግበር፡ከመዝ።
3ወአውሥአ፡ወይቤሎሙ፡እሴአለክሙ፡አነሂ፡አሐተ፡ነገረ፡ወንግሩኒ።
4ጥምቀቱ፡ለዮሐንስ፡እምአይቴ፡ይእቲ፡እምሰማይኑ፡ወሚመ፡እምሰብእ።
5ወተባሀሉ፡በበይናቲሆሙ፡እመሂ፡ንብሎ፡እምሰማይ፡ይብለነ፡እፎ፡ኢአመንክምዎ።
6ወእመሂ፡ንብሎ፡እምሰብእ፡ይዌግሩነ፡ኵሉ፡ሕዝብ፡እስመ፡ኵሎሙ፡ተአመንዎ፡ለዮሐንስ፡ከመ፡ነቢይ፡ውእቱ።
7ወአውሥእዎ፡ወይቤልዎ፡ኢነአምር፡እምኀበ፡ኮነት።
8ወይቤሎሙ፡እግዚእ፡ኢየሱስ፡አነሂ፡ኢይነግረክሙ፡በመባሕተ፡መኑ፡እገብር፡ከመዝ።

በእንተ፡ዐቀበተ፡ወይን

9ወአኀዘ፡ይመስል፡ሎሙ፡ለሕዝብ፡ዘንተ፡ምሳሌ፡ወይቤሎሙ፡ብእሲ፡ተከለ፡ወይነ፡ወሤመ፡ሎቱ፡ዐቀብተ፡ለወይኑ፡ወአክረየ፡ምክያደ፡ወሐነጸ፡ማኅፈደ፡ወነገደ፡ርኁቀ፡ብሔረ፡ወጐንደየ፡አቲወ።
10ወአመ፡ኮነ፡ጊዜ፡ፍሬሁ፡ፈነወ፡ገብሮ፡ኀበ፡ዐቀብተ፡ወይን፡ከመ፡ይፈንዉ፡ሎቱ፡እምፍሬ፡ወይኑ፡ወዘበጥዎ፡ዐቀብተ፡ወይን፡ለገብሩ፡ወፈነውዎ፡ዕራቆ።
11ወዳግመ፡ፈነወ፡ካልአኒ፡ገብሮ፡ወኪያሁኒ፡ዘበጥዎ፡ወአኅሠርዎ፡ወፈነውዎ፡ዕራቆ።
12ወካዕበ፡ፈነወ፡ሣልሰኒ፡ገብሮ፡ወኪያሁኒ፡ፈቅእዎ፡ወሰደድዎ።
13ወይቤ፡በዓለ፡ዓጸደ፡ወይን፡ምንተ፡እንከ፡እሬሲ፡እፌኑ፡ወልድየ፡ዘአፈቅር፡ለእመ፡ኪያሁ፡ርእዮሙ፡የኀፍሩ፡ወፈነዎ።
14ወሶበ፡ርእይዎ፡ዐቀብተ፡ወይን፡ተማከሩ፡ወይቤሉ፡ዝንቱ፡ውእቱ፡ወራሲሁ፡ንዑ፡ንቅትሎ፡ወንርከብ፡ርስቶ።
15ወአውፅእዎ፡አፍኣ፡እምዐጸደ፡ወይን፡ወቀተልዎ።
16ወሶበ፡መጽአ፡በዓለ፡ዐጸደ፡ወይን፡ምንተ፡እንከ፡ይሬስዮሙ፡ይመጽእ፡ወይቀትሎሙ፡ለእልክቱ፡ዐቀብተ፡ዐጸደ፡ወይን፡ወይሁብ፡ወይኖ፡ለካልኣን፡ወሰሚዖሙ፡ቃሎ፡ይቤሉ፡ሐሰ፡ኢይከውን፡ከመዝ።
17ወነጸሮሙ፡ወይቤሎሙ፡ምንትኑመ፡ጽሑፍ፡ዘይብል፡«እብን፡እንተ፡መነንዋ፡ነደቅት፡ይእቲ፡ኮነት፡ውስተ፡ርእሰ፡ማዕዘንት።»
18ወኵሉ፡ዘወድቀ፡ዲበ፡ይእቲ፡እብን፡ይትቀጠቀጥ፡ወለዘኒ፡ወድቀት፡ላዕሌሁ፡ትቀጥቅጦ።
19ወፈቀዱ፡ሊቃነ፡ካህናት፡ወጸሐፍት፡የአኀዝዎ፡ሶቤሃ፡ወፈርህዎሙ፡ለሕዝብ፡እስመ፡አእመሩ፡ከመ፡በእንቲኣሆሙ፡መሰለ፡ከመዝ።

በእንተ፡ውሂበ፡ጸባሕት

20ወተግኂሦሙ፡እምኔሁ፡አጽንሑ፡ሎቱ፡እለ፡ይትዐቀብዎ፡ወፈነዉ፡ኀቤሁ፡ሰብአ፡ዐይን፡እለ፡ያጸድቁ፡ርእሶሙ፡ከመ፡ያስሕትዎ፡በቃሉ፡ወከመ፡ያግብእዎ፡ለመኳንንት፡ወለመሳፍንት።
21ወተሰእልዎ፡ወይቤልዎ፡ሊቅ፡ነአምር፡ከመ፡ጽድቀ፡ትነግር፡ወትሜህር፡ወኢታደሉ፡ለገጽ፡ወርቱዐ፡ትሜህር፡ፍኖተ፡እግዚአብሔር።
22ይከውነነሁ፡ነሀብ፡ጸባሕተ፡ለቄሳር፡ወሚመ፡አልቦኑ።
23ወአእመሮሙ፡ትምይንቶሙ፡ወይቤሎሙ፡ለምንት፡ታሜክሩኒ፡አርእዩኒ፡ዲናረ።
24ወአምጽኡ፡ወአርአይዎ፡ወይቤሎሙ፡ዘመኑ፡መልክዑ፡ወመጽሐፉ፡ወአውሥእዎ፡ወይቤልዎ፡ዘቄሳር።
25ወይቤሎሙ፡ሀቡ፡ዘቄሳር፡ለቄሳር፡ወዘእግዚአብሔር፡ለእግዚአብሔር።
26ወስእንዎ፡አስሕቶቶ፡በቃሉ፡በቅድመ፡ኵሉ፡ሕዝብ፡ወአንከሩ፡ሣእሣአ፡አፉሁ፡ወአውሥኦቶ፡ወአርመሙ።

በእንተ፡ሰዱቃውያን፡ወትንሣኤ፡ሙታን

27ወመጽኡ፡ኀቤሁ፡ሰዱቃውያን፡እለ፡ይብሉ፡ኢየሐይዉ፡ምዉታን።
28ወተስእልዎ፡ወይቤልዎ፡ሊቅ፡ሙሴ፡ጸሐፈ፡ለነ፡እንዘ፡ይብል፡«ለእመቦ፡ብእሲ፡ዘሞተ፡እኁሁ፡ወኀደገ፡ብእሲቶ፡እንዘ፡አልቦ፡ውሉድ፡ያውስባ፡እኁሁ፡ለብእሲቱ፡ወያቅም፡ዘርዐ፡ለእኁሁ።»
29ወሀለዉ፡እንከ፡ኅቤነ፡ሰብዐቱ፡አኀው፡ወአውሰበ፡ዘይልኅቅ፡ብእሲተ፡ወሞተ፡እንዘ፡አልቦ፡ውሉድ።
30ወከማሁ፡አውሰባ፡ካልኡሂ፡ወኢወለደ፡ወከማሁ፡ሣልሱሂ፡ወኢኀደጉ፡ውሉደ።
31ወሰብዓቲሆሙ፡ከማሁ፡አውሰብዋ፡ወሞቱ፡እንዘ፡አልቦሙ፡ውሉድ።
32ወድኅረ፡ኵሎሙ፡ሞተት፡ይእቲ፡ብእሲት።
33ወአመ፡የሐይዉ፡እንከ፡ምዉታን፡ለመኑ፡እምኔሆሙ፡ትከውኖ፡ብእሲተ፡እስመ፡ናሁ፡ሰብዓቲሆሙ፡አውሰብዋ።
34ወአውሥአ፡እግዚእ፡ኢየሱስ፡ወይቤሎሙ፡ውሉደ፡ዝንቱ፡ዓለም፡ያወስቡ፡ወይትዋሰቡ፡ወይወልዱ፡ወይትዋለዱ።
35ወእለሰ፡ይደልዎሙ፡ይርከብዎ፡ለዝክቱ፡ዓለም፡አመ፡የሐይዉ፡ሙታን፡ኢያወስቡ፡ወኢይትዋሰቡ።
36ወኢይትከሀሎሙ፡እንከ፡መዊት፡አላ፡ከመ፡መላእክተ፡እግዚአብሔር፡እሙንቱ፡ወውሉደ፡እግዚአብሔር፡ይከውኑ፡ወውሉደ፡ሕይወት፡እሙንቱ።
37ወከመሰ፡የሐይዉ፡ሙታን፡ሙሴሂ፡ነገረ፡ዘከመ፡ይቤሎ፡እግዚአብሔር፡በኀበ፡ዕፀ፡ጳጦስ፡አነ፡ውእቱ፡አምላከ፡አብርሃም፡ወአምላከ፡ይስሐቅ፡ወአምላከ፡ያዕቆብ።
38ኢኮነኬ፡አምላከ፡ሙታን፡አላ፡አምላከ፡ሕያዋን፡ውእቱ፡እስመ፡ኵሎሙ፡ሕያዋን፡እሙንቱ፡በኀቤሁ።
39ወአውሥኡ፡ሰብእ፡እምጸሐፍት፡ወይቤሉ፡ሊቅ፡ሠናየ፡ትቤ።
40ወአልቦ፡እንከ፡መኑሂ፡ዘተኀበለ፡ይሰአሎ።

ዘከመ፡ተስእሎሙ፡እግዚእነ፡ለፈሪሳውያን

41ወይቤሎሙ፡እፎኑ፡ይብልዎ፡ለክርስቶስ፡ወልደ፡ዳዊት።
42ወለሊሁ፡ዳዊት፡ይቤ፡በመጽሐፈ፡መዝሙር፡«ይቤሎ፡እግዚእ፡ለእግዚእየ፡ንበር፡በየማንየ
43እስከ፡አገብኦሙ፡ለጸላእትከ፡ታሕተ፡መከየደ፡እገሪከ።»
44ዘለሊሁ፡እንከ፡ዳዊት፡እግዚእየ፡ይቤሎ፡እፎ፡እንከ፡ይከውኖ፡ወልዶ።
45ወእንዘ፡ኵሎሙ፡ሕዝብ፡ይሰምዑ፡ይቤሎሙ፡ለአርዳኢሁ።
46ተዐቀብዎሙ፡ለጸሐፍት፡እለ፡ይፈቅዱ፡ያንሶስዉ፡ተላቢሶሙ፡ወያፈቅሩ፡ተአምኆ፡በምሥያጣት፡ወነቢረ፡ፍጽም፡በውስተ፡አዕዋዳት፡ወርእሰ፡ምርፋቃት፡በውስተ፡ምሳሓት።
47እለ፡ይውኅጥዎን፡ለአብያተ፡መበለታት፡ወለምክንያት፡ያነውኁ፡ጸሎተ፡እሙንቱ፡ይነሥኡ፡ዘየዐቢ፡ኵነኔ።