፰፡በእንተ፡አይኅ።
ወኮነ፡ዝግብር፡እኩየ፡በቅድመ፡እግዚአብሔር፤ወውእቱኒ፡ደምሰሶሙ፡በማየ፡አይኅ፡ዘይቈርር፡እምነ፡አስሐቲያ። አርኀወ፡ኀዋኅወ፡ሰማይ፡ወወረደ፡አስራበ፡አይኅ፡ወተርኅወ፡አንቅዕት፡ዘመትሕተ፡ምድር፡ወተከሥተ፡አንቅዕተ፡አይኅ፡ላዕለ፡ምድር፤ወጠፍኡ፡ኃጥኣን፡እስመ፡አረሩ፡ፍሬ፡መቅሠፍቶሙ፤ወኀልቀ፡ምስሌሆሙ፡ኵሉ፡እንስሳ፡ወአራዊት፡እስመ፡ኵሎሙ፡ተፈጥሩ፡በእንተ፡ፍሥሓ፡አዳም፡ወለክብሩ፤ወቦ፡በእንተ፡ጽጋቡ፡ወቦ፡በእንተ፡ፍሥሓሁ፡ወቦ፡ዘበእንተ፡አስማት፡ለሰብሖ፡ፈጣሪሁ፡ከመ፡ያእምሮሙ፤በከመ፡ይቤ፡ዳዊት፡ወኵሎ፡አግረርከ፡ታሕተ፡እገሪሁ፤በእንቲአሁ፡ተፈጥሩ፡ወበእንቲአሁ፡ኀልቁ፡ዘእንበለ፡፰ነፍስ፡ወእምነ፡ንጹሕ፡እንስሳ፡ወአራዊት፡በበ፯፯፡ወእምነ፡ርኩስ፡እንስሳ፡ወአራዊት፡በበ፪፪፨ ፨ ፨