Kebre Negest 6

፮፡በእንተ፡ኀጢአተ፡ቃየን።

ወውእቱሰ፡ርጉም፡ቀታሌ፡እኁሁ፡ቃየን፡አብዝኀ፡ለእከይ፡ወዘርኡኒ፡ከማሁ፡እለ፡አምዕዕ፡ለእግዚአብሔር፡በእከዮሙ፡ወአልቦሙ፡ፍርሀተ፡እግዚአብሔር፡ቅድመ፡አዕይንቲሆሙ፡ወኢኀለይዎ፡ከመ፡ፈጣሪሆሙ፡ወኢጸለዩ፡ኀቤሁ፡ወኢተጋነዩ፡ወኢሰአልዎ፡ወኢተቀንዩ፡ሎቱ፡በፍርሀት፤ዘእንበለ፡ዘይበልዑ፡ወይሰትዩ፡ወይዘፍኑ፡ወይትዋነዩ፡በመሰንቆ፡ወበማሕሌት፡ወበዝሙት፡ዘእንበለ፡ሕግ፡ወዘእንበለ፡መስፈርት፡ወዘእንበለ፡ሥርዐት።ወበዝኀ፡እከዮሙ፡ለደቂቀ፡ቃየን፡እስከ፡በትዕቢተ፡ዝሙቶሙ፡አግብኡ፡ዘርአ፡አድግ፡ኀበ፡ፈረስ፡ወኮነ፡በቅለ፡ዘኢአዘዘ፡እግዚአብሔር፤በከመ፡እለ፡ይሁቡ፡ውሉዶሙ፡መሀይምናን፡ለከሓድያን፡ወይከውኑ፡ውሉዶሙ፡ዘርአ፡ግሙራ፡ርኩሳን፡መንፈቆሙ፡ሠናይ፡ወመንፈቆሙ፡ዘርአ፡እኩያን፤ወእለ፡ገብርዋ፡ለእኪት፡ጽኑሕ፡ደይኖሙ፡ወንቡር፡ጌጋዮሙ፨ ፨ ፨