፵፬፡ከመ፡ኢመፍትው፡ሐምየ፡ንጉሥ።
ወኢመፍትው፡ይሕምይዎ፡ለንጉሥ፡እስመ፡መሲሑ፡ለእግዚአብሔር፡ውእቱ።ኢመፍትው፡ወኢኮነ፡ሠናየ፡ሐሚዮቱ፡ለንጉሥ፤ለእመ፡ገብረ፡ሠናየ፡ኢያሀጒል፡እም፫፡መንግሥት፡፩፡ያገርር፡ሎቱ፡ፀሮ፡ወኢያገብኦ፡ውስተ፡እደ፡ጸላኢሁ፤፪፡ወበሰማያትኒ፡ያነግሦ፡ምስሌሁ፡ምስለ፡ጻድቃኒሁ፡ወያነብሮ፡በየማኑ፤፫፡በዲበ፡ምድርኒ፡ያነግሦ፡በክብር፡ወበፍሥሓ፡ወያረትዕ፡ሎቱ፡መንግሥቶ፡ወያገርር፡አሕዛበ፡ታሕ፡እገሪሁ።ወእመሰ፡ተዐወሮ፡ለእግዚአብሔር፡ወኢገብረ፡ሠናየ፡ወኢ፡ሖረ፡በፍኖት፡ርትዕት፡ለሊሁ፡እግዚአብሔር፡ይገብር፡በከመ፡ፈቀደ፡ላዕሌሁ፡ወበዲበ፡ምድርኒ፡ያሐጽጽ፡መዋዕሊሁ፡ወበሰማያትኒ፡ውስተ፡ማኅደረ፡ሲኦል፡ምስለ፡ዲያብሎስ፡ማኅደሩ፤ወበዲበ፡ምድርኒ፡ዘእንበለ፡ጥዕና፡ወፍሥሓ፡ልብ፡ምስለ፡ድንጋፄ፡ወፍርሀት፡ዘእንበለ፡ሰላም፡በሁከት፨ኢኮነ፡ሠናየ፡ሐሚዮቱ፡ለንጉሥ፡እምሕዝብ፡እለ፡እምታሕቴሁ፡እስመ፡ፍዳ፡ለእግዚአብሔር፡ውእቱ፤ወባሕቱ ፡ካህናትሰ፡አምሳለ፡ነቢያት፡እሙንቱ፡ወባሕቱ፡ፈድፋደ፡ይኄይሱ፡እምነቢያት፡እስመ፡ተውህቦሙ፡ምሥጢራት፡ከመ፡ይእኅዙ፡ፀሐየ፡ጽድቅ፤ሱራፌል፡እለ፡ተፈጥሩ፡እምእሳት፡ዘኢይክሉ፡እኂዘ፡ምሥጢራት፡ዘእንበለ፡በጕጠታት።ለካህናትሰ፡ሰመዮሙ፡ፄወ፤ወዓዲ፡ለካህናት፡ሰመዮሙ፡ማኅቶተ፤ካዕበ፡ሰመዮሙ፡ብርሃኖ፡ለዓለም፤ወካዕበ፡ሰመዮሙ፡ፀሐየ፡ዘያበርህ፡ጽልመተ፡እንዘ፡ክርስቶስ፡ፀሐየ፡ጽድቅ፡ውስተ፡አልባቢሆሙ።ወካህንሰ፡ዘቦቱ፡ልቡና፡ይገሥጾ፡ለንጉሥ፡በእንተ፡ምግባራተ፡ዘርእየ፤ወዘኢርእየሰ፡እግዚኣብሔር፡ይፈትን፡ወአልቦ፡ዘይወቅሶ።ወዓዲ፡ኢይሕምይዎሙ፡አሕዛብ፡ለጳጳሳት፡ወለካህናት፤እስመ፡ደቂቀ፡እግዚአብሔር፡ወሰብአ፡ቤቱ፡እሙንቱ፤በእንተ፡ዘገሠጽዎሙ፡በእንተ፡ኀጢአቶሙ፡ወጌጋዮሙ።ወአንተኒ፡ኦካህን፡ለእመ፡ርኢከ፡ዕዉቀ፡ኀጢአቶ፡ለብእሲ፡ኢትኅፈር፡ገሥጾቶ፡ኢያፍርህከ፡ሰይፍ፡ወኢስደት፤ወስማዕ፡ዘከመ፡ተምዕዖ፡እግዚአብሔር፡ለኢሳይያስ፡በእንተ፡ዖዝያን፡ንጉሥ፡እስመ፡ኢገሠጾ፤ወካዕበ፡ስማዕ፡በእንተ፡ሳሙኤል፡ነቢይ፡ዘከመ፡ገሠጾ፡ለሳኦል፡ንጉሥ፡እንዘ፡ኢየኀፍሮ፡ወሠጠጠ፡መንግሥቶ፡በነገሩ፤ወኤልያስኒ፡ለአከአብ፤ወአንተኒ፡ኢትኅፈር፡ገሥጾ፡ወመሀሮ፡ለዘ፡ኤብስ። ወእስራኤልሰ፡እምትካት፡የሐምዩ፡ንጉሦሙ፡ወያምዕዑ፡ነቢያቲሆሙ፡ወድኅረሰ፡ሰቀሉ፡መድኀኒሆሙ፤ወሕዝበ፡ክርስቲያንሰ፡መሀይምናን፡ይነብሩ፡በሰላም፡ዘእንበለ፡ደዌ፡ወሕማም፡ዘእንበለ፡ጽልእ፡ወማዕቀፍ፡ምስለ፡ንጉሥነ፡እገሌ፡መፍቀሬ፡እግዚአብሔር፡እንዘ፡ኢያአትት፡እምልቡ፡ነገረ፡ጽድቅ፡ወሃይማኖት፡በእንተ፡አብያተ፡ክርስቲያናት፡ወመሀይምናን፡ወፀሩኒ፡ግሩራን፡በኀይለ፡መስቀሉ፡ለኢየሱስ፡ክርስቶስ፨ ፨ ፨