፵፪፡በእንተ፡፲፡ቃላት።
ወስምዑ፡እስራኤል፡ዘተአዘዘ፡እምእግዚአብሔር፡ከመ፡ትዕቀቡ፡ኪያሁ።ወይቤ፡አነ፡ውእቱ፡እግዚአብሔር፡አምላክከ፡ዘአውፃእኩከ፡እምነ፡ምድረ፡ግብጽ፡ወእምነ፡ቤተ፡ቅኔ፤ወኢይኩን፡ባዕደ፡አማልክተ፡ዘእንበሌየ፡ወኢትግበር፡አምላከ፡ዘግልፎ፡ወኢበኵሉ፡አምሳል፡ዘውስተ፡ሰማይ፡ዘላዕሉ፡ወኢበኵሉ፡ዘበ፡ምድር፡በታሕቱ፡ወኢዘውስተ፡ማይ፡ዘመትሕተ፡ምድር፤ ወኢትስግድ፡ሎሙ፡ወኢታምልኮሙ፤እስመ፡አነ፡እግዚአብሔር፡አምላክከ፡አምላክ፡ቀናኢ፡ዘእትፈደይ፡ኀጢአተ፡ወላዲ፡ላዕለ፡ውሉድ፡እስከ፡ሣልስ፡ወራብዕ፡ትውልድ፡ለእለ፡ይጸልኡኒ ፤ወእገብር፡ምሕረተ፡እስከ፡፼፡ትውልድ፡ለእለ፡ያፈቅሩኒ፡ወየዐቅቡ፡ትእዛዝየ።ወኢትምሐል፡ስመ፡እግዚአብሔር፡አምላክከ፡በሐሰት፡እስመ፡ኢያነጽሕ፡እግዚአብሔር፡ለዘ፡ይምሕል፡ስሞ፡በሐሰት።ወዕቀብ፡ዕለተ፡ሰንበት፡ከመ፡ትቀድሳ፡በከመ፡አዘዘ፡እግዚአብሔር፡አምላክከ፤ሰዱሰ፡መዋዕለ፡ትገብር፡ግብረከ፡ወበሳብዕት፡ዕለት፡ሰንበቱ፡ለእግዚአብሔር፡አምላክከ፡ኢትግበር፡ባቲ፡ግብረ፡ቅኔ፡ኢአንተ፡ወኢወልድከ፡ወኢወለትከ፡ወኢገብርከ፡ወኢአድግከ፡ወኢኵሉ፡እንስሳከ፡ወኢፈላሲ፡ዘይነብር፡ኀቤከ፤እስመ፡በሰዱስ፡መዋዕል፡ገብረ፡እግዚአብሔር፡ሰማየ፡ወምድረ፡ወባሕረ፡ወኵሎ፡ዘውስቴታ፡ወአዕረፈ፡አመ፡ዕለተ፡ሳብዕት፡ወበበይነዝ፡ባረካ፡እግዚአብሔር፡ለሳብዕት፡ዕለት፡ወአጽደቃ።አክብር፡አባከ፡ወእምከ፡ከመ፡ይኩንከ፡ጽድቀ፡ ብዙኀ፡ዕለተ፡ትረክብ፡በውስተ፡ምድር፡ዘወሀበከ፡እግዚአብሔር፡አምላክከ።ኢትሖር፡ብእሲተ፡ብእሲ። ኢትቅትል፡ነፍሰ።ኢትዘሙ።ኢትስርቅ።ስምዐ፡በሐሰት፡ኢትስማዕ፡ላዕለ፡ቢጽከ። ወኢትፍትው፡ብእሲተ፡ካልእከ፡ኢቤቶ፡ወኢገራህቶ፡ወኢገብሮ፡ወኢአመቶ፡ወኢላህሞ፡ወኢብዕራዮ፡ወኢአድጎ፡ወኢእምኵሉ፡እንስሳሁ፡ዘአጥረየ፡አጥርዮ፡ካልእከ፤ዝነገር፡ዘነገረ፡እግዚአብሔር፡ሕጎ፡ወሥርዐቶ፡ወለእለኒ፡ይኤብሱ፡ገሥጾሙ፡ከመ፡ኢይጽንዑ፡ውስተስሒት፡ወይትዐገሱ፡እምርኵስ፡ዘኢሠምረ፡እግዚአብሔር፤ወዝንቱ፡ውእቱ፡ነገር፡ዘኢሠምረ፡እግዚአብሔር፡ወርቱዕ፡ይትገሐሱ፡እምኔሁ፡ብእሲ፡ብእሲ፡ኀበ፡ይከውኖ፡ዘመዱ፡ኢይባእ፡ ይክሥት፡ኀፍረቶ፤እስመ፡አነ፡ውእቱ፡እግዚአብሔር፡አምላክክሙ።ኀፍረተ፡አቡከ፡ወእምከ፡ኢትክሥት፡እስመ፡እምከ፡ይእቲ፤ኢትክሥት፡ኀፍረተ፡ብእሲተ፡አቡከ፡እስመ፡ኀፍረተ፡እምከ፡ይእቲ፤ኀፍረተ፡እኅትከ፡እንተ፡እምነ፡አቡከ፡አው፡እንተ፡እምነ፡እምከ፡ኢትክሥት፤ እመኒ፡እንተ፡እምነ፡አፍአ፡ተወልደት፡ሎቱ፡ወእመኒ፡እንተ፡እምአዝማዲከ፡ይእቲ፡ኢትክሥት ፡ኀፍረታ፤ኀፍረተ፡ወለተ፡ወልድከ፡ኢትክሥት፡አው፡ኀፍረተ፡ወለተ፡ወለትከ፡ኢትክሥት፡እስመ፡ኀፍረትከ፡ይእቲ፤ኀፍረተ፡ወለተ፡ብእሲተ፡አቡከ፡ኢትክሥት፡እስመ፡እኅትከ፡ወለተ፡እምከ፡ይእቲ፡ወኢትክሥት፡ኀፍረታ፤ኀፍረተ፡እኅተ፡አቡከ፡ኢትክሥት፡እስመ፡ቤተ፡አቡከ፡ይእቲ፤ኀፍረተ፡እኅተ፡እምከ፡ኢትክሥት፡እስመ፡ቤተ፡እምከ፡ይእቲ፤ኀፍረተ፡ብእሲተ፡እኁሁ፡ለአቡከ፡ኢትክሥት፡እስመ፡ዘመድከ፡ይእቲ፤ኀፍረተ፡ብእሲተ፡ወልድከ፡ኢትክሥት፡እስመ፡ብእሲተ፡ወልድከ፡ይእቲ፤ኀፍረተ፡ወለትከ፡ወብእሲተ፡ወልደ፡እኁከ፡ኢትክሥት፡እስመ፡ኀፍረትከ፡ውእቱ፤ኀፍረተ፡ብእሲተ፡እኁከ፡ኢትክሥት፡እስመ፡ኀፍረተ፡እኁከ፡ይእቲ ፡አምጣነ፡ሀሎ፡ሕያው፡እኁከ፤ኀፍረተ፡ብእሲት፡ምስለ፡ወለታ፡ኢትክሥት፡ወኢዘወለተ፡ወልዳ፡ወኢዘወለተ፡ወለታ፡ኢትግበር፡ከመ፡ትክሥት፡ኀፍረቶን፡ቤትከ፡ውእቱ፡ወኀጢአት፡ውእቱ፤ወብእሲተ፡ምስለ፡እኅታ፡ኢታውስብ፡ከመ፡ታስተቃንዖን፡ወከመ፡ትክሥትኀፍረቶን፡ለዛቲኒ፡ወዘእንታክቲኒ፡እንዘ፡ዓዲሃ፡ቀዳሚት፡ሕያውት፡ይእቲ፤ወኀበ፡ብእሲት፡ትክት፡ኢትባእ፡እንበለ፡ትንጻሕ፡ከመ፡ትክሥት፡ኀፍረታ፡እንዘ፡ዓዲ፡ርኵስት፡ይእቲ፤ወኢትባእ፡ኀበ፡ብእሲተ፡ካልእከ፡ከመ፡ትስክብ፡ምስሌሃ፡ወኢትዝራእ፡ዘርእከ፡ውስቴታ፤ወኢታስተፃምድ፡ኀበ፡መልአከ፡ውሉድከ፡ከመ፡ኢታርኵስ፡ስሞ፡ለቅዱስ፡ስመ፡እግዚአብሔር፤ወምስለ፡ተባዕት ፡ኢትስክብ፡ከመ፡ምስለ፡አንስት፡እስመ፡ርኩስ፡ውእቱ፤ወኢትሖር፡ኀበ፡እንስሳ፡ወኢትስክብ፡ከመ፡ታ፡ውፅእ፡ዘርአከ፡ላዕሌሁ፡ከመ፡ኢትርኰስ፡ቦቱ፡ወብእሲትኒ፡ኢትሖር፡ኀበ፡እንስሳ፡ከመ፡ይስክባ፡እስመ፡ርኵስ፡ውእቱ።ወኢታርኵሱ፡ርእሰክሙ፡በኵሉ፡ዝንቱ፡እስመ፡ቦቱ፡ረኵሱ ፡አሕዛብ፡እለ፡አነ፡አውፃእክዎሙ፡እምቅድሜክሙ፡ወበዝንቱ፡ኢታርኵሱ፡ሥጋክሙ፤ ወቀድሱ፡ነፍሰክሙ፡ወሥጋክሙ፡ለእግዚአብሔር፡እስመ፡ቅዱስ፡ውእቱ፡ወያፈቅሮሙ፡ለእለ፡ይቄድሱ፡ነፍሶሙ፡ወሥጋሆሙ፡ሎቱ፤እስመ፡ቅዱስ፡ወግሩም፡ወልዑል፡ውእቱ፡ወመሓሪ፡ወመስተሣህል፡ውእቱ፡ወሎቱ፡ይደሉ፡ስብሐት፡ለዓለመ፡ዓለም፡አሜን፨ ፨ ፨