5
በእንተ፡ጽድቀ፡አሚን
1 ቁሙ፡እንከ፡ወኢትሑሩ፡ዳግመ፡ውስተ፡አርዑተ፡ቅኔ።
2 ናሁ፡አነ፡ጳውሎስ፡እብለክሙ፡እምከመ፡ትትገዘሩ፡ክርስቶስ፡ኢይበቍዐክሙ፡ምንተኒ።
3 ወካዕበ፡አሰምዕ፡ለኵሉ፡ብእሲ፡ግዙር፡ከመ፡ይደልዎ፡ይግበር፡ኵሎ፡ሕገ፡ኦሪት።
4 ተስዕርክሙ፡እምክርስቶስ፡እለ፡በኦሪት፡ትጸድቁ፡ወዶቅሙ፡እምጸጋሁ።
5 ወንሕነሰ፡በመንፈስ፡ቅዱስ፡ወበአሚን፡ንሴፎ፡ንጽደቅ።
6 እስመ፡በኀበ፡እግዚእነ፡ኢየሱስ፡ክርስቶስ፡ተገዝሮሂ፡ኢይበቍዕ፡ወኢተገዝሮሂ፡ኢያሰልጥ፡ዘእንበለ፡አሚን፡ወተፋቅሮ።
በእንተ፡ትዕይርተ፡መስቀሉ፡ለክርስቶስ
7 ትካትሰ፡ሠናየ፡ሮጽክሙ።
8 መኑ፡አዕቀፈክሙ፡ኢትእመኑ፡በጽድቅ።
9 አኮኑ፡ኅዳጥ፡ብሑእ፡ብዙኀ፡ሐሪጸ፡ያብሕእ።
10 አንሰ፡ተአመንኩክሙ፡በእግዚእነ፡ከመ፡ኢተሐልዩ፡ባዕደ፡ወዘሰ፡የሀውከክሙ፡ይጸውር፡ደይኖ፡መኑሂ፡ዘኮነ፡ከዊነ።
11 ወአንሰ፡አኀውየ፡ለእመ፡ግዝረተ፡እሰብክ፡ዓዲ፡ለምንትኑ፡እንከ፡እዴግን።ተስዕረኑ፡እንከ፡ትዕይርተ፡መስቀሎ፡ለክርስቶስ።
12 ርቱዕ፡ይንትጉ፡እለ፡የሀውኩክሙ።
በእንተ፡ተጸውዖ፡ግዕዛን
13 ወአንትሙሰ፡ለግዕዘን፡ተጸዋዕክሙ፡አኀውየ፡ወዳእሙ፡ኢትግበሩ፡ላቲ፡ምክንያተ፡ለግዕዛንክሙ፡በሥጋክሙ፡ወበተፋቅሮ፡ተቀነዩ፡ለቢጽክሙ።
14 እስመ፡አሐዱ፡ቃል፡ይፌጽሞ፡ለኵሉ፡ሕግ፡አፍቅር፡ቢጸከ፡ከመ፡ነፍስከ።
15 ወእመሰ፡በበይናቲክሙ፡ትትባልዑ፡ወትትናሰኩ፡ተኀልቆ፡ተረፍክሙ።
16 እብለክሙ፡በመንፈስ፡ሑሩ፡ወፍትወተ፡ሥጋክሙ፡ኢትግበሩ።
17 እስመ፡ሥጋኒ፡ይፈቱ፡ዘኢይፈቱ፡መንፈስ፡ወመንፈስኒ፡ይፈቱ፡ዘኢይፈቱ፡ሥጋ፡ወይትኣበዩ፡ በበይናቲሆሙ፡ከመ፡ኢትግበሩ፡ዘትፈቅድ።
18 ወእመሰ፡ዘበመንፈስ፡ትተልዉ፡ወፃእክሙ፡እምኦሪት።
19 ይትዐወቅ፡ምግባሩ፡ለሥጋ።ዝሙት፡ርኵስ፡ወምርዓት።
20 አጣዕዎ፡ሥራይ፡ጽልእ፡ትዝህርት፡ትዝውፍት፡ቅንአት፡መዓት፡ኑፋቀ፡ተቃኅዎ።
21 ተሐምሞ፡ተቃትሎ።ስታይ፡ስክረት።ወዘአምሳሊሁ፡ለዝንቱ።በከመ፡አቅደምኩ፡ነጊሮተክሙ፡ዘዘንተ፡ ይገብር፡ኢይሬኢ፡መንግሥተ፡እግዚአብሔር።
22 ወፍሬሁሰ፡ለመንፈስ፡ቅዱስ፡ተፋቅሮ፡ፍሥሓ፡ሰላም፡ትዕግሥት፡ምጽዋት፡ኃሩት፡ሃይማኖት።የውሀት፡ ኢዘምዎት።
23 አልቦ፡ዘይኄይስ፡እምዝ፡ሕግ።
24 ወእለሰ፡በኢየሱስ፡ክርስቶስ፡ሰቀሉ፡ሥጋሆሙ፡ምስለ፡ፍትወት፡ወምስለ፡ኃጢአት።
25 ወእመሰ፡በመንፈስ፡ነሐዩ፡ወዘመንፈስ፡ንግበር።
26 ወኢንኩን፡ዝሁራነ፡ወኢትትሓመዩ፡በበይናቲክሙ፡ወኢትትኃሠሡ፡በበይናቲክሙ።