Biblia Etíope · Biblia Etíope en Ge'ez
Gálatas 4
ኀበ፡ሰብአ፡ገላትያ።4በእንተ፡ትርሲተ፡ውሉድ
1ወባሕቱ፡እብል፡አምጣነሰ፡ሕፃን፡ውእቱ፡ወራሲ፡አልቦ፡ዘይኄይስ፡እምነባሪ፡እንዘ፡እግዚእ፡ውእቱ፡ለኵሉ።
2ወባሕቱ፡ላዕለ፡እምሔው፡ወላዕለ፡መገብት፡ይትዐቀብ፡እስከ፡ዕድሜ፡ዘዐደመ፡አቡሁ።
3ከማሁ፡ንሕነኒ፡አመ፡ሕፃናት፡ንሕነ፡ተቀነይነ፡ለስሒተ፡ዝዓለም።
4ወአመ፡በጽሐ፡ዕድሜሁ፡ፈነወ፡እግዚአብሔር፡ወልዶ፡ወተወልደ፡እምብእሲት፡ወገብረ፡ በሕገ፡ኦሪት።
5ከመ፡ይሣየጦሙ፡ለእለ፡ውስተ፡ኦሪት፡ከመ፡ንርከብ፡ትርሲተ፡ውሉድ።
6ወከመሰ፡ውሉድ፡አንትሙ፡ናሁ፡ፈነወ፡እግዚአብሔር፡መንፈሰ፡ወልዱ፡ውስተ፡ልብክሙ፡ውእቱ፡ ዘይጼውዕ፡ወይብል፡አባ፡ወአቡየ።
7እንከሰኬ፡ወልድ፡አንተ፡ወኢኮንከ፡ገብረ፡ወእመሰኬ፡ወልድ፡አንተ፡ወራሲሁኬ፡ለእግዚአብሔር፡አንተ፡በኢየሱስ፡ክርስቶስ።በእንተ፡ርኂቅ፡እምአማልክት
8ወባሕቱ፡ትካትሰ፡በኢያእምሮትክሙ፡ተቀነይክሙ፡ለእለ፡ኢኮኑ፡አማልክተ።
9ወይእዜሰ፡አእመርምዎ፡ለእግዚአብሔር፡ወፈድፋደ፡ውእቱ፡አእመረክሙ።እፎ፡ካዕበ፡ኀበ፡ዝኩ፡ድኩም፡ወጽኑስ፡ጣዖተ፡ዝዓለም፡ትፈቅድ፡ፈጠራ፡ትትቀነዩ፡ሎሙ።
10ወትትዓቀቡ፡ዕለተ፡ወርኀ፡ወጊዜ፡ዓመታት።
11እፈርሀክሙ፡እንዳዒ፡ለእመ፡ለከንቱ፡ጻመውኩ፡በእንቲአክሙ።በእንተ፡አብፅዖተ፡ውሉድ
12ኩኑ፡ከማየ፡እስመ፡አነሂ፡ከማክሙ፡ኮንኩ።አኀዊነ፡አስተበቍዐክሙ፡እስመ፡ኢገፋዕክሙኒ።
13ታአምሩ፡ከመ፡በአምጣነ፡ድካመ፡ኀይልየ፡መሀርኩክሙ፡ቀዲሙ።
14ወእንዘሂ፡አሐምም፡ኢተቈጣዕክሙኒ፡ወኢመነንክሙኒ፡በሥጋየ፡ወተወከፍክሙኒ፡ከመ፡መልአከ፡ እግዚአብሔር፡ወከመ፡ክርስቶስ፡ኢየሱስ።
15አይቴኑ፡አብፅዖትክሙ፡ይእዜ።አነ፡ሰማዕትክሙ፡ከመ፡ሶበ፡ይትከሀለክሙ፡አዕይንቲክሙ፡መሊኀክሙ፡እምወሀብክሙኒ።
16ጸላኤኑ፡ኮንኩክሙ፡ሶበ፡መሀርኩክሙ፡ጽድቀ።
17ወእሉሰ፡ይቀንኡ፡ላዕሌክሙ፡ወአኮ፡ለሠናይ።ዳእሙ፡ይዝግሑክሙ፡ይፈቅዱ፡ከመ፡ትቅንኡ፡ላዕሌሆሙ።
18ሠናይኬ፡ከመ፡ትቅንኡ፡ለገቢረ፡ሠናይ፡ኵሎ፡ጊዜ፡ወአኮ፡ዳእሙ፡በሀልዎ፡ዚአየ፡ኀቤክሙ።
19ደቂቅየ፡እለ፡ዳግመ፡አሐምም፡ብክሙ፡እስከ፡አመ፡ያስተርኢ፡ክርስቶስ፡በላዕሌክሙ።
20ወእፈቅድ፡አሀሉ፡ኀቤክሙ፡ይእዜ፡ወእዌልጥ፡ቃልየ፡እስመ፡አኀጥእ፡ዘእብል፡በእንቲአክሙ።
21ትብሉኑ፡በሕገ፡ኦሪት፡ነሀሉ፡ወኢትሰምዕዋኑ፡ለኦሪት።
22እስመ፡ጽሑፍ፡ከመ፡አብርሃም፡ክልኤ፡ደቂቀ፡ወለደ፡አሐደ፡እምዕቅብቱ፡ወአሐደ፡እምአግዓዚት።
23ወባሕቱ፡ካልእ፡ልደቱ፡ለዘእምዕቅብቱ፡ሕገ፡ሰብእ፡ተወልደ።ወዘሰ፡እምአግዓዚት፡በዘአሰፈዎ።
24ወዝውእቱ፡አምሳለ፡ክልኤቱ፡ሥርዓት።ወአሐቲሰ፡እምደብረ፡ሲና፡ትወልድ፡ለቅኔ።ወይእቲሰ፡አጋር።
25ወሲናሰ፡ደብር፡ውእቱ፡በብሔረ፡ዐረብ፡ወትትናጸር፡ምስለ፡ኢየሩሳሌም፡እንተ፡ይእዜ፡ወትትቀነይ፡ምስለ፡ደቂቃ።
26ወኢየሩሳሌምሰ፡እንተ፡ላዕሉ፡አግዓዚት፡ይእቲ፡ወይእቲ፡እምነ።
27ጽሑፍ፡ትትፈሣሕ፡መካን፡እንተ፡ኢትወልድ፡ወትትኀሠይ፡ወትከልሕ፡እንተ፡ኢታአምር፡ማሕመመ፡ እስመ፡ብዙኅ፡ውሉዳ፡ለማዕስብ፡እምእንተ፡ባቲ፡ምት።
28ወንሕነሰ፡አኀዊነ፡ውሉደ፡ተስፋ፡አምሳለ፡ይስሐቅ።
29ወበከመ፡ዘበሕገ፡ሥጋ፡ተወልደ፡ሰደዶ፡ለዘበመንፈስ፡ተወልደ፡ከማሁ፡ይእዜኒ።
30ወባሕቱ፡ምንተ፡ይቤ፡መጽሐፍ።ስድዳ፡ለአመት፡ምስለ፡ወልዳ፡እስመ፡ኢይወርስ፡ወልደ፡አመት፡ምስለ፡ወልደ፡አግዓዚት።
31ወንሕነሰ፡ይእዜ፡አኀዊነ፡ኢኮነ፡ውሉደ፡አመት፡ዘእንበለ፡ዘአግዓዚት፡እስመ፡ክርስቶስ፡አግዐዘነ።