Biblia Etíope · Biblia Etíope en Ge'ez
Enoc 80
መጽሐፈ፡ሄኖክ።ወበውእቱ፡መዋዕል፡አውሥአኒ፡ኡርኤል፡ወይቤለኒ፡ነዋ፡አርአይኩከ፡ኵሎ፡ኦሄኖክ፡ወኵሎ፡ከሠትኩ፡ለከ፡ትርአዮ፡ለዝ፡ፀሐይ፡ወለዝ፡ወርኅ፡ወለእለ፡ይመርሕዎሙ፡ለከዋክብተ፡ሰማይ፡ወለኵሎሙ፡እለ፡ይመይጥዎሙ፡ግብሮሙ፡ወአዝማኖሙ፡ወሙፃኢሆሙ።ወበመዋዕለ፡ኃጥአን፡ክራማት፡የሐፅራ፡ወዘርአ፡ዚአሆሙ፡ይከውን፡ደኀራዌ፡በምድሮሙ፡ወበሙፋሮሙ፡ወኵሉ፡ግብር፡ዘዲበ፡ምድር፡ይትመየጥ፡ወኢያስተርኢ፡በዘመኑ፡ወዝናም፡ይትከላእ፡ወሰማይ፡ታቀውም።ወበውእቱ፡አዝማን፡ፍሬ፡ምድር፡ደኃራዌ፡ይከውን፡ወኢይበቍል፡በዘመኑ፡ወፍሬ፡ዕፅ፡ይትከላእ፡በዘመነ፡ዚአሁ።ወወርኅ፡ይዌልጥ፡ሥርአቶ፡ወኢይትረአይ፡በዘመነ፡ዚአሁ።ወበእማንቱ፡መዋዕል፡ይትረአይ፡ሰማይ፡ወይበጽሕ፡ዐባር፡በጽንፈ፡ሰረገላት፡ዐቢይ፡በምዕራብ፡ወይበርህ፡ፈድፋደ፡እምሥርዐተ፡ብርሃን።ወይስሕቱ፡ብዙኃን፡አርእስቲሆሙ፡ለከዋክብተ፡ትእዛዝ፡ወእሉ፡ይመይጡ፡ፍናዊሆሙ፡ወግብሮሙ፡ወኢይትረአዩ፡በአዝማነ፡ዚአሆሙ፡እለ፡ተአዘዙ፡ሎሙ።ወኵሉ፡ሥርዐተ፡ከዋክብት፡ይትዐፀዉ፡ላዕለ፡ኃጥኣን፡ወሕሊናሆሙ፡ለእለ፡ይነብሩ፡ዲበ፡ምድር፡ይስሕቱ፡ዲቤሆሙ፡ወይትመየጡ፡እምኵሉ፡ፍናዊሆሙ፡ወይስሕቱ፡ወይመስዎሙ፡አማልክተ።ወይበዝኅ፡ላዕሌሆሙ፡እከይ፡ወመቅሠፍት፡ይመጽእ፡ዲቤሆሙ፡ከመ፡ያኅጕሎሙ፡ለኵሎሙ።