Biblia Etíope · Biblia Etíope en Ge'ez
Enoc 79
መጽሐፈ፡ሄኖክ።ወይእዜኒ፡ወልድየ፡ማቱሳላ፡አርአይኩከ፡ኵሎ፡ወተፈጸመ፡ኵሉ፡ሥርዐተ፡ከዋክብት፡ዘሰማይ።ወአርአየኒ፡ኵሎ፡ሥርዐቶሙ፡ለእሉ፡እንተ፡በኵሉ፡መዋዕል፡ወበኵሉ፡ዘመን፡ዘበኵሉ፡ሥልጣን፡ወበኵሉ፡ዓመት፡ወበሙፃኡ፡ወበትእዛዙ፡በኵሉ፡ወርኅ፡ወበኵሉ፡ሰንበታት።ወኅፀፀ፡ወርኅ፡ዘይትገበር፡በሳድስት፡ኆኅት፡እስመ፡በዛቲ፡ኆኅት፡ሳድስት፡ይትፌጸም፡ብርሃነ፡ዚአሁ፡ወእምኔሁ፡ይከውን፡ርእሰ፡ወርኅ።ወታኅፃፂት፡ዘይትገበር፡በኆኅት፡ቀዳሚት፡በዘመነ፡ዚአሁ፡እስከ፡ይትፌጸም፡መዋዕል፡፻ወ፸ወ፯ወበሥርዐተ፡ሰንበት፡፳ወ፭ወ፪መዋዕል።ወዘየሐፅፅ፡እምፀሐይ፡ወበሥርዐተ፡ከዋክብት፡ኀሙሰ፡መዋዕለ፡በዘመን፡፩ጥንቁቀ፡ወሶበ፡ይትፌጸም፡ዝመካን፡ዘትሬኢ።ከመዝ፡አርአያ፡ወአምሳል፡እምኵሉ፡ብርሃን፡ዘአርአየኒ፡ኡርኤል፡መልአክ፡ዐቢይ፡ዘውእቱ፡መራኂሆሙ።