Biblia Etíope · Biblia Etíope en Ge'ez
Enoc 77
መጽሐፈ፡ሄኖክ።ይጼውዕዎ፡ለነፋስ፡ቀዳማዊ፡ጽባሓዊ፡እስመ፡ቀዳማዊ፡ውእቱ፡ወይጼውዕዎ፡ለካልእ፡አዜብ፡እስመ፡ልዑል፡ህየ፡ይወርድ፡ወፈድፋደ፡ህየ፡ይወርድ፡ቡሩክ፡ለዓለም።ወለነፋስ፡ዘእምዕራብ፡ስሙ፡ንቱግ፡እስመ፡በህየ፡የሐፅፅ፡ኵሉ፡ብርሃናተ፡ሰማይ፡ወይወርዱ።ወራብዕ፡ነፋስ፡ዘስሙ፡መስዕ፡ይትከፈል፡፫ክፍለ፡፩እምኔሆሙ፡ማኅደር፡ለሰብእ፡ወካልእ፡ለአብሕርተ፡ማያት፡ወበቀላያት፡ወበኦም፡ወበአፍላግ፡ወበጽልመት፡ወበጊሜ፡ወሣልስ፡ክፍል፡በገነተ፡ጽድቅ።፯አድባረ፡ነዋኃነ፡ርኢኩ፡እለ፡ይነውኁ፡እምኵሉ፡አድባር፡እለ፡ውስተ፡ምድር፡ወእምኔሆሙ፡ይወጽእ፡አስሐትያ፡ወየኀልፍ፡ወየሐውር፡መዋዕል፡ወዘመን፡ወዓመት።፯አፍላገ፡ዲበ፡ምድር፡ርኢኩ፡ዐበይተ፡እምኵሎሙ፡አፍላግ፡፩እምኔሆሙ፡ይመጽእ፡እምዓረብ፡ውስተ፡ባሕር፡ዐቢይ፡ይክዑ፡ማዮ።ወእልክቱ፡፪ይመጽኡ፡እመስዕ፡እስከ፡ባሕር፡ወይክዕዉ፡ማዮሙ፡በባሕረ፡ኤርትራ፡እምሥራቅ።ወእለ፡ተርፉ፡፬ይወጽኡ፡በገቦ፡መስዕ፡እስከ፡ባሕረ፡ዚአሆሙ፡ባሕረ፡ኤርትራ፡ወ፪በባሕር፡ዐቢይ፡ይሰወጡ፡በህየ፡ወይቤሉ፡መድበራ።ሰቡዐ፡ደሰያተ፡ዐበይተ፡ርኢኩ፡በባሕር፡ወበምድር፡፪በምድር፡ወ፭በባሕር፡ዐቢይ።