Biblia Etíope · Biblia Etíope en Ge'ez
Enoc 76
መጽሐፈ፡ሄኖክ።ወበአጽናፈ፡ምድር፡ርኢኩ፡፲ወ፪ኀዋኅው፡ርኋተ፡ለኵሎሙ፡ነፋሳት፡እለ፡እምኔሆሙ፡ይወጽኡ፡ነፋሳት፡ወይነፍሱ፡ዲበ፡ምድር።፫እምኔሆሙ፡ርኋት፡በገጸ፡ሰማይ፡ወ፫በምዕራብ፡ወ፫በየማነ፡ሰማይ፡ወ፫በፀጋም።ወ፫ቀዳምያት፡እለ፡መንገለ፡ጽባሕ፡ወ፫መንገለ፡መስዕ፡ወ፫በድኅር፡እለ፡በጸጋም፡ለመንገለ፡አዜብ፡ወ፫በዓረብ።በ፬እምኔሆሙ፡ይወጽኡ፡ነፋሳተ፡በረከት፡ወሰላም፡ወእምእልኩ፡፰ይወጽኡ፡ነፋሳተ፡መቅሠፍት፡ሶበ፡ይትፌነዉ፡ይደመስስዋ፡ለኵላ፡ምድር፡ወለማይ፡ዘዲቤሃ፡ወለኵሎሙ፡እለ፡የኀድፉ፡ዲቤሃ፡ወኵሉ፡ዘሀሎ፡ውስተ፡ማይ፡ወዲበ፡የብስ።ወይወጽእ፡ቀዳማይ፡ነፋስ፡እምእልኩ፡ኀዋኅው፡ዘስሙ፡ጽባሓይ፡በቀዳሚት፡ኆኅት፡እንተ፡መንገለ፡ጽባሕ፡እንተ፡ታጸንን፡ለአዜብ፡ይወጽእ፡እምኔሃ፡ድምሳሴ፡የብስ፡ወሞቅ፡ወሐጕል።ወበካልእት፡ኆኅት፡ማእከላይት፡ይወጽእ፡ርትዕ፡ወይወጽእ፡እምኔሃ፡ዝናም፡ወፍሬ፡ወሰላም፡ወጠል፤ወበሣልስት፡ኆኅት፡እንተ፡መንገለ፡መስዕ፡ይወጽእ፡ቍር፡ወየብስ።ወእምድኅረ፡እሉ፡ነፋሳት፡በመንገለ፡አዜብ፡ይወጽእ፡በ፫ኆኅት፤ቀዳምያት፡በቀዳሚት፡ኆኅት፡እምኔሆን፡እንተ፡ትጸንን፡ለመንገለ፡ምሥራቅ፡ይወጽእ፡ነፋሰ፡ሞቅ።ወበኆኅት፡እንተ፡ኀቤሃ፡ማእከላይት፡ይወጽእ፡እምኔሃ፡መዐዛ፡ሠናይ፡ወጠል፡ወዝናም፡ወሰላም፡ወሕይወት።ወበሣልስት፡ኆኅት፡እንተ፡መንገለ፡ምዕራብ፡ይወጽእ፡እምኔሃ፡ጠል፡ወዝናም፡ወአናኵዕ፡ወድምሳሴ።ወእምድኅረ፡እሉ፡ነፋሳት፡ዘመንገለ፡መስዕ፡[ዘስሙ፡ባሕር፡] እም፡[፫]፡ሳብዓይ፡ኆኅት፡እንተ፡መንገለ፡ምሥራቅ፡ዘታጸንን፡መንገለ፡አዜብ፡ይወጽእ፡እምኔሃ፡ጠል፡ወዝናም፡አናኵዕ፡ወድምሳሴ።ወእማእከላይት፡ኆኅት፡ርትዕት፡ይወጽእ፡እምኔሃ፡ዝናም፡ወጠል፡ወሕይወት፡ወሰላም፡ወበሣልስት፡ኆኅት፡እንተ፡መንገለ፡ምዕራብ፡እንተ፡ታጸንን፡ለመስዕ፡ይወጽእ፡እምኔሃ፡ጊሜ፡ወአስሐትያ፡ወሐመዳ፡ወዝናም፡ወጠል፡ወአናኵዕ።ወእምድኅረ፡እሉ፡[፬] ነፋሳት፡እለ፡መንገለ፡ምዕራብ፡በቀዳሚት፡ኆኅት፡እንት፡ታጸንን፡ለመንገለ፡መስዕ፡ወእምኔሃ፡ይወጽእ፡ጠል፡ወዝናም፡ወአስሐትያ፡ወቍር፡ወሐመዳ፡ወደደክ።ወእምነ፡ኆኅት፡ማእከላይት፡ይወጽእ፡ጠል፡ወዝናም፡ሰላም፡ወበረከት፡ወበደኃሪት፡ኆኅት፡እንተ፡መንገለ፡አዜብ፡ይወጽእ፡እምኔሃ፡የብስ፡ወድምሳሴ፡ዋዕይ፡ወሐጕል።ወተፈጸማ፡፲ወ፪ኀዋኅው፡ዘ፬ኀዋኅው፡ሰማይ፡ወኩሎ፡ትእዛዞሙ፡ወኵሎ፡መቅሠፍቶሙ፡ወሰላሞሙ፡አርአይኩከ፡ወልድየ፡ማቱሳላ።