3
1 ስምዑ፡ዘንተ፡ነገረ፡ዘይቤለክሙ፡እግዚአብሔር፡ቤተ፡እስራኤል፡ወኵሉ፡ሕዝብ፡ዘአውፃእክዎሙ፡እምድረ፡ግብጽ፡እንዘ፡ይብል።
2 ዳእሙ፡ኪያክሙ፡አእመርኩ፡እምኵሉ፡አሕዛበ፡ምድር፡በእንተ፡ዝንቱ፡እትቤቀለክሙ፡በእንተ፡ኵሉ፡ኀጢአትክሙ።
3 የሐውሩኑ፡ካልኤ፡ኅቡረ፡እንዘ፡ኢይትራአዩ።
4 ይጥኅርኑ፡አንበሳ፡በውስተ፡ግቡ፡በከ፡ዘአልቦ፡ዘይበልዕ።ይሁብኑ፡ቃሎ፡እጓለ፡አንበሳ፡በውስተ፡ግቡ፡በከ፡ዘአልቦ፡ዘይመሥጥ።
5 ወይወድቅኑ፡ዖፍ፡ውስተ፡መሥገርት፡ዘኢተሠግረ።ትትጋባእኑ፡መሥገርት፡ዘእንበለ፡ትእኅዝ።
6 ወይነፍሑኑ፡ቀርነ፡በሀገር፡ወኢይደነግፁ፡አሕዛብ።ወኢይመጽእኑ፡እኩይ፡ውስተ፡ሀገር፡ዘእግዚአብሔር፡ኢገብረ።
7 እስመ፡አልቦ፡ዘይገብር፡እግዚአብሔር፡ዘኢከሠተ፡ወዘኢነገረ፡ለአግብርቲሁ፡ለነቢያት።
8 ወአንበሳ፡ይጥኅር፡ወመኑ፡ኢይፈርህ፡ወእግዚአብሔር፡ይነብብ፡ወመኑ፡ኢይትኔበይ።
9 ዜንውዎሙ፡ለበሓውርተ፡ፋርስ፡ወለበሓውርተ፡ግብጽ፡ወበልዎሙ፡ተጋብኡ፡ውስተ፡ሰማርያ፡ወርእዩ፡ብዙኀ፡መንክረ፡በማእከለ፡ወትዕግልተ፡ዘውስቴታ።
10 ወኢያእመረት፡ዘሀለወ፡ቅድሜሃ፡ይቤ፡እግዚአብሔር፡እለ፡ይዘግቡ፡ዐመፃ፡ወሕርትምና፡ውስተ፡በሓውርቲሆሙ።
11 በእንተ፡ዝንቱ፡ከመዝ፡ይቤ፡እግዚአብሔር፡እግዚእ፡ጢሮስ፡በዐውድኪ፡ይማስን፡ምድርኪ፡ወይስዕሮ፡ለኀይልኪ፡እምኔኪ፡ወይትበረበር፡በሓውርትኪ።
12 በእንተ፡ዝንቱ፡ይቤ፡እግዚአብሔር፡በከመ፡ያነግፍ፡ኖላዊ፡እምአፈ፡አንበሳ፡ክልኤ፡እግረ፡ወርእሰ፡ከማሁ፡ደቂቀ፡እስራኤል፡ይወፅኡ፡እለ፡ይነብሩ፡በሰማርያ፡መንገለ፡አሕዛበ፡ደማስቆ።
13 ስምዑ፡ካህናት፡ወናሁ፡ኣሰምዕ፡ለቤተ፡ያዕቆብ፡ይቤ፡እግዚአብሔር፡እግዚእ፡ዘኵሎ፡ይመልክ።
14 እስመ፡በይእቲ፡ዕለት፡አመ፡ተበቀልክዎ፡ኀጢአቶ፡ለእስራኤል፡ወተበቀልኩ፡ምሥዋዓቲሁ፡ለቤቴል፡ወይትከሠት፡አቅርንተ፡ምሥዋዕ፡ወይወድቅ፡ውስተ፡ምድር።
15 ወእካዕዎሙ፡ወእቀትሎሙ፡ለቤተ፡ምክራም፡ወለቤተ፡ሐጋይ፡ወይትኀጐሉ፡አብያት፡ዘቀርነ፡ነጌ፡ ወይትዌሰኩ፡አብያት፡ካልኣን፡ብዙኃን፡ይቤ፡እግዚአብሔር።
