Biblia Etíope · Biblia Etíope en Ge'ez
Amós 2
ዘአሞጽ፡ነቢይ።1ከመዝ፡ይቤ፡እግዚአብሔር፡በእንተ፡ሠሳስ፡ኀጢአተ፡ሞአብ፡ወበእንተ፡አርባዕ፡ኢይመይጥ፡እስመ፡አውዐዩ፡አዕፅምቲሁ፡ለንጉሠ፡ኢዶምያ፡ለግምስስ።
2ወእፌኑ፡እሳተ፡ላዕለ፡ሞአብ፡ወትበልዕ፡መሰረታቲሃ፡ለአህጉሪሃ፡ወትመውት፡ሞአብ፡በድካም፡በውውዓ፡ወበቃለ፡ቀርን።
3ወእሴርዎሙ፡ለመኳንንቲሃ፡ወለኵሎሙ፡መላእክቲሃ፡ምስሌሆሙ፡ይቤ፡እግዚአብሔር።
4ከመዝ፡ይቤ፡እግዚአብሔር፡በእንተ፡ሠላስ፡ኀጢአቶሙ፡ለደቂቀ፡ይሁዳ፡ወበእንተ፡አርባዕ፡ኢይመይጦሙ፡እስመ፡ዐለዉ፡ሕግ፡እግዚአብሔር፡ወኢዐቀቡ፡ትአዛዞ፡ወአስሐቶሙ፡ከንቆሆሙ፡ዘገብሩ፡አበዊሆሙኒ፡ተለዉ፡ድኀሬሆሙ።
5ወእፌኑ፡እሳተ፡ላዕለ፡ይሁዳ፡ወትበልዕ፡መሰረታቲሃ፡ለኢየሩሳሌም።
6ከመዝ፡ይቤ፡እግዚአብሔር፡በእንተ፡ሠላስ፡ኀጢአቶሙ፡ለእስራኤል፡ወበእንተ፡አርባዕ፡ኢይመይጦሙ፡እስመ፡ኢያግብኡ፡ወርቆ፡በጽድቅ፡ኃምስ፡በእንተ፡አሳእኒሆሙ።
7በዘ፡ይከይዱ፡ምድረ፡ወይኰርዑ፡አርእስተ፡ነዳያን፡ወይመይጡ፡ፍትሐ፡ምስኪናን፡ወአብ፡ወወልዱ፡ይበውኡ፡ኀበ፡አሐቲ፡ብእሲት፡ከመ፡ያርኵሱ፡ስመ፡አምላኮሙ።
8ወየአስሩ፡አልባሲሆሙ፡ወይገብሩ፡መንጦላዕተ፡ውስተ፡ምሥዋዕ፡ወይሰትዩ፡ወይነ፡ትዕግልት፡በቤተ፡አምላኮሙ።
9ወአንሰ፡አጥፋእክዎሙ፡ለአሞሬዎን፡ዘኑኁ፡ከመ፡ኑኀ፡አርዝ፡ወጽንዑ፡ከመ፡አውልዕ፡ወአጥፋእኩ፡ፍሬሁ፡እምላዕሌሁ፡ወሥርዉሂ፡በታሕቴሁ።
10ወአነ፡ኣውፃእክዎሙ፡እምድረ፡ግብጽ፡ወወሰድክዎሙ፡ገዳመ፡አርብዓ፡ዓመተ፡ከመ፡ኣውርሶሙ፡ምድረ፡አሞሬዎን።
11ወነሣእኩ፡እምደቂቆሙ፡ለነቢያት፡ወእምወራዙቲሆሙ፡እለ፡ይትቄደሱ።ኢኮነሁ፡ከመዝ፡ደቂቀ፡እስራኤል፡ይቤ፡እግዚአብሔር።
12ወታሰትይዎሙ፡ወይነ፡ለቅዱሳን፡ወትክልእዎሙ፡ለነኪያት፡ወትብልዎሙ፡ኢትትነበዩ።
13በእንተ፡ዝንቱ፡ናሁ፡አነ፡ኣንኰረኵረክሙ፡በታሕቴክሙ፡ከመ፡ዘያንኰረኵር፡ሰረገላ፡ዘምሉእ፡ሕለተ።
14ወኢይክል፡ረዋጺ፡አምስጦ፡ወኀያልኒ፡ኢይእኅዝ፡በጽንዑ።ወመስተቃትልኒ፡ኢያድኅን፡ነፍሶ።
15ወነዳፊኒ፡ኢይቀውም፡ወረዋጺኒ፡ኢያመስጥ፡ወመስተጽዕንኒ፡ኢያወፅእ፡ነፍሶ።
16ወዘጽኑዕ፡ኢይረክብዎ፡ለልብ፡በኀይል፡ዘዕራቁ፡ይዴግን፡ውእተ፡አሚረ፡ይቤ፡እግዚአብሔር።