4
በእንተ፡ከሢተ፡ስእለት፡በጊዜ፡ጸሎት
1 ወይእዜኒ፡አኀዊነ፡ፍቁራን፡ፍሥሓነ፡ወአክሊልነ፡ከመዝ፡ቁሙ፡ወጽንዑ፡በእግዚእነ፡አኀዊነ።
2 ወአስተበቍዐክሙ፡ኤዎድያን፡ወስንጣክን፡ከመ፡ተኀልዩ፡በተልእኮ፡እግዚእነ፡በአሐዱ፡ልብ።
3 ወአስተበቍዐከ፡ለከሂ፡እኁየ፡ወመፃምርትየ፡ሰትሪካ፡ከመ፡ታርድኦሙ፡እስመ፡ሰርሑ፡ምስሌየ፡በትምህርተ፡ ወንጌል፡ምስለ፡ቀሌምንጦስ፡ወኵሎሙ፡ቢጽነ፡እለ፡አሐዱ፡ግብሮሙ፡እለ፡ተጽሕፈ፡አስማቲሆሙ፡ውስተ፡መጽሐፈ፡ሕይወት።
4 ተፈሥሑ፡በእግዚእነ፡ዘልፈ፡ወካዕበ፡እብለክሙ፡ተፈሥሑ።
5 ወይትዐወቅ፡ስላጤክሙ፡በኀበ፡ኵሉ፡ሰብእ፡እግዚአብሔር፡ቅሩብ።
6 ኢተኀልዩ፡ወኢምንተኒ፡ወባሕቱ፡ጸልዩ፡በኵሉ፡ጊዜ፡ወሰአሉ፡ወእንዘ፡ተአኵቱ፡ክሥቱ፡ስእለተክሙ፡ኀበ፡እግዚአብሔር።
7 ወሰላመ፡እግዚአብሔር፡እንተ፡ኵሉ፡ባቲ፡ወትትሌዐል፡እምኵሉ፡ልብ፡ወእምኵሉ፡ኅሊና፡ታጽንዖ፡ለልብክሙ፡ወለኅሊናክሙ፡በኢየሱስ፡ክርስቶስ።
8 ወይእዜኒ፡አኀዊነ፡ኵሎ፡ዘርትዕ፡ወዘንጽሕ፡ወዘጽድቅ፡ወዘሠናይ፡ወዘፍቅር፡ወዘምድኃር፡ወአስተርክቦ፡ዘይደሉ፡ወዘይትአኰት፡ኪያሁ፡ኀልዩ።
9 ዘተመሀርክሙ፡ወዘሰማዕክሙ፡ወዘርኢክሙ፡በኀቤየ፡ኪያሁ፡ግበሩ፡ወአምላከ፡ሰላም፡የሀሉ፡ምስለ፡ኵልክሙ።
10 ተፈሣሕኩ፡በእግዚእነ፡ፈድፈደ፡እስመ፡ትኄልዩ፡ወትጽሕቁ፡ለትካዝየ፡እምቀዲሙ፡በከመ፡ትጽሕቁ፡ሊተ፡ዓዲ፡ወለእመ፡ይሰአነክሙ።
11 ወአኮ፡ዘእቤ፡በእንተ፡ዘኀጣእኩ፡እስመ፡አአምር፡ከመ፡የአክለኒ፡ዘብየ።
12 ከሃሊ፡አንሰ፡ተጽናሰሂ፡ወተደልዎሂ፡በኵሉ፡ውስተ፡ኵሉ፡ለመድኩ፡ርኂበሂ፡ወጸጊበሂ፡ሐሚመሂ፡ወተፈሥሖሂ።
13 ኵሎ፡እክል፡በዘውእቱ፡አክሀለኒ፡ክርስቶስ።
14 ወባሕቱ፡ሠናየ፡ገበርክሙ፡ዘተሳተፍክሙ፡በሕማምየ።
15 ተአምሩ፡አንትሙ፡ሰብአ፡ፊልጵስዩስ፡በቀዳሚ፡ትምህርት፡አመ፡መጻእኩ፡እመቄዶንያ፡ከመ፡ኢኀብሩ፡ምስሌየ፡አሐዱሂ፡እምቤተ፡ክርስቲያን፡ኢበውሂብ፡ወኢበነሢእ፡ዘእንበለ፡ዳእሙ፡ባሕቲትክሙ።
16 ዓዲ፡በተሰሎንቄሂ፡ምዕረ፡ወካዕበ፡ፈኖክሙ፡ሊተ፡ለትካዝየ።
17 አኮ፡ሀብተክሙ፡ፈቂድየ፡ዘእዜከር፡ዘንተ፡ዳእሙ፡አኀሥሥ፡ከመ፡ይሥመር፡በላዕሌክሙ፡ፍሬ፡ጽድቅ።
18 ወናሁ፡ተወከፍኩ፡ኵሎ፡ዘፈኖክሙ፡ኀቤየ፡አከለኒ፡ወበዘተርፈ፡ሰለጥኩ፡በዘአብጽሐ፡ሊተ፡አፍሮዲጡ፡ዘእምኀቤክሙ፡መዓዛ፡ሠናየ፡ወመሥዋዕተ፡ኅሩየ፡ወሥሙረ፡በኀበ፡እግዚአብሔር።
19 ወአምላኪየ፡ይፈጽም፡ለክሙ፡ኵሎ፡መፍቀደክሙ፡በከመ፡ብዕለ፡ስብሐቲሁ፡ለኢየሱስ፡ክርስቶስ
20 ወእግዚአብሔር፡አቡነ፡ዘሎቱ፡ስብሐት፡ለዓለመ፡ዓለም፡አሜን።
21 አምኁ፡ኵሎ፡ቅዱሳነ፡በኢየሱስ፡ክርስቶስ፡አምኁክሙ፡አኀዊነ፡እለ፡ኀቤየ።
22 ወይኤምኁክሙ፡ኵሎሙ፡ቅዱሳን፡ወፈድፋደሰ፡እለ፡እምሰብአ፡ቄሣር፡ቤተ፡ንጉሥ።
23 ጸጋሁ፡ለእግዚእነ፡ኢየሱስ፡ክርስቶስ፡ምስለ፡መንፈስክሙ፡አሜን። ። ።
ተፈጸመት፡መልእክት፡ኀበ፡ሰብአ፡ፊልጵስዩስ፡ወተጽሕፈት፡በሮሜ፡ወተፈነወት፡ምስለ፡ጢሞቴዎስ፡ወአፍሮዲጡ። ። ።
ወስብሐት፡ለእግዚአብሔር፡አሜን። ። ።