Biblia Etíope · Biblia Etíope en Ge'ez

Filipenses 3

ኀበ፡ሰብአ፡ፊልጰስዮስ።

3ዘከመ፡ይደሉ፡ተዐቅቦ፡እምእኩያን

1ወይእዜኒ፡አኀውየ፡ተፈሥሑ፡በእግዚእነ፡ወዘሂ፡ዘእጽሕፍ፡ለክሙ፡ኢይትሀከይ፡አንሰ፡እስመ፡ያጸንዐክሙ።

2ተዐቀቡ፡አንትሙሂ፡ወዑቅዎሙ፡ለከለባት፡ወዑቅዎሙ፡ለገበርተ፡እኪት፡ወዑቅዎሙ፡ለምቱራን፡በግዝረት።

3ግዙራንሰ፡ንሕነ፡እለ፡ንትለአክ፡ለእግዚአብሔር፡በመንፈስ፡ወናመልክ፡ወንትሜካሕ፡በኢየሱስ፡ክርስቶስ፡ወአኮ፡በሥጋነ፡ዘንትዌከል።

4እንዘ፡ብየኒ፡ግዝረት፡እመሰ፡አነ፡እትዌከል፡በግዝረት፡ወእመሰ፡ቦ፡ዘይኄሊ፡ትውክልተ፡በግዝረት፡አነ፡እኄይሶ፡ለዝንቱ።

5ግዙር፡ዘበሳምንት፡እምሕዝበ፡እስራኤል፡እምነገደ፡ብንያም፡ዕብራዊ፡ዘእምዕብራውያን፡ወበሕገ፡ኦሪት፡ፈሪሳዊ።

6ወበቅንአት፡ሰደድኩ፡ቤተ፡ክርስቲያን፡በጽድቀ፡ኦሪት፡ንጹሐ፡ከዊንየ።

7ወባሕቱ፡ዝኰ፡ረባሕየ፡አብደርኩ፡እኅጐሎ፡በእንተ፡ክርስቶስ።

8ወረሰይኩ፡ኵሎ፡ኀሣረ፡በእንተ፡ዕበየ፡ኀይለ፡አእምሮቱ፡ለኢየሱስ፡ክርስቶስ፡እግዚእየ፡ዘበእንቲኣሁ፡ገደፍኩ፡ኵሎ ወረሰይክዎ፡ከመ፡እዳው፡ከመ፡እርብሖ፡ለክርስቶስ።

9ወእኩን፡ቦቱ፡እንዘ፡አልብየ፡ይእዜ፡ጽድቀ፡ኦሪት፡ዘእንበለ፡ጽድቀ፡ሃይማኖተ፡ክርስቶስ፡ዘእምኀበ፡እግዚአብሔር።

10ወቦቱ፡አአምሮ፡ለኢየሱስ፡ወለኀይለ፡ተንሥኦቱ፡ወእሳተፎ፡በሕማሙ፡ወእትሜሰሎ፡በሞቱ።

11እመቦ፡ከመ፡አድምዖ፡በዝንቱ፡አመ፡ይትነሥኡ፡ምዉታን።

12ወአኮሰ፡ዘወዳእኩ፡ወነሣእኩ፡ወሰለጥኩ፡ዘንተ፡ዳእሙ፡እዴግን፡ለእመ፡እረክብ፡ግብረ፡ዘበእንቲኣሁ፡ነሥአኒ፡ኢየሱስ ክርስቶስ።

13ኦ፡አኀውየ፡ሊተሰ፡ይመስለኒ፡ዓዲየ፡ኢነሣእኩ፡ፍጻሜየ።

14እስመ፡ዘድኅሬየ፡እረስዕ፡ወዘቅድሜየ፡እሜልዕ፡ወእዴግን፡ወአኀሥሥ፡ዕሴትየ፡ከመ፡ሰብአ፡ዐይን፡ለጽዋዔ፡ዘእግዚአብሔር፡ኀበ፡ላዕሉ፡በኢየሱስ ክርስቶስ።

15ኵልክሙ፡ፍጹማን፡ዘንተ፡ኀልዩ፡ወእመኒ፡ቦ፡ባዕድ፡ዘትኄልዩ፡ኪያሁኒ፡ይክሥት፡ለክሙ፡እግዚአብሔር።

16ወባሕቱ፡ውስተ፡ዘበጻሕነ፡ግብር፡ናጥብዕ፡በአሐዱ፡ኅብረት።

17ኪያየ፡ተመሰሉ፡አኀውየ፡ወተዐቀብዎሙ፡ለእለ፡ከመዝ፡የሐውሩ፡ዘከመ፡ትሬእዩኒ።

18እስመ፡ብዙኃን፡እለ፡የሐወሩ፡ሑረተ፡ካልአ፡ዘከመ፡እብለክሙ፡ዘልፈ፡ወይእዜኒ፡ገሃደ፡እነግረክሙ፡ከመ፡እሙንቱ፡ጸላእቱ፡ለመስቀለ፡ክርስቶስ።

19እለ፡ደኃሪቶሙ፡ለሕርትምና፡እለ፡ከርሦሙ፡ያመልኩ፡ወክብሮሙ፡ኀሣሮሙ፡እለ፡ይኄልዩ ዘውስተ፡ምድር።

20ወለነሰ፡ዘውስተ፡ሰማያት፡ሀገርነ፡ወእምህየ፡ንጸንሕ፡ኪያሁ፡መድኀኒነ፡ኢየሱስ፡ክርስቶስ፡እግዚእነ።

21ዘይሔድስ፡ሥጋነ፡ትሑተ፡ወይሬስዮ፡አምሳለ፡ሥጋ፡ስብሐቲሁ፡በከመ፡ረድኤተ፡ኀይሉ፡ዘቦቱ፡ይገኒ፡ሎቱ፡ኵሉ።