3
በእንተ፡ደኃሪ፡መዋዕል
1 ወዘንተ፡ባሕቱ፡አእምር፡ከመ፡በደኃሪ፡መዋዕል፡ይመጽእ፡ዓመታተ፡እኩይ።
2 ወይከውኑ፡ሰብእ፡መፍቀርያነ፡ርእሶሙ፡ወመፍቀርያነ፡ፈጊዕ፡ወንዋይ፡ነባብያነ፡ዝሁራነ፡ፅሩፋነ፡ዐላውያነ፡አዝማዲሆሙ፡እለ፡አልቦሙ፡አኰቴተ፡ውፁኣነ፡ጽድቅ።
3 እለ፡አልባሙ፡ምሕረተ፡ሥሑጻነ፡ጸላእያነ፡ሠናይ።
4 ዐላውያነ፡ዝሉፋነ፡ጽሉኣነ፡እለ፡ያበድሩ፡ሐውዘ፡እምፍቅረ፡እግዚአብሔር።
5 ይትሜሰሉ፡ጻድቃነ፡ወይክሕድዎ፡ለኀይለ፡ጽድቅ።
6 ወለእለ፡ከመዝ፡ተገሐሦሙ።እስመ፡እሙንቱ፡እለ፡ይትባውኡ፡አብያተ፡ሰብእ፡ወይፄውዎን፡ለአንስት፡እለ፡ፅፉራት፡በኃጢአት፡ወያወርዱ፡ውስተ፡ብዙኅ፡ፍትወት።
7 ወዘልፈ፡ይትጌሠጹ፡ወኢያአምርዋ፡ግሙራ፡ለጽድቅ።
8 ከመ፡ኢያኔስ፡ወኢያንበሬስ፡ተቃወምዎ፡ለሙሴ።ከማሁ፡እሉሂ፡ተቃወምዋ፡ለጽድቅ።
9 ሰብእ፡ሙሱናነ፡ልብ፡ወንፉቃነ፡ሃይማኖት።ወባሕቱ፡ኢይትሌዐሉ፡እስመ፡ፈድፈደት፡እበዶሙ፡ ወተዐውቀት፡ለኵሉ፡ከመ፡እበዶሙ፡ለእልክቱ፡ዓዲ።
በእንተ፡ተሊወ፡መምህራን
10 ወአንተሰ፡ተለውከ፡በትምህርትየ፡በግዕዝየ፡በዘመሀርኩከ፡በሃይማኖት፡ወበተስፋ፡ወበተፋቅሮ፡ ወበትዕግሥት።በተሰዶ፡ወበሕማም።
11 መጠነ፡ረከበኒ፡በአንጾኪያ፡በኢቆንያ፡በልስጥራን፡መጠነ፡ተዐገሥኩ፡ተሰዶ።
12 ወእምኵሉ፡አድኀነኒ፡እግዚአብሔር።ወኵሎሙ፡እለ፡ይፈቅዱ፡የሐይዉ፡በጽድቀ፡ኢየሱስ፡ክርስቶስ፡ይሰደዲ።
13 ወሰበእሰ፡እኩያን፡ይትሌዐሉ፡ውስተ፡እንተ፡ተአኪ፡ወይስሕቱ፡ወያስሕቱ።
14 ወአንተሰ፡ሀሉ፡በዘተመሀርከ፡ወተአመንከ።ታአምር፡በኀበ፡መኑ፡ተመሀርከ።
15 ታአምር፡እምንእስከ፡መጽሐፈ፡ቅዱሰ፡ዘይክል፡አሕይዎተከ፡በሃይማኖተ፡ኢየሱስ፡ክርስቶስ።
16 ወኵሉ፡መጽሐፍ፡በመንፈሰ፡እግዚአብሔር፡ተጽሕፈ፡ወይበቍዕ፡ለኵሉ፡ትምህርት፡ወተግሣጽ፡ወአርትዖ፡ወአጥብቦ፡ውስተ፡ጽድቅ።
17 ከመ፡ይትገሠጽ፡ብእሴ፡እግዚአብሔር፡ውስተ፡ኵሉ፡ምግባረ፡ሠናይ።
