Biblia Etíope · Biblia Etíope en Ge'ez
2 Timoteo 4
ኀበ፡ጢሞቴዎስ፡ዳግማዊ።1ወእኤዝዘከ፡በቅድመ፡እግዚአብሔር፡ወእግዚእነ፡ኢየሱስ፡ክርስቶስ፡ዘሀልዎ፡ይኰንን፡ሕያዋነ፡ወሙታነ፡አመ፡ይመጽእ፡በመንግሥቱ።
2ከመ፡ትስብክ፡ቃሎ፡ቀዊመከ፡በድቡት፡በጊዜሁ፡ወዘእንበለ፡ጊዜሁ፡ገሥጽ፡ወተዛለፍ፡ወየውህ፡እንዘ፡ትትዔገሥ፡በኵሉ፡ወትሜህር።
3እስመ፡ይበጽሕ፡ጊዜሁ፡አመ፡የአብይዋ፡ለትምህርተ፡ሕይወት፡ወየሐውሩ፡በፍትወቶሙ፡ወያመጽኡ፡መምህራነ፡ለርእሶሙ፡በሐከከ፡እዘኒሆሙ።
4ወይመይጡ፡እዘኒሆሙ፡እምጽድቅ፡ወይትመየጡ፡ኀበ፡መኃደምት።
5ወአንተሰ፡ንቃህ፡ወጥበብ፡በኵሉ፡ወጻሙ፡ወግበር፡ምግባረ፡ወንጌላዊ፡ወፈጽም፡መልእክተከ።
6ወአንሰ፡ወዳእኩ፡ሰለጥኩ፡ወበጽሐኒ፡ዕድሜየ፡ለአዕርፎ።
7ሠናየ፡ገድለ፡ተጋደልኩ፡በድርየኒ፡ፈጸምኩ፡ወሃይማኖተኒ፡ዐቀብኩ።
8እንከሰ፡ጽኑሕ፡ሊተ፡አክሊለ፡ጽድቅ፡ዘየዐስየኒ፡እግዚአብሔር፡ይእተ፡ዕለተ፡መኰንነ፡ጽድቅ።ወአኮ፡ለባሕቲተየ።አላ፡ለኵሎሙ፡እለ፡ያፈቅሩ፡ምጽአተ፡ዚአሁ።
9አሰተፋጥን፡ትምጻእ፡ኀቤየ፡ፍጡነ።
10ዴማስ፡ኀደገኒ፡ወአፍቀሮ፡ለዝንቱ፡ዓለም፡ዘይእዜ፡ወሖረ፡ተሰሎንቄ፡ወቄርቂስኒ፡ገላትያ፡ወቲቶ፡ድልማጥያ።ሉቃስ፡ባሕቲቱ፡ምስሌየ።
11ወአምጽኦ፡ምስሌከ፡ለማርቆስ፡እስመ፡ይበቍዐኒ፡ለመልእክት።
12ወፈነውክዎ፡ለቲኪቆስ፡ኤፌሶን።
13ወፌሎነኒ፡ዘመጽሐፍ፡ዘኀደጉ፡በጢሮአስ፡ኀበ፡ቀርጳ፡ተመላእ፡ምስሌከ፡አመ፡ትመጽእ፡ወዓዲ፡መጻሕፍተ፡ወረቀ።
14እለ፡እስክንድሮስ፡ነሃቢ፡ብዙኀ፡ሣቀየኒ።ይፍድዮ፡እግዚአብሔር፡በከመ፡ምግባሩ።
15ወአንተኒ፡ተዓቀቦ፡እስመ፡ፈድፋደ፡ተቃወሞ፡ለነገርነ።
16ወበቀዳሚ፡ነገርየ፡አልቦ፡ዘኀብረ፡ምስሌየ፡ዳእሙ፡ኵሎሙ፡ኀደጉኒ።
17ወይስረይ፡ሎሙ፡ዘንተ።ወዳእሙ፡እግዚአብሔር፡ቆመ፡ሊተ፡ወአጽንዐኒ፡ከመ፡ይእመኑ፡በስብከተ፡ዚአየ፡ወይስምዑ፡ኵሎሙ፡አሕዛብ፡ወድኅንኩ፡እምአፈ፡አንበሳ።
18ወያድኅነኒ፡እግዘአብሔር፡እምኵሉ፡ግብር፡እኩይ፡ወያሐይወኒ፡ውስተ፡መንግሥቱ፡ዘበሰማያት፡ውእቱ፡ዘሎቱ፡ስብሐት፡ለዓለመ፡ዓለም፡አሜን።ማኅተመ፡መልእክት
19አምኅ፡ጵርስቅላ፡ወአቂላ፡ወቤተ፡ሄኔሲፎሩ።
20አሬስጦስ፡ነበረ፡ቆሮንቶስ፡ወለጥሮፊሞስ፡ኀደግዎ፡በሀገረ፡መሊጦን፡ይደዊ።
21አስተፋጥን፡ትምጻእ፡ኀቤየ፡እምቅድመ፡ክረምት።ይኤምኁከ፡ኤውቡሎስ፡ወጱዴስ፡ወሊኖስ፡ወቀላውድያ፡ወኵሎሙ፡አኀዊነ።
22ወእግዚእነ፡ኢየሱስ፡ክርስቶስ፡የሀሉ፡ምስለ፡ምንፈስከ።ወጸጋሁ፡ምስሌክሙ፡አሜን። ። ።ተፈጸመት፡መልእክት፡ካልእት፡ኀበ፡ጢሞቴዎስ፡ወተጽሕፈት፡በሮሜ፡ወተፈነወት፡በእደ፡አንክሮሎስ። ። ።ወስብሐት፡ለእግዚአብሔር፡አሜን። ። ።2