5
በእንተ፡አክብሮ፡ልሂቃን፡ወተአዝዞ
1 ሊቃናት፡ኢታመጕጽ፡ትአዘዝ፡ከመ፡ዘለአቡከ።
2 ወለንኡሳን፡ከመ፡ዘለአኀዊከ።
3 ወለልሂቃትሂ፡ከመ፡ዘለአምከ፡ወለንኡሳትሂ፡ከመ፡ዘለአኃቲከ፡በኵሉ፡ንጽሕ።ወአክብር፡እቤራተ፡በአማን።
4 ወእመቦ፡እቤር፡አንተ፡ባቲ፡ወሉድ፡አው፡ደቂቀ፡ውሉድ፡ይትመሀሩ፡ቅድመ፡አሠንዮ፡ለቤቶሙ፡ወይዕስዩ፡አዝማዲሆሙ፡እስመ፡ከማሁ፡ሠናይ፡ወሥሙር፡በቅድመ፡እግዚአብሔር።
5 ወእንተሰ፡እቤር፡በአማን፡ንጽሕት፡እንተ፡ባሕቲታ፡ትነብር፡እስመ፡ቱክልታ፡እግዚአብሔር፡ወትፀመድ፡ጸሎተ፡ወትስእል፡መዐልተ፡ወሌሊተ።
6 ወእንተሰ፡ትፈግዕ፡ምስለ፡ተውኔት፡ምውት፡ይእቲ፡እንዘ፡ሕያዋ።
7 ወከመዝ፡ገሥጽ፡ከመ፡ኢያድልዉ፡ወኢያመክንዩ።
8 ወዘሰ፡ኢይሔሊ፡ለቤቱ፡ወይገድፍ፡አዝማዲሁ፡ውእቱ፡ክሕደ፡ሃይማኖቶ፡ወየአኪ፡እምዘ፡ኢየአምን።
በእንተ፡ኅርየተ፡ዲያቆናውያት
9 ወለእመ፡ኀረይከ፡እቤረ፡ኅረይ፡እንተ፡ስሳ፡ክረምታ፡እንተ፡አሐደ፡ብእሴ፡አውስበት።
10 ብእሲት፡እንተ፡ይንእድዋ፡በኵሉ፡ምግባረ፡ሠናይ።ለእመ፡አልሀቀት፡ውሉዳ፡ወለእመ፡ነግደ፡ተወክፈት፡ወለእመ፡እግረ፡ጻድቃን፡ኀፀበት፡ወእመ፡ርኁበ፡አጽገበት፡ወኵሎ፡ምግባረ፡ሠናይ፡ለእመ፡ተለወት።
11 ወለንኡሳትሰ፡መበለታት፡ተገሐሦን።ሶበ፡ፈግዓ፡ላዕለ፡ክርስቶስ፡ወይፈቅዳ፡ ይግብኣ፡ለአውስቦ።
12 ወጽኑሕ፡ደይኖን፡እስመ፡ክሕዳ፡ሃይማኖቶን፡ቀዳሚተ።
13 ወዓዲ፡አፅርዕተ፡ይትሜሀራ፡እንዘ፡የዐውዳ፡አብያተ፡ወአኮ፡አፅርዕተ፡ባሕቲቶ፡አላ፡ዓዲ፡ከመ፡ ያብዝኃ፡ነቢበ፡ወምግባረ፡ከንቱ፡ይፍጥራ፡ነገረ፡ዘኢህልው።
14 እፈቅድ፡እንከ፡ለንኡሳት፡ያውስባ፡ወይትዋለዳ፡ወይኩና፡በዓልታተ፡ቤት፡ወኢይርከብ፡ምክንያተ፡ወኢአሐተኒ፡በዘይፀብኦን፡ጸላኢ፡ከመ፡ኢያጽእላ፡ርእሶን።
15 እስመቦ፡እለ፡ተመይጡ፡ወተለውዎ፡ለሰይጣን።
16 ወለእምቦ፡እምእመናን፡ዘቦ፡እቤር፡ይዕቀባ፡ወኢያክብድ፡ላዕለ፡ቤተ፡ክርስቲያን።ከመ፡ትክሀል፡ለእለ፡በአማን፡እቤራት።
ዘከመ፡ይደሉ፡ምክዕቢተ፡ክብር፡ለእለ፡ይትለአኩ፡ሠናየ
17 እለ፡ሠናየ፡ተልእኩ፡ቀሲሳን፡ምክዕቢተ፡ክብር፡ይደልዎሙ፡ወፈድፋደሰ፡ለእለ፡ይሰርሑ፡በቃል፡ወበምህሮ።
18 ወይብል፡መጽሐፍ፡ኢትፍፅሞ፡አፋሁ፡ለላህም፡ሶበ፡ታከይድ፡እክለ፡ወይደልዎ፡ዐስቡ፡ለዘይትቀኒይ።
19 ላዕለ፡ልሂቅ፡ኢትስማዕ፡ውዴተ፡ዘእንበለ፡ይዝልፍዎ፡ክልኤቱ፡ወሠለስቱ፡ሰማዕት።
20 ወለእለሂ፡ስሕቱ፡በቅድመ፡ኵሉ፡ገሥጾሙ፡ከሙ፡ባዕድኒ፡ይፍራህ።
21 አሰምዕ፡ለከ፡በቅድመ፡እግዚአብሔር፡ወኢየሱስ፡ክርስቶስ፡ወመላእክቲሁ፡ኅሩያን፡ከመ፡ትዕቀብ፡ዘንተ፡እንዘ፡ኢታደሉ፡ወኢታጸድቆ፡ለሰብእ፡ቅድመ፡ፍትሕ፡ወኢትግበር፡ምንተሂ፡በአድልዎ።
22 ወኢትሢም፡ፍጡነ፡ወኢመነሂ፡ወኢትሳተፍ፡በኃጢአተ፡ባዕድ።
23 ወአንጽሕ፡እንከ፡ርእሰከ።ወኢትስተይ፡ማየ፡ዕራቆ፡ኅዳጠ፡ወይነ፡ቶስሕ፡በእንተ፡ሕማመ፡ከብድከ፡ወበእንተ፡ደዌከ፡ዘዘልፍ።
24 ቦሰብእ፡ዘይትዐወቅ፡ኃጢአቱ፡ወይትባደሮ፡ውስተ፡ደይን፡ወቦዘይተልዎ፡ኃጢአቱ።
25 ወከማሁ፡ዘሂ፡ይገብር፡ሠናየ፡ይትዐወቅ፡ወዘሂ፡ካልእ፡ምግባሩ፡ኢይትከበት።