Biblia Etíope · Biblia Etíope en Ge'ez
1 Timoteo 6
ኀበ፡ጢሞቴዎስ፡ቀዳማዊ።1ወኵሉ፡ነባሪ፡ወቅኑይ፡አክብሩ፡አጋእዝቲክሙ፡በኵሉ፡ከመ፡ኢይፅርፉ፡ላዕለ፡ስመ፡እግዚአብሔር፡ወላዕለ፡ትምህርቱ።
2ወእለሰ፡ቦሙ፡አጋእዝት፡መሃይምናን፡ኢያስተሐቅሩ፡እስመ፡አኀዊሆሙ፡እሙንቱ፡በሃይማኖት፡ዓዲ፡ፈድፋደ ይትቀነዩ፡ሎሙ፡እስመ፡ምእመናን፡ወፍቁራን፡እሙንቱ፡ወለእሉ፡ይትወከፉ፡ወይትለአኩ፡በፍሥሓ፡ሎሙ፡ከመዝ፡መሀር፡ወገሥጽ፡ወአስተብቍዖሙ።
3ወእመሰ፡ቦ፡ዘይሜህር፡ካልአ፡ወኢይገብእ፡ኀበ፡ትምህርተ፡ነገረ፡ሕይወት፡ዘውእቱ፡ቃለ፡እግዚእነ፡ኢየሱስ፡ክርስቶስ፡ወኀበ፡ትምህርተ፡ጽድቅ።
4ውእቱኬ፡ዘይትዔበይ፡እንዘ፡አልቦ፡ዘየአምር፡ዘእንበለ፡መቅሠፍተ፡ዘየኀሥሥ፡ወነገረ፡ጋዕዝ፡ዘእምኔሁ፡ይመጽእ ተሓምሞ፡ወተቃንኦ፡ፀሪፍ፡ወምክር፡እኩይ፡ወአስተዳጕጾ፡ሰብእ።
5ወእሉ፡ሙሱናን፡ወውፁኣን፡እምጽድቅ፡ወይሬስይዎ፡ለጽድቀ፡እግዚአብሔር፡ተግባረ፡ተገኀሦሙ፡ለእሉ።
6እስመ፡ለነሰ፡ተግባርነ፡ዐቢይ፡ውእቱ፡ፈሪሀ፡እግዚአብሔር።
7እስመ፡አልቦ፡ዘአምጻእነ፡ውስተ፡ዓለም፡ወአልቦ፡ዘንክል፡ነሢአ፡እምኔሁ።
8እምከመ፡ረከብነ፡ሲሳየነ፡ወዐራዘነ፡የአክለነ።
9ወእለሰ፡ይፈቅዱ፡ይብዐሉ፡ይወድቁ፡ውስተ፡መንሱት፡ወብዙኅ፡መሣግረ፡ፍትወት፡ዘእበድ፡ዘይብእሶሙ፡ወዘያሠጥሞሙ፡ለሰብእ፡ውስተ፡ተሠርዎ፡ወሞት።
10እስመ፡ሥርዉ፡ለኵሉ፡እኩይ፡አፍቅሮ፡ንዋይ፡እስመ፡ብዙኃን፡እለ፡በዛቲ፡ስሕቱ፡ወዐለዉ፡ሃይማኖቶሙ፡ወኀሠሡ፡ለርእሶሙ፡ብዙኀ፡መቅሠፍተ።
11ወአንተሰ፡ብእሴ፡እግዚአብሔር፡ጕየይ፡እምዝ፡ወዴግን፡ጽድቀ፡ወምሂረ፡ወሃይማኖተ፡ወተፋቅሮ፡ወትዕግሥተ፡ወትሕትና።
12ተጋደል፡ሠናየ፡ገድለ፡በሃይማኖት፡ለተመጥዎ፡ሕይወት፡ዘለዓለም፡ዘሎቱ፡ተጸዋዕከ፡ወአመንከ፡ሠናየ፡አሚነ፡በቅድመ፡ብዙኃን፡ሰማዕት።
13ከመዝ፡እኤዝዘከ፡በቅድመ፡እግዚአብሔር፡ዘኵሎ፡ሙታነ፡ያሐዩ፡ወኢየሱስ፡ክርስቶስ፡ዘኮነ፡ሰማዕተ፡በቅድመ፡ጲላጦስ፡ጴንጤናዊ።
14በሠናይ፡አሚን፡ከመ፡ትዕቀብ፡ዘንተ፡ትእዛዘ፡በንጽሕ፡እንዘ፡ኢታደሉ፡እስከ፡ምጽአቱ፡ለእግዚእነ፡ኢየሱስ፡ክርስቶስ።
15ዘያስተርኢ፡በዕድሜሁ፡ዘባሕቲቱ፡ብፁዕ፡ወኀያል፡ንጉሠ፡ነገሥት፡ወእግዚአ፡አጋእዝት።
16ውእቱ፡ባሕቲቱ፡ዘኢይመውት፡ወቦቱ፡ብርሃን፡ዘኢይጠፍእ፡እምቅድመ፡ዓለም፡ዘአልቦ፡ዘርእዮ፡ሰብእ ወአልቦ፡ዘይክል፡ርእዮቶ፡ዘሎቱ፡ክብር፡ወስብሐት፡ወኀይል፡ለዓለመ፡ዓለም፡አሜን።በእንተ፡ትእዛዝ፡ዘተውህበ፡ለአብዕልት
17ለአብዕልተ፡ዝንቱኒ፡ዓለም፡አዝዞሙ፡ከመ፡ኢይትዐበዩ፡ወኢይትአመንዎ፡ለብዕሎሙ፡ኀላፊ፡ዘእንበለ፡በእግዚአብሔር፡ሕያው፡ዘውእቱ፡ይሁበነ፡በብዝኀ፡ብዕሉ፡ኵሎ፡ከመ፡ንትፈሣሕ።18ከመ፡ይግበሩ፡ግብረ፡ሠናየ፡ወይብዐሉ፡በገቢረ፡ጽድቅ፡ወይኩኑ፡ራትዓነ፥ወጸጋውያነ፡ወሱቱፋነ።
19ወይሣርሩ፡ለርእሶሙ፡መሠረተ፡ሠናየ፡ለዘይመጽእ፡ዓለም፡ከመ፡ይርከቡ፡ሕይወተ፡ዘበአማን።
20ኦ፡ጢሞቴዎስ፡ዕቀብ፡ማሕፀንተከ፡ተገኀሦሙ፡ለርኩሳን፡እለ፡ያመጽኡ፡ነገረ፡ከንቶ፡ወያሴስልዋ፡ለጽድቅ፡በሐሰት።
21እስመ፡እሉ፡ስሕቱ፡እምተስፋ፡ሃይማኖት፡ጸጋ፡ምስሌከ፡አሜን። ። ።ተፈጸመት፡መልእክት፡ቀዳማዊት፡ኀበ፡ጢሞቴዎስ፡ወተጽሕፈት፡በአቴና፡ወተፈነወት፡በእደ፡ቲቶ። ። ።ወስብሐት፡ለእግዚአብሔር፡አሜን። ። ።1