2
በእንተ፡ሥርዐተ፡ቤተ፡ክርስቲያን
1 ወአንተሰ፡ንግር፡ዘይደልው፡ለትምህርተ፡ሕይወት።
2 ሊቃውንትኒ፡ይኩኑ፡ንጹሓነ፡እምዝሙት፡ወንቁሃነ፡ወጠቢባነ።ወኢይናፍቁ፡በሃይማኖት፡ይትፋቀሩ፡ወይለብዉ፡ወይትዓገሡ።
3 ልሂቃትሂ፡ከማሁ፡ይትቀደሳ፡ወያሠንያ፡ግዕዞን፡ኢያስተሐውራ፡ነገረ፡ወኢይትነያ፡ለስቴ፡ወኢይሰጠያ፡ውስተ፡ስካር፡ዳእሙ፡ይገሥጻ፡ወይምሀራ፡ሠናየ፡ትምህርተ፡ለአንስት፡ከመ፡ያንጽሓ፡ርእሶን።
4 ወንኡሳትሂ፡ይፍቅራ፡አምታቲሆን፡ወውሉዶን።
5 ኢይዘምዋ፡ወይግበራ፡ሠናየ፡ወያሠንያ፡ግዐዞን፡ወሥርዓተ፡ቤቶን፡ወይትአዘዛ፡ለአምታቲሆን፡ከመ፡ኢይፅርፍ፡አሐዱሂ፡ላዕለ፡ቃለ፡እግዚአብሔር።
6 ወለወራዙትኒ፡ገሥጾሙ፡ያንጽሑ፡ርእሶሙ፡ወይኩኑ፡ጠቢባነ።
7 ወኩኖሙ፡አርአያ፡ለኵሎሙ፡በምግባረ፡ሠናይ።
8 ወይኩን፡ነገርከ፡ወትምህርትከ፡በንጹሕ።በሥሩዕ፡ነገር፡ዘአልቦ፡ነውር፡ዘኢይሜንኖ፡አሐዱኒ፡ከመ፡ይትኀፈር፡ጸላኢ፡ወይኅጣእ፡ዘይነብብ፡ላዕሌነ፡ሕሡመ።
9 ነባሪኒ፡ይትአዘዙ፡ለአጋእዝቲሆሙ፡ወያሥምርዎሙ፡በኵሉ፡ወኢይቅስጡ፡ወኢይትዋሥኡ፡በኵሉ።
10 አላ፡ያሠንዩ፡በንጹሕ፡ሃይማኖቶሙ፡ከመ፡ይንአድዎ፡በኵለሄ፡ለትምህርተ፡እግዚአብሔር፡መድኀኒነ።
11 እስመ፡ተዐውቀ፡ጸጋሁ፡ለእግዚአብሔር፡በኀበ፡ኵሉ፡ሰብእ።
12 ወትሜህረነ፡ከመ፡ንትናከራ፡ለኃጢአት፡ወለፍትወተ፡ዓለም፡ወንሕየው፡በጽድቅ፡ወበንጽሕ፡ወበተፋቅሮ፡በዝንቱ፡ዓለም።
13 እንዘ፡ንሴፎ፡አብፅዖ፡ወምጽአተ፡ስብሐቲሁ፡ለአምላክነ፡ዐቢይ፡ወመድኀኒነ፡ኢየሱስ፡ ክርስቶስ።
14 ዘመጠወ፡ርእሶ፡በእንቲአነ፡ከመ፡ይቤዝወነ፡እምኃጢአት፡ወያንጽሕ፡ሎቱ፡ሕዝበ፡ሐዲሰ፡ዘይትቀኀው፡በምግባረ፡ሠናይ።
15 ከመዝ፡ንግር፡ወገሥጽ፡ወተዛለፍ፡እንዘ፡ታቴሕት፡ርእሰከ፡ለኵሉ፡ወአልቦ፡ዘያስሕትከ።