Biblia Etíope · Biblia Etíope en Ge'ez

Eclesiástico (Sirácida) 8

ጥበበ፡ሲራክ።

1ወኢትትጋአዝ፡ምስለ፡ዐበይት፡ሰብእ፤ ከመ፡ኢትደቅ፡ውስተ፡እዴሆሙ።

2ወኢትትቃሐው፡ምስለ፡ዘይብዕለከ፤ ከመ፡በብዕሉ፡ኢይማእከ፤ እስመ፡ብዙኃን፡ተሀጕሉ፡በእንተ፡ወርቅ፤ ወገመጾሙ፡ልቦሙ፡ለነገሥት።

3ወኢትትላኰይ፡ምስለ፡ብእሲ፡ነባቢ፤ ወእመ፡አኮሰ፡ወጣሕከ፡ዕፀወ፡ዲበ፡እሳት።

4ኢትሳለቅ፤ ምስለ፡አብድ፤ ከመ፡ኢታኅስር፡አዝማዲከ።

5ኢትትሀበቦ፡ለዘይትኃነይ፡በእንተ፡ጌጋዩ፤ ተዘከር፡ከመ፡ኵልነ፡ኃጥኣን፡ንሕነ።

6ኢታስተኣክዮ፡ለሰብአ፡በርሥአቱ፤ እስመ፡እምውስቴትነሂ፡ቦ፡ዘይረሥእ።

7ኢትትፈሣሕ፡ላዕለ፡ዘሞተ፤ ተዘከር፡ከመ፡ኵልነ፡ንመውት።

8ኢታስትት፡ነገረ፤ ጠቢባን፤ ወተመሀር፡አምሳሊሆሙ፤ እስመ፡በኀቤሆሙ፡ትረክባ፡ለጥበብ፤ ወተፀ[ምዶ፡] መኳንንት።

9ወዕቀብ፡ተግሣጾሙ፡ለአእሩግ፤ እስመ፡እሙንቱሂ፡በኀበ፡አበዊሆሙ፡ተምህሩ፤ ወአንተሂ፡በኀቤሆሙ፡ትጠብብ፤ ወትረክብ፡ዘትነብብ፡በጊዜ፡ትካዝከ፡ወታአምር፡ዘታወሥእ።

10ኢትሱጥ፡እሳቶሙ፡ለኃጥኣን፤ ከመ፡ኢተዐይ፡በነዶሙ።

11ኢትትዋሣእ፡በኀበ፡ጸዓሊ፤ ከመ፡ኢያስሕትክ፡በቃለ፡አፉሁ።

12ወኢትለቅሖ፡ለዘ፡ይብዕለከ፤ ወለእመ፡ለቃሕካሁ፡ረሲ፡ከመ፡ዘሀጐልከ።

13ኢትትሐበ[ይ፡በ] ዘይጸንዐከ፤ ወለእመሰ፡ተሐበይከ፡ኀሊ፡እንከ፡ዘከመ፡ትፈዲ፡ለሊከ።

14ኢትሳነን፡ምስለ፡መኰንን፤ እስመ፡በከመ፡ክብሩ፡ያገብኡ፡ሎቱ፡ፍትሐ።

15ምስለ፡መስተኀይል፡ኢትኅበር፡መንገደ፤ ከመ፡ኢይትባዕ፡ላዕሌከ፤ እስመ፡ውእቱሰ፡ዘፈቀደ፡በልቡ፡ይገብር፤ ወትመውት፡አንተ፡በእበደ፡ዚአሁ።

16ወኢትትጋአዝ፡ምስለ፡መዐትም፤ ወኢትፃእ፡ሐቅለ፡ምስሌሁ፤ እስመ፡ወኢከመ፡ምንትኒ፡ክዒወ፡ደም፡በኀቤሁ፤ ወኀበ፡አልቦ፡ረድኤት፡ይወስደከ።

17ወኢትትማከር፡ምስለ፡አብድ፤ እስመ፡ኢይክል፡ዐቂበ፡ነገር፡ዘሰምዐ።

18ኢትግበር፡ቅድመ፡ነኪር፡ትካዘከ፤ እስመ፡ኢታአምር፡እፎ፡ይበጽሕ።

19ኢትክሥት፡ለኵሉ፡ሰብእ፡ዘውስተ፡ልብከ፤ ከመ፡ኢይኩንከ፡ህጉለ፡ዕሴትከ።