Biblia Etíope · Biblia Etíope en Ge'ez

Eclesiástico (Sirácida) 40

ጥበበ፡ሲራክ።

1ዐቢይ፡ትሕዝብት፡ፍጥረቱ፡ለእጓለ፡እመሕያው፤ ወክቡድ፡ጾር፡ላዕለ፡ውሉደ፡አዳም፤ እምከመ፡ይወፅኡ፡እምከርሠ፡እሞሙ፤ እስከ፡አመ፡ይትቀበሩ፡ውስተ፡እመ፡ኵሉ።

2ድንጋጼ፡ይእቲ፡ወፍርሀተ፡ልብ፤ ትሕዝብታ፡ለዕለተ፡ሞት፡ላዕለ፡ኵሉ፡እጓለ፡እመሕያው፤

3እምነ፡ዘይነብር፡ላዕለ፡መንበረ፡መንግሥት፤ እስከ፡ነዳይ፡ዘይሰክብ፡ውስተ፡መሬት፡ወሐመድ። 4 . . . . . .።

5መዐት፡ወቅንአት፡ወጋእዝ፡ወሁከት፡ወፍርሀተ፡ሞት፡ወቀሐው፡ወሐኔት፤ ጊዜ፡ይሰክብ፡ውስተ፡ምስካቢሁ፡ይዌልጥ፡ኅሊናሁ፡ንዋመ፡ሌሊት።

6ኅዳጥኒ፡ወኢከመ፡ምንት፡ውእቱ፡ለዕረፍት፡ወበንዋሙ፡ይትዐወቆ፡ወይረክቦ፡ከመ፡እንግልጋ፡ለምዕር፤ ወያወላውላ፡ለምክረ፡ልቡ፡ከመ፡ዘይነትዕ፡በውስተ፡ቀትል።

7ወዘሰ፡ይገይስ፡ያመሥጥ፡በዕለቱ፤ ለሊሁ፡[ያነክራ]፡ለፍርሀቱ።

8ወዝ፡ምስለ፡ኵሉ፡ነፍሰ፡እጓለ፡እመሕያው፡እስከ፡እንስሳ፤ ዘላዕለ፡ኃጥኣን፡ይብእስ፡ምስብዒተ፡ዝንቱ፡ኵሉ፤

9ቀትል፡ወትዝኅርት፡ወብድብድ፡ወኲናት፤ ረኃብ፡ወቍስለ፡ልብ፡ወመቅሠፍት።

10ዝንቱ፡ኵሉ፡ተፈጥረ፡ላዕለ፡ኃጥኣን፤ ወእንበይነ፡ዚአሆሙ፡መጽአ፡ማየ፡አይኅ።

11ኵሉ፡እምነ፡ምድር፡ወኵሉ፡ውስተ፡ምድር፤ ወአፍላግሂ፡ኵሉ፡ውስተ፡ባሕር፡ይገብእ፡ማዩ።

12ወኵሉ፡[ሕልያን፡] ወዐመፃ፡ትደመሰስ፤ ወሃይማኖትሰ፡ለዓለም፡ትቀውም።

13ንዋየ፡ዐመፃ፡ከመ፡ውሒዝ፡ይየብስ፤ ወይደምፅ፡ከመ፡ዐቢይ፡ፀዓዕ፡ሶበ፡ይዘንም።

14ወውእቱሰ፡እምከመ፡ሰፍሐ፡እዴሁ፡ያስተፌሥሕ፤ ወእለሰ፡የዐልውውዎ፡የኀልቁ፡ወይጠፍኡ።

15ውሉደ፡ኃጥኣን፡ኢይትባዝጉ፡አዕጹቂሆሙ፤ ወሥርዎሙ፡ለርኩሳን፡ከመ፡ዘውስተ፡ኰኵሕ፡ልሙጽ።

16ወይደምፅ፡በላዕለ፡ኵሉ፡ማይ፡ወበጽንፈ፡ውሒዝ፡ወይቀውም፡ተምሕዎ፡እምነ፡ኵሉ፡ሣዕር።

17ወጸጋሁሰ፡ከመ፡ገነተ፡እግዚአብሔር፡በበረከት፤ ወምጽዋትኒ፡ለዓለም፡ይቀውም።

18ሕይወቱ፡ለዘይዴለው፡ዘገብረ፡ይጥዕሞ፤ ወእምነ፡ክልኤሆሙ፡ረኪበ፡መድፍን።

19ውሉድኒ፡ወሕንጻ፡ሀገር፡ያዐብዩ፡ስመ፤ ወእምነ፡ክልኤሆሙ፡ብእሲት፡እንተ፡ሠናይ፡ልባ።

20ወይን፡ወማሕሌት፡ያስተፌሥሕ፡ልበ፤ ወእምነ፡ክልኤሆሙ፡አፍቅሮታ፡ለጥበብ።

21መሰንቆ፡ወመዝሙር፡ይሔውዛ፡ለነፍስ፤ ወእምነ፡ክልኤሆሙ፡ልሳን፡ጥዑም።

22ሥን፡ወላሕይ፡ይኤድማ፡ለዐይን፤ ወእምነ፡ክልኤሆሙ፡ሐመልማለ፡ዘርእ።

23ዐርክ፡ወማኅፈር፡ይበቍዑ፡በመዋዕሊሆሙ፤ ወእምነ፡ክልኤሆሙ፡ብአሲት፡ኄርት፡ለምታ።

24አኀውኒ፡ወረድኤትኒ፡ለዕለተ፡ምንዳቤ፤ ወእምነ፡ክልኤሆሙ፡ምጽዋት፡ትኄይስ፡አድኅኖ።

25ወርቅ፡ወብሩር፡ያጸንዑ፡ሀገረ፤ ወእምነ፡ክልኤሆሙ፡ምክር፡ሠናይት።

26ብዕል፡ወንዋይ፡ያስተፌሥሑ፡ልበ፤ ወእምነ፡ክልኤሆሙ፡ፈሪሀ፡እግዚአብሔር። ፈሪሀ፡እግዚአብሔር፡አልባቲ፡ዘታኀጥእ፤ ወኢትፈቅድ፡ላቲ፡ረድኤተ።

27ፈሪሀ፡እግዚአብሔር፡ከመ፡ገነተ፡እግዚአብሔር፡በረከታ፤ ወኵሉ፡ክብር፡ወትፍሥሕት፡ውስቴታ።

28ወልድየ፡በሕይወትከ፡ኢታፍቅራ፡ለስኢል፤ ይኄይስ፡መዊት፡እምነ፡ስኢል።

29ብእሲ፡ዘማእደ፡ባዕድ፡ይጸንሕ፡ወይሴፈው፤ ንብረቱ፡ከመ፡ዘኢኮነ፡ሕያወ፡ዘይፈቱ፡እክለ፡ባዕድ፤ ወብእሲሰ፡ጠቢብ፡ዘተገሠጸ፡ይትዐቀብ።

30ጥዑም፡ስኢል፡ውስተ፡አፈ፡ዘኢየኀፍር፤ ወውስተ፡ከርሡሰ፡እሳት፡ትነድድ።