Biblia Etíope · Biblia Etíope en Ge'ez
Eclesiástico (Sirácida) 13
ጥበበ፡ሲራክ።1ዘገሰሰ፡ፒሳ፡ይትአኀዝ፡ቦቱ፤ ወዘተዓረኮ፡ለዕቡይ፡ይከውን፡ከማሁ።
2ኢታንሥእ፡ክቡደ፡ወኢትሰከም፡ላዕሌከ፤ ኢትደምር፡ንዋየከ፡ምስለ፡ዘይኄይለከ፡ወይብዕለከ። በአይቴ፡ይትዓረክ፡መቅጹት፡ምስለ፡ጽህርት፤ እስመ፡ለሊሃ፡ትጐድእ፡ወለሊሃ፡ትሰበር፤
3ከማሁ፡ባዕል፡ለሊሁ፡ይገፍዕ፡ወለሊሁ፡ይትመዓዕ፤ ወነዳይሰ፡ውእቱ፡ይትገፋዕ፡ወውእቱ፡ይገኒ።
4ለእመ፡ብከ፡በዘትበቍዖ፡ያቀርበከ፡ኀቤሁ፤ ወእመሰ፡ተጸነስከ፡ኢይኔጽረከ፡እንከ።
5ወለእመ፡ብከ፡የኀብር፡ምስሌከ፤ ወያኀልቅ፡ለከ፡ዘዚአከ፡ወዓዲ፡ኢያነክረከ።
6ወእመቦ፡ትካዘ፡ዘይፈቅድ፡ይየውሀከ፤ ወብእዙኀ፡ያስተሴፍወከ፡ወይሥሕቀከ፤ ወሠናየ፡ይትናገረከ፡ወምንተ፡ትፈቅድ፡ይብለከ፡
7ወበመብልዑ፡የኀይጠከ፤ ወካዕበ፤ ወሥልሰ፡ያሰፍጠከ፤ ወእምዝ፡ድኅረ፡ይገብእ፡ኢይስማዕከ፤ ወእመኒ፡ርእየከ፡ይሥሕቅ፡ላዕሌከ፤ ወየሐውስ፡ርእሶ፡ለከ።
8ተዐቀብ፡ኢያስሕትከ፡ወኢይየውህክ፤ ወኢታብእ፡ሐዘነ፡ማእከለ፡ትፍሥሕትክ።
9ዘይቤለከ፡ዐቢይ፡ኦሆ፡በሎ፤ ለግዕዙ፤ ወለእመኒ፤ ጸውዐከ፡ኢትእበዮ፤ ወፈድፋደ፡ያፈቅረከ።
10ኢትርሐቅኒ፡ወኢትስሐትኒ፤ ወኢትጐንዲ፡ርሒቆቶ፡ከመ፡ኢይርሳዕከ።
11ወኢታፈድፍድ፡ተናግሮ፡ምስሌሁ፤ ወኢትትአመና፡በብዙኅ፡ነገሩ፤ እስመ፡በብዝኀ፡ነገር፡ያሜክረከ፤ ወከመ፡ዘይሥሕቅ፡ምስሌከ፡የሐተከ።
12አልቦ፡ሣህለ፡ዘያወጽእ፡ምክረ፡ቢጹ፤ እስመ፡ኢያሐዝኖ፡ተሞቅሖ፡ወመንሱት።
13ዑቅ፤ ወተዐቀብ፡በሕቁ፤ እስመ፡ምስለ፡ቀታሊከ፤ ተሐውር።
15ኵሉ፡እንስሳ፡ያፈቅር፡ዘመዶ፤ ወኵሉ፡ሰብእ፡ያፈቅር፡ቢጾ።
16ወኵሉ፡ነፍስ፡ይትጋባእ፡ምስለ፡ዘከማሁ፡< ወሰብእኒ፡ምስለ፡ዘይዘውጎ፡ይተሉ።
17በአይቴ፡ይትዓረክ፡ተኵላ፡ምስለ፡በግዕ፤ ከማሁ፡ኃጥእ፡ምስለ፡ጻድቅ።
18ወመኑ፡ያስተሰናእዎሙ፡ለአክልብት፡ምስለ፡አዝእብት፤ ወመኑ፡ያስተዓርኮ፡ለነዳይ፡ምስለ፡ባዕል። 19 . . . .፤ ከማሁ፡ይትዔገሎ፡ባዕል፡ለነዳይ።
30ያስቆርሮ፡ዕቡይ፡ለዘያቴሕት፡ርእሶ፤ ከማሁ፡ያስቆርሮ፡ባዕል፡ለነዳይ።
21ባዕል፡ለእመ፡ተንተነ፡ይሰውቅዎ፡አዕርክቲሁ፤ ወነዳይሰ፡ለእመ፡ወድቀ፡ይከይድዎ፡ቢጹ።
22ባዕል፡ለእመ፡ድኅፀ፡ብዙኃን፡ያነሥእዎ፤ ወእመኒ፡ነበበ፡ቃሎ፡ያረትዑ፡ሎቱ። ነዳይሰ፡ለእመ፡ስሕተ፡ይረግምዎ፤ ወእመኒ፡ሠናየ፡ነበበ፡ኢያፀምእዎ።
23ወባዕልሰ፡ለእመ፡ነበበ፡ኵሉ፡ያረምም፤ ወይንእዱ፡ሎቱ፡ምግባሮ፡ወያበጽሕዎ፡እስከ፡ደመና። ወነዳይሰ፡ለእመ፡ነበበ፡ምንትኑ፡ዝንቱ፡ይብልዎ፤ ወእመኒ፤ ተዐቅፈ፡ያቴክልዎ።
24ሠናይ፡ብዒል፡እንዘ፡ኢይገብር፡ኀጢአተ፤ ወያሐሥማ፡ኃጥእ፡ለንዴቱ፡በአፉሁ።
25ልቡ፡ለሰብእ፡ይዌልጦ፡ገጾ፤ ለእመኒ፡ፍሡሕ፡ውእቱ፡ወለእመኒ፡ትኩዝ፡ውእቱ።
26አሠሩ፡ለልብ፡ፍሡሕ፡ገጽ፡ብሩህ፤ ወትረክብ፡ምክረ፡ጥበብ፡ሰሪሐከ።