ግዕዝ
Home Formaciones Libros Biblioteca Ge'ez Contacto
Sinaxario · Yekatit

2 de Yekatit

አመ፡፪፡ለየካቲት
1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፪፡ለየካቲት፡በዛቲ፡ዕለት፡አዕረፈ፡አባ፡ለንጊኖስ፡አበ፡ምኔት፡ዘደብረ፡ዝጋግ፡ዘአፍአ፡ሀገረ፡እስክንድርያ።
2ወዝንቱ፡ቅዱስ፡ኮነ፡እምሰብአ፡ቅልቅልያ፡ወመንኰሰ፡በህየ፡ወመምህሩሰ፡መፍቀሬ፡ክርስቶስ፡መነኮስ፡ጻድቅ፡ወውእቱ፡ይጐይይ፡እምክብረ፡ሰብእ፡ወውእተ፡ጊዜ፡አዕረፈ፡አበ፡ምኔት፡አቡሆሙ፡ዘደብረ፡ዚአሆሙ፡ወፈቀዱ፡ይሢምዎ፡ለአረጋዊ፡መምህሩ፡አባ፡ሉክያኖስ፡አበ፡ምኔት፡ወነሥኦ፡አባ፡ሉክያኖስ፡ለረድኡ፡አባ፡ለንጊኖስ፡ወወፅኡ፡እምቅልቅልያ፡ወበጽሑ፡ብሔረ፡ሶርያ፡ወነበሩ፡ውስተ፡አሐቲ፡ቤተ፡ክርስቲያን።
3ወኢፈቀደ፡እግዚእነ፡ክርስቶስ፡ሎቱ፡ስብሐት፡ከመ፡ይኀባእ፡ጽድቆሙ፡እስመ፡ሀገር፡ከመ፡ኢትክል፡ተኀብኦ፡እንተ፡ተሐንፀት፡መልዕልተ፡ደብር፡እስመ፡ገብረ፡እግዚእነ፡ዲበ፡እደዊሆሙ፡ተአምራተ፡ወመንክራተ፡ብዙኃተ።
4ወበእንተ፡ውዳሴ፡ዘሰብእ፡ፈሪሆ፡አባ፡ለንጊኖስ፡ወፅአ፡እምኀበ፡መምህሩ፡በምክረ፡ዚኣሁ፡ወበጽሐ፡ኀበ፡ብሔረ፡ግብፅ፡ወቦአ፡ውስተ፡ደብረ፡ዝጋግ፡ተቀበልዎ፡በፍሥሐ፡ወነበረ፡ኀቤሆሙ፡እስከ፡አመ፡አዕረፈ፡አበ፡ምኔተ፡ዚአሁ።
5ወርእዮሙ፡ገድሎ፡ወትሩፋቲሁ፡ወጽድቆ፡ሤምዎ፡አበምኔት፡ላዕለ፡ደብረ፡ዝጋግ።
6ወእምድኅረ፡ኅዳጥ፡መዋዕል፡መጽእ፡መምህሩ፡አባ፡ሉክያኖስ፡ወኮኑ፡ይትጌበሩ፡ኅቡረ፡ተድባባተ፡አሕማር፡ወይሴሰዩ፡እምግ፡ብረ፡እደዊሆሙ፡ወነበሩ፡ብዙኀ፡መዋዕለ፡በ፩ዱ፡ልብ፡ወይገብር፡እግዚእነ፡ዲበ፡እደዊሆሙ፡ተአምራተ፡ወመንክራተ፡ብዙኃተ፡ወእምዝ፡ኣዕረፈ፡አባ፡ሉክያኖስ።
7ወበመዋዕሊሁ፡ለመርቅያን፡ዓላዊ፡ንጉሥ፡ዘአስተጋብአ፡ማኅበረ፡በኬልቄዶን፡ወውእቱ፡ለሊሁ፡ፈነወ፡ላእካነ፡ውስተ፡ኵሉ፡በሐውርት፡ወምስሌሆሙ፡ጦማር፡ዘሃይማኖቱ፡ርኵስት፡ዘይሬስዮ፡ለክርስቶስ፡፪ተ፡ጠባይዓተ።
8ወበጽሑ፡፫ቱ፡እምላእካኒሁ፡ለንጉሥ፡ኀበ፡ደብረ፡ዝጋግ፡ወወሀቡ፡ውእተ፡ጦማረ፡ለአባ፡ለንጊኖስ፡ወይቤልዎ፡ንጉሥ፡መርቅያን፡አዘዘ፡ከመ፡ትእመኑ፡በዘጽሕፍት፡ውስተ፡ዛቲ፡መጽሐፍ። ወይቤ፡ቅዱስ፡ለንጊኖስ፡አንሰ፡ኢይክል፡እግበር፡ወኢምንተኒ፡ዘእንበለ፡በምክሮሙ፡ለአበው፡ቅዱሳን፡ንዑ፡ምስሌየ፡ከመ፡ንትማከር፡ወአብኦሙ፡ለላእካነ፡ንጉሥ፡ውስተ፡በዓት፡ኀበ፡አብድንቲሆሙ፡ለቅዱሳን።
9ወይቤሎሙ፡ኦአበውየ፡ቅዱሳን፡አንሰ፡አአምር፡ለእመ፡ምዉታን፡በሥጋ፡ወአንትሙ፡ሕያዋን፡በመንፈስ፡እስመ፡ናሁ፡አምጽኡ፡ዘንተ፡ጦማረ፡ኀቤየ፡ዘጽሑፍ፡ውስቴቱ፡ሃይማኖት፡ርኩስ፡ዘይሬስዮ፡ለክርስቶስ፡፪ተ፡ጠባይዓተ፡ትኤዝዙኒኑ፡ሊተ፡ከመ፡እጽሐፍ፡ውስቴቱ፡ወእእመን፡በቃሉ፡አው፡አልቦ። ወለእመ፡ኢነገርክሙኒ፡ዘእገብር፡ሕያው፡ውእቱ፡እግዚአብሔር። ወእመ፡አኮ፡አነ፡አወፅእ፡አዕፅምቲክሙ፡እምዝንቱ፡መካን።
10ወሶቤሃ፡ወፅአ፡ቃል፡እምአብድንቲሆሙ፡እንዘ፡ይሰምዑ፡ኵሎሙ፡ሰብእ፡ዘይብል፡ኢትኅድግ፡ሃይማኖተ፡ርትዕተ፡ዘአበዊነ፡ሐዋርያት፡ወዘአበዊነ፡፫፻፲ወ፰ቱ፡ርቱዓነ፡ሃይማኖት፡ወኢትትሉ፡ዘንተ፡ጦማረ፡ርኩሰ፡ወባሕቱ፡አእትቶ፡እምላዕለ፡አብድንቲነ።
11ወሰሚዖሙ፡ላእካነ፡ንጉሥ፡ዘንተ፡አንከሩ፡ፈድፋደ፡ወአኀዞሙ፡ፍርሃት፡ወረዓድ፡ዐቢይ፡ወኢተመይጡ፡ኀበ፡ንጉሥ፡አላ፡ላፀዩ፡ሥዕርተ፡ርእሶሙ፡ወለብሱ፡አልባሰ፡ምንኵስና፡ወነበሩ፡ውስተ፡ውእቱ፡ገዳም፡ብዙኅ፡ዓመታተ፡ወተፀምዱ፡በገድል፡እስከ፡አዕረፉ።
12ወቅዱስሰ፡ለንጊኖስ፡ፈጺሞ፡ገድሎ፡ወአሥሚሮ፡እግዚአብሔርሃ፡አዕረፈ፡በሰላም፡በርሥዓን፡ሠናይ፡ወነሥአ፡አክሊለ፡ሕይወት። በረከቱ፡ተሀሉ፡ምስሌነ፡ለዓለመ፡ዓለም፡አሜን።
ሰላም፡እብል፡መዓልተ፡ወለያልየ፤ትሩፋቲከ፡አቡየ፤ለንጊኖስ፡አነክር፡ዘተውህበከ፡ዕበየ፤ኀበ፡ኢሀሎከ፡ሶበ፡ቆብዐከ፡ርእየ፤ሰይጣን፡ተኃፊሮ፡እፎኑመ፡ጐየ።
13ወበዛቲ፡ዕለት፡አዕረፈ፡አባ፡ጳውሊ፡ገዳማዊ፡ዘየዓቢ፡እምኵሎሙ፡ገዳማውያን፡ቅዱሳን፡ወውእቱ፡ርእሶሙ፡ወዘውገ፡መላእክት፡ትጉሃን።
14ወዝንቱ፡ቅዱስ፡ኮነ፡እምሀገረ፡እስክንድርያ፡ወሎቱ፡እኀው፡ዘስሙ፡ጴጥሮስ፡ወኮነ፡አበሆሙ፡ባዕለ፡ጥቀ፡ወኢይትኌለቍ፡ብዝኀ፡ንዋዩ፡እምወርቅ፡ወእምብሩር፡ወእምአልባስ፡ክቡራት።
15ወእምድኅረ፡አዕረፈ፡አቡሆሙ፡ወተፈጸመ፡መዋዕለ፡ኀዘኖሙ። አኀዙ፡ይትካፈሉ፡ርስተ፡አቡሆሙ፡ወነሥአ፡እኍሁ፡ጴጥሮስ፡ክፍለ፡ዘየዓቢ፡ለርእሱ፡ወወሀቦ፡ለጳውሎስ፡ዘይንእስ፡በእንተዝ፡ኀዘነ፡ልቡ፡ወይቤሎ፡ለእኍሁ፡ለምንት፡ኢትሁበኒ፡ክፍልየ፡በርትዕ፡እምርስተ፡አቡየ። አውሥኦ፡ወይቤሎ፡እስመ፡አንተ፡ወሬዛ፡ትዘሩ፡ንዋየከ፡ወአነ፡አዓቅብ፡ለከ፡እስከ፡አመ፡ትልኅቅ።
16ወበእንተዝ፡ተበአሱ፡በበይናቲሆሙ፡ወሖሩ፡ኀበ፡መኰንን፡ከመ፡ይግበር፡ሎሙ፡ፍትሐ።
17ወእንዘ፡እሙንቱ፡የሐውሩ፡ረከቡ፡፩ደ፡ምዉተ፡እንዘ፡ይወስድዎ፡በዓራት፡ፀዊሮሙ፡ኀበ፡ይቀብርዎ፡ወብዙኃን፡ይተልውዎ፡ወይላህውዎ።
18ወሶቤሃ፡ፀውዖ፡ቅዱስ፡ጳውሊ፡ለ፩ዱ፡እምእለ፡ይተልውዎ፡ለምዉት፡ወተሰአሎ፡ወይቤሎ፡መኑ፡ውእቱ፡ዘሞተ፡ዮም፡አውሥኦ፡ወይቤሎ፡ውእቱ፡ብእሲ፡እስመ፡ዘንቱ፡ዘሞተ፡ባዕል፡ፈድፋደ፡ከመ፡አቡከ፡አእምር፡ኦ፡ወልድየ፡ወይትፌጋዕ፡በብዕለ፡ወርቅ፡ወብሩር፡ወናሁ፡ኀደጎ፡ለኵሉ፡ብዕሉ፡ወየሐውር፡ዕራቆ፡ኀበ፡ኢይትመየጥ።
19ወይእዜኒ፡ኦ፡ወልድየ፡ይደልወነ፡ከመ፡ንትጋደል፡በእንተ፡መድኀኒተ፡ነፍስነ፡እስመ፡ንሕነ፡ኢነአምር፡ማዕዜ፡ዘንመውት። ወባሕቱ፡ብፁዕ፡ብእሲ፡ዘቦቱ፡ንዋይ፡ወቦቱ፡ሥልጣን፡ከመ፡ይኅድጎ፡እስመ፡ውእቱ፡ይነሥእ፡ክብረ፡ወብዕለ፡በኢየሩሳሌም፡ሰማያዊት፡ሀገሮሙ፡ለቅዱሳን።
20ወሶበ፡ሰምዐ፡ጳውሊ፡ዘንተ፡ቃለ፡ገዐረ፡ወበከየ፡እምልቡ፡ወይቤ፡ወይ፡ሊተ፡ምንት፡ብየ፡እምንዋየ፡ዝንቱ፡ዓለም፡ኃላፊ፡ወእምድኅረ፡ኅዳጥ፡መዋዕል፡አኀድጎ፡ወአሐውር፡ዕራቅየ።
21ወእምዝ፡ተመይጠ፡ኀበ፡እኊሁ፡ወይቤሎ፡ነዓ፡ንትመየጥ፡ኀበ፡ቤትነ፡እስመ፡አነ፡እምይእዜ፡ኢይትናገር፡ምንተኒ፡በእንተ፡ንዋይ፡ወዘንተ፡ብሂሎ፡ጐየ፡እምእኍሁ፡ወወፅአ፡አፍአ፡ወቦአ፡ውስተ፡መቃብር፡ወነበረ፡ውስቴቱ፡ሠለስተ፡መዋዕለ፡እንዘ፡ይጼሊ፡ወያስተበቍዕ፡ኀበ፡እግዚአብሔር፡ከመ፡ይምርሖ፡ውስተ፡ፍኖቱ።
22ወእኍሁሰ፡ጴጥሮስ፡ነበረ፡እንዘ፡የዓውድ፡ውስተ፡ኵሉ፡በሐውርት፡እንዘ፡የኀሥሣ፡ወኢረከቦ፡ኀዘነ፡ዐቢየ፡ኀዘነ፡በእንቲአሁ።
23ወቅዱስኒ፡ጳውሊ፡እንዘ፡ሀሎ፡ውስተ፡ውእቱ፡መቃብር፡፫ተ፡መዓልተ፡ወ፫ተ፡ሌሊ፡ኢተዘከረ፡መብልዐ፡ወመስቴ፡ወኢበጽ፡ፍርሃት፡ወድንጋፄ፡እስመ፡ኃይል፡አምላካ፡ትጼልሎ፡ወተዓቅቦ።
24ወአመ፡ራብዕት፡ዕለት፡ፈነወ፡እግዚእነ፡መልአኮ፡ኀቤሁ፡ወመሠጦ፡እምህየ፡ወወሰዶ፡ውስተ፡ውሣጤ፡ገዳም፡ዘመንገለ፡ምሥራቅ፡ወአንበሮ፡ውስተ፡ውእቱ፡ገዳም፡ኀበ፡ነቅዐ፡ማይ፡ወተአምኆ፡መልአክ፡ወዐርገ፡ውስተ፡ሰማይ።
25ወረከበ፡ቅዱስ፡አባ፡ጳውሊ፡ግበባተ፡ዘአራዊት፡ወቦአ፡ውስቴቶሙ፡ወገብረ፡ሎቱ፡ልብሶ፡እምቈጽለ፡በቀልት፡ጸለየ፡ወይቤ፡ኦ፡እግዚእየ፡ኢየሱስ፡ክርስቶስ፡ወልደ፡እግዚአብሔር፡ሕያው፡ዕቀበኒ፡ወአድኅነኒ፡እምእዴሁ፡ለጸላኢ፡ዘአልቦ፡ምሕረት፡ወትምጻእ፡ላዕሌየ፡ምሕረትከ። ወአፅንዓኒ፡እስከ፡እፌጽም፡ገድልየ፡በምሕረትከ፡ኦ፡ንጉሠ፡ኵሉ፡ዓለም፡እስመ፡ለከ፡ኃይል፡ወስብሐት፡ለዓለመ፡ዓለም።
26ወነበረ፡ውስተ፡ይእቲ፡በዓት፡፹፡ዓመተ፡ወኢርእየ፡መነሂ፡ግሙራ፡እምሰብእ፡ወልብሱ፡ኮነ፡ፀጕረ፡በቀልት፡ወኮነ፡እግዚእነ፡ይፌኑ፡ኀቤሁ፡ቋዐ፡ኵሎ፡አሚረ፡በጊዜ፡ምሴት፡ወምስሌሁ፡መንፈቀ፡ኅብስት፡ሲሳዩ፡ለጳውሊ፡ብፁዕ።
27ወሶበ፡ፈቀደ፡እግዚአብሔር፡ከመ፡ይክሥት፡ቅድስናሁ፡ወጽድቆ፡ፈነወ፡መልአኮ፡ኀበ፡አብ፡ዐቢይ፡አባ፡እንጦንዮስ፡ወውእቱ፡ነበረ፡እንዘ፡ይሔሊ፡ከመ፡አልቦ፡ዘኀደረ፡ውስተ፡ገዳም፡እምቅድሜሁ። ወይቤሎ፡ውእቱ፡መልአክ፡ለእንጦንዮስ፡ሑር፡ውስተ፡ውሣጤ፡ገዳም፡ዘርኁቅ፡እምኔከ፡መጠነ፡፪ቱ፡መዓልት፡ሀሎ፡ብእሲ፡ዘኢይደልዎሙ፡ለሰብአ፡ዓለም፡ይኩኑ፡ከመ፡አሐቲ፡እምሥዕርተ፡ርእሱ፡ወበእንተ፡ጸሎቱ፡ለዝንቱ፡ጻድቅ፡ረትዐ፡ዓለም፡ወምድርኒ፡ወሀበት፡ፍሬሃ፡ወበእንቲአሁ፡ይወርድ፡ጠል፡ውስተ፡ምድር፡ወይሠርቅ፡ፀሐይ፡ላዕለ፡ጻድቃን፡ወኃጥአን።
28ወሶቤሃ፡ተንሥአ፡አባ፡እንጦኒ፡ወሖረ፡ውስተ፡ውሣጤ፡ገዳም፡እንዘ፡የአምን፡ቃለ፡እግዚእ፡ወይጸይሕ፡ሎቱ፡ፍኖቶ፡ወረከበ፡አሠረ፡ብእሲ፡ምስለ፡አሠረ፡አራዊት፡ብዙኃን፡ወአንሶሰወ፡ዲበ፡አሠሩ፡ለቅዱስ፡እስከ፡በጽሐ፡ኀበ፡በዓቱ።
29ወሰምዖ፡ለቅዱስ፡እንዘ፡ይዜምር፡ወነሥአ፡አባ፡እንጦንዮስ፡እብነ፡ወጐድጐደ፡ቦቱ፡አንቀጸ፡በዓቱ፡ወቅዱስሰ፡አባ፡ጳውሊ፡ሶበ፡ሰምዐ፡እንዘ፡ይጐደጕድ፡ሐለየ፡ከመ፡ግብረ፡ሰይጣን፡ውእቱ፡ወነሥአ፡እብነ፡ዐቢየ፡ወአንበሮ፡እንተ፡ድኅረ፡ማዕፆ፡አንቀጸ፡በዓቱ።
30ወጸርሐ፡እንጦንዮስ፡ወይቤ፡ኀሠሥኩ፡ወኢተውህበ፡ሊተ፡ሰአልኩ፡ወኢረከብኩ፡ጐድጐድኩ፡ወኢተርኅወ፡ሊተ፡ወሶቤሃ፡አርኀወ፡ሎቱ፡ወአብኦ፡ወተአምኁ፡በበይናቲሆሙ፡በአምኀ፡መንፍሳዊት፡ወጸለዩ፡ኅቡረ፡ወነበሩ።
31ወይቤሎ፡እንጦንዮስ፡ኦ፡አቡየ፡መኑ፡ስምከ። አውሥኦ፡አረጋዊ፡ወይቤሎ፡ለእመ፡አንተ፡ኢኮንከ፡ዘተአምር፡ስምየ፡ለምንት፡አንሶሰውከ፡ውስተ፡ዛቲ፡መካን። ወበይእቲ፡ሰዓት፡አርኀወ፡እግዚአብሔር፡ልቦ፡ለእንጦንዮስ፡ወይቤ፡ብፁዕ፡አነ፡እስመ፡ደለወኒ፡ከመ፡እነፅር፡ጳውሎስሃ፡ገዳማዌ።
32ወእንዘ፡ይትናገሩ፡ዕበያቲሁ፡ለእግዚአብሔር፡ናሁ፡መጽአ፡ቋዕ፡በጊዜ፡ምሴት፡ወወገረ፡ሎቱ፡አሐተ፡ኅብስተ፡ፍጽምተ፡ወይቤሎ፡አባ፡ጳውሊ፡ለአባ፡እንጦንዮስ፡ይእዜ፡አእመርኩ፡ከመ፡አንተ፡ገብሩ፡ለእግዚአብሔር፡እስመ፡ናሁ፡ነበርኩ፡ውስተ፡ዝንቱ፡ገዳም፡እስከ፡ዮም፡፹፡ዓመተ፡ይፌኑ፡ሊተ፡እግዚአብሔር፡ኵሎ፡አሚረ፡መንፈቀ፡ኅብስት፡ወናሁ፡ፈነወ፡ለከ፡ሲሳየከ፡ዮም።
33ወእምድኅረዝ፡ተንሥኡ፡ወጸለዩ፡ኅቡረ፡እስከ፡አስተርአየ፡ኮከበ፡ምዕራብ፡ወነበሩ፡ወበልዑ፡ወእምዝ፡ተንሥኡ፡ወቆሙ፡ወጸለዩ፡ወሰብሕዎ፡ለእግዚአብሔር፡እስከ፡ጊዜ፡ጽባሕ።
34ወሶበ፡ርእዩ፡ብርሃነ፡ጽባሕ፡ከመ፡ሠረቀ፡ተአምኁ፡በበይናቲሆሙ፡ወይቤሎ፡እንጦንዮስ፡ኦ፡አቡየ፡እምኀበ፡አይቴ፡ትትሜጦ፡ምሥጢራተ፡ቅድሳት፡በዝንቱ፡ኵሉ፡መዋዕል፡ወይቤሎ፡ጳውሊ፡እስመ፡እግዚአብሔር፡ይፌኑ፡ሊተ፡መልአኮ፡ወይሜጥወኒ፡ኵሎ፡ዕለተ፡በቀዳሚት፡ሰንበት፡ወበዕለተ፡እሑድ።
35ወእምዝ፡ይቤሎ፡ቅዱስ፡እንጦንዮስ፡እፈቅድ፡ታይድዓኒ፡ዝንቱ፡አስኬማ፡ይበዝኅኑ፡ዲበ፡ምድር፡ወሚመ፡አልቦ።
36ወአክሞሰሰ፡ወእምዝ፡ገዐረ፡አባ፡ጳውሊ፡ወትሰአሎ፡አባ፡እንጦንዮስ፡ወይቤሎ፡ኦ፡አቡየ፡ምንተ፡ርኢከ፡ወሶበ፡አክሞሰስከ፡አክሞሰስኩ፡ወተፈሣሕኩ፡ወሶበሂ፡ገዐርከ፡ኀዘንኩ።
37ወይቤሎ፡ኦ፡ጳውሊ፡ወልድየ፡በቀዳሚ፡ርኢኩ፡ወመጽኡ፡አርጋብ፡እለ፡ኅብረ፡ፀሐይ። ወእቤሎ፡ለዘአስተርአየኒ፡እለ፡መኑ፡እሙንቱ፧ ወይቤለኒ፡እሉ፡እሙንቱ፡መምህራን፡መነኮሳት፡ኄራን። ወዳግመ፡መጽኡ፡እለ፡ኅብረ፡እሳት። እሉሂ፡ውሉዶሙ፡አርድእት፡እለ፡ቦሙ፡መቲረ፡ፈቃድ። ወሥልሰ፡መጽኡ፡እለ፡ኅብረ፡ወርኅ። ወእሉኒ፡መምህራን፡ዘቦሙ፡ቅድስና፡ወአልቦሙ፡ትሩፋት፡ወበራብዕ፡ጊዜ፡መጽኡ፡እለ፡ኅብረ፡ሐመድ። እሉሂ፡እለ፡አልቦሙ፡ምንተኒ፡እምገቢረ፡ጽድቅ። ወበኃምስ፡ጊዜ፡መጽኡ፡እለ፡ኅብረ፡ሐመልሚል፡እሉ፡እሙንቱ፡እለ፡ሤጡ፡ርእሶሙ፡ለረብኅ፡ሥጋዊ፡ወእለ፡ውኅጠሙ፡ዓለም።
38ኦ፡ወልድየ፡እሉ፡ገዳማት፡ወአድባራት፡ይከውኑ፡ማኅደሪሆሙ፡ለአርጋብ፡ፅዕድዋን፡እሉ፡ውሉድከ፡ቅዱሳን፡ወያስተጋብእ፡ኅሩያኒሁ፡እግዚአብሔር፡ውስቴቶሙ፡እምኵሉ፡መካናት፡ወዝንቱ፡ስም፡ዘውእቱ፡ኅሩይ፡የኀልፍ፡ወይከውን፡ስሞሙ፡መነኮሳተ፡ወይትፌሥሑ፡ብዙኀ፡መዋዕለ፡ወያፈልሶሙ፡እግዚአብሔር፡እምቅድመ፡መዓት።
39ወድኅሬሆሙ፡ይትነሥኡ፡ትውልድ፡ዘኢይሰምዑ፡ወኢይትኤዘዙ፡ለመምህራኒሆሙ፡ወእለ፡ኢይተግሁ፡በሌሊት፡በእንተ፡መድኃኒተ፡ነፍሶሙ፡አሜሃ፡ይትመዓዕ፡እግዚአብሔር፡ላዕለ፡አድባራት፡ወገዳማት፡ወያመዘብሮሙ፡ወያነሥእ፡እምነ፡ሕዝብ፡ዓላውያን፡እለ፡አልቦሙ፡ልብ፡ወሕግ፡ወይገብርዎሙ፡ለገዳማት፡ወለአድባራት፡በድወ፡ብዙኀ፡መዋዕለ፡አላ፡ባሕቱ፡ተዝካሮሙ፡ለቅዱሳን፡ኢየኃልፍ።
40ወእግዚአብሔርኒ፡ይወዲ፡ሣህለ፡ውስተ፡አልባቢሆሙ፡ለካልአን፡ሰብእ፡ወየሐውሩ፡ገዳማተ፡ወአድባራተ፡ወየኀድሩ፡ምዕረ፡ዳግመ፡ወሰይጣንሰ፡የሐውር፡ውስተ፡አድባራት፡ወይሬሲ፡ማእከሎሙ፡ፀብዐ፡ወየኀድጉ፡አስኬማሆሙ፡ወይወርዱ፡ውስተ፡ዓለም፡እስመ፡እሙንቱ፡ኢረከቡ፡ጥብዓተ፡ወፍቅረ፡እግዚአብሔር፡ወኢተዓገሡ፡ባቲ፡እስመ፡ውእቱ፡ጽሑፍ፡ዘይቤ፡ወበትዕግሥትክሙ፡ታጠርይዋ፡ለነፍስክሙ።
41ወይቤ፡እንጦንዮስ፡ቡርክት፡ይእቲ፡ዕለት፡እንተ፡ባቲ፡ደለወኒ፡ከመ፡እርአይ፡ገጸከ፡ወይትአኰት፡ወይሰባሕ፡ስሙ፡ለእግዚአብሔር። ዘረሰየኒ፡ድልወ፡ለዝንቱ፡ጸጋ፡ዐቢይ።
42ወይቤሎ፡አባ፡ጳውሊ፡ብፁዕ፡ተንሥእ፡ይእዜ፡ወሑር፡ፍጡነ፡ኀበ፡ማኅደርከ፡ወአምጽእ፡ምስሌከ፡ልብሰ፡ዘወሀቦ፡ቈስጠንጢኖስ፡ለአትናቴዎስ፡ሊቀ፡ጳጳሳት፡ዘአልበሰከ፡ኪያሃ፡አባ፡አትናቴዎስ፡ከመ፡ትግንዝ፡ባቲ፡ሥጋየ፡ወእንጦንዮስሰ፡አንከረ፡እምነገሩ፡ወበእንተ፡ሊቀ፡ጳጳሳት፡ወአምነ፡በኵሉ፡ትንቢታቲሁ፡ዘተነበየ፡ሎቱ።
43ወይቤሎ፡ዳግመ፡አፍጥን፡ሐዊረ፡ወኢትቁም፡እስመ፡ቀርበ፡ፀአትየ፡ዘሥሩዕ፡ላዕለ፡ኵሉ፡ሰብእ። ወሰሚዖ፡አባ፡እንጦንዮስ፡ደንገፀ፡ፈድፋደ፡ወበከየ፡ወወፅአ፡እምኔሁ፡ወአን፡ሶሰወ፡፪ተ፡መዓልተ፡ወ፪ተ፡ለያልየ፡እስከ፡በጽሐ፡ኀበ፡ማኅደሩ፡ወነሢኦ፡ዛተ፡ልብሰ፡ተመይጠ፡ወእንዘ፡ሀሎ፡ውስተ፡ፍኖት፡ርእዮ፡ለአባ፡ቡላ፡ወለማኀበረ፡መላእክት፡እንዘ፡ይሴብሑ፡ውስተ፡አየር፡ወይብሉ፡ስብሐት፡ለእግዚአብሔር።
44ወካዕበ፡ይብሉ፡ሰላም፡ለከ፡ኦ፡ኀሩዩ፡ለእግዚአብሔር፡ብፁዕ፡ጳውሊ፡ብእሴ፡እግዚአብሔር፡ወመላእክት፡ይትፌሥሑ፡ምስሌከ፡እስመ፡አንተ፡ትትፌሣሕ፡በመንግሥተ፡ሰማያት፡ወኀደገ፡እምኔከ፡ጽልመተ፡ወይነሥኡከ፡ኀበ፡ብሔረ፡ብርሃን፡ወኀደገ፡እምኔከ፡ኀዘነ፡ወይወስዱከ፡ኀበ፡ትፍሥሕት፡ዘለዓለም፡እስመ፡አንተ፡ኮንከ፡ብፁዓዌ፡በትው፡ልድከ፡አንተ፡ጳውሎስ፡ገዳማዊ።
45ወሶበ፡ይብሉ፡ዘንተ፡ስብሐታተ፡ተኀብኡ፡ወይቤ፡ብፁዕ፡አባ፡እንጦኒ፡ዛቲ፡ነፍሱ፡ለአቡየ፡አባ፡ጳውሎስ፡እንዘ፡ያዓርግዋ፡ውስተ፡ሰማያት።
46ወእምዝ፡ሶበ፡ቦአ፡እንጦኒ፡ውስተ፡በዓት፡ወረከቦ፡ለአባ፡ጳውሊ፡ስጉደ፡በብረኪሁ፡ወገጹ፡ወእደዊሁ፡ስፉሐት፡በአምሳለ፡ትእምርተ፡መስቀል፡ወነሥኦ፡ከመ፡ዘሕያው፡ወከደኖ፡ወበከየ፡ላዕሌሁ፡እንዘ፡ይብል፡ተዘከረኒ፡ኦ፡አቡየ፡በውስተ፡ማኅደር፡ዘኀደርከ፡ውስቴቱ።
47ወእምዝ፡ተንሥአ፡ወገነዘ፡ሥጋሁ፡በይእቲ፡ልብስ፡ወነሥአ፡መጽሐፈ፡ወፈጸመ፡ላዕሌሁ፡ቀኖና፡ዘቤተ፡ክርስቲያን፡ወጸለየ፡ላዕሌሁ፡፫ተ፡ጊዜ፡አንበበ፡ላዕሌሁ፡፬ተ፡ወንጌላተ፡ወነሥአ፡ልብሶ፡ዘፀጕረ፡በቀልት።
48ወኮነ፡ይሔሊ፡ምንተ፡ዘይገብር፡ቦቱ፡እስመ፡ኢኮነ፡መክርይ፡ምስሌሁ። ወናሁ፡መጽኡ፡ኀቤሁ፡፪ቱ፡አናብስት፡ወሰገዱ፡ኀበ፡ሥጋሁ፡ለቅዱስ፡ጳውሊ፡ወተአምኅዎ፡ወደንገፀ፡ወፈርሀ፡ቅዱስ፡እንጦንዮስ፡ሶበ፡ርእዮሙ፡ለአናብስት፡ወእሙንቱ፡አድነኑ፡ኀበ፡እንጦንዮስ፡ዘከመ፡ይስእልዎ፡ወኮኑ፡ይልሕሱ፡እገሪሁ፡ከመ፡ዘየአምርዎ፡እምቀዳሚ፡ወያኤምርዎ፡ከመ፡ዘይብልዎ፡አይቴ፡ንከሪ፡ሎቱ።
49ወአእመረ፡አባ፡እንጦንዮስ፡ትእምርቶሙ፡ወሰፈረ፡ሎሙ፡መጠነ፡ቆመ፡ሥጋሁ፡ወወሰነ፡ሎሙ፡ወከረዩ፡ሎቱ፡፩ዱ፡በትርአስ፡ወ፩ዱ፡በትርጋፅ፡እስከ፡መጠነ፡፬ቱ፡በእመት፡ወአመረ፡እንጦኒ፡ወይቤሎሙ፡የአክለክሙ፡ወዐርጉ፡እሙንቱ፡አናብስት፡እምውስተ፡መቃብር፡ወሰገዱ፡ለአባ፡እንጦንዮስ፡ከመ፡ዘይብልዎ፡ባርከነ፡ወባረከ፡ላዕሌሆሙ፡ወሖሩ፡እምኀቤሁ፡ወቅዱስኒ፡እንጦኒ፡ቀበረ፡ሥጋሁ፡ለቅዱስ፡ጳውሊ፡ገዳማዊ።
50ወእምድኅረዝ፡ነሥአ፡ዓፅፎ፡ወመንጸፎ፡ለአባ፡ጳውሊ፡ወልብሶ፡ዘበቀልት፡ከመ፡ወልድ፡ዘይወርስ፡ንዋየ፡አቡሁ፡ወረሰየ፡ትእምርተ፡ላዕለ፡መቃብሪሁ፡ለቅዱስ፡ጳውሊ፡ወሖረ፡ኀበ፡ሀገረ፡እስክንድርያ፡እስከ፡በጽሐ፡ኀበ፡አባ፡አትናቴዎስ፡ሊቀ፡ጳጳሳት፡ወነገሮ፡ኵሎ፡ዘኮነ፡እምነ፡ቅዱስ፡አባ፡ጳውሊ።
51ወሰሚዖ፡ሊቀ፡ጳጳሳት፡ዜናሁ፡ተፈሥሐ፡ዐቢየ፡ፍሥሐ፡ወነሥአ፡ልብሶ፡ለብፁዕ፡ጳውሊ፡ወረሰዮ፡ኀቤሁ፡ወይለብሶ፡፫ተ፡ጊዜ፡ለለዓመት፡በበዓለ፡ጥምቀት፡ቅድስት፡ወበዓለ፡ትንሣኤ፡ወበበዓለ፡ዕርገት፡ዐቢይ።
52ወፈነወ፡ሊቀ፡ጳጳሳት፡ካህናተ፡ወዲያቆናተ፡ወዕደወ፡ፅኑዓነ፡ምስለ፡አባ፡እንጦንዮስ፡ወምስሌሆሙ፡መንኰራኵራት፡ከመ፡ይሁሩ፡ሥጋሁ፡ለቅዱስ፡አባ፡ጳውሊ፡ወነበሩ፡ብዙኀ፡ዕለታተ፡እንዘ፡የዓውዱ፡ውስተ፡ገዳም፡ወኢረከቡ፡መቃብሪሁ፡ለቅዱስ፡እስመ፡ተኀብአ፡እምኔሆሙ።
53ወአስተርአዮ፡ለቅዱስ፡አትናቴዎስ፡ሊቀ፡ጳጳሳት፡ቅዱስ፡አባ፡ጳውሊ፡ወይቤሎ፡ፈኑ፡ይሚጥዎሙ፡ለዕደው፡ወኢይፃምዉ፡እስመ፡እግዚአብሔር፡ኢይፈቅድ፡ከመ፡ይርኣየኒ፡መኑሂ፡እምሰብእ፡እስከ፡አስተርእዮቱ፡ለእግዚእነ፡ወፈነወ፡ሊቀ፡ጳጳሳት፡ወሜጠሙ፡ለእሉ፡ዕደው።
54ወበአሐቲ፡ዕለት፡ፈቀደ፡እግዚአብሔር፡ከመ፡ይክሥት፡ክብረ፡ልብሱ፡ለቅዱስ፡ጳውሊ፡ወሞተ፡፩፡ወሬዛ፡ክርስቲያናዊ፡በሀገረ፡እስክንድርያ፡ኦሕዝበ፡ክርስቲያን፡እመ፡ኑኒ፡አነ፡አቡክሙ፡አትናቴዎስ፡እስመ፡ነሣ፡እኩ፡ልብሶ፡ዘፀጕረ፡በቀልት፡ለብፁዕ፡አባ፡ጳውሊ፡ወአንበርክዎ፡ዲበ፡ምውት፡ወተንሥአ፡ሶቤሃ፡ወአነ፡ኮንኩ፡ስምዐ፡በዝንቱ።
55ወኤስድሮስኒ፡ኤጲስቆጶስ፡ይቤ፡አነሂ፡ስምዕ፡በዝንቱ፡ነገር፡እስመ፡ርኢኩ፡ዘንተ፡በአዕይንትየ፡ወአነሂ፡ኤስድሮስ፡ኤጲስቆጶስ፡ዘጸሐፍኩ፡በእዴየ፡ዘንተ፡መንክረ፡እስመ፡በስምዐ፡፪ቱ፡ወቱ፡ይቀውም፡ኵሉ፡ነገር።
56ወተሰምዐ፡ዜናሃ፡ለዛቲ፡ተአምር፡ውስተ፡ኵሉ፡ግብፅ፡ወአንክሩ፡ኵሎሙ፡ሰብእ፡ወሰብሕዎ፡ለአግዚአብሔር፡ዘይገብር፡መንክራተ፡ባላዕለ፡ቅዱሳኒሁ። ጸሎቱ፡ወበረከቱ፡ቅድስት፡ተሀሉ፡ምስሌነ፡ለዓለመ፡ዓለም፡አሜን።
ሰላም፡ለጳውሊ፡ውሣጤ፡ገዳም፡ዘተፀምደ፤እንዘ፡ኢይሬኢ፡እምሰብእ፡መነሂ፡፩ደ፤ፃመወ፡ብዙኀ፡ወተጋደለ፡ፈድፋደ፤ድኅረ፡ሞተሂ፡ከመ፡በሕይወቱ፡ለመደ፤ለእግዚአብሔር፡አምላኩ፡በብረኩ፡ሰገደ።
57ወበዛቲ፡ዕለት፡አርአየ፡መንክረ፡ቶማስ፡ሐዋርያ፡ሶበ፡ወፅአ፡ከመ፡ይስብክ፡ኀበ፡አዘዞ፡እግዚእነ፡ወቀርበ፡ይብጻሕ፡ኀበ፡ሀገር፡፪ተ፡ምዕራፈ፡ተግኀሠ፡ንስቲተ፡እምፍኖት፡ወርእየ፡ወሬዛ፡ምዉተ፡ወልሁይ፡ጥቀ፡ወይቤ፡ሐዋርያ፡እግዚኦ፡በእንተዝኑ፡አምጻእከኒ፡ዝየ፡ከመ፡እርአይ፡ዘንተ፡መንሱተ፡ወባሕቱ፡ፈቃድከ፡ይኩን።
58ወዘንተ፡ብሂሎ፡ጸለየ፡ብዙኀ፡በእንተ፡ምዉት፡ወሶቤሃ፡ወፅአ፡ከይሲ፡እምገቦ፡እብን፡እንዘ፡ይዘብጥ፡በዘነቡ፡ምድረ፡ወጸርሐ፡በቃል፡ዐቢይ፡እንዘ፡ይብል፡ምንት፡ብየ፡ምስሌከ፡ሐዋርያሁ፡ለክርስቶስ፡እስመ፡መጻእከ፡ትዝልፍ፡ምግባርየ፡ወይቤ፡ንግር፡ግብረከ።
59ወይቤ፡ከይሲ፡ሀለወት፡ሐዋርያ፡እወ፡ብእሲት፡ሠናይት፡በአንፃረ፡ዓፀድ፡ወአነ፡ርኢክዋ፡ወአፍቀርክዋ። ወእምዝ፡ረከብክዎ፡ለዝንቱ፡ወሬዛ፡እንዘ፡ይስዕማ፡ወእንዘ፡ይዴመር፡ምስሌሃ፡በዕለተ፡ሰንበት፡ወአኮ፡መፍትው፡ከመ፡እንግር፡ኵሎ፡እኩየ፡ዘገብረ፡በቅድሜከ፡እስመ፡አነ፡አአምር፡ከመ፡ሱታፌሁ፡አንተ፡ለክርስቶስ፡በእንተዝ፡ቀተልክዎ። ወነገሮ፡ለሐዋርያ፡ውእቱ፡ሰይጣን፡ዘኅዱር፡ላዕለ፡ከይሲ፡ኵሎ፡እከዮ፡ዘይገብር፡ላዕለ፡ውሉደ፡ሰብእ።
60ወእምዝ፡አውግዞ፡ሐዋርያ፡ለከይሲ፡ከመ፡ይንሣእ፡ኀምዞ፡እምውእቱ፡ብእሲ፡በስመ፡ኢየሱስ፡ክርስቶስ፡ወነሥአ፡ኀምዞ፡ወሶቤሃ፡ተነፍሐ፡ወነቅዐ፡ወሞተ፡ወወሬዛኒ፡ዘሞተ፡ተንሥአ፡ወቀነፀ፡ወሐቀፈ፡እግሮ፡ለሐዋርያ።
61ወበዝኩ፡መካን፡አእመኖሙ፡ለአሕዛብ፡ወሐነፀ፡ቤተ፡ክርስቲያን፡ወእምዝ፡ቦአ፡ሐዋርያ፡ውስተ፡ሀገር፡ምስለ፡ዝኩ፡ወሬዛ፡ዘአንሥኦ፡እሙታን።
62ወእንዘ፡ይትናገር፡ምስለ፡አሕዛብ፡ውስተ፡ውእቱ፡መካን፡መጽአ፡ዕዋለ፡አድግ፡ወቆመ፡ቅድሜሁ፡ለሐዋርያ፡ወከሠተ፡አፉሁ፡ወይቤ፡ፅሙዱ፡ለክርስቶስ፡ወሐዋርያሁ፡ለልዑል፡ዘተአምር፡ኅቡአተ፡ወኅቡረ፡ቅኔ፡ምስለ፡ወልደ፡እግዚአብሔር፡ነዓ፡ተመየጥ፡ኀበ፡ዘፈነወከ፡አምላክ፡ዕርግ፡ወተፀዓን፡ዲቤየ፡ወአዕርፍ፡እስከ፡ትበውእ፡ማእከለ፡ሀገር።
63ወሰሚዖ፡ሐዋርያ፡አንከረ፡ጥቀ፡ወሰብሖ፡ለእግዚአብሔር፡ወይቤሎ፡ለዕዋል፡እምአይ፡ዘመድ፡አንተ፡ዘመጠነዝ፡ምሥጢራተ፡ትነብብ። ወይቤሎ፡አነ፡እምትውልዱ፡ለዘተቀንየ፡ለበለዓም፡ዘእምኔሁ፡እግዚእከ፡ወመምህርከ፡በውእቱ፡ትውልድ፡ተፅዕነ፡ላዕለ፡አቡየ።
64ወአነሂ፡ተፈነውኩ፡ይእዜ፡ከመ፡አዕርፍከ፡እምድካመ፡ፍኖት፡ወተፀዓን፡ላዕሌየ፡ወአበየ፡ተፅዕኖ፡ሐዋርያ። ወሶበ፡አስተብቍዖ፡ዕዋል፡ብዙኀ፡ተፅዕነ፡ዲቤሁ፡ወበጽሐ፡ኀበ፡ኀዋኅወ፡ወግር፡እንዘ፡ይተልውዎ፡ሕዝብ፡ብዙኃን። ወወረደ፡እምላዕሌሁ፡ወይቤሎ፡ሑር፡ወተዓቀብ፡በኀበ፡ሖርከ፡ወውእተ፡ጊዜ፡ወድቀ፡ወሞተ። ወእለ፡ርእዩ፡ደንገፁ፡ወይቤልዎ፡ለሐዋርያ፡አሕይዎ፡ወይቤሎሙ፡እምክህልኩ፡አንሥኦቶ፡በኃይለ፡አምላኪየ፡ወባሕቱ፡እምዝ፡ይኄይሶ፡ወአዘዞሙ፡ይክርዩ፡ምድረ፡ወይቅብርዎ።
65ወእምዝ፡ወሀቦሙ፡ሰላመ፡ወሖረ፡እምኀቤሆሙ። በረከቱ፡ተሀሉ፡ምስሌነ፡ለዓለመ፡ዓለም፡አሜን።
ሰላም፡ለቶማስ፡ዘአርአየ፡ግዕዞ፤ኀበ፡ሖረ፡ይስብክ፡ለእግዚአብሔር፡ትእዛዞ፤እስከ፡ለመዊት፡አብጽሖ፡እንተ፡አስከሮ፡ወአስዖዘዞ፤በስመ፡ኢየሱስ፡አውግዞ፤እምላዕለ፡ብእሲ፡ምዉት፡ከመ፡ይንሣእ፡ኅምዞ።

ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።