Sinaxario · Tir
8 de Tir
አመ፡፰፡ለጥር1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፰፡ለጥር፡በዛቲ፡ዕለት፡ኮነ፡ቅዳሴሃ፡ለቤተ፡ክርስቲያን፡ዘአባ፡መቃርስ፡በገዳመ፡አስቄጥስ፡በእዴሁ፡ለቅዱስ፡ወክቡር፡አባ፡ብንያሚን፡ሊቀ፡ጳጳሳት፡ዘሀገረ፡እስክንድርያ፡እምድኅረ፡በጽሐ፡ላዕሌሁ፡ምንዳቤ፡ዐቢይ፡እምነ፡መቆቅዝ፡ዓላዊ፡መለካዊ፡ወጐየ፡እምኔሁ፡አባ፡ብንያሚ፡ኀበ፡ላዕላይ፡ግብፅ፡እስከ፡ተፍጻሜተ፡፲ቱ፡ዓመት።
2ወሶበ፡አጥፍኦ፡እግዚአብሔር፡ለውእቱ፡መቆቅዝ፡ዓላዊ፡ኮነ፡ለአብያተ፡ክርስቲያናት፡ኀድአት፡ወሰላም፡ወተመይጠ፡አባ፡ብንያሚ፡ኀበ፡መንበረ፡ሢመቱ።
3ወእምዝ፡መጽኡ፡ኀቤሁ፡ረበናት፡እምገዳመ፡አስቄጥስ፡ቅድስት፡ወሰአልዎ፡ከመ፡ይሑር፡ምስሌሆሙ፡ወይቀድስ፡ሎሙ፡ቤተ፡ክርስቲያን፡ሐዳሰ፡ዘተሐንፀት፡በስሙ፡ለአባ፡መቃርስ፡ወተንሢኦ፡ሖረ፡ምስሌሆሙ፡በዓቢይ፡ፍሥሐ፡ወቀደሳ፡ለቤተ፡ክርስቲ፡ያን።
4ወሶበ፡ወጠነ፡አባ፡ብንያሚ፡ይቅባዕ፡ማእደ፡ወምሥዋዐ፡በሜሮን፡ቅዱስ፡ርእየ፡እዴሁ፡ለእግዚእነ፡ሎቱ፡ስብሐት። እንዘ፡ትቀብዕ፡ምስሌሁ፡ወሶቤሃ፡ወድቀ፡በገጹ፡በፍርሃት፡ዓቢይ።
5ወአንሥኦ፡ኪሩብ፡ወይቤሎ፡ኢትፍራህ፡ወጸሐፍ፡ለዝንቱ፡መካን፡ቀኖና፡እስመ፡ውእቱ፡ምሥጢረ፡ቅድሳቱ፡ለእግዚአብሔር፡ወኢይባእ፡መኑሂ፡ኀቤሁ፡በትዕቢተ፡ልብ፡ወኢበኀልያን፡ዘእንበለ፡ዘተሠይመ፡ውስቴቱ።
6ወኢይድፍር፡ወኢይትናገር፡መኑሂ፡ነገረ፡ከንቱ፡እስመ፡ውእቱ፡ቤተ፡ቅድሳቱ፡ለእግዚአብሔር፡ወዝንቱ፡ቀኖና፡ይኩን፡ሥሩዐ፡እስከ፡ለዓለም፡ውስተ፡ዝንቱ፡መካን፡እስመ፡ናሁ፡ሀሎ፡መዋዕል፡ይመጽእ፡ወያማስኑ፡ትእዛዛተ፡ዘሠርዑ፡አበዊሆሙ፡ወኢይተልዉ፡አሠሮሙ፡ወይከውን፡ዝንቱ፡መካን፡ቅዱስ፡ከመ፡መካነ፡ሥላቅ፡ወይቤ፡አባ፡ብንያሚ፡በአማን፡ዝንቱ፡ቤተ፡እግዚአብሔር፡ወዝንቱ፡ውእቱ፡ኆኀታ፡ለሰማይ።
7ወእንዘ፡ዘንተ፡ይትናዢ፡ምስለ፡ኪሩብ፡ነፀረ፡መንገለ፡ምዕራብ፡ዘቤተ፡ክርስቲያን፡ወርእየ፡፩ደ፡አረጋዌ፡ዘሠናይ፡አርአያሁ፡ወነዊኅ፡ጽሕሙ፡ወገጹ፡ብሩህ፡ከመ፡ገጸ፡መልአከ፡እግዚአብሔር፡ወአደሞ፡ፈድፋደ፡ለአባ፡ብንያሚ፡ወይቤ፡በነፍሱ፡ለእመ፡ሞተ፡፩፡እምኤጲስቆጶሳት፡አነ፡እሠይሞ፡ለዝንቱ፡አረጋዊ፡ኤጲስቆጶስ፡ህየንቴሁ፡ለዘሞተ።
8ወይቤሎ፡ኪሩብ፡ኦ፡ብንያሚን፡ትሬስዮኑ፡ለዝንቱ፡አረጋዊ፡ኤጲስቆጶሰ፡እስመ፡ዝንቱ፡ውእቱ፡አቡሆሙ፡ለሊቃነ፡ጳጳሳት፡ወኤጲስቆጶሳት፡ወለመነኮሳት፡ቅዱሳን፡ወዝንቱ፡አባ፡መቃርስ፡ውእቱ፡እስመ፡በጽሐ፡ዮም፡በመንፈስ፡ከመ፡ይትፈሣሕ፡ምስለ፡ውሉዱ፡ወኢይትኃጣእ፡እምውሉዱ፡ሥዩም፡ወኢሊቅ፡ወኢይትኀጣእ፡እማእከለ፡ምኔታቲሁ፡ፍሬያት፡ጥዑማት፡ዘመንፈስ፡ቅዱስ።
9ወይቤ፡አባ፡ብንያሚ፡ብፁዕ፡ውእቱ፡ወብፁዓን፡ደቂቁ፡ወይቤ፡ኪሩብ፡ለእመ፡ዓቀቡ፡ደቂቁ፡ምግባራቲሁ፡ወትእዛዛቲሁ፡ወተለዉ፡አሠሮ፡እሙንቱ፡ይከውኑ፡ምስሌሁ፡ኀበ፡ውእቱ፡ሀሎ፡ውስተ፡ስብሐት። ወለእመ፡ተዓደዉ፡ትእዛዛቲሁ፡ኢይከውኖሙ፡ምስሌሁ፡ርስት።
10ወይቤሎ፡አባ፡መቃርዮስ፡ለመልአክ፡ኪሩብ፡እግዚእየ፡ኢትምትር፡ላዕለ፡ውሉድየ፡በዝንቱ፡ነገር፡አላ፡ለእመ፡ተርፈት፡ውስተ፡አስካል፡አሐቲ፡ኅጠት፡እስመ፡በረከቱ፡ለእግዚአብሔር፡ውስቴታ፡ይከውን፡ለእመ፡ተርፈሰ፡ፍቅር፡ውስቴቶሙ፡በበይናቲሆሙ፡አነ፡አአምን፡ከመ፡እግዚአብሔር፡ኢያርኅቆሙ፡እመንግሥቱ፡ወአንከረ፡ሊቀ፡ጳጳሳት፡አባ፡ብንያሚ፡እምሕረቱ፡ለአረጋዊ፡አባ፡መቃርዮስ።
11ወጸሐፈ፡ቀኖና፡አባ፡ብንያሚ፡ዘአዘ፡ኪሩብ፡ወአንበሮ፡ውስተ፡ቤተ፡ክርስቲያን፡ከመ፡ይኩን፡ተዝካረ፡በኵሉ፡አዝማን።
12ወሰአሎ፡ለእግዚእነ፡አባ፡ብንያሚን፡ከመ፡ይኩን፡ሞቱ፡በከመ፡ዛቲ፡ዕለት፡ወከማሁ፡ኮነ፡ሎቱ፡አመ፡፰፡ለወርኀ፡ጥር። በረከቱ፡ትኩን፡ምስሌነ፡ለዓለመ፡ዓለም፡አሜን።
ሰላም፡ለብንያሚን፡ዘተምህረ፡መጻሕፍተ፤እስከነ፡ተኀርየ፡ያድምፅ፡በእስክንድርያ፡ሢመተዘይቤሎ፡ራእየ፡ዘከመ፡ሰምዐ፡ክሡተ፤እስመ፡ትርዕዮሙ፡ለመርዔተ፡ክርስቶስ፡አንተብንያሚ፡ብፁዕ፡ተፈሣሕ፡ትፍሥሕተ።ሰላም፡ለቅዳሴ፡ቤትከ፡በእደ፡ብንያሚን፡ዘኮነ፤የማነ፡አምላክ፡ምስሌሁ፡እንዘ፡ይቀብዕ፡ሜሮነ፤ውሳጤ፡መቅደስከ፡ዛቲ፡መቃርዮስ፡አቡነ፤የዓቅባ፡በትኀይልት፡ኪሩብ፡ወሰነ፤ዘቦ፡ትዕቢተ፡ወዘቦ፡ኀልያነ።እግዚአብሔር፡አብ፡ዘታነኀሲ፡አብሶ፤ወለብሉይ፡ዘትሔድሶ፤ለገብርከ፡በምሕረትከ፡ኀሥሦ፤ወኀድፍ፡ዓዲ፡ኀበ፡ዛኅን፡ወመርሶ፤በተዓግሦ፡ዘአጥረየ፡ነፍሶ።
13ወበዛቲ፡ዕለት፡አዕረፈ፡አብ፡ቅዱስ፡አባ፡እንድራኒቆስ፡ሊቀ፡ጳጳሳት፡ዘእስክንድርያ፡እምኍልቆሙ፡ለአበው፡ሊቃነ፡ጳጳሳት፡፴ወ፯ቱ፡ወውእቱ፡እምውሉደ፡ሀገረ፡እስክንድርያ፡ወኮነ፡ዲያቆነ፡ወውእቱ፡ኄር፡ወማእምር፡ወተምህረ፡መጻሕፍተ፡ቤተ፡ክርስቲያን።
14ኮነ፡ወልደ፡እኅወ፡አቡሁ፡መኰንነ፡ሀገረ፡እስክንድርያ፡ወበእንተ፡ሢመቱ፡ወዕበየ፡ክብሩ፡ወቤቱ፡ኢየኀድር፡ውስተ፡አድባር፡በከመ፡ኮኑ፡ሊቃነ፡ጳጳሳት፡የኀድሩ፡እለ፡እምቅድሜሁ። ወተሠይመ፡ዝንቱ፡በ፲፡ዓመተ፡መንግሥቱ፡ለሕርቃል፡ንጉሠ፡ሮም፡በ፱፻፴፡ወ፫፡ዓመተ፡መንግሥቱ፡ለእስክንድር፡ንጉሥ።
15ወበመዋዕሊሁ፡ለዝንቱ፡አብ፡ተንሥአ፡ክስራ፡ንጉሠ፡ፋርስ፡ዘኮነ፡ከሐዴ፡ወያመልክ፡ፀሐየ፡ወአስተጋብአ፡ሠራዊቶ፡ወኮኑ፡ብዙኃነ፡ወዓገትዋ፡ለብሔረ፡ሮም፡ወለብሔረ፡ሶርያ፡ወለፍልስጥኤም፡ወኣመዝበሩ፡ሀገሮሙ፡ወፄወዉ፡ንዋዮሙ።
16ወእምዝ፡ዓገታ፡ለግብፅ፡ወበጽሐ፡ኀበ፡ሀገረ፡እስክንድርያ፡ወኮነ፡በዓውዳ፡ለሀገረ፡እስክንድርያ፡፮፻ተ፡አድባራት፡ምሉአነ፡እመነኮሳት፡ወለእሙንቱ፡መነኮሳት፡ቦሙ፡ብዙኀ፡ንዋይ፡ወይነብሩ፡እንዘ፡ይትፌግዑ፡ወበእንተዝ፡ወሀቦ፡ሥልጣነ፡እግዚእነ፡ለክስራ፡ከመ፡ያጥፍኦሙ፡ውእቱኒ፡ቀተሎሙ፡ወኢተርፈ፡እምኔሆሙ፡ዘእንበለ፡ዘጐየ፡ወተኀብአ፡ወማኅረከ፡ኵሎ፡ንዋዮሙ። ወእማንቱሂ፡አድባራት፡ኢተሐንፃ፡ወኢተቀደሳ፡እስከ፡ይእዜ።
17ወሶበ፡ሰምዑ፡ሰብአ፡ሀገረ፡እስክንድርያ፡አርኀዉ፡ሎቱ፡አንቀፀ፡ሀገሮሙ፡ወክስራኒ፡ርእየ፡በሕልሙ፡ከመ፡ዘይቤሎ፡ናሁ፡መጠውክዋ፡ለዛቲ፡ሀገር፡ውስተ፡እዴከ፡ወኢታንህላ፡አላ፡ቅትሎሙ፡ለፅኑዓን፡እለ፡ውስቴታ፡እስመ፡እሙንቱ፡ዓማፅያን። ወነሥኦ፡ለንጉሠ፡ሀገር፡ወአሠሮ፡ወይቤሎሙ፡ለሰብአ፡ሀገር፡ከመ፡ያምጽኡ፡ሎቱ፡ወራዙተ፡ፅኑዓነ፡እለ፡መዋዕሊሆሙ፡፲ወ፰ቱ፡ዓመት፡እስከ፡፴ወ፵፡ዓመት፡ከመ፡አሀቦሙ፡ለለ፩ዱ፡፩ዱ፡በበ፳፡ዲናረ፡ወርቅ፡ወእሥርዖሙ፡ሐራ፡ሊተ፡ወይዕቀብዋ፡ለሀገር፡ወመሰሎሙ፡ከመ፡እሙን፡ቃሉ፡ወተጋብኡ፡ኀቤሁ፡፹፻፡ዕደው። ወአኀዘ፡ውእቱ፡ከመ፡ይጽሐፍ፡ኍልቆሙ፡ወእሙንቱ፡ይሔልዩ፡ከመ፡ይንሥኡ፡ወርቀ፡ወሶበ፡ተፈጸመ፡ኍልቆሙ፡ቀተሎሙ፡ለኵ፡ሎሙ፡በሰይፍ።
18ወእምዝ፡ዐርገ፡ኀበ፡ላዕላይ፡ግብፅ፡ወበጽሐ፡ኀበ፡ሀገረ፡ንቅዮስ፡ወሰምዐ፡ከመ፡በዓታት፡ወአድባራት፡ወመካናት፡ውስቴቶሙ፡፯፻፡መነኮሳት፡ዘምግባራቲሆሙ፡እኪት፡ቀተሎሙ፡በሰይፍ፡ለኵሎሙ።
19ወሶበ፡ሰምዐ፡ሕርቃል፡ንጉሠ፡ሮም፡ዘገብረ፡ክስራ፡ንጉሠ፡ፋርስ፡አስተጋብአ፡ሠራዊቶ፡ወሖረ፡ኀቤሁ፡ወቀተሎ፡ምስለ፡ሠራዊቱ፡ወኣመዝበረ፡ሀገሮ።
20ወገድሉሰ፡ለዝንቱ፡አብ፡እንድራኒቆስ፡ሠናይ፡ፈድፋደ፡ወነበረ፡ውስተ፡ሢመቱ፡፯ተ፡ዓመተ፡ወአሥመሮ፡ለእግዚእነ፡ወአዕረፈ፡በሰላም፡በ፫፻፵ወ፯፡ዓመተ፡ሰማዕታት፡እምቅ፡ድመ፡መንግሥተ፡ተንባላት፡ውስተ፡ብሔረ፡ግብፅ። በረከቱ፡ትኩን፡ምስሌነ፡ለዓለመ፡ዓለም፡አሜን።
ሰላም፡እብል፡ለእንድራኒቆስ፡ግሡፅ፤በትምህርተ፡መንፈስ፡ዐቢይ፡ወአኮ፡ሕፁፅ፤ሱባዔ፡ዓመታት፡ፈጺሞ፡በዲበ፡መንበሩ፡ሕኑፅ፤ፈለሰ፡ዮም፡እምዓለመ፡ጽልመት፡ወዳኅፅ፤እምቅድመ፡ይንግሡ፡ተንባላት፡በግብፅ።
21ወበዛቲ፡ዕለት፡አዕረፈ፡አብ፡ቅዱስ፡አባ፡ብንያሚን፡ሊቀ፡ጳጳሳት፡ዘእስክንድርያ፡እምኍልቆሙ፡ለአበው፡ሊቃነ፡ጳጳሳት፡፴ወ፰ቱ፡ወዝንቱ፡ቅዱስ፡እምሰብአ፡ሀገረ፡ባርስጥ፡እምብዑላኒሃ፡ወመንኰሰ፡እምንእሱ፡ኀበ፡፩ዱ፡ብእሲ፡ቅዱስ፡ዘስሙ፡ቴዎድሮስ፡በውስተ፡ደብር፡ዘምዕራበ፡ሀገረ፡እስክንድርያ።
22ወኮነ፡ወትረ፡ይልኅቅ፡በምግባረ፡ሠናይ፡ወተምህረ፡መጻሕፍተ፡ቤተ፡ክርስቲያን፡ብዙኀ።
23ወበአሐቲ፡ሌሊት፡ርእየ፡ራእየ፡ዘከመ፡ይቤሎ፡ተፈሣሕ፡ኦ፡ብንያሚን፡እስመ፡አንተ፡ትርዕዮሙ፡ለመርዔተ፡ክርስቶስ፡ወነገሮ፡ለመምህሩ፡ዘከመ፡ርእየ፡ራእየ፡ወይቤሎ፡መምህሩ፡ተዓቀብ፡እምሰይጣናት፡ከመ፡ኢያስሕቱከ፡በትዕቢት፡ወዘንተ፡ሰሚዖ፡ወሰከ፡ላዕለ፡ትሩፋቲሁ፡ወተጋድሎቱ።
24ወእምዝ፡ነሥኦ፡መምህሩ፡ለአባ፡ብንያሚን፡ወወሰዶ፡ኀበ፡እንድራኒቆስ፡ሊቀ፡ጳጳሳት፡ወነገሮ፡ዘከመ፡ርእየ፡ወልዱ፡ብንያሚን፡ወአባ፡እንድራኒቆስ፡ሤሞ፡ቀሲሰ፡ወመጠዎ፡ሎቱ፡ምግብና፡ዘቤተ፡ክርስቲያን፡ወነበረ፡እንዘ፡ይሜግባ፡ለቤተ፡ክርስቲያን፡በሠናይ።
25ወእምድኅረ፡አዕረፈ፡አባ፡እንድራኒቆስ፡ተሠይመ፡አባ፡ብንያሚን፡ሊቀ፡ጳጳሳት። ወባሕቱ፡በጽሖ፡ለዝንቱ፡አብ፡ምንዳቤ፡ዐቢይ፡ወአስተርአዮ፡መልአከ፡እግዚአብሔር፡ወአጠየቆ፡ዘይከውን፡እምኔሁ፡ወአዞዞ፡ከመ፡ይጕየይ፡ውእቱ፡ወኤጲስቆጶሳቲሁ፡ምስሌሁ፡ኵሎሙ፡ወእምዝ፡ቀደሰ፡ቅዳሴ፡ቍርባን፡ወመጠዎሙ፡ለሕዝብ፡ምሥጢራተ፡ቅድሳት፡ወአዘዞሙ፡ከመ፡ይፅንዑ፡ውስተ፡ሃይማኖት፡ርትዕት፡ወአጠየቆሙ፡ዘይከውን፡ኵሎ።
26ወእምዝ፡ፈነወ፡መልእክታት፡ኀበ፡ኵሎሙ፡ኤጲስቆጶሳት፡ወኀበ፡ሊቃናተ፡አድባራት፡ወአዘዞሙ፡ከመ፡ይጕየዩ፡ወውእቱ፡ሖረ፡ኀበ፡ገዳመ፡አስቄጥስ፡ዘአባ፡መቃርስ፡ወእምህየ፡ሖረ፡ኀበ፡ላዕላይ፡ግብፅ።
27ወእምድኅረ፡ወፅአ፡እምሀገረ፡እስክን፡ድርያ፡በጽሐ፡ኀቤሁ፡መኰንን፡ወውእቱ፡ሊቀ፡ጳጳሳት፡እምኀበ፡ሕርቃል፡ንጉሡ፡ሮም፡ወኮነ፡ሥሉጠ፡ላዕለ፡ኵሎን፡አብያተ፡ክርስቲያናት፡ወላዕለ፡መሃይምናን፡ወኰነኖሙ፡ለብዙኃን፡እምኔሆሙ፡ወአኀዞ፡ለእኀወ፡አባ፡ብንያሚን፡ዘስሙ፡ሚናስ፡ወኰነኖ፡ወአውዓዮ፡ገበዋቲሁ፡በእሳት፡ወአስጠሞ፡ውስተ፡ባሕር።
28ወበእማንቱ፡መዋዕል፡ርእየ፡ራእየ፡ሕርቃል፡ንጉሠ፡ሮም፡ከመ፡ዘይቤሎ፡ናሁ፡ይመጽኡ፡ሕዝብ፡ብዙኃን፡ላዕሌከ፡ግዙራን፡ነዮሙ፡ወይወውዑ፡ወይነግሡ፡ላዕለ፡ምድር፡ወመሰሎ፡ከመ፡እሙንቱ፡አይሁድ፡ወአጥመ፡ቆሙ፡ለብዙኀን፡እምኔሆሙ፡ወራእይሰ፡ዘኮነት፡ኀቤሁ፡በእንተ፡መንግሥቶሙ፡ለተንባላት።
29ወተንባላትኒ፡በጽሑ፡ኀቤሁ፡እምድረ፡ያትሮብ፡እንተ፡ይእቲ፡መካ፡ወነግሡ፡በምድረ፡ሶርያ።
30ወበውእቱ፡መዋዕል፡ወፅአ፡ዑመር፡ወልደ፡ዓፅ፡ኀበ፡ምድረ፡ግብፅ፡ወነግሠ፡ላዕሌሃ፡ወነበረ፡ባቲ፡፫፡ዓመተ፡በ፻፲ወ፱፡ዓመተ፡ሰማዕታት፡በጽሐ፡ዑመር፡ኀበ፡ሀገረ፡እስክንድርያ፡ወአንሀለ፡ቅፅራ፡ወአውዓየ፡አብያተ፡ክርስቲያናት፡ብዙኃተ፡ወቤተ፡ክርስቲያኑ፡ለቅዱስ፡ማርቆስ፡ወንጌላዊ፡ዘኮነት፡ኀበ፡ጽንፈ፡ባሕር፡ዘዕውቅት፡ይእቲ፡ይእዜ፡በመትሕተ፡ምድር። ወከማሁ፡ካዕበ፡አውዓዮሙ፡ለአድባራት፡ወለምኔታት፡እለ፡የዓውድዋ፡ለሀገረ፡እስክንድርያ፡ወማኅረከ፡ኵሎ፡ንዋየ፡ዘውስቴቶሙ።
31ወእምዝ፡አብአ፡ሊቀ፡ሐራ፡አሕማ፡ራተ፡ኀበ፡ሀሎ፡ሥጋሁ፡ለቅዱስ፡ማርቆስ፡ወንጌላዊ፡ወአብአ፡እዴሁ፡ውስተ፡ሣፁን፡ወረከበ፡ሥጋሁ፡ለቅዱስ፡ማርቆስ፡ወአእመረ፡ከመ፡ዐቢይ፡ውእቱ፡ወነሥአ፡ርእሶ፡ለቅዱስ፡ማርቆስ፡ወንጌላዊ፡ወአብኦ፡ውስተ፡ሐመሩ።
32ወዑመርሰ፡ወልደ፡ዓፅ፡ሶበ፡አእመረ፡ግብሮ፡ለአባ፡ብንያሚን፡ወበእንተ፡ምንት፡ዘጐየ፡ጸሐፈ፡መልእክተ፡ወፈነወ፡ኀበ፡ኵሉ፡ብሔረ፡ግብፅ፡እንዘ፡ይብል፡ነዓ፡ወኢትፍራህ፡ወመግቦሙ፡ለሕዝብከ፡ወለአብያተ፡ክርስቲያናቲከ።
33ወመጽአ፡አባ፡ብንያሚን፡እምኀበ፡ጉዋ፡በ፲፡ዓመተ፡መንግሥቱ፡ለሕርቃል፡ንጉሡ፡ሮም፡በ፫፡ዓመተ፡መንግሥቶሙ፡ለተንባላት።
34ወዑመር፡አክበሮ፡ክብረ፡ዐቢየ፡ወአዘዘ፡ሎቱ፡ከመ፡የሀብዎ፡አብያተ፡ክርስቲያናቲሁ፡ወኵሎ፡ንዋዮሙ፡ወምድሮሙ፡ለካህናቲሆሙ፡ወይቤሎ፡ሑር፡ጸሊ፡ሊተ፡በእንቲአየ፡እስከ፡አሐውር፡ኀበ፡ሀገረ፡ምዕራብ፡ወእነግሥ፡ላዕለ፡፭፡አህጉር፤ ወሶበ፡ገባእኩ፡እገብር፡ለከ፡ኵሎ፡ዘትፈቅድ፡ወይቤሎ፡አባ፡ብንያሚን፡እግዚአብሔር፡ያርትዕ፡ፍናዊከ፡ወነገሮ፡ኵሎ፡ዘይከውን፡ላዕሌሁ።
35ወሶበ፡ፈቀደ፡ዑመር፡ከመ፡ይሑር፡አቅረቡ፡ሎቱ፡አሕማረ፡ወአኀዙ፡ያውፅኡ፡አሕማረ፡እመርስ፡ዘእንበለ፡ሐመር፡ዘውስቴታ፡ሥጋሁ፡ለቅዱስ፡ማርቆስ፡እስመ፡ይእቲ፡አበየት፡ወፂአ፡እመርሶ፡ወተጋብኡ፡ኵሎሙ፡ኖትያተ፡አሕማር፡ወአሠሩ፡አሕባላተ፡ውስተ፡ይእቲ፡ሐመር፡ወሰሐብዋ፡ወኢክህሉ፡አንቀልቅሎታ፡ወይቤ፡መኰንን፡ፍትሕዋ፡ለይእቲ፡ሐመር፡ወኀድግዋ። ወፈርሀ፡ሊቀ፡ሐመር፡ወነገሮ፡ለዑመር፡በእንተ፡ርእሱ፡ለቅዱስ፡ማርቆስ፡ወንጌላዊ፡ወከሠተ፡ሎቱ።
36ወፈነወ፡መኰንን፡ኀበ፡አባ፡ብንያሚን፡ወነገሮ፡በእንተ፡ርእሱ፡ለቅዱስ፡ማርቆስ፡ወአባ፡ብንያሚን፡ርእየ፡ራእየ፡በይእቲ፡ሌሊት፡ከመ፡ቅዱስ፡ማርቆስ፡ወንጌላዊ፡ይቤሎ፡አስተዳሉ፡ሊተ፡መካነ፡በኀቤከ፡ወአባ፡ብንያሚን፡አጠየቆ፡ለመኰንን፡ወይቤሎ፡በአማን፡ዛቲ፡ርእሱ፡ለቅዱስ፡ማርቆስ፡ወንጌላዊ፡ወእምዝ፡ነሥኣ፡አባ፡ብንያሚን፡ለርእሰ፡ቅዱስ፡ማርቆስ፡ወንጌላዊ፡እምውስተ፡ሐመር፡ወሶቤሃ፡ወፅአት፡ይእቲ፡ሐመር፡እመርሶ።
37ወሶበ፡ርእየ፡መኰንን፡ዘንተ፡ተአምረ፡አንከረ፡ፈድፋደ፡ወወሀቦ፡ለአባ፡ብንያሚን፡ንዋየ፡ብዙኀ፡ወአዘዞ፡ከመ፡ይሕንፅ፡ቤተ፡ክርስቲያኑ፡ለቅዱስ፡ማርቆስ፡ወተሐንፀት፡ሎቱ፡ቤተ፡ክርስቲያን፡ሠናይተ፡ወአንበረ፡ሥጋሁ፡ወርእሶ፡ለቅዱስ፡ማርቆስ፡ውስቴታ።
38ወኮነ፡ዝንቱ፡አብ፡መስተጋድለ፡ፅኑዐ፡በአንተ፡አረማውያን፡ወሜጠሙ፡ለብዙኃን፡እምኔሆሙ፡ወአብኦሙ፡ውስተ፡ሃይማኖት፡ርትዕት፡ወአፅንዖሙ፡ባቲ።
39ወበመዋዕሊሁ፡ለዝንቱ፡አብ፡አምጽአ፡እግዚአብሔር፡ረኀበ፡ዐቢየ፡ውስተ፡ኵሉ፡አህጉር፡ዘኢኮነ፡ከማሁ፡ወሞቱ፡ብዙኃን፡በውእቱ፡ረኀብ፡ዘአልቦ፡ኍልቍ፡ወኮኑ፡ግዱፋነ፡ውስተ፡መራኅብት፡ወምሥያጣት።
40ወውእቱኒ፡አባ፡ብንያሚን፡ደወ፡እግሮ፡መጠነ፡፪ቱ፡ዓመት፡ወእምዝ፡አዕረፈ፡ወኮነ፡ኵሉ፡መዋዕለ፡ሢመቱ፡፴፱፡ዓመተ። በረከቱ፡ትኩን፡ምስሌነ፡ለዓለመ፡ዓለም፡አሜን።
41ወበዛቲ፡ዕለት፡አዕረፈ፡ሚልክያስ፡ነቢይ፡ጻድቅ፡ዘአድምዐ፡ፈቃዶ፡ለእግዚአብሔር፡ዘሰመይዎ፡መልአክ፡ወዝንቱ፡ነቢይ፡ተወልደ፡እምድኅረ፡ተመይጡ፡ሕዝብ፡እም፡ፄዋዌ፡በውስተ፡መካን፡ዘስሙ፡ሱፋድ።
42ወሶበ፡ኮነ፡ወሬዛ፡ሖረ፡ሑረተ፡ሠናየ፡ወኮኑ፡ኵሉ፡ሕዝብ፡ያከብርዎ፡በእንተ፡ጽድቁ፡ወበእንተዝ፡ሰመይዎ፡ሚልክያስ፡ዘበትርጓሜሁ፡መልአክ። እስመ፡ውእቱ፡ኮነ፡አርአያሁ፡ሠናየ፡ፈድፋደ፡በአርአያሁኒ።
43ወኵሎ፡ዘይከውን፡ይትናገር፡በትንቢት፡ወመልአከ፡እግዚአብሔር፡ያስተርእዮ፡ወይነግሮ፡ወሕዝብኒ፡ኢይሬእይዎ፡ለመልአክ፡ግሙራ፡አላ፡ባሕቱ፡ይሰምዑ፡ቃሎ፡ወቦ፡እምኔሆሙ፡እለ፡ደለዎሙ፡ከመ፡ይርአይዎ፡ገጾ፡ገሀደ፡በከመ፡ጽሑፍ፡ውስተ፡መጻሕፍተ፡መሳፍንት፡ወእንዘ፡ወሬዛ፡ውእቱ፡አዕረፈ፡ወተቀብረ፡ውስተ፡ዘአበዊሁ፡ገራህት። በረከተ፡አምላኩ፡ተሀሉ፡ምስሌነ፡ለዓለመ፡ዓለም፡ኣሜን።
ሰላም፡ለሚልክያስ፡ዘአድምዐ፡ፈቃዶ፤ምስለ፡ንኡሳን፡ነቢያት፡እንዘ፡ኢይትፈለጥ፡በተዋሕዶ፤ እግዚአብሔር፡አምላክ፡ለእለ፡ገብሩ፡ፈቃዶ፤እረድእ፡ይብል፡በአፉሁ፡ዘአልቦ፡ተብዕዶ፤በከመ፡ይረድእ፡ኣብ፡ዘሎቱ፡ውሉዶ።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።