ግዕዝ
Home Formaciones Libros Biblioteca Ge'ez Contacto
Sinaxario · Tir

5 de Tir

አመ፡፭፡ለጥር
1በስመ፡ኣብ፡ወወልድ፡ወመንፈስ፡ቅዱስ፡፩፡አምላክ፡አመ፡፭፡ለጥር፡በዛቲ፡ዕለት፡ኮነ፡ሰማዕተ፡ቅዱስ፡አውስግንዮስ፡ወዝንቱ፡ቅዱስ፡ሐራ፡ውእቱ፡በመዋዕሊሁ፡ለቈስጠንጢኖስ፡ንጉሥ፡ወኮነ፡ያመልኮ፡ለእግዚአብሔር፡ወብዙኅ፡ምሕረተ፡ይገብር፡ለነዳያን፡ወለምስኪናን።
2ወሶበ፡አስተርአዮ፡ለቈስጠንጢኖስ፡አምሳለ፡መስቀል፡በከክብት፡ውስተ፡ሰማይ፡እምቅድመ፡ይእመን፡በእግዚእነ፡ክርስቶስ፡ወኢያእመረ፡ዘንተ፡ተአምረ፡ወቀርበ፡ኀበ፡ንጉሥ፡ዝንቱ፡ቅዱስ፡አውስግንዮስ፡ወይቤሎ፡እስመ፡ዛቲ፡ትእምርቱ፡ለእግዚእነ፡ኢየሱስ፡ክርስቶስ፡እስመ፡ኢሀሎ፡ውስተ፡ሠራዊቱ፡ለንጉሥ፡ዘይደፍር፡ይጸውዕ፡ስሞ፡ለእግዚእነ፡ክርስቶስ።
3ወሶበ፡ሞዖሙ፡ንጉሥ፡ለጸላእቱ፡በትእምርተ፡መስቀል፡ማሕየዊ፡ኮነ፡ክርስቲያናዊ፡ዘበአማን፡ወዓቀመ፡ቀርነ፡ሃይማኖት፡ዘክርስትና።
4ወሐይወ፡ዝንቱ፡ሐራ፡አውስግንዮስ፡እምድኅረ፡ቈስጠንጢኖስ፡ወእምድኅረ፡ወልዱ፡እስከ፡መዋዕሊሁ፡ለሉልያኖስ፡ከሐዲ።
5ለቱ፡ወበውእቱ፡መዋዕል፡ኮነ፡መዋዕሊሁ፡፻ወ፲፡ዓመተ፡ወእንዘ፡ውእቱ፡ያንሶሱ፡ውስተ፡መራኅብተ፡ሀገር፡ዘአንጾኪያ፡ረከቦሙ፡ዕደው፡እንዘ፡ይትበአሱ፡በበይናቲሆሙ፡ወፈቀደ፡ይዕርቆሙ፡ወገብረ፡ሰላመ፡ማእከሎሙ፡እስመ፡ውእቱ፡አረጋዊ፡ክቡር፡ወገብረ፡ፍሥሐ፡ወሰላመ።
6ወሖረ፡፩፡ብእሲ፡ኀበ፡ንጉሥ፡ሉልያኖስ፡ወአስተዋደዮ፡ለዝንቱ፡ቅዱስ፡አውስግንዮስ፡እንዘ፡ይብል፡እስመ፡አውስግንዮስ፡ኮነ፡መስፍነ፡ወመኰንነ፡በፈቃዱ፡ወአብጽሖ፡ዓውድ፡ውስተ፡ወይቤሎ፡ኦ፡ንጉሥ፡አውስግንዮስ፡መኑ፡ሤመከ፡መስፍነ፡ወመኰንነ፡ወይቤሎ፡ቅዱስ፡ለምንት፡ኀደገ፡አምልኮቶ፡ለእግዚአብሔር፡አኀዜ፡ኵሉ፡ዘነፍስከ፡ውስተ፡እዴሁ፡ወሰገድከ፡ለጣዖታት፡ርኩሳን፡ወኢተለውኮሙ፡ለነገሥት፡እለ፡እምቅድሜከ።
7ወአንሰ፡ነበርኩ፡ሐራ፡ዘከማከ፡ምስለ፡ቈስጠንጢኖስ፡፳፡ዓመተ፡ወምስለ፡ወልዱ፡አልቦ፡እምኔሆሙ፡እኩየ፡ግዕዝ፡ዘከማከ፡እስመ፡አንተ፡ኀደገ፡ፈሪሃ፡እግዚአብሔር፡ወአምለከ፡ጣዖተ፡ርኩሰ። ወሰሚዖ፡ንጉሥ፡ተምዐ፡ጥቀ፡ወአዘዘ፡ይስቅልዎ፡ወይደዩ፡ውስተ፡ገበዋቲሁ፡ነበልባለ፡እሳት፡ወገብሩ፡ቦቱ፡ዘንተ፡ኵሎ፡ወውእቱሰ፡ይትዔገሥ፡በእንተ፡ስሙ፡ለእግዚእነ።
8ወሶበ፡ደክመ፡እምኰንኖቱ፡አዘዘ፡ከመ፡ይምትሩ፡ርእሶ፡በሰይፍ፡ወሶበ፡ወሰድዎ፡ሐራ፡ኀበ፡ይቀትልዎ፡ሰአሎሙ፡ከመ፡ይትዓገሥዎ፡እስከ፡ይጼሊ። ወሶበ፡ፈጸመ፡ጸሎቶ፡መተሩ፡ርእሶ፡ክብርተ፡ወነሥአ፡አክሊለ፡ስምዕ፡በመንግሥተ፡ሰማያት፡ምስለ፡ኵሎሙ፡ቅዱሳን። በረከቱ፡ቅድስት፡ትኩን፡ምስሌነ፡ለዓለመ፡ዓለም፡አሜን።
ሰላም፡ለአውግንዮስ፡ለምሥጢረ፡መስቀል፡ዘተርጎሞ፤አመ፡ቈስጠንጢኖስ፡ርእየ፡ማዕተበ፡ከዋክብት፡ነዊሞ፤እንዘ፡ኢያፅሕቦ፡ልኀቅና፡ወርስዓኒሁ፡ኢያደክሞ፤፻ወ፲ተ፡ዓመተ፡መዋዕለ፡ሕይወቱ፡ፈጺሞ፤በእንተ፡ክርስቶስ፡ተመትረ፡ወከዓወ፡ደሞ።
9ወበዛቲ፡ዕለት፡አዕረፈ፡አባ፡ማቴዎስ፡ሊቀ፡ጳጳሳት፡ዘእስክንድርያ፡እምኍልቆሙ፡ለአበው፡ሊቃነ፡ጳጳሳት፡፹ወ፯ቱ።
10እስመ፡ለዝንቱ፡አባ፡ማቴዎስ፡ኮኑ፡አበዊሁ፡እምነገደ፡እስራኤል፡ወምእመናን፡በክርስቶስ፡ወፍጹማን፡በምግባረ፡ሠናይ፡ወስሙ፡ለአቡሁ፡ስምዖን፡ወስማ፡ለእሙ፡በርባራ፡ወወሀቦ፡እግዚአብሔር፡፪ተ፡ዘርአ፡ለዘይልኀቅ፡ስሙ፡ያዕቆብ። ወለዘይንእስ፡ስሙ፡ማቴዎስ። ወለዝንቱሰ፡አባ፡ማቴዎስ፡እንዘ፡ሀሎ፡በከርሥ፡ረከባ፡ለእሙ፡አባ፡ጴጥሮስ፡ኤጲስቆጶስ፡ዘሀገረ፡አቡፌስ፡ወሶበ፡ርእያ፡ወረደ፡እምላዕለ፡አድጉ፡ወይቤላ፡ኦ፡ብእሲቶ፡ቡርክት፡አንቲ፡ወቡሩክ፡ፍሬ፡ከርሥኪ፡ወናሁ፡ይወፅእ፡እምኔኪ፡ኮከብ፡ብሩህ፡ዘያበርህ፡በስብከቱ፡ከመ፡ማርቆስ፡ወንጌላዊ።
11ወሶበ፡ኮኖ፡፲ወ፭ተ፡ዓመተ፡አዕረፉ፡አበዊሁ፡ወእምዝ፡ሖረ፡ኀበ፡አባ፡አብርሃም፡ቆሞስ፡ዘደብረ፡ቅዱስ፡አቡፋና፡ወሰአሎ፡ከመ፡ያመንኵሶ፡ወይቤሎ፡ቅድመ፡ተሠነዓው፡ምስለ፡እኍከ፡ዘይልኅቅ፡ወእምድኅረዝ፡ተመየጥ፡ኀቤየ።
12ወሰሚዖ፡ተመይጠ፡እንዘ፡ይቴክዝ፡ወበፍኖት፡ተራከቦ፡ቅዱስ፡ሚካኤል፡መልአክ፡በአምሳለ፡መነኮስ፡ወነገሮ፡ከመ፡ይከውን፡ተአምራት፡በእደዊሁ።
13ወበጺሖ፡ኀበ፡እኍሁ፡ያዕቆብ፡አገበሮ፡ከመ፡ይኀድጎ፡ይመንኵስ፡ወሶበ፡አበዮ፡ሖረ፡ኀበ፡ደብረ፡አባ፡አሞኒ፡ዘደብረ፡ቶና፡ወተማኅፀነ፡በቤተ፡ክርስቲያን፡ወሶበ፡ሰአልዎ፡መነኮሳት፡ለእኍሁ፡በእንቲአሁ፡ኀደጎ፡ወሖረ፡ኀበ፡አባ፡አብርሃም፡ዘደብረ፡አቡፋና፡ወአመንኰሶ፡ወተጋደለ፡በጾም፡ወበጸሎት፡እስከ፡ተለዓለ፡በገድሉ፡እምእለ፡ሀለዉ፡ህየ፡መነኮሳት።
14ወእምድኅረ፡ኮኖ፡፩፡ዓመተ፡ወፅአ፡አባ፡ጴጥሮስ፡ኤጲስቆጶስ፡ኀበ፡አባ፡አብርሃም፡የሀቦ፡ኪያሁ፡ይኩኖ፡ረድአ፡ርእዮ፡ትዕግሥቶ፡ወጥበቦ፡ወነሥኦ፡ምስሌሁ፡ዘእንበለ፡ፈቃዱ፡ወነበረ፡ምስሌሁ፡እንዘ፡ይተግህ፡ኵላ፡ሌሊተ፡እምጊዜ፡ዕርበተ፡ፀሐይ፡እስከ፡ይሠርቅ።
15ወሶበ፡ኮኖ፡፲ወ፰፡ዓመተ፡እምዘተወልደ፡አኀዞ፡ኤጲስቆጶስ፡ወሤሞ፡ቀሲሰ፡ዘእንበለ፡ፈቃዱ።
16ወሶበ፡ርእየ፡ሰይጣን፡ትጋሆ፡ቦአ፡ውስተ፡ልበ፡አሐቲ፡ብእሲት፡ላህይት፡እስከ፡አርአየቶ፡ገጻ፡ወሰአለቶ፡ከመ፡ይስክብ፡ምስሌሃ፡ወጸለየ፡አባ፡ማቴዎስ፡ኀበ፡እግዚአብሔር፡በአንብዕ፡እስከ፡ፈቀደ፡ለመዊት።
17ወእምዝ፡ቦአ፡ኀበ፡ኤጲስቆጶስ፡ወአስ፡ተብቍዖ፡ከመ፡ይፈንዎ፡ኀበ፡ደብሩ። ወሶበ፡ከልኦ፡ኤጲስቆጶስ፡ቦአ፡ውስተ፡ቤተ፡መዛግብት፡ወነሥአ፡ልብሰ፡ክህነት፡ዘኤጲስቆጶስ፡ዘብዙኅ፡ሤጡ፡ወመተሮ፡በበንስቲት፡በመላፂ፡ወአንበሮ፡ውስተ፡መካኑ፡ከመ፡ቀዳሚ።
18ወይቤሎ፡ኤጲስቆጶስ፡በሣኒታሁ፡ለአባ፡ማቴዎስ፡አምጽእ፡ሊተ፡ልብሰ፡ክህነት፡ከመ፡እቀድስ፡ዮም፡ወሶበ፡አምጽኡ፡ሎቱ፡ወድቁ፡ቅድሜሁ፡ከመ፡ዕራባተ፡ዕፅ፡ወርእዮ፡ኤጲስ፡ቆጶስ፡ተምዐ፡ጥቀ፡ወይቤ፡መኑ፡ገብረ፡ዘንተ፡ወይቤ፡አባ፡ማቴዎስ፡አነ፡ገበርኩ፡እስመ፡ከላእከኒ፡ሐዊረ፡ወእምዝ፡ካዕበ፡ዘየዓቢ፡እገብር፡እምእደቅ፡በዝሙት፡በዝ፡መካን።
19ወፈነዎ፡ኤጲስቆጶስ፡በመዐት፡ወጸሐፈ፡ግዘተ፡ለሰብአ፡ደብር፡በእንቲአሁ፡ከመ፡ይስግድ፡በበ፪፡መዓልት፡በበ፪፡ሌሊት፡፪ተ፡ወኢይኀድር፡ውስተ፡በዓት፡ወኢ፡ውስተ፡ቤት፡ዘእንበለ፡በቤተ፡ክርስቲያን፡በጊዜ፡ጸሎት፡ወተወክፈ፡አባ፡ማቴዎስ፡ዘንተ፡ገድለ፡እስከ፡፪፡ዓመት።
20ወሰሚዖ፡ኤጲስቆጶስ፡ትዕግሥቶ፡ፈነወ፡ሎቱ፡ቡራኬ፡ወፍትሐተ፡ግዘት።
21ወእምዝ፡መጽአ፡ኀቤሁ፡እኍሁ፡ያዕቆብ፡ወመንኰሰ፡ወተጋደለ፡እስከ፡ሞዖ፡ለሰይጣን።
22ወእምዝ፡ሖረ፡አባ፡ማቴዎስ፡ውስተ፡ደብረ፡አባ፡እንጦንዮስ፡ወነበረ፡ህየ፡እንዘ፡ይትጋደል፡ብዙኀ። ወሀሎ፡ህየ፡መነኮስ፡ጻድቅ፡ዘስሙ፡ያዕቆብ፡ርእየ፡ራእየ፡ዘከመ፡መጽአ፡መልአክ፡ብርሃናዊ፡ኀበ፡አባ፡ማቴዎስ፡ወተአምኆ፡ወአንበረ፡ወንጌለ፡ዲበ፡ርእሱ፡ወወሀቦ፡መራኁተ፡ውስተ፡እዴሁ፡ወነቂሖ፡አባ፡ያዕቆብ፡ነገሮ፡ለአባ፡ማቴዎስ፡ዘንተ፡ራእየ፡ወእምአሜሃ፡ነበረ፡አባ፡ማቴዎስ፡እንዘ፡የዓውድ፡እምሀገር፡ለሀገር፡ጸሊኦ፡ስብሐተ፡ከንቶ።
23ወአሐተ፡ዕለተ፡እንዘ፡ይትለአክ፡ውስተ፡ቅዳሴ፡ቍርባን፡ርእዮ፡ለእግዚእነ፡ነቢሮ፡ዲበ፡ምሥዋዕ፡ወይሰክብ፡ዲበ፡ፃሕል፡በአምሳለ፡ሕፃን፡ንኡስ፡ወበጊዜ፡ፈትቶ፡ኅብስተ፡ቍር፡ባን፡ይቀውም፡ነዋኀ፡ሰዓተ፡ሰፊሖ፡እደዊሁ፡እንዘ፡ይዴመም፡ወይበኪ፡በዐቢይ፡ፍርሃት፡ወኢይነግር፡ለመኑሂ፡ዘንተ፡ራእየ።
24ወሶበ፡ይሬኢ፡መምህሩ፡ያነክር፡እምፐኔሁ፡በእንተ፡ቁመቱ፡ነዋኀ፡ሰዓተ፡ወጸለየ፡ኀበ፡እግዚአብሔር፡ከመ፡ይክሥት፡ሎቱ፡ዘንተ፡ግብረ፡ወሶበ፡ቦኡ፡ከመ፡ይቀድሱ፡በከመ፡ልማዶሙ፡ተርእዮ፡እግዚእነ፡ሰኪቦ፡ዲበ፡ፃሕል፡በአምሳለ፡ሕፃን፡ወይትገመድ፡በእዴሁ፡ለአባ፡ማቴዎስ፡ተመሲሎ፡ኅብስተ፡ወሶቤሃ፡አንከረ፡ወይቤ፡ስብሐት፡ለከ፡እግዚኦ፡ዘትሁብ፡ዐቢየ፡ጸጋ፡ለውሉደ፡ሰብእ።
25ወሶበ፡አእመረ፡ዘንተ፡አባ፡ማቴዎስ፡አምጽአ፡ቅንዋተ፡ዘሐፂን፡ወለክዓ፡ውስተ፡ብረኪሁ፡በዕለተ፡ዓርብ፡እስከ፡ዓፀየ፡ወወፅአ፡እምኔሁ፡ዕፄ። ወእምዝ፡ወፅአ፡ወሖረ፡ውስተ፡ደብረ፡ቍስቋም፡ወነበረ፡ህየ፡እንዘ፡ይትጋደል፡ብዙኀ፡ወሶበ፡ያንቀዓዱ፡ላዕለ፡ወይኔፅሮ፡ለእግዚእነ፡ነቢሮ፡በየማነ፡አቡሁ፡ወሶበ፡ይኔጽር፡ታሕተ፡ይኔዕሮ፡ውስተ፡ቀላያት፡በዕበየ፡ስብሐቲሁ።
26ወእምዝ፡ሶበ፡አዕረፈ፡አባ፡ገብርኤል፡ሊቀ፡ጳጳሳት፡ዘእምቅድሜሁ፡ሤምዎ፡ሊቀ፡ጳጳሳት፡ዘእንበለ፡ፈቃዱ፡ወረሰዩ። ላዕሌሁ፡ዓቃቤ፡ወበሣኒታ፡ነገዎ፡ራእየ፡ዘርእዩ፡ከመ፡ይደሉ፡ውእቱ፡ለሊቀ፡ጵጵስና፡ወሰሚዖ፡አባ፡ማቴዎስ፡አእመረ፡ከመ፡ኢየኀድግዎ፡ወነሥአ፡መላፂ፡በኅቡዕ፡ወሰሐባ፡ለልሳኑ፡ወመተራ፡ወበይእቲ፡ሌሊት፡መጽአት፡እግዝእትነ፡ማርያም፡ወቀብዓቶ፡ቅብዐ፡ፈውስ፡ወሜጠት፡ልሳኖ፡ከመ፡ቀዳሚ።
27ወእምዝ፡ወሰድዎ፡ኀበ፡እስክንድርያ፡ወእመ፡ሤምዎ፡ሊቀ፡ጵጵስና፡በበዓለ፡ፍልሰታ፡ለእግዝእትነ፡ማርያም፡አመ፡፲ወ፮፡ለነሐሴ፡ተሰምዐ፡ቃል፡እምሰማይ፡ዘይብል፡“ይደልዎ። ይደልዎ። ይደልዎ።”
28ወአምጽኡ፡ርእሰ፡ማርቆስ፡ወንጌላዊ፡ከመ፡ያንብሩ፡ውስተ፡ሕፅኑ፡ወሠሪራ፡ርእስ፡ሰዓመት፡አፉሁ። ወእምአሜሃ፡ኢነበረ፡ዲበ፡ቍርባን፡ወኢይበውእ፡አትራኖስ፡በጊዜ፡ውስተ፡ቤቱ፡በዐርብ፡ወበረቡዕ፡ወኢይበውእ፡ኀቤሁ፡እምሰብእ፡መኑሂ።
29ወተነበየ፡ከመ፡ይነግሥ፡ዳዊት፡ንጉሠ፡ኢትዮጵያ፡እንዘ፡ሀሎ፡ነጊሦ፡እኍሁ፡ውድም፡አስፌራ።
30ወገብረ፡ዝንቱ፡አብ፡ብዙኀ፡ተአምረ፡ወፈውሶ፡ዱዉያን፡ወአንሥኦ፡ሙታን፡በሰበን፡ዘዲበ፡ርእሱ።
31ወበመዋዕሊሁ፡ተሠይመ፡መኰንን፡እኩይ፡እምታሕተ፡ሥልጣነ፡ምስር፡ወአገበሮ፡ለሊቀ፡ጳጳሳት፡ከመ፡የሃቦ፡ጸባሕተ፡ዘኢነበረ፡ቀዳሚ፡ወሶበ፡አበዮ፡ዘበጦ፡ለአባ፡ማቴዎስ፡ዝብጠተ፡ዐቢየ፡ወወሰድዎ፡ውስተ፡ቤቱ፡ፀዊሮሙ፡እሊአሁ። ወበይእቲ፡ሰዓት፡ሰአላ፡አባ፡ማቴዎስ፡ለእግዝእትነ፡ማርያም፡ከመ፡ትንሣእ፡ነፍሶ፡እምፃዕረ፡ዝንቱ፡ዓለም፡ወይእቲኒ፡አስተርአየቶ፡ወተናገረቶ፡እንዘ፡ትብል፡ኢትኀዝን፡እስመ፡እምድኅረ፡፰ቱ፡መዋዕል፡ተዓርፍ።
32ወበሣኒታ፡ጸውዖሙ፡አባ፡ማቴዎስ፡ለኤጲስቆጶሳት፡ወለኵሎሙ፡ካህናት፡ወሕዝብ፡ወነገሮሙ፡ዕለተ፡ዕረፍቱ፡ወመዓዶሙ፡በእንተ፡ሃይማኖት፡ወባረኮሙ።
33ወሶበ፡ፀንዐ፡ላዕሌሁ፡ሕማም፡ነሥኣ፡ለሥዕለ፡እግዝእትነ፡ማርያም፡ወጸለየ፡ነዋኀ፡ሰዓተ፡ወሰዓማ፡ለሥዕል፡ወዓተበ፡ገጾ፡በትእምርተ፡መስቀል፡ወባረከ፡ኵሎ፡ሀገረ፡እለ፡ምእመናን፡በክርስቶስ፡ወእምዝ፡አዕረፈ፡በዕለተ፡እሑድ። በረከቱ፡ቅድስት፡ተሀሉ፡ምስሌነ፡ለዓለመ፡ዓለም፡አሜን።
ሰላም፡ለማቴዎስ፡እምካልአኒሁ፡ዘተበፅዐ፤ሶበ፡ክብረ፡ዓለም፡ጸልአ፤ምክረ፡ማርያም፡ድንግል፡እንዘ፡ይሰምዕ፡ሰሚዐ፤እንተ፡መተረ፡ልሳኖ፡ኀበ፡ህላዌሃ፡አግብአ፤ሶበ፡ደርሰኒ፡ወመዓረ፡ቀብዐ።
34ወበዛቲ፡ዕለት፡ኮኑ፡ስምዐ፡ያሬውንዮስ፡ውብዙኀን፡ዕድ፡ወአንስት፡ወለንጊኖስ፡ዘሮሜ፡ወእስክንድርያ፡ዘሐወሀቶ፡ለአባ፡አርሳኒ፡ወአውስያ። በረከቶሙ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለአውስያ፡እንተ፡ተመይጠት፡እምካሕዳ፤እግዚአብሔር፡ጊዜ፡ፈቀዳ፤አኀዝዋ፡ላቲ፡ወአቅረብዋ፡ለፍዳ፤ሶበ፡ከልሐ፡ማእከሎሙ፡ፈረሰ፡ቴዎድሮስ፡ወልዳ፤ማኅበረ፡አጋንንት፡ተዘርዉ፡ወጉዩ፡እምዓውዳ።

ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።