ግዕዝ
Home Formaciones Libros Biblioteca Ge'ez Contacto
Sinaxario · Tir

22 de Tir

አመ፡፳ወ፪፡ለጥር
1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፳ወ፪፡ለጥር፡በዛቲ፡ዕለት፡አዕረፈ፡አብ፡ዐቢይ፡ወክቡር፡ኮከበ፡ገዳም፡ቅዱስ፡አባ፡እንጦንዮስ፡አቡሆሙ፡ለኵሎሙ፡መነኮሳት። ወዝንቱ፡ቅዱስ፡እምሀገረ፡ቅማን፡እምብሔረ፡ግብፅ፡እምሰሚነ፡ምስር። ወአበዊሁኒ፡ክርስቲያን፡ወለውእቱሰ፡አልቦ፡ውስቴቱ፡ጽልሑት፡እምንእሱ፡ወሶበሂ፡የሐውር፡ምስለ፡አበዊሁ፡ኀበ፡ቤተ፡ክርስቲያን፡ይቄርብ፡ቍርባነ፡ወኢይሣለቅ፡ምስለ፡ሕፃናት፡ወኢይዘፍን፡ምንተኒ፡ግሙራ።
2ወሶበ፡ልኅቀ፡ንስቲተ፡ኮነ፡ያደንን፡ርእሶ፡ለአበዊሁ፡ወይትኤዘዞሙ፡ወሶበ፡ኮነ፡ሎቱ፡፯ቱ፡ዓመት፡ተምህረ፡መጻሕፍተ፡ቤተ፡ክርስቲያን፡ወኮነ፡አሜሃ፡መዋዕለ፡ሢመቱ፡ለአባ፡ቴዎናስ፡ሊቀ፡ጳጳሳት፡ዘእስክንድርያ። ወሰሚዖ፡ዜናሁ፡ለአባ፡እንጦንዮስ፡ፈነወ፡ላእከ፡ወአብጽሖ፡ኀቤሁ፡ወባረኮ፡ወተነበየ፡በእንቲአሁ። ወይቤ፡እስመ፡ዝንቱ፡ሕፃን፡ይከውን፡በቅድመ፡እግዚአብሔር፡ዐቢየ፡ወይትሌዓል፡ዜናሁ፡ውስተ፡ኵሉ፡በሐውርት፡ወይበጽሕ፡ወአንበረ፡እዴሁ፡ላዕሌሁ፡ወሤሞ፡ዲያቆነ።
3ወእምዝ፡ሞቱ፡አበዊሁ፡ወኀደጉ፡ምስሌሁ፡ንስቲተ፡እኀቶ፡ወድኅረ፡፯፡ወርኅ፡ሖረ፡ኀበ፡ቤተ፡ክርስቲያን፡በከመ፡ልማዱ፡ወቦአ፡ውስተ፡ልቡ፡ፍቅረ፡መንፈስ፡ቅዱስ፡ወሐለየ፡ዘከመ፡እፎ፡ኀደጉ፡ማኅበረ፡ሐዋርያት፡ኵሎ፡ግብረ፡ወዘከመ፡ሤጡ፡ጥሪቶሙ፡ወአብኡ፡ወረሰይዎ፡ታሕተ፡እግረ፡ሐዋርያት፡በከመ፡ጽሑፍ፡ውስተ፡ዜና፡ሐዋርያት። ከመ፡በአይ፡መክፈልት፡ይከውን፡ተስፋሆሙ፡ዘአስተዳለወ፡ሎሙ፡እግዚአብሔር፡በሰማያት፡ወኮነ፡ይሔሊ፡በዝንቱ፡ግብር፡ኵሎ፡ጊዜ።
4ወካዕበ፡ተዘከረ፡ቃሎ፡ለእግዚእነ፡ዘውስተ፡ወንጌል፡ቅዱስ፡ዘይቤሎ፡ለባዕል፡ለእመ፡ኮንከ፡ትፈቅድ፡ትኩን፡ፍጹመ፡ሑር፡ወሢጥ፡ኵሎ፡ጥሪተከ፡ወሀብ፡ለነዳያን፡ወረስዮ፡ለከ፡መዝገበ፡ዘበሰማያት፡ወነዓ፡ትልወኒ።
5ወእንጦንዮስሰ፡ነሥአ፡ሕሊና፡ቅዱሰ፡እምኀበ፡እግዚአብሔር፡ወሐለየ፡በልቡ፡ከመ፡ውእቱ፡ቃል፡ወፅአ፡በእንቲአሁ። ወሶቤሃ፡ወፅእ፡እምቤተ፡ክርስቲያን፡ወሀለዎ፡ለአቡሁ፡ምድር፡ስፉሕ፡ዐቢይ፡ወሠናይ፡ወሀቦሙ፡ለሰብአ፡ሀገር፡ወንዋዮሂ፡ዘኀደጉ፡ሎቱ፡ዘረወ፡ላዕለ፡ነዳያን፡ወምስኪናን። ወነሥኣ፡ለእኅቱ፡ወወሰዳ፡ኀበ፡ደብረ፡ደናግል፡ወአኀዘ፡ውእቱ፡ይትጋደል፡በጾም፡ወበጸሎት።
6ወእምቅድመ፡ውእቱ፡መዋዕል፡ኢያስተርአየ፡ግብረ፡ምንኵስና፡አላ፡ኮነ፡ዘይፈቅድ፡ይፀመዶ፡ለእግዚአብሔር። ይወፅእ፡አፍአ፡ሀገር፡ንስቲተ፡ወይነብር፡ባሕቲቶ፡በተፀምዶ፡ወከማሁ፡ገብረ፡ቅዱስ፡አባ፡እንጦንዮስ፡ወኮነ፡ሰይጣን፡ይፀብዖ፡በሀኬት፡ወበሐልዮ፡ገቢረ፡ኀጢአት፡ወያመጽእ፡ሎቱ፡ገጸ፡ብእሲት፡በሕልም፡ወይእቲ፡ከመ፡ዘትነውም፡ምስሌሁ፡ውእቱሰ፡ይትኃየል፡ላዕለ፡ዝንቱ፡ኵሉ፡በረድኤተ፡እግዚእነ።
7ወእምዝ፡ሖረ፡ኀበ፡ጽንፈ፡ባሕር፡ወሐነፀ፡መቃብረ፡ወኀደረ፡ውስቴቱ፡ወፈጸመ፡አንቀጸ፡መቃብር፡ላዕሌሁ፡ወኮነ፡ይትጋደል፡ገድለ፡በህየ፡ወአዝማዲሁኒ፡ወእለ፡የአምርዎ፡ይሔውፅዎ፡ወያመጽኡ፡ሎቱ፡ሲሳዮ።
8ወሶበ፡ርእይዎ፡ሰይጣናት፡እንዘ፡ይትጋደል፡ከመዝ፡ቀንኡ፡ላዕሌሁ፡ወመጽኡ፡ኀቤሁ፡ወዘበጥዎ፡ዝብጠተ፡ዐቢየ፡ወኀደግዎ፡ግዱፈ፡ወሶበ፡መጽኡ፡አዝማዲሁ፡ከመ፡የሐውፅዎ፡ወረከብዎ፡ግዱፈ፡ከመ፡ምዉት፡ወፀዊሮሙ፡ወሰድዎ፡ኀበ፡ቤተ፡ክርስቲያን፡ወእግዚእነ፡ፈወሶ፡እምሕማሙ።
9ወሶበ፡ነቅሐት፡ነፍሱ፡ሰአሎሙ፡ከመ፡ይፁርዎ፡ወይሚጥዎ፡ኀበ፡መጣሱ፡ወሜጥዎ።
10ወሶበ፡ሞዖሙ፡ለሰይጣናት፡መጽኡ፡ካዕበ፡ምስለ፡ምትሐት፡ብዙኅ፡በአምሳለ፡አራዊት፡ወአናብስት፡ወተኵላት፡ወአክይስት፡ወአቃርብት፡ወኮኑ፡ለለ፩፩፡እምኔሆሙ፡ይትነሥኡ፡ላዕሌሁ፡ከመ፡ያፍርህዎ። ውእቱሰ፡ይሣለቅ፡ላዕሌሆሙ፡ወይብሎ፡ለእመ፡ኮነ፡ለክሙ፡ሥልጣን፡ላዕሌየ፡፩፡እምኔክሙ፡ይመውዓኒ። ወሶቤሃ፡ተዘርዉ፡ከመ፡ጢስ፡እስመ፡ወሀቦ፡እግዚእነ፡ሥልጣነ፡ወመዊዐ፡ላዕለ፡ሰይጣናት፡ወአዕረፈ፡እምሕማም፡ወመከራ፡ዘሰይጣናት።
11ወእምዓመት፡እስከ፡ዓመት፡ይበልዕ፡፯ተ፡ጊዜያተ፡ኅብስተ፡ዘአብሰሎ፡በፀሐይ፡ወኢየኀድግ፡መነሂ፡ከመ፡ይባእ፡ውስተ፡በዓቱ። አላ፡ይቀውም፡አፍአ፡ወይሰምዕ፡ቃሎ፡ወነበረ፡ከመዝ፡እንዘ፡ይፀመድ፡ወይትጋደል፡መጠነ፡፳፡ዓመት።
12ወእምዝ፡አዘዞ፡እግዚእነ፡ከመ፡ይናዝዞሙ፡ለሰብእ፡ወይምህሮሙ፡ፈሪሀ፡እግዚአብሔር፡ፍጹመ፡ወአምልኮቶ፡ወሖረ፡ኀበ፡ሀገረ፡ፍዩም፡ወመሀሮሙ፡ለብዙኃን፡አኀው፡ወአፅንፆሙ፡በሕገ፡እግዚአብሔር፡ወተጋብኡ፡እምነ፡አድባራት፡ወእመካናት፡ብዙኃት፡ወኮኑ፡መስተጋድላነ፡ወተጋብኡ፡ኀበ፡ደብሩ።
13ወበውእቱ፡መዋዕል፡ኮነ፡ስደት፡ወኮኑ፡ብዙኃን፡ይነሥኡ፡አክሊለ፡ስምዕ፡ወውእቱ፡ፈተወ፡ከመ፡ይኩን፡ሰማዕተ፡ወኀደገ፡ደብሮ፡ወሖረ፡ኀበ፡ሀገረ፡እስክንድርያ፡ወተአመነ፡በእግዚእነ፡ኢየሱስ፡ክርስቶስ፡ወኢአኀዝዎ፡ግሙራ። ወሐወጾሙ፡ለመሃይምናን፡ሙቁሐን፡ወናዘዞሙ፡ወርእዮ፡መኰንን፡ለእንጦንዮስ፡ከመ፡ኢይፈርህ፡አዘዞሙ፡ለሐራ፡ከመ፡ኢያስተርኢ፡መነኮስ፡ውስተ፡ዐውደ፡ምኵናን። ወእንጦንዮስሰ፡ያስተርኢ፡ቅድሜሁ፡ገሀደ፡ኵሎ፡ጊዜ፡ወተናገሮ፡ነገረ፡ክቡደ፡ከመ፡ይትመዓዕ፡ላዕሌሁ፡ወይኰንኖ፡ወይቅሥፎ፡ወከመ፡ይኩን፡ሰማዕተ፡ወመኰንንሰ፡ኢተናገሮ፡ምንተኒ፡ወኢገብረ፡ላዕሌሁ፡እም፡እኩይ፡እስመ፡ቤተ፡እግዚአብሔር፡ዓቀቦ፡በእንተ፡በቍዔተ፡ብዙኃን።
14ወሶበ፡ተፈጸመ፡መዋዕለ፡ስደት፡በቅዱስ፡ጴጥሮስ፡ሊቀ፡ጳጳሳት፡ዘእስክንድርያ፡ተፍጻሜተ፡ሰማዕት፡ገብአ፡ኀበ፡ደብሩ፡ቅዱስ፡እንጦንዮስ፡በፈቃደ፡እግዚአብሔር፡ወልብሱሰ፡ዘይለብስ፡ሠቀ፡ፀጕር፡ወኢተሐፅበ፡በኵሉ፡መዋዕለ፡ሕይወቱ።
15ወኮኑ፡ብዙኃን፡ድዉያን፡ይመጽኡ፡ኀቤሁ፡ወይጼሊ፡ላዕሌሆሙ፡ወየሐይዉ።
16ወሶበ፡ርእየ፡ብዙኀነ፡አሕዛበ፡እንዘ፡ይመጽኡ፡ኀቤሁ፡ከመ፡ይስምዑ፡ትምህርቶ፡ወኢያብሕዎ፡ይንበር፡ባሕቲቶ፡በከመ፡ይፈቅድ፡ወፈርሀ፡ከመ፡ኢይምጽኦ፡ትዕቢት፡ወሐለየ፡ከመ፡ይሑር፡ኀበ፡ላዕላይ፡ግብፅ፡ውስተ፡መካን፡ኀበ፡ኢይረክብዎ፡ወነሥአ፡እምአኀው፡ንስቲተ፡ኀብስተ፡ወነበረ፡ኀበ፡ሐይቀ፡ባሕር፡እንዘ፡ይጸንሕ፡ሐመረ፡ከመ፡ይፀዓን፡ወይሑር፡ኀበ፡ፈቀደ።
17ወሶቤሃ፡መጽአ፡ኀቤሁ፡ቃል፡እም፡ሰማይ፡ዘይብል፡ኦ፡እንጦንዮስ፡ምንተ፡ትፈቅድ፡ወአይቴ፡ተሐውር። ወይቤ፡እስመ፡ብዙኃን፡ሰብእ፡ይመጽኡ፡ኀቤየ፡ወይከልኡኒ፡እንበር፡ባሕቲትየ፡ወበእንተዝ፡እፈቅድ፡እሑር፡ኀበ፡ላዕላይ፡ግብፅ፡አውሥኦ፡ወይቤሎ፡ውእቱ፡ቃል፡ለእመ፡ትፈቅድ፡ትሑር፡ኀበ፡ላዕላይ፡ግብፅ፡ፃማከ፡ዓዲ፡ይትመክዓብ፡ወለእመ፡ፈቀድከ፡ትንበር፡ባሕቲትከ፡ሑር፡ውሣጤ፡ገዳም፡መጠነ፡፫ቱ፡መዓልት።
18ወሶቤሃ፡ርእዮሙ፡ለሰብአ፡ዓረባውያን፡ዘይፈቅዱ፡ይሑሩ፡እንተ፡ይእቲ፡ፍኖት፡ወእንጦንዮስኒ፡ሖረ፡ኀቤሆሙ፡ወሰአሎሙ፡ከመ፡ይሑር፡ምስሌሆሙ፡ውስተ፡ገዳም፡ወተወክፍዎ፡በፍሥሐ፡ወሖረ፡ምስሌሆሙ፡፫ተ፡መዐልተ፡እስከ፡በጽሐ፡ኀበ፡ደብር፡ነዊኅ፡ፈድፋደ፡ወቦ፡ህየ፡ማይ፡ጽሩይ፡ወጥፁም፡ወቆሪር፡ወበቀልት፡ወተምር፡ብዙኀ።
19ወቅዱስ፡እንጦኒ፡አፍቀሮ፡ለውእቱ፡መካን፡እስመ፡እግዚእነ፡ጸውዖ፡እምጽንፈ፡ባሕር፡ኀበ፡አስተዳለወ፡ሎቱ፡ዛተ፡መካነ፡ወኀደረ፡ውስተ፡ውእቱ፡መካን፡ወዓረብ፡ያመጽኡ፡ሎቱ፡ኅብስተ፡ወሀለዉ፡ውስተ፡ውእቱ፡መካን፡ብዙኃን፡አራዊት፡እኩያን፡ወበጸሎቱ፡ሰደዶሙ።
20ወኮነ፡ለለ፩ዱ፡ጊዜ፡ይወፅእ፡ኀበ፡ጽንፈ፡እለ፡ሀለዉ፡ህየ፡ወይናዝዞሙ፡ወይገብእ፡ኀበ፡ባሕር፡ኀበ፡ደብሩ፡ወይሔውዖሙ፡ለአኃው፡መካኑ።
21ወተሰምዐ፡ዜናሁ፡በኀበ፡ቈስጠንጢኖስ፡ንጉሥ፡ጻድቅ፡ወጸሐፈ፡ኀቤሁ፡መጽሐፈ፡መልእክት፡እንዘ፡ይዌድሶ፡ወይስእሎ፡ከመ፡ይዝክሮ፡በጸሎቱ፡ወተፈሥሑ፡አኀው፡በመጽሐፈ፡መልእክቱ፡ለንጉሥ፡ወቅዱስሰ፡እንጦንዮስ፡ኢተመይጠ፡ኀበ፡መጽሐፈ፡መልእክቱ፡ለንጉሥ፡አላ፡ይቤሎሙ፡ናሁ፡መጽሐፈ፡መልእክቱ፡ለነጉሠ፡ነገሥት፡ሰማያዊ፡ይትነበብ፡በላዕሌነ፡ምንት፡ብነ፡ኀበ፡መጽሐፈ፡መልእክቱ፡ለንጉሥ፡ምድራዊ። ኢንትኤዘዝ፡ወኢንሰምዕ፡እምኔሁ።
22ወሰአልዎ፡አኀው፡ወይቤልዎ፡ዝንቱ፡ጻድቅ፡ንጉሥ፡መፍቀሬ፡ቤተ፡ክርስቲያን፡ውእቱ፡ወይደሉ፡ከመ፡ትናዝዞ፡በመጽሐፈ፡መልእክት፡ኀቤሁ። ወእምዝ፡ጸሐፈ፡ሎቱ፡እንዘ፡ይናዝዞ፡ወይባርክ፡ላዕሌሁ፡ወላዕለ፡መንግሥቱ፡ወላዕለ፡ኵሉ፡ሠራዊቱ።
23ወካዕበ፡ሶበ፡ሰምዐ፡ዜናሁ፡ንጉሡ፡አፍርንጊ፡ዘብሔረ፡በርኪኖን፡ወመጠነ፡ፍኖቱ፡፮፡አውራኅ፡ፈነወ፡ኀበ፡ቅዱስ፡አባ፡እንጦንዮስ፡ወይቤሎ፡አንሰ፡እስእለከ፡በእንተ፡ሕማማቲሁ፡ለእግዚእነ፡ኢየሱስ፡ክርስቶስ፡ከመ፡ትምጻእ፡ኀቤነ፡ወትባርክ፡ላዕሌነ፡ወላዕለ፡ኵሉ፡ሀገሪትነ፡ወሠራዊትነ።
24ወሶበ፡ሰምዐ፡እንጦንዮስ፡ኀዘነ፡ፈድፋደ፡በእንተ፡ዘይቤሎ፡በእንተ፡ሕማማቲሁ፡ለእግዚእነ፡ወቆመ፡ወጸለየ፡እንዘ፡ይብል፡እስእለከ፡ኦ፡እግዚእየ፡ኢየሱስ፡ክርስቶስ፡ከመ፡ትግበር፡ፈቃደከ፡ላዕሌየ፡ለእመ፡ፈቀድከ፡ከመ፡እሑር፡ኀበ፡ብሔረ፡በርኪኖን፡ዘአፍርንጊ፡ክሥት፡ሊተ፡ትእምርተ።
25ወሶበ፡ይቤ፡ዘንተ፡ናሁ፡ፆረቶ፡ደመና፡ብርህት፡ወአብጽሐቶ፡በይእቲ፡ሰዓት፡ኀበ፡ብሔረ፡አፍርንጊ፡ወተፈሥሐ፡ቦቱ፡ንጉሠ፡አፍርንጊ፡ዐቢየ፡ፍሥሐ፡ወከማሁ፡ኵሎሙ፡ሠራዊቱ፡ወሕዝቡ፡ወአቅረቡ፡ሎቱ፡ኩሎ፡ድዉያነ፡ዕውራነ፡ወሐንካሳነ፡ወኵሎ፡ዘዘዚአሆሙ፡ደዌ፡ወፈወሶሙ፡ሶቤሃ፡በኃይለ፡ጸሎቱ፡ወነበረ፡ኀቤሁ፡፮ተ፡አውራኀ፡እንዘ፡ይሜህሮሙ፡ፍኖተ፡ጽድቅ፡ወሕይወት፡ወለብዙኀን፡አእላፋት፡አልበሶሙ፡አልባሰ፡ምንኵስና።
26ወኮነ፡ለለዕለተ፡እሑድ፡ትፀውሮ፡ደመና፡ብርህት፡ወታበጽሖ፡ኀበ፡ደብሩ፡ወይትራከብ፡ምስለ፡ውሉዱ፡ወይናዝዞሙ፡እስመ፡በሣኒታሁ፡ትፀውሮ፡ይእቲ፡ደመና፡ወትመይጦ፡ኀበ፡ብሔረ፡አፍርንጊ፡ወከመዝ፡ነበረ፡መጠነ፡፮፡አውራኅ።
27ወእምድኅረዝ፡ገብአ፡ኀበ፡ደብሩ፡ወበአሐቲ፡ዕለት፡መጽአ፡ላዕሌሁ፡ሀኬት፡ወመጽአ፡ቃል፡ኀቤሁ፡ዘይብሎ፡ፃእ፡ኣፍአ፡ከመ፡ትርአይ፡ወሶበ፡ወፅአ፡አፍአ፡ወርእዮ፡ለመልአክ፡ዘይትዓፀፍ፡አልባሰ፡ምንኵስና፡ወቦ፡ላዕሌሁ፡ቆብዕ፡አምሳለ፡ጌራ፡ወሥርግው፡ኵለንታሁ፡በአስኬማ፡ወቅናት፡ወፊቃር፡ወውእቱ፡ይነብር፡ወይፀፍር፡ሆሣዕና። ወእምዝ፡ይትነሣእ፡ወይጼሊ፡በበሰዓታት፡ወካዕበ፡ይነብር፡ወይፀፍር፡ወመጽአ፡ቃል፡ኀቤሁ፡ዘይብል፡ኦ፡እንጦንዮስ፡ከመዝ፡ግበር፡ወአንተ፡ተዓርፍ፡እምፀብዓ፡ሰይጣናት፡ወነሥአ፡ውእተ፡አምሳለ፡ዘውእቱ፡አልባሰ፡ምንኵስና፡ወእምይእቲ፡ዕለት፡ኢመጽአ፡ላዕሌሁ፡ሀኬት፡ወኢፀብዐ፡አጋንንት።
28ወአስተርአዮ፡እግዚእነ፡ኢየሱስ፡ክር፡ስቶስ፡ሎቱ፡ስብሐት። ወይናዝዞ፡ወያፀንፆ፡ወይብሎ፡አማንየ፡እብለከ፡ኦ፡ኅሩይየ፡እንጦ፡ንዮስ፡እስመ፡በእንተ፡ፃማከ፡ወተጋድሎትከ፡ወተፀምዶትከ፡በውስተ፡ዛቲ፡ገዳም፡በእንተ፡አፍቅሮትከ፡ኪያየ፡አነ፡እብለከ፡ከመ፡አዐቢ፡ስመከ፡ወአልዕል፡ቀርነከ፡ውስተ፡ኵሉ፡አጽናፈ፡ምድር። ወእሬስዮሙ፡ለገዳማት፡ወለአድባራት፡ከመ፡ማኅደሪሆሙ፡ለአርጋብ፡ፅዕድዋን፡እሉ፡እሙንቱ፡መነኮሳት። ወፈድፋ፡ደሰ፡አድባራት፡ዘዚአከ፡እስመ፡እሙንቱ፡እነ፡ይነብሩ፡እስከ፡ተፍጻሜተ፡ዓለም። ወኵሉ፡ዘይገብር፡ተዝካረከ፡ወይሁብ፡ምጽዋተ፡አው፡መባአ፡ዕጣነ፡ወቍርባነ፡በስምከ፡እደመስስ፡ኵሎ፡ኃጣውኢሁ፡ወኢይሬኢ፡ግሙራ፡ኵነኔ፡ገሃነም።
29ወለደብርኒ፡ዘይትቀበር፡ውስቴቱ፡ሥጋከ፡አነ፡አሌዕሎ፡ፈድፋደ፡ወእሬሲ፡ውስቴቱ፡መነኮሳተ፡ጻድቃነ፡አምሳለ፡መላእክት፡ወኢይትኀጣእ፡እምኔሆሙ፡ሊቅ፡እስከ፡ተፍጻሜተ፡ዓለም።
30ወእሬስዮሙ፡ለነገሥተ፡ምድር፡ወለመሳፍንት፡ሥዩማን፡ከመ፡ይፁሩ፡አምኃ፡ለደብርከ፡ወለውሉድከ፡እለ፡የዓቅቡ፡ትእዛዝየ፡ወዘንተ፡ብሂሎ፡እግዚእነ፡ዐርገ፡ውስተ፡ሰማያት፡በዓቢይ፡ስብሐት፡ወተፈሥሐ፡አባ፡እንጦንዮስ፡ዐቢየ፡ፍሥሐ።
31ወተነበየ፡በእንተ፡ተመዝብሮታ፡ለቤተ፡ክርስቲያን፡እንዘ፡ይብል፡እስመ፡ንፉቃን፡እምሃይማኖት፡ይሠለጡ፡ላዕሌሃ፡ለቤተ፡ክርስቲያን፡ወእምድኅረዝ፡ትትመየጥ፡ኀበ፡ሥርዓታ፡ከመ፡ቀዳሚ።
32ወተነበየ፡በእንተ፡መነኮሳት፡ከመ፡እሙንቱ፡ይበዝኁ፡ወይትዌሰኩ፡ፈድፋደ፡ወይመልኡ፡ገዳማተ፡ወአድባራተ፡ወየኀድሩ፡ውስተ፡አዕፃዳት፡ወአህጉር፡ወማእከለ፡ዓለም።
33ወተነበየ፡በእንተ፡ተፍጻሜተ፡ዓለም።
34ወውእቱ፡ዘአልበሶ፡አልባሰ፡ምንኵስና፡ለአባ፡መቃርስ፡እስመ፡ውእቱ፡ረድኡ፡ወወልዱ፡ወውእቱ፡ናዘዞ፡ወአጠቆ፡ዘይከውን፡እምኔሁ።
35ወእምዝ፡መጽአ፡ኀቤሁ፡አባ፡ቡላ፡ርእሰ፡ገዳማውያን፡ወውእቱ፡ዘሐለየ፡ለሥጋሁ፡ወገነዞ፡በአልባሰ፡አትናቴዎስ፡ሐዋርያዊ።
36ወሶበ፡አእመረ፡አባ፡እንጦንዮስ፡ቅዱስ፡ከመ፡ቀርበ፡ጊዜ፡ፍልሰቱ፡አዘዞሙ፡ለውሉዱ፡ከመ፡ይኅብኡ፡ሥጋሁ፡ወነገሮሙ፡ከመ፡የሀቡ፡በትሮ፡ለአባ፡መቃርስ፡ወልዱ፡ወመንጸፎ፡ለአትናቴዎስ፡ወአልባሲሁ፡ዘዘብድወ፡ጠሊ፡ለሰራብዮን፡ኤጲስቆጶስ፡ወእምዝ፡ሰከበ፡ዲበ፡ምድር፡ወመጠወ፡ነፍሶ፡ውስተ፡እዴሁ፡ለእግዚአብሔር። ወመጽኡ፡ኀቤሁ፡ኵሎሙ፡ማኅበረ፡መላእክት፡ቅዱሳን፡ወተቀበልዎ፡በዐቢይ፡ፍሥሐ፡ወበብዙኅ፡ክብር፡ወአዕረግዎ፡ውስተ፡ዕረፍት፡ዘለዓለም።
37ወለሥጋሁሰ፡ኀብእዎ፡ደቂቁ፡በከመ፡አዘዞሙ፡እስመ፡ውእቱ፡ኮነ፡ይናዝዞሙ፡ወይጌሥፆሙ፡ለእለ፡ይከሥቱ፡ሥጋሆሙ፡ለቅዱሳን፡ሰማዕታት፡እስመ፡ይነሥኡ፡በእንቲአሆሙ፡ንዋየ፡ብዙኀ፡ወይሬስዩ፡ዝክተ፡ጥሪተ፡ሎሙ።
38ወሐይወ፡ዝንቱ፡ቅዱስ፡ብፁዕ፡ኣባ፡እንጦንዮስ፡እስከ፡ርስዕ፡ሠናይ፡ወኢተወለጠ፡ሥጋሁ፡ወልኅቀ፡ፈድፋደ፡ወኢደክመ፡ኃይሉ፡ወኢፅንዑ፡ወኢወድቀ፡ምንተኒ፡እምአስናኒሁ፡ወኢተሐፅበ፡በማይ፡በኵሉ፡መዋዕለ፡ሕይወቱ። ወኮነ፡ኵሉ፡መዋዕሊሁ፡፻ወ፩፡ዓመት፡ወአዕረፈ፡በሰላም። በረከቱ፡ቅድስት፡ወኃይለ፡ጸሎቱ፡ተሀሉ፡ምስሌነ፡ለዓለመ፡ዓለም፡አሜን።
ሰላም፡ለብሕታዌከ፡እንበለ፡ወንትጋ፤ውስተ፡ናሕስ፡ከመ፡ዖፍ፡ወበቤት፡አምሳለ፡ጉጋ፤ብእሴ፡ሰማይ፡እንጦንዮስ፡ወመልአከ፡ምድር፡በጸጋ፤ለቤተ፡ብለኔ፡እንዘ፡ያስተራኵስ፡ሕጋ፤መዋዕለ፡ሕይወቱ፡በማይ፡ኢተሐዕበ፡ሥጋ።
39ወበዛቲ፡ዕለት፡ተዝካሩ፡ለሚናስ፡ኤጲስቆጶስ፡ዘማፍን። በረከቱ፡ትኩን፡ምስሌነ፡ለዓለመ፡ዓለም፡አሜን።

ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።