Sinaxario · Tir
13 de Tir
አመ፡፲ወ፫፡ለጥር1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፲ወ፫፡ለጥር፡በዛቲ፡ዕለት፡አዕረፉ፡ሰብዑ፡ደቂቅ፡እለ፡አስማቲሆሙ፡አርሲላዶስ፡ወዱአሚዶስ፡አውጋንዮስ፡ወድሜጥሮስ፡ብርናጥ፡ወእስጢፋኖስ፡ወኪራኮስ፡ወእሉ፡ደቂቅ፡ውሉዶሙ፡ለዐበይተ፡ሀገር፡እለ፡ፀንዑ፡በአሚነ፡እግዚእነ፡ኢየሱስ፡ክርስቶስ፡ሎቱ፡ስብሐት።
2ወአስተዋደይዎሙ፡ኀበ፡ዳኬዎስ፡ንጉሥ፡ዓላዊ፡ከመ፡እሙንቱ፡ክርስቲያን፡ወአስተ፡ባጽሕዎሙ፡ውእቱኒ፡አገበሮሙ፡ከመ፡ይስግዱ፡ለአማልክት። ወሶበ፡አበይዎ፡ወሀቦሙ፡ዕድሜ፡ከመ፡ይትማከሩ፡ምስለ፡ነፍሶሙ።
3ወእምዝ፡ሖረ፡ዳኬዎስ፡ውስተ፡መፍቅዱ፡ወእሉኒ፡ቅዱሳን፡ሖሩ፡ውስተ፡አብያቲሆሙ፡ወዘረዉ፡ኵሎ፡ንዋዮሙ፡ለነዳያን፡ወለምስኪናን፡ወዘተርፉ፡ዲናራተ፡ነሥኡ፡ለመፍቅዶሙ፡ወተኀብኡ፡ውስተ፡በዓት፡ዘምሥራቀ፡ሀገር። ወዱአሚዶስሰ፡ወሬዛ፡ጠቢብ፡ወለባዊ፡ውእቱ፡ወኮነ፡ይትለአኮሙ፡ወይሣየጥ፡ሲሳዮሙ፡ውስተ፡ሀገር፡ወይነግ፡ሮሙ፡ነገረ፡ዘሰምዐ፡በእንተ፡ግብረ፡መንግ፡ሥት።
4ወሶበ፡ተመይጠ፡ዳኬዎስ፡ንጉሥ፡ውስተ፡ሀገር፡ኀሠሣሙ፡ለእለ፡ደቂቅ፡ወኢረከቦሙ። ወለእሉሰ፡ሰብዑ፡ደቂቅ፡ሶበ፡ኖሙ፡ውስተ፡በዓት፡በጊዜ፡ሠርክ፡ነሥአ፡እግዚአብሔር፡ነፍሳቲሆሙ፡ወአንበሮሙ፡በከመ፡ውእቱ፡አእመረ፡ወኖሙ፡ሠለስተ፡ምእተ፡ሰብዓ፡ወክልኤተ፡ዓመተ።
5ወሀለዉ፡ምእመናን፡እምውዓልያነ፡ንጉሥ፡ዘስሞሙ፡ቴዎድሮስ፡ወመቅንዮስ፡ነሥኡ፡፪ተ፡ጽላተ፡ዘዓረር፡ወጸሐፉ፡ዝክሮሙ፡ለቅዱሳን፡ወአንበሩ፡ውስተ፡በዓት፡ወኀተምዋ፡ለበዓት።
6ወእምድኅረ፡ሞተ፡ዳኬዎስ፡ነግሡ፡ብዙኃን፡ነገሥት፡እስከ፡መዋዕለ፡ቴዎዶስዮስ፡ንጉሥ፡ጻድቅ፡ወበመዋዕሊሁ፡ለዝንቱ፡ቴዎዶስዮስ፡ተንሥኡ፡ዕልዋን፡ሰብእ፡እለ፡ይብሉ፡አልቦ፡ትንሣኤ፡ምዉታን።
7ወሀሎ፡፩፡መኰንን፡ዘስሙ፡አልድዮስ፡ሶበ፡ፈቀደ፡ይሕንፅ፡ማኅደረ፡ለአባግዒሁ፡አዘዞሙ፡ለአግብርቲሁ፡ያምጽኡ፡አእባነ፡ወበምክንያተ፡ዝንቱ፡ነገር፡አርኀውዎ፡ለውእቱ፡በዓት።
8ወነቂሖሙ፡እሙንቱ፡ቅዱሳን፡ፈነ፡ውዎ፡ለዱአሚዶስ፡ከመ፡ይሣየጥ፡ሲሳዮሙ፡ወሶበ፡ርእዩ፡ሰብአ፡ሀገር፡ዲናረ፡ዘጽሑፍ፡በስመ፡ዳኬዎስ፡አኀዝዎ፡ለዱአሚዶስ፡ወመ፡ሰሎሙ፡ዘረከበ፡መድፍነ፡ኅቡአ፡ወአብጽ፡ሕዎ፡ኀበ፡መኳንንት፡ወኤጲስቆጶሳት።
9ወሶበ፡ሐተትዎ፡ነገሮሙ፡በእንተ፡አብያጺሁ፡ስድስቱ፡ወሐዊሮሙ፡ረከብዎሙ፡ንቡራነ፡እንዘ፡ይበርህ፡ገጾሙ፡ከመ፡ፀሐይ።
10ወውስተ፡አንቀጸ፡በዓቶሙ፡ረከቡ፡ጽላተ፡ዘእብን፡ዘጽሑፍ፡ዲቤሁ፡ዜናሆሙ፡ወሰሚ፡ፆሙ፡ከመ፡በመዋዕለ፡ዳኬዎስ፡ንጉሥ፡ኖሙ፡አንከሩ፡ግብሮ፡ለእግዚአብሔር።
11ወለአኩ፡ኀበ፡ቴዎዶስዮስ፡ንጉሥ፡ጻድቅ፡ወበጺሖ፡ውእቱ፡ተአምኆሙ፡ለቅዱሳን፡ወተባረከ፡እምኔሆሙ፡ወእምድኅረ፡ተዜያነዉ፡አዕረፉ፡ወንጉሥኒ፡በከየ፡ላዕሌሆሙ፡ወተቀብሩ፡ውስተ፡ይእቲ፡በዓት። በረከቶሙ፡ትኩን፡ምስሌነ፡ለዓለመ፡ዓለም፡አሜን።
ሰላም፡ለክሙ፡ደቂቀ፡ኍላቌ፡ሱባኤ፤ዘነበርክሙ፡ክቡዳነ፡እምንዋመ፡ፍርሃት፡ወምማኤ፤እምድኅረ፡፫፻፡ዓመታት፡ዘምስለ፡፸ወኤ፤ነቂሖተክሙ፡እለ፡ነፀሩ፡ጉባኤ፤ላዕለ፡ምዉታን፡ዘይከውን፡አእመሩ፡ትንሣኤ።
12ወበዛቲ፡ዕለት፡ተዝካሮሙ፡ለቃርኖስ፡ሰማዕት፡ወለሚና፡ዘጾማዕት። በረከቶሙ፡ይኩን፡ምስሌነ፡ለዓለመ፡ዓለም፡አሜን።
13ወበዛቲ፡ዕለት፡አዕረፈ፡አባ፡ነኮሮ፡ወዝንቱ፡ጻድቅ፡ኮነ፡መስተጋድለ፡በኀቡእ፡ዘእንበለ፡ያእምሮ፡ሰብእ፡ወይሬሲ፡ታሕተ፡መንጸፉ፡አሥዋከ፡ከመ፡ኢይኑም፡በጥዒና፡ወይተግህ፡መዓልተ፡ወሌሊተ።
14ወእምብዝነ፡ትሕትናሁ፡ረሰይዎ፡ዓፃዌ፡ኆኅት፡ወሀሎ፡ውስተ፡ውእቱ፡ደብር፡መነኮስ፡ባሕታዊ፡ዘይሬኢ፡ኅቡአተ፡በመንፈስ።
15ወበአሐቲ፡ሌሊት፡ርእየ፡በሕልሙ፡እንዘ፡ይቀውም፡ውስተ፡መካን፡ልዑል፡ወመትሕቴሁ፡ገነት፡ወዘዘዚአሁ፡ፍሬያቲሁ፡ወየዓውድዎ፡አፍላግ፡ወሀሎ፡ማእከሎሙ፡አባ፡ነኮሮ፡ወይሠቅዮሙ፡ለፌ፡ወለፌ። ወይቤሎ፡ውእቱ፡መነኮስ፡ኦ፡እኁየ፡ነኮሮ፡ዘመኑ፡ዛቲ፡ገነት። ወይቤሎ፡አነ፡ተከልክዋ፡ወይቤሎ፡እፈቅድ፡ከመ፡ተሀበኒ፡እምነ፡ፍሬሃ፡ወእምዝ፡መተረ፡እምፍሬያተ፡ሮማን፡፫ተ፡ወወሀቦ፡ውእቱኒ፡አሰሮ፡ውስተ፡ልብሱ።
16ወሶበ፡ነቅሐ፡እምንዋሙ፡ረከቦሙ፡ለእሉ፡ፍሬያት፡ወሶቤሃ፡ሖረ፡ኀበ፡አባ፡ነኮሮ፡ወረከቦ፡ቀዊሞ፡ውስተ፡አንቀጽ፡ወይቤሎ፡ኦ፡እኍየ፡ርኢከኒኑ፡በዛቲ፡ሌሊት። ወይቤሎ፡እወ፡ርኢኩከ፡አኮኑ፡ወሀብኩከ፡፫ተ፡ፍሬያተ፡ሮማን።
17ወሐዊሮ፡ውስተ፡ምኔት፡ነገሮሙ፡ለአኀው፡ወለአበ፡ምኔት፡ኵሎ፡ዘኮነ፡ወአርአዮሙ፡ፍሬያተ፡ሮማን፡ወአንከሩ፡አኀው፡እምቅድስናሁ፡ለአባ፡ነኮሮ፡እስመ፡አሜሃ፡ወርኀ፡ሐጋይ፡ወኢኮነ፡ጊዜሁ፡ለሮማን፡ወኀዘኑ፡መነኮሳት፡በእንተ፡ዘረሰይዎ፡ውስተ፡ትሑት፡ግብር፡ዘውእቱ፡ዓቃቤ፡አንቀጽ።
18ወፈቀዱ፡ያዕብይዎ፡ወሶበ፡ሖሩ፡ኀቤሁ፡ኢረከብዎ፡ወኀዘኑ፡በእንቲአሁ፡ዐቢየ፡ኀዘነ፡ወነገርዎሙ፡ፈላስያን፡ከመ፡ውእቱ፡አዕረፈ፡በከመ፡ዛቲ፡ዕለት። በረከቱ፡ትኩን፡ምስሌነ፡ለዓለመ፡ዓለም፡አሜን።
ሰላም፡እብል፡ለብፁዕ፡ነኮሮ፤መልዕልተ፡አሥዋክ፡ዘይነውም፡መንጸፈ፡ገቢሮ፤እንተ፡እምኔሁ፡ዘነሥአ፡በሕልም፡ብእሲ፡አእሚሮ፤ረከበ፡በጊዜ፡ንቃሑ፡እስከ፡አንከረ፡አንክሮ፤ኀንባባተ፡ሮማን፡ሠላስ፡በልብሱ፡ዓቊሮ።ሰላም፡እብል፡ለኤጲፋንያ፡ራብዕት፤እንተ፡ይጠመቁ፡ባቲ፡ዘኢተጠምቁ፡ትካት፤እለ፡ኢገብሩ፡ቀዳሚ፡ተጠምቆ፡ምስለ፡ትዕይንት፤በአንጽሖ፡ነፍስ፡አመ፡ሠርቀ፡ወርኅ፡ካልእት፤ከመ፡ፋሲካ፡ይግበሩ፡ትኤዝዝ፡ኦሪት።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።