Sinaxario · Tikimt
17 de Tikimt
አመ፡፲ወ፯፡ለጥቅምት1በስመ፡አብ፡ቅዱስ፡፩፡አምላክ፡ወወልድ፡ወመንፈስ፡አመ፡፲ወ፯፡ለጥቅምት፡በዛቲ፡ዕለት፡አዕረፈ፡ፊልያስ፡ሰማዕት፡ኤጲስ፡ቆጶስ፡ዘብሔረ፡ተምይስ፡በመዋዕለ፡ቍልቍልያኖስ።
2ወአቅረብዎ፡ለቅዱስ፡ፊልያስ፡ውስተ፡ዓውደ፡ምኵናን፡ወይቤልዎ፡ሡዕ፡ለአማልክት። ወይቤ፡ቅዱስ፡ፊልያስ፡አንሰ፡ኢይሠውዕ፡ዘእንበለ፡ለእግዚአብሔር፡ባሕቲቱ።
3ወይቤ፡ቍልቍልያኖስ፡አይኑ፡ውእቱ፡ዘይፈቅድ፡እግዚአብሔር፡መሥዋዕተ። አውሥአ፡ፊልያስ፡ወይቤሎ፡ልበ፡ንጹሐ፡ወኵነኔ፡ጽድቅ፡ወነገረ፡ህልወ፡ዘከመዝ፡መሥዋዕተ፡ይሠምር፡እግዚአብሔር።
4ወይቤ፡ቍልቍልያኖስ፡ኢሦዓሁ፡ሙሴ፧ ወይቤ፡ፊልያስ፡ለአይሁድ፡ለባሕቲቶሙ፡ተአዘዘ፡ይሡዑ፡በኢየሩሳሌም፡ለእግዚአብሔር።
5ወይቤ፡ቍልቍልያኖስ፡በእንተ፡ነፍስኑ፡ትትጋደል፡አው፡በእንተ፡ሥጋ፡ወይቤ፡ፊልያስ፡በእንተ፡ነፍስ፡ወሥጋ። ወይቤ፡ቍልቍልያኖስ፡ዝ፡ሥጋ፡ይትነሣእኑ።
6ወይቤ፡ቅዱስ፡ፊልያስ፡እወ። ወይቤ፡ቍልቍልያኖስ፡አልብከኑ፡ፍቅረ፡ብእሲት፡ወአዝማድ፡ወይቤ፡ፊልያስ፡እምኵሉ፡ፍቅረ፡እግዚአብሔር፡የዓቢ።
7ወይቤ፡ቍልቍልያኖስ፡አይኑ፡እግዚአብሔር፧ አንሥአ፡እዴሁ። ወይቤ፡ፊልያስ፡ውእቱ፡እግዚአብሔር፧ ገብረ፡ሰማያተ፡ወምድረ፡ወኵሎ፡ዘውስቴቶሙ።
8ወእምዝ፡ዜነዎ፡ልደቶ፡ወስቅለቶ፡ወሞቶ፡ወትንሣኤሁ፡ወዕርገቶ።
9ወይቤ፡ቍልቍልያኖስ፡ቦኑ፡አምላክ፡ይሰቀል። ወይቤ፡ፊልያስ፡እስመ፡በእንተ፡ፍቅረ፡ዚአነ፡መጽአ፡ውስተ፡ዓለም፡ወለብሰ፡ሥጋነ፡ወቤዘወነ፡በሕማማቲሁ፡ማሕየዊት።
10ወይቤ፡ቍልቍልያኖስ፡ኢተአምርኑ፡ከመ፡አክበርኩከ፡ወኢፈቀድኩ፡እፃባዕከ፡እስመ፡አአምር፡ክብረከ፡ወክብረ፡አዝማዲከ፡ወይእዜኒ፡ሡዕ፡ለአማልክት፡ከመ፡ኢትሙት፡በእኩይ፡ሞት።
11ወይቤ፡ፊልያስ፡እመሰ፡ትፈቅድ፡ከመ፡ታሥምረኒ፡አዝዝ፡ኰንኖትየ፡ወቀቲሎትየ።
12ወአዘዘ፡ቍልቍልያኖስ፡ከመ፡ይቅትልዎ፡ወእንዘ፡ይወስድዎ፡መጽአ፡እኍሁ፡ምስለ፡ዐበይተ፡ሀገር፡ወአስተብቍዕዎ፡ብዙኀ፡እንዘ፡ይእኅዝዎ፡እገሪሁ፡ወእንዘ፡ይስዕሙ፡እደዊሁ፡ወእገሪሁ፡ወሰአልዎ፡ከመ፡ይትአዘዝ፡ለመኰንን፡ወይሡዕ፡ለአማልክት።
13ወገሠፆሙ፡ቅዱስ፡እንዘ፡ይብል፡ኅድጉኒ፡ኦ፡መስሕታን፡አንሰ፡አሐውር፡ከመ፡እፁር፡መስቀሎ፡ለአምላኪየ።
14ወበጺሖ፡ኀበ፡ይትኴነን፡ወሰፍሐ፡እደዊሁ፡ወጸለየ፡ነዋኅ፡ጸሎተ፡ኀበ፡እግዚእነ፡ኢየሱስ፡ክርስቶስ፡ሎቱ፡ስብሐት፡ወአማኀፀነ፡ሕዝቦ፡ወተሰነዓሎሙ፡በሰላም፡ወእምዝ፡ተከለለ። ጸሎቱ፡ወበረከቱ፡ተሀሉ፡ምስሌነ፡ለዓለመ፡ዓለም፡አሜን።
ሰላም፡ለከ፡ዘኢፈራህከ፡ሥቃዮ፤ለመኰንነ፡ጋዕዝ፡ወተላኵዮ፤ፊልያስ፡ሀበኒ፡እመዝገበ፡እክልከ፡ዘእትሜነዮ፤ኅድግሰ፡ወዓሊከ፡ዘይፀመደከ፡ነዮ፤ሀገረኒ፡ትክል፡ሴስዮ።
15ወበዛቲ፡ዕለት፡ኮነ፡ተዝካሩ፡ለቅዱስ፡ጎርጎርዮስ፡እኀወ፡ባስልዮስ፡ሊቀ፡ጳጳሳት። ጸሎቱ፡ወበረከቱ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለልደተ፡ሐና፡እመ፡ሳሙኤል፡ክቡር፤ሶበ፡ጸለየት፡በልባ፡በኢከናፍር፤ሶበ፡አምሰላ፡ስክርተ፡ካህነ፡ምሥጢር፤ኢይፃዕ፡እምአፉክሙ፡ዐቢይ፡ነገር፤እስመ፡አምላክነ፡ይቤ፡ውእቱ፡ማእምር።
16ወበዛቲ፡ዕለት፡አዕረፈ፡አብ፡ቅዱስ፡ዲዮስቆሮስ፡ሊቀ፡ጳጳሳት፡ዘእስክንድርያ፡ዘተሠይመ፡እምድኅረ፡አባ፡ዮሐንስ፡ወውእቱ፡እምኍልቆሙ፡ለአበው፡ሊቃነ፡ጳጳሳት፡፴ወ፩ዱ።
17ወውእቱ፡ተሠይመ፡መርቆሬዎስሃ፡ሐዲሰ፡እስመ፡ዝንቱ፡አብ፡ኮነ፡የዋህ፡በግዕዙ፡ወክቡረ፡በአእምሮቱ፡ወበምግባሩ፡ሠናይ፡ወፍጹመ፡በመዋዕሊሁ፡እስመ፡አልቦ፡በትውልድ፡ዘይትማሰል፡ኪያሁ፡ወተሠይመ፡ሊቀ፡ጳጳሳት፡በፈቃደ፡መንፈስ፡ቅዱስ።
18ወጸሐፈ፡መልእክተ፡ኀበ፡አብ፡ቅዱስ፡መምህረ፡ቤተ፡ክርስቲያን፡አባ፡ሳዊሮስ፡ሊቀ፡ጳጳሳት፡ዘአንጾኪያ፡ወከሠተ፡ውስተ፡ይእቲ፡መልእክት፡ሃይማኖተ፡ርትዕተ፡ዘሥሉስ፡ቅዱስ፡ዕሩይ፡በመለኮት።
19ወተናገረ፡በእንተ፡ትስብእቱ፡ለወልደ፡እግዚአብሔር፡ወይቤ፡እስመ፡ቃለ፡እግዚአብሔር፡ነሥአ፡ሥጋ፡ፍጹመ፡ወነፍሰ፡ነባቢተ፡ወለባዊተ፡እምእግዝእትነ፡ማርያም፡ቅድስት፡ድንግል፡በ፪። ወኮነ፡፩፡ወልደ፡ወ፩ደ፡ገጸ፡በተዋሕዶቱ፡ዘኢይትፈለጥ፡ወኢኮነ፡፪ተ፡አላ፡አሐዱ፡ውእቱ፡እስመ፡ሥሉስ፡ቅዱስ፡አሐዱ፡አምላክ፡እምቅድመ፡ትስብእቱሂ። ወእምድኅረ፡ትስብእቱ፡ለቃል። ወኢይባእ፡ላዕሌሁ፡ወስኮ፡በትስብእቱ።
20ወሶበ፡በጽሐት፡መልእክቱ፡ለቅዱስ፡ዲዮስቆሮስ፡ኀበ፡አባ፡ሳዊሮስ፡አንበባ፡ተፈሥሐ፡ወተኃሥየ፡ባቲ፡ወባቲ፡ሰበከ፡በቅድመ፡ሕዝብ፡በሀገረ፡አንጾኪያ፡ወተፈሥሑ፡ቦቱ፡ኵሎሙ፡ሕዝብ።
21ወእምዝ፡ጸሐፈ፡ሎቱ፡ቅዱስ፡አባ፡ሳዊሮስ፡ስጣዌ፡መልእክቱ፡እንዘ፡አአኵቶ፡ለእግዚአብሔር፡ዘኀረየከ፡ሢመት፡ክብርት፡መሢሐዊት።
22ወአለበዎ፡ከመ፡ኢይፃዕ፡እምኔሃ፡ኢለየማን፡ወኢለጸጋም፡ወይትገበር፡በኵሉ፡ቃላቲሁ፡ወምግባራቲሁ፡ወይንበር፡በሃይማኖት፡ርትዕት፡ዘሠርዕዋ፡አበዊነ፡ቅዱሳን፡፫፻፲ወ፰፡ርቱዓነ፡ሃይማኖት፡እለ፡ተጋብኡ፡በሀገረ፡ኒቅያ፡ወአዘዙ፡ቦቱ፡በውስተ፡ቀኖናሆሙ።
23ወእምዝ፡ይቤሎ፡በውስተ፡መልእክቱ፡መሀሮሙ፡ለሕዝብከ፡ወትረ፡ከመ፡ይጽንዑ፡ውስተ፡ሃይማኖት፡ርትዕት፡ወይትናገሩ፡ኵሎ፡አሚረ፡በእንተ፡ዝንቱ።
24ወሶበ፡በጽሐት፡መልእክቱ፡ለአባ፡ሳዊሮስ፡ተፈሥሐ፡ባቲ፡አባ፡ዲዮስቆሮስ፡ወአዘዘ፡ከመ፡ያንብብዋ፡በመልዕልተ፡መንበር፡ለሕዝብ።
25ወኮነ፡ዝንቱ፡አብ፡ይሜህሮሙ፡ለሕዝብ፡ወትረ፡ወያነብብ፡ሎሙ፡መጻሕፍተ፡ቅዱሳተ፡ወይኤዝዞሙ፡ለኵሎሙ፡ካህናት፡እለ፡ውስተ፡አህጉር፡ከመ፡ይትዓቀቡ፡ወይዕቀቡ፡መርዔቶሙ፡ዘተመጠውዋ።
26ወሶበ፡ፈጸመ፡ሑረቶ፡ሠናየ፡ወአሥመሮ፡ለእግዚአብሔር፡ወአዕረፈ፡በሰላም፡ጸሎቱ፡ወበረከቱ፡የሀሉ፡ምስሌነ፡ለዓለመ፡ዓለም፡ኣሜን።
ሰላም፡ለከ፡ዲዮስቆሮስ፡ጸሐፊ፤ሃይማኖተ፡ሥሉስ፡ቅዱስ፡ለመሃይምናን፡ታወፊ፤ሊቀ፡ጳጳሳት፡ዐቢይ፡ወካህን፡ዘውገ፡ሱራፊ፤ውስተ፡ሃይማኖተከ፡እስመ፡ነፍስየ፡ትተፊ፤በመንግሥተ፡ሰማይ፡በላ፡ምስሌየ፡አዕርፊ።ወበዛቲ፡ዕለት፡ተዝካሩ፡ለቅዱስ፡እስጢፋኖስ፡ሊቀ፡ዲያቆናት፡ወቀዳሜ፡ሰማዕት። ጸሎቱ፡ወበረከቱ፡የሀሉ፡ምስሌነ፡ለዓለመ፡ዓለም፡አሜን።ሰላም፡ለእስጢፋኖስ፡እንተ፡ነፀረ፡በዓይኑ፤እንዘ፡ወልድ፡ይነብር፡ለአብ፡በየማኑ፤ከመ፡ኖትያዊ፡ጠቢብ፡ኀዳፌ፡ሐመር፡በኪኑ፤ባሕረ፡መጻሕፍት፡አመ፡ፀበተ፡ልሳኑ፤ተቃውሞቶ፡መዋግድ፡ስእኑ።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።