ግዕዝ
Home Formaciones Libros Biblioteca Ge'ez Contacto
Sinaxario · Tahsas

5 de Tahsas

አመ፡፭፡ለታኅሣሥ
1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፭፡ለታኅሣሥ፡በዛቲ፡ዕለት፡አዕረፈ፡ናሆም፡ነቢይ፡ወጻድቅ፡ዝንቱ፡ጻድቅ፡እምነገደ፡ስምዖን።
2ወውእቱ፡በትንቢቱ፡እምነ፡ሙሴ፡፲ወ፯ቱ፡ወተነበየ፡በመዋዕሊሁ፡ለዓሞፅ፡ወልደ፡ዮናዳዕ፡ወገሠፆሙ፡ለደቂቀ፡እስራኤል፡በእንተ፡ክሕደቶሙ፡ወአምልኮቶሙ፡ጣዖተ።
3ወከሠተ፡በውስተ፡ትንቢቱ፡እስመ፡እግዚአብሔር፡ልዑል፡ለእመ፡ኮነ፡መሐሬ፡ወመስተሣህል፡ወብዙኀ፡ምሕረት፡ባሕቱ፡ውእቱሰ፡ይትቤቀል፡እምጸላእቱ፡ወእምእለ፡ይትቃረንዎ፡ወየዓቅብ፡ሎሙ፡ኵነኔ።
4ወተነበየ፡በእንተ፡ስብከተ፡ወንጌል፡ቅዱስ፡ወበእንተ፡ሐዋርያት፡እለ፡ይሰብኩ፡ወሰመዮሙ፡ዓዋድያነ፡በሠናይ፡ወሰባክያነ፡በሰላም።
5ወተነበየ፡በእንተ፡ነነዌ፡ከመ፡ማያት፡ወእሳት፡ሀለዎሙ፡ያጥፍእዋ፡ወያሕስምዋ፡ወኮነ፡በከመ፡ተነበየ። እስመ፡እግዚአብሔር፡ረሰየ፡ውስቴታ፡ድልቅልቀ፡ዓቢየ፡ወነደ፡እሳት፡ውስቴታ፡ወውዕየት፡መንፈቃ፡ወእሙንቱ፡እለ፡ተመይጡ፡እምፍኖተ፡ጽድቅ፡ወገብሩ፡ኣበሳ፡በንስሐሆሙ።
6ወእለሰ፡ነበሩ፡ፅኑዓነ፡ኢበጽሖሙ፡ምንተኒ፡እምእኩይ፡ግሙራ።
7ወሶበ፡ፈጸመ፡መዋዕለ፡ትንቢቱ፡ወአሥመሮ፡ለእግዚአብሔር፡ወአዕረፈ፡በሰላም። እግዚአብሔር፡ይምሐረነ፡በጸሎቱ፡ለዓለመ፡ዓለም፡አሜን።
ሰላም፡ለከ፡ሰባኬ፡ምጽአቱ፡እምሲና፤ዘበድልቅልቅ፡ፍና፤ለዝ፡አምላክ፡እንተ፡ርኢኮ፡በዓይነ፡ልቡና፤አስተብቍዖ፡ናሆም፡ወሰአሎ፡እምፀበለ፡እግሩ፡ደመና፤ዲበ፡ሕማምየ፡ይነፍንፍ፡ጥዒና።
8ወበዛቲ፡ዕለት፡ኮነ፡ሰማዕተ፡ቅዱስ፡ኤስድሮስ፡በረከቱ፡ትኩን፡ምስሌነ፡ለዓለመ፡ዓለም፡አሜን።
ሰላም፡ለከ፡ኤላውትሮስ፡ብፁዕ፤ ሰማዕተ፡እግዚእ፤በእንተ፡ኢየሱስ፡ክርስቶስ፡ምስለ፡እለ፡ተቀትሉ፡ሰብእ፤አሀሉ፡ኀበ፡ሀሎከ፡በታሕተ፡ዓቢይ፡ምሥዋዕ፤ያስተዳልወኒ፡ጸሎትከ፡ለብእሲ፡ኀጥእ።
9ወበዛቲ፡ዕለት፡ኮነት፡ሰማዕተ፡ብፅዕት፡ወቅድስት፡አውጋንያ፡እምሀገረ፡ሮሜ፡ወስሙ፡ለአቡሃ፡ፊልጶስ፡ወውእቱ፡ንጉሥ፡ወያመልክ፡ጣዖታተ።
10ወተወልደት፡ዛቲ፡ቅድስት፡በሀገረ፡እስክንድርያ፡እስመ፡እማሰ፡ክርስቲያናዊት፡ይእቲ፡ወመሀረታ፡ሃይማኖተ፡በኅቡእ።
11ወሶበ፡ልኅቀት፡ፈኀርዋ፡መኳንንት፡ዐበይት፡ወነገራ፡አቡሃ፡ዘንተ፡ወትቤሎ፡ለአቡሃ፡አብሐኒ፡ቅድመ፡ከመ፡እፃዕ፡ገዳመ፡እፍታሕ፡አዕይንትየ፡በርእየተ፡አድባራት፡ወእትፈሣሕ።
12ወሰሚዖ፡አቡሃ፡ደመረ፡ላቲ፡፪ተ፡ሕፅዋነ፡ወአብሐ፡ከመ፡ትግበር፡ዘፈቀደት፡ወወፅአት፡ሶቤሃ፡ወዖደት፡አድባረ፡መነኮሳት፡ወበጽሐት፡ኀበ፡ቤተ፡ክርስቲያን፡ዘሀለወ፡ባቲ፡ኤጲስ፡ቆጶስ፡ጻድቅ፡ወቅዱስ፡ዘስሙ፡ቴዎድሮስ፡ወነገረቶ፡ሎቱ፡ኵሎ፡ዘውስተ፡ልባ፡ወውእቱ፡ተወክፋ፡ወአጥመቃ፡ምስለ፡ሕፅዋኒሃ፡ወመንኮሰት፡በህየ፡ወሰመየት፡ስማ፡አውጋንዮስ፡ወኢያእመረ፡መኑሂ፡ከመ፡ይእቲ፡ብእሲት።
13ወሶበ፡ኢተመይጠት፡ኀሠሣ፡አቡሃ፡ወሶበ፡ኢረከባ፡ገብረ፡ጣዖተ፡በአምሳሊሃ፡ወነበረ፡እንዘ፡ይሰግድ፡ለውእቱ፡ምስል፡ሠርከ።
14ወእምድኅረ፡ነበረ፡አባ፡አውጋንዮስ፡እንተ፡ይእቲ፡አውጋንያ፡ብእሲት፡አሐደ፡ዓመተ፡ምስለ፡አበምኔት፡ዘውስተ፡ውእቱ፡መካን፡ኀረይዎ፡መነኮሳት፡ወሤምዎ፡አበ፡ምኔት፡ወጸጋ፡ፈውስ፡ተውህቦ፡እምእግዚአብሔር፡ከመ፡ይክሥት፡አዕይንተ፡ዕውራን፡ወከመ፡ያውፅእ፡አጋንንተ።
15ወመጽአት፡ኀቤሁ፡አሐቲ፡ብእሲት፡ዘባ፡ጋኔን፡ወፈወሳ፡ቅዱስ፡አውጋንዮስ።
16ወአምድኅረዝ፡ወደየ፡ሰይጣን፡ፍትወተ፡ከንቶ፡ውስተ፡ልበ፡ይእቲ፡ብእሲት፡ከመ፡ትትናገሮ፡ለቅዱስ፡አውጋንዮስ፡ይኀድግ፡ደብሮ፡ወምንኵስናሁ፡ወያውስባ፡ወሶበ፡ሰምዓት፡ቅድስት፡አውጋንያ፡ዘተጸውዓት፡በአምሳለ፡ብእሲ፡ትቤላ፡ለይእቲ፡ብእሲት፡ሑሪ፡እምኔየ፡ኦ፡እኅትየ፡እስመ፡ሰይጣን፡አስርሐኪ።
17ወሶበ፡ተኀፍረት፡ይእቲ፡ብእሲት፡ሖረት፡ኀበ፡ንጉሥ፡ዘውእቱ፡አቡሃ፡ለአውጋንያ፡ወትቤሎ፡እስመ፡አነ፡ሖርኩ፡ውስተ፡መካነ፡እገሌ፡መጽአ፡ኀቤየ፡ወሬዛ፡መነኮስ፡በሌሊት፡ወፈቀደ፡ከመ፡ይስክብ፡ምስሌየ፡ወሶበ፡ጸራሕኩ፡ኀበ፡አግብርትየ፡ሖረ፡እምኔየ።
18ወሶበ፡ሰምዐ፡ዘንተ፡ንጉሥ፡አዘዘ፡ያምጽእዎሙ፡ለመነኮሳት፡አሢሮሙ፡ወሶበ፡በጽሑ፡አግብኦሙ፡ኀበ፡ካልእ፡መኰንን፡ከመ፡ይኰንኖሙ፡በቤቱ፡ውእቱኒ፡ኰነኖሙ፡ወቦ፡እለ፡ሞቱ፡እምኔሆሙ።
19ወሶበ፡ርእየት፡አውጋንያ፡ዘተመሰለት፡ከመ፡ብእሲ፡ኀሣሮሙ፡ለመነኮሳት፡ሖረት፡ኀበ፡ንጉሥ፡ወትቤሎ፡ኦ፡እግዚእየ፡መሐል፡ሊተ፡ከመ፡እሙነ፡ለእመ፡ነገርኩከ፡ምሥጢርየ፡ኢትክልአኒ፡መፍቅድየ፡ወሶበ፡መሐለ፡ላቲ፡ወሰደቶ፡ኀበ፡መካን፡ጽሚተ፡ወከሠተት፡ሎቱ፡ከመ፡ይእቲ፡ወለቱ፡አውጋንያ፡ወነገረቶ፡መፍቅዳ።
20ወሰሚዖ፡ንጉሥ፡ይቤላ፡በአማን፡ኣንቲ፡ወለትየ፡አውጋንያ፡ወአንሰ፡አመንኩ፡በአምላክኪ፡ወአዘዘ፡ሶቤሃ፡ይፍትሕዎሙ፡ለመነኮሳት፡ወለእለ፡ሞቱሂ፡በውስተ፡ኵነኔ፡ከመ፡ይቅብርዎሙ። ወእምዝ፡ተጠምቀ፡ምስለ፡ኵሎ፡ሰብአ፡ቤቱ፡በስመ፡አብ፡ወወልድ፡ወመንፈስ፡ቅዱስ፡፩፡አምላክ፡ወኮኑ፡ኵሎሙ፡ክርስቲያነ።
21ወሶበ፡ርእዩ፡ሰብአ፡ሀገረ፡እስክንድርያ፡ሃይማኖቶ፡ለፊልጶስ፡ሤምዎ፡ሊቀ፡ጳጳሳት፡ላዕለ፡መንበረ፡ማርቆስ፡ወነበረ፡ብዙኀ፡ዓመታተ፡እንዘ፡ይሰብክ፡ሃይማኖተ፡ክርስቶስ።
22ወእምድኅረዝ፡ፈነወ፡ካልእ፡መኰንን፡ዓላዊ፡ሐራሁ፡በኀቡእ፡ከመ፡ይቅትልዎ፡ለፊልጶስ፡ወረከብዎ፡ውስተ፡ቤተ፡ክርስቲያን፡ቀዊሞ፡እንዘ፡ይጼሊ፡ወቀተልዎ፡ወኮነ፡ሰማዕተ።
23ወሶበ፡ሰምዐ፡ሊቀ፡ጳጳሳት፡ዘሮሜ፡ዜናሃ፡ለቅድስት፡አውጋንያ፡ነሥኣ፡ኀቤሁ፡ወሤማ፡እመ፡ምኔት፡ላዕለ፡ደብረ፡ዚአሁ፡ዘሐነፀ፡ወየአክል፡ኍልቈ፡መነኮሳይያት፡፴፻፡ወደናግል፡፫፻፡መነኮሳይያት፡ወለ፪ቱ፡ሕፅዋን፡እለ፡ነበሩ፡ምስሌሃ፡ሤሞሙ፡ኤጲስ፡ቆጶሳተ፡ላዕለ፡፪ቱ፡አህጉር።
24ወእምድኅረዝ፡መጽአ፡ካልእ፡መኰንን፡ወአኀዛ፡ለቅድስት፡አውጋንያ፡ወኰነና፡በዘዘዚአሁ፡ኵነኔ፡እስከ፡መጠወት፡ነፍሳ፡ወኮነት፡ሰማዕተ፡በእንተ፡ስመ፡እግዚእነ፡ኢየሱስ፡ክርስቶስ። ጸሎታ፡ወበረከታ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለአውጋንያ፡ዘተመሰለት፡ሕፅወ፤በዘታነጽሕ፡ዛቲ፡መነኮሳተ፡አኀወ፤ወጽድቀ፡አቡሃ፡ፊልጶስ፡እዜኑ፡መትልወ፤እመንግሥተ፡ምድር፡ለመንግሥተ፡ሰማይ፡አድለወ፤እስከ፡በትረያርክ፡ኮነ፡ይገሥፅ፡አበወ።ሰላም፡እብል፡ቴዎድሮስሃ፡ሰማዕተ፤ለአውጋንያ፡ዘመርሓ፡የማናዊተ፡ፍኖተ፤እለ፡ነፀርዎ፡ኣኀው፡ከመ፡ኮንዎ፡ሰማዕተ፤ኢውዕየአ፡ወኢረስነ፡ምንተ፤እንዘ፡በልብሱ፡የዓቍር፡እሳተ።
25ወበዛቲ፡ዕለት፡ኮነ፡ሰማዕተ፡ቅዱስ፡ፊቅጦር፡ዘሀገረ፡ሻው፡ዘእምአድያመ፡አስዩጥ። ወለዝንቱ፡ቅዱስ፡ኮነ፡ስመ፡አቡሁ፡መርመር፡ወስማ፡ለእሙ፡ማርታ፡ወእሙንቱ፡ጻድቃን፡ወያመልክዎ፡ለእግዚአብሔር፡ዘእንበለ፡ፍርሃት።
26ወባሕቱ፡ኢኮነ፡ሎሙ፡ወልድ፡ወነበሩ፡እንዘ፡ይስእሉ፡ወይሁቡ፡ምጽዋተ፡ብዙኀ፡ለነዳያን፡ወተወክፈ፡እግዚእነ፡ስእለቶሙ፡ወፀንሰቶ፡ቡርክት፡ማርታ፡ለዝንቱ፡ማር፡ፊቅጦር፡ወወለደቶ፡አመ፡፱፡ለግንቦት፡ወሐፀንዎ፡በተግሣፅ፡ወበፈሪሃ፡እግዚአብሔር።
27ወሶበ፡ኮኖ፡፳፡ዓመት፡ወሰዶ፡አቡሁ፡ኀበ፡ንጉሥ፡ወሤሞ፡ንጉሥ፡መስፍነ፡ህንተ፡አቡሁ፡እስመ፡አቡሁ፡ረስዐ፡በመዋዕሊሁ።
28ወአምድኅረ፡ኅዳጥ፡መዋዕል፡በጽሐ፡መልእክተ፡ንጉሥ፡ዲዮቅልጥያኖስ፡ኀበ፡መኰንነ፡እንጽና፡ከመ፡ይቅትሎሙ፡ለክርስቲያን፡እለ፡ኢያመልኩ፡አማልክተ፡ውእቱሰ፡መኰንን፡መጽአ፡ኀበ፡ሀገረ፡ሻው፡እንዘ፡የኀሥሦሙ፡ለክርስቲያን።
29ወአሜሃ፡አስተዋደይዎ፡ሰብእ፡ለቅዱስ፡ፊቅጦር፡ከመ፡ውእቱ፡ያመልኮ፡ለእግዚአብሔር፡በንጽሕ። ወሶቤሃ፡አዘዘ፡ያብጽሕዎ፡ወሶበ፡አምጽእዎ፡ኀቤሁ፡አገበሮ፡ከመ፡ይሡዕ፡ለአማልክት፡ወአበዮ፡ወመኰንንኒ፡አዘዘ፡ይደይዎ፡ውስተ፡ቤተ፡ሞቅሕ።
30ወእንዘ፡ይጼሊ፡በህየ፡ወረደ፡እምሰማይ፡መልአከ፡እግዚአብሔር፡ቅዱስ፡ሚካኤል፡ወአዕረጎ፡ውስተ፡ሰማይ፡ወዓቀብተ፡ቤተ፡ሞቅሕ፡ሶበ፡ኃጥእዎ፡ተሀውኩ፡ፈድፋደ፡ወእምድኅረ፡፯ቱ፡ዕለት፡ተመይጠ፡ወረከብዎ፡ወወሰድዎ፡ኀበ፡መኰንን፡ውእቱኒ፡ወሰዶ፡ኀበ፡ዲዮቅልጥያኖስ፡ንጉሥ፡ውእቱኒ፡ተራኅርኀ፡ሎቱ፡ወተየውሆ፡ከመ፡ይሚጦ፡እምአምልኮ፡እግዚአብሔር፡ወስእነ፡ኦሆ፡አብሎቶ።
31ወእምዝ፡ፈነዎ፡ወሜጦ፡ኀበ፡አውጣክያኖስ፡መኰንን፡እንዘ፡ይብል፡ናሁ፡ፈነውክዎ፡ለከ፡ለእመ፡ሰምዓከ፡ይሡዕ፡ለአማልክት፡ወለእመ፡ኢሰምዓከ፡ኢትምሓኮ፡አላ፡ቅትሎ።
32ወእምዝ፡አሠሩ፡እደዊሁ፡ወእገሪሁ፡ወወደዩ፡ልጓመ፡ሐፂን፡ውስተ፡አፉሁ፡ወአብእዎ፡ውስተ፡ይወስድዎ፡ከርሠ፡ሐመር፡ወእንዘ፡እሱረ፡ወረደ፡መልአከ፡እግዚአብሔር፡ወፈትሖ፡እማእሰሪሁ።
33ወሶበ፡በጽሐ፡ኀበ፡መኰንን፡አኀዘ፡ቅዱስ፡ይርግሞ፡ለመኰንን፡ወለአማልክቲሁ፡ርኩሳን፡ወተቈጥዐ፡መኰንን፡ወኰነኖ፡ኵነኔ፡ፅኑዐ፡ወአሰሮ፡ውስተ፡ቤተ፡ሞቅሕ።
34ወእንዘ፡ሀሎ፡በህየ፡አስተርአዮ፡መድኀኒነ፡በሠረገላ፡ብርሃን፡ወአወፈዮ፡ኪዳነ። ወቅዱስሰ፡ኮነ፡ይገብር፡ተአምራተ፡ወመንክራተ፡ወይፌውስ፡ኵሎ፡ዱያነ።
35ወሰሚዖ፡መኰንን፡ተምዐ፡ጥቀ፡ወአዘዘ፡ያምጽእዎ፡ዓዲ፡ከመ፡ይኂጦ፡ወይየውሆ፡ወቅዱስሰ፡ጸዓሎ፡ወረገመ፡አማልክቲሁ፡ርኩሳነ፡ወአዘዘ፡ይእስርዎ፡ላዕለ፡ዘነበ፡ፈረስ፡ወይስሐብዎ፡መጠነ፡ምሕዋረ፡አሐቲ፡ዕለት።
36ወእምድኅረዝ፡ወደይዎ፡ውስተ፡ምንዳደ፡እሳተ፡ብለኔ፡ወከመዝ፡ፈጸመ፡ገድሎ፡ሠናየ፡ወሥጋሁሰ፡ኢያውፅኡ፡እለ፡ቀተልዎ። ወባሕቱ፡መጽኡ፡መሃይምናን፡ወወረዱ፡በሰዋስው፡ውስተ፡ቤተ፡ብለኔ፡ወነሥእዎ፡ገነዝዎ፡ወአምዓዝዎ፡በአፈው፡ወአንበርዎ፡ውስተ፡መካን፡ሠናይ፡ወሐነፁ፡ዲቤሁ፡ቤተ፡ክርስቲያን። በረከቱ፡ቅድስት፡ትኩን፡ምስሌነ፡ለዓለመ፡ዓለም፡አሜን።
ሰላም፡ለዝክረ፡ስምከ፡ምዑዝ፡እምአፈው፤ወጥዑም፡ዓዲ፡እምነ፡መዓር፡ወጼው፤ፊቅጦር፡በግዕ፡ዘአርአያከ፡ቅድው፤ይኩነኒ፡ቤዛ፡አመ፡ጠብሑከ፡በሻው፤ደመ፡ስምዕከ፡ከመ፡ማይ፡ክዕው።
37ወበዛቲ፡ዕለት፡ተዝካሮሙ፡ለፊንጦስ፡ወሐናንያ፡ወበርክዮስ፡ወዮሐንስ፡ወፊልጶስ፡አቡሃ፡ለአውጋንያ፡ሰማዕት፡ተጋዳሊት። በረከቶሙ፡የሀሉ፡ምስሌነ፡ለዓለመ፡ዓለም፡አሜን።

ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።