ግዕዝ
Home Formaciones Libros Biblioteca Ge'ez Contacto
Sinaxario · Tahsas

22 de Tahsas

አመ፡፳ወ፪፡ለታኅሣሥ
1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፳ወ፪፡ለታኅሣሥ፡በዛቲ፡ዕለት፡ኮነ፡ተዝካረ፡በዓሉ፡ለመልአክ፡ክቡር፡ሊቀ፡መላእክት፡ገብርኤል፡መበሥር። ወሕንፀተ፡ቤተ፡ክርስቲያኑ፡በሀገረ፡ዳናህ፡ወአርአየ፡ባቲ፡ተአምራቲሁ፡ወቅዳሴሃ፡በዛቲ፡ዕለት፡ወኮነ፡ስምዐ፡በእንቲአሁ፡አርኬላዎስ፡ኤጲስቆጶስ፡ዘይእቲ፡ሀገር።
2ወዝንቱ፡መልአክ፡ክቡር፡ዘተፈነወ፡እምኀበ፡እግዚአብሔር፡ኀበ፡እግዝእትነ፡ቅድስት፡ድንግል፡ማርያም፡ወኮነ፡ምእመነ፡በእንተ፡ዘዜነዋ፡ለእግዝእትነ፡ልደቶ፡እምኔሃ፡ወክቡር፡ፈድፋደ፡እምኵሎሙ፡መላእክት።
3ወሶበ፡ቦአ፡ኀቤሃ፡ይቤላ፡ሰላም፡ለኪ፡ተፈሥሒ፡ፍሥሕት፡ኦ፡ምልእተ፡ጸጋ፡እግዚአብሔር፡ምስሌኪ።
4ወውእቱ፡ዘአብሠሮ፡ለዘካርያስ፡ካህን፡በእንተ፡ልደቱ፡ለዮሐንስ፡መጥምቅ።
5ወጥቀ፡ዐቢይ፡ክብሩ፡ለዝንቱ፡መልአክ፡ገብርኤል፡ኅሩይ፡ዜናዌ፡ሐዲስ። ወይደልወነ፡ለነ፡ከመ፡ንትጋባእ፡በዕለተ፡በዓሉ፡በልብ፡ንጹሕ፡ወበሃይማኖት፡ርትዕት፡ወናሰስል፡ጽልአ፡ወዐመፃ፡እማእከሌነ፡ወንግበር፡ሰላመ፡ወንሰነዓው፡ምስለ፡ቢጽነ፡ወንትፋቀር፡በበይናቲነ፡ወንስቅል፡ሕሊናነ፡ኀበ፡እግዚአብሔር፡መሐሪ፡ከመ፡ይሣሃለነ። ወናስተብቍዕ፡በኵሉ፡ልብነ፡ኀበ፡ዝንቱ፡መልአክ፡ክቡር፡ገብርኤል፡ውኀበ፡ሚካኤል፡ቢጹ፡እስመ፡እሉ፡ክቡራን፡ወኅሩያን፡ከመ፡ይተንብሉ፡በእንቲኣነ።
6ወትርጓሜሁ፡ለገብርኤል፡አምላክ፡ወሰብእ፡ወውእቱ፡ዘዜነዎሙ፡ለኖሎት፡እንዘ፡ይብል፡“ናሁ፡ተወልደ፡ለክሙ፡ዮም፡መድኀን፡ዘውእቱ፡ክርስቶስ”። ትንብልናሁ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለቤትከ፡በሀገረ፡ዳናህ፡ዘቀደሳ፤አርኬላዎስ፡ኤጲስቆጶሳ፤ገብርኤል፡ሰባኪ፡ምጽአተ፡ክርስቶስ፡አንበሳ፤ለዛቲ፡በዓልከ፡በዘይትሌዓል፡ሞገሳ፤በዓለ፡ማርያም፡አንበረ፡ደቅስዮስ፡በርእሳ።
7ወበዛቲ፡ዕለት፡ኮነ፡ተዝካረ፡በዓል፡ዐቢይ፡በዘዜነዋ፡ገብርኤል፡መልአክ፡ክቡር፡ወአብሠራ፡ለእግዝእትነ፡ቅድስት፡ድንግል፡ማርያም።
8ወሀሎ፡፩፡ብእሲ፡ኤጲስቆጶስ፡ጻድቅ፡ዘስሙ፡ደቅስዮስ፡በሀገረ፡ሮሜ፡ወአስተርኣየቶ፡ሎቱ፡እግዝእትነ፡ቅድስት፡ድንግል፡ማርያም፡ወትቤሎ፡ኦ፡ፍቁርየ፡ደቅስዮስ፡አንሰ፡ሠመርኩ፡ብከ፡በኵሉ፡ግብርከ፡ወተፈሣሕኩ፡በእንቲአከ፡ወዘንተ፡ብሂላ፡ተሠወረት፡እምኔሁ።
9ወበእንተዝ፡ተፈሥሐ፡ውእቱኒ፡በእንተ፡ዘአስተርአየቶ፡ወሐለየ፡ይወስክ፡ክብራ፡ወዕበያ፡ወእምዝ፡ሠርዐ፡ላቲ፡በዓለ፡በዘዜነዋ፡ወአብሠራ፡ገብርኤል፡መልአክ፡ዐቢይ፡ወክቡር፡በዘፀንሰቶ፡አመ፡፳ወ፱፡ለመጋቢት፡ዘኢተክህሎሙ፡ለምእመናን፡ከመ፡ያብዕልዎ፡እስመ፡በመዋዕለ፡ጾም፡ዐቢይ፡ውእቱ፡ወዓዲ፡ይከውን፡በሰሙነ፡ሕማማት፡ውእቱሰ፡ሠርዖ፡አመ፡፳ወ፪፡ለታኅሣሥ፡በ፰ቱ፡መዓልት፡እምቅድመ፡ልደቱ፡ለመድኀኒነ፡ወአብዓልዎ፡መሃይምናን፡በዛቲ፡ዕለት፡ወተፈሥሑ፡ዐቢየ፡ፍሥሐ፡ወእምይእቲ፡ዕለት፡ተሠርዐ፡ዝንቱ፡በዓል፡እስከ፡ዮም።
10ወአስተርአየቶ፡ካዕበ፡እግዝእትነ፡ማርያም፡ለብፁዕ፡ደቅስዮስ፡ወውስተ፡እዴሃ፡ልብስ፡ብሩህ፡ወትቤሎ፡ንሣእ፡ዘንተ፡ልብሰ፡ወአልቦ፡ዘይክል፡ለቢሶታ፡ዘእንበሌከ። ወዲበ፡መንበርከኒ፡አልቦ፡ዘይነብር፡ዲቤሁ። ወለእመቦ፡ዘይትዓደው፡ቃልየ፡አነ፡እትቤቀሎ።
11ወእምዝ፡እምድኅረ፡አዕረፈ፡ተሠይመ፡ካልእ፡ኤጲስቆጶስ፡ወለብሳ፡ለይእቲ፡ልብስ፡ወነበረ፡ዲበ፡መንበሩ፡ወበጊዜሃ፡ወድቀ፡እምላዕለ፡መንበር፡ወሞተ፡በእኩይ፡ሞት።
12ወእለ፡ርእዩ፡ዘንተ፡አንከሩ፡እምተኣምራቲሃ፡ለእግዝእትነ፡ቅድስት፡ድንግል፡ማርያም፡ወላዲተ፡አምላክ። ጸሎታ፡ወበረከታ፡የሀሉ፡ምስሌነ፡ለዓለመ፡ዓለም፡አሜን።
ሰላም፡እብል፡ለደቅስዮስ፡ባህርያ፤ኤጲስቆጶስ፡ዘጥልጥልያ፤በእንተ፡ዘጸሐፈ፡ላቲ፡ተአምራቲሃ፡ወዜና፡ዕበያ፤እንተ፡ወሀበቶ፡ማርያም፡ማርያ፤ልብሰ፡ሰማያዊተ፡እስከ፡ዮም፡ነያ።ሰላም፡ለኖላዊነ፡አልቦ፡ዘይመስሎ፤ኢ፡ዘይመጽእ፡ወኢዘሀሎ፤መራዕየ፡ይዕቀብ፡እምወዲቅ፡ወእምተሐጕሎ፤መንገለ፡ወፈረ፡ያወፍር፡በመትሎ፤አባግዕኒ፡ይሰምዓ፡ቃሎ።
13ወበዛቲ፡ዕለት፡አዕረፈ፡ቅዱስ፡አንስጣስዮስ፡ሊቀ፡ጳጳሳት፡ዘእስክንድርያ፡እምኍልቆሙ፡ለአበው፡ሊቃነ፡ጳጳሳት፡፴ወ፮ቱ።
14ወዝንቱ፡ቅዱስ፡እምልኂቃነ፡ሀገረ፡እስክንድርያ፡ወኮነ፡መስፍነ፡በውስተ፡ቤተ፡መንግሥት፡ወእምዝ፡ተሠይመ፡ቀሲሰ፡ውስተ፡ቤተ፡ክርስቲያን፡ዘእስክንድርያ፡ወበፈቃደ፡እግዚአብሔር፡ተሠይመ፡ሊቀ፡ጳጳሳት።
15ወሶበ፡ተሠይመ፡ሐለየ፡በእንተ፡አብያተ፡ክርስቲያናት፡ብዙኀት፡ወሤመ፡ውስተ፡ኵሉ፡መካን፡ኤጲስቆጶሳተ፡ወካህናተ፡ብዙኀነ፡ወነሥአ፡እምነ፡መለካውያን፡አብያተ፡ክርስቲያናት፡ብዙኀተ፡ዘኢኮነ፡ኍልቆሙ፡ሎቱ፡ምስለ፡አብያተ፡ክርስቲያን፡ዘያዕቆባውያን። እስመ፡ውእቱ፡ኮነ፡ክቡረ፡በኀቤሆሙ፡በአእምሮቱ፡ወበሃይማኖቱ፡ወበትሩፋቲሁ፡ወሜጠሙ፡ለብዙኀን፡እምኔሆሙ፡ውስተ፡ሃይማኖት፡ርትዕት።
16ወእምድኅረዝ፡ሞተ፡ቈስጠንጢኖስ፡ንጉሥ፡ጻድቅ፡ወነግሠ፡ህየንቴሁ፡ካልእ፡ንጉሥ፡ዘሃይማኖቱ፡እኪት። ወፈነወ፡፩ደ፡እምነ፡መላእክቲሁ፡እኩያን፡ከመ፡ያስተዋድዮ፡ለዝንቱ፡አብ፡አንስጣስዮስ፡ወውእቱ፡መልአክ፡እኩይ፡አስተዋደዮ፡እንዘ፡ይብል፡ሶበ፡ሠርዐ፡ቅዳሴ፡ቍርባን፡ውስተ፡ቤተ፡ክርስቲያን፡አውገዞ፡ለንጉሥ፡ወለሃይማኖቱ፡ወኢኮነ፡ዝንቱ፡አብ፡ዘተናገረ፡ምንተኒ።
17ወሶበ፡አንበበ፡መልእክቶ፡ተምዐ፡ንጉሥ፡ወፈነወ፡ኀበ፡መኰንነ፡እስክንድርያ፡ወአዘዘ፡ከመ፡ይንሣእ፡እምዝንቱ፡አብ፡ቤተ፡ክርስቲያኖሙ፡ለቅዱሳን፡ቆዝሞስ፡ወድምያኖስ፡ወኵሎ፡ንዋየ፡ቅድሳት፡ወይመጥዎ፡ለአስግያኖስ፡ሊቀ፡ጳጳሳት፡ዘሮሜ።
18ወበእንተዝ፡ኀዘነ፡ዝንቱ፡አብ፡ፈድፋደ። ወባሕቱ፡እግዚአብሔር፡ዘየሐትት፡አልባበ፡ሰብእ፡ናዘዞ፡ወአጥፍኦ፡ለጴጥሮስ፡ዓላዊ፡ሊቀ፡ጳጳሳት፡ዘአንጾኪያ። ወሤሞ፡ህየንቴሁ፡ለአትናስዮስ፡ብእሲ፡ጻድቅ፡ወማእምር፡ወፈነወ፡ሎቱ፡ለዝንቱ፡አብ፡አንስጣስዮስ፡መልእክተ፡በእንተ፡ሃይማኖት፡ርትዕት፡ወተፈሥሐ፡ቦቱ፡ወአስተጋብኦሙ፡ለኤጲስቆጶሳት፡ወለካህናት፡ወአንበባ፡ለይእቲ፡መልእክት፡በቅድሜሆሙ፡ወተፈሥሑ፡ባቲ፡ወአንከሩ፡እምነ፡ቃል፡ዘጽሑፍ፡ውስቴታ፡ወበእንተ፡አእምሮቱ።
19ወእምድኅረዝ፡ተንሥአ፡አባ፡አትናስዮስ፡ሊቀ፡ጳጳሳት፡ዘአንጾኪያ፡ወነሥአ፡ምስሌሁ፡ኤጲስቆጶሳተ፡ቀሳውስተ፡ወዲያቆናተ፡ወረበናተ፡ወመነኮሳተ፡ወመጽአ፡ኀበ፡ሀገረ፡እስክንድርያ፡ወወፅአ፡ዝንቱ፡አብ፡አባ፡አንስጣስዮስ፡ወምስሌሁ፡ኤጲስቆጶሳት፡ቀሳውስት፡ወዲያቆናት፡ወመነኮሳት፡ወረበናት፡ወተቀበልዎሙ፡በፍሥሐ።
20ወእምዝ፡ይቤ፡አባ፡አትናስዮስ፡ኦ፡አኀው፡ፍቁራን። ይደልወነ፡ከመ፡ንንሣእ፡ወንዘምር፡እንዘ፡ንብል፡ሣህል፡ወርትዕ፡ተራከባ፡ጽድቅ፡ወሰላም፡ተሰዓማ፡እስመ፡አትናስዮስ፡ወአንስጣስዮስ፡ተራከቡ፡ወተአምኁ፡በበይናቲሆሙ። ጽድቅ፡አስተርአየ፡በምድረ፡ግብፅ፡ወርትዕ፡ሠረቀ፡እምሥራቅ፡ወኮኑ፡ግብፅ፡ወአንጾኪያ፡ወከማሁ፡ሶርያ፡በአሐቲ፡ሃይማኖት፡አሐተ፡ቤተ፡ክርስቲያነ፡ከመ፡አሐቲ፡ድንግል፡ከመ፡ዘለ፩፡ብእሲ፡ንጹሕ፡ዘውእቱ፡ኢየሱስ፡ክርስቶስ።
21ወነበረ፡አባ፡አትናስዮስ፡ምስለ፡አባ፡አንስጣስዮስ፡ውስተ፡፩፡ደብር፡እንዘ፡ይትሜሀሩ፡በበይናቲሆሙ፡ወይትዋሥኡ፡ወየሐትቱ፡በእንተ፡ምሥጢረ፡ሃይማኖት፡ርትዕት። ወእምዝ፡ተመይጠ፡አባ፡አትናስዮስ፡ኀበ፡ሀገሩ፡በሰላም፡ወተሠነዓዋ፡ክልኤቲ፡አብያተ፡ክርስቲያናት፡ወኮና፡አሐተ፡መርዔተ።
22ወኮነ፡ዝንቱ፡አብ፡አንስጣስዮስ፡ይሜህሮሙ፡ለመርዔቱ፡ዘይበቍዖሙ፡ለነፍሶሙ፡እመጽሐፈ፡ሕይወት።
23ወእምብዝነ፡ጥበቡ፡ወአእምሮቱ፡ረሰየ፡ጥንተ፡መጻሕፍቲሁ፡ወመልእክታቲሁ፡ኵሎ፡ለለዓመት፡በ፩፡እምኆኀያተ፡እልፍ፡ወ፳፻ት፡ዘውእቱ፡ኣሌፍ። ወከመዝ፡ወጠነ፡በቀዳሚት፡ዓመት፡ጸሐፈ፡ኵሎ፡መልእክታቲሁ፡ወትምህርታቲሁ፡በአሌፍ። ወበዳግሚት፡ዓመት፡ጸሐፈ፡መልእክታቲሁ፡በቤት። ወከማሁ፡በሣልሳይ፡ዓመት፡በጋሜል፡እስከ፡ፈጸመ፡መዋዕለ፡ሢመቱ፡፳ወ፪ተ፡ዓመተ፡ጸሐፈ፡፳ወ፪፡ኆኀያተ፡እልፈ፡፳፻ተ፡መጻሕፍተ።
24ወሶበ፡በጽሐ፡ጾመ፡ልደት፡ሐመ፡ንስቲተ፡ወአዕረፈ፡በሰላም፡በ፫፻፡፴ወ፩፡ዓመተ፡ሰማዕታት፡ቅዱሳን። ጸሎቱ፡ወበረከቱ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለአንስጣስዮስ፡እግዚአብሔር፡ዘሤሞ፤መለካውያነ፡ለተቃውሞ፤በብዙኀ፡ጽሒቅ፡ወአስተሐምሞ፤እምድኅረ፡አብጽሐ፡ለጽሒፈ፡ተግሣፅ፡ዓቅሞ፤አመ፡ጾመ፡ልደት፡አዕረፈ፡ንስቲተ፡ሐሚሞ።

ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።