Sinaxario · Tahsas
14 de Tahsas
አመ፡፲ወ፬፡ለታኅሣሥ1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፲ወ፬፡ለታኅሣሥ፡በዛቲ፡ዕለት፡ኮነ፡ሰማዕተ፡ቅዱስ፡ስምዖን፡ዘእምሀገረ፡መኑፍ፡በመዋዕሊሆሙ፡ለተንባላት።
2ወዝንቱ፡ቅዱስ፡ተዋሥአ፡ምስለ፡ተንባላታዊ፡ሞዖ፡ወአስተኀፈሮ፡ወሖረ፡ውእቱ፡ተንባላታዊ፡ኀበ፡ርእሰ፡መሳፍንቶሙ፡ወአስተዋደዮ፡ለቅዱስ፡ስምዖን፡እንዘ፡ይብል፡እስመ፡ውእቱ፡ስምዖን፡ረገመ፡ሃይማኖተነ።
3ወበእንተዝ፡አኀዝዎ፡ወኰነንዎ፡ኵነኔ፡ዐቢየ፡ወእምዝ፡መተሩ፡ርእሶ፡በሰይፍ፡ወነሥአ፡አክሊለ፡ስምዕ፡በመንግሥተ፡ሰማይ። ጸሎቱ፡ወበረከቱ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለስምዖን፡ምቱረ፡ክሳድ፡በሰይፍ፤ወለስምዖን፡ቢጹ፡ዘሀገረ፡መኑፍ፤ብሖር፡ወሚናስ፡ዘገነተ፡ወንጌል፡አዕዋፍ፤ፁሩነ፡በአእዳው፡ወኀዝሉነ፡በክንፍ፤ከመ፡ታዕድዉነ፡እምቀልቀል፡ወጸድፍ።
4ወበዛቲ፡ዕለት፡ኮነ፡ዕረፍቶሙ፡ለቅዱሳን፡አባ፡ብሖር፡ወአባ፡ሚናስ፡አረጋዊ። በረከቶሙ፡የሀሉ፡ምስሌነ፡ለዓለመ፡ዓለም፡አሜን።
5ወበዛቲ፡ዕለት፡ኮኑ፡ሰማዕተ፡ቅዱስ፡መርምህናም፡ወእኅቱ፡ሣራ፡ወ፵፡አግብርቲሁ፡ወለዝንቱ፡ቅዱስ፡ኮነ፡አቡሁ፡ንጉሠ፡ላዕለ፡ሀገረ፡አቶር፡ወያመልክ፡ግልፎዋተ፡ዘስሞሙ፡ቤል፡ወአጵሎን፡ወእሙ፡ክርስቲያናዊት፡ይእቲ።
6ወዝንቱ፡ቅዱስ፡መርምህናም፡ሰአሎ፡ለአቡሁ፡ከመ፡ይፃዕ፡ገዳመ፡ወይንዓው፡አራዊተ። ወሶበ፡አብሖ፡ወፅአ፡ምስለ፡፵፡አግብርቲሁ፡መስተፅዕናነ፡አፍራስ፡ወበጺሖ፡ኀበ፡እሙ፡ይቤላ፡አሐውር፡ከመ፡ዕንዓው፡አራዊተ፡ወትቤሎ፡እሙ፡ይባርክ፡ላዕሌከ፡እግዚአብሔር፡አምላከ፡ሰማያት፡ወምድር።
7ወሐዊሮ፡በጽሐ፡ደብረ፡መትሎብ፡ወኀደረ፡ህየ፡ወበሌሊት፡ጸውዖ፡መልአከ፡እግዚአብሔር፡ወይቤሎ። ኦ፡መርምህናም፡ተንሥእ፡ወዕርግ፡ውስተ፡ዝንቱ፡ደብር፡ወትረክብ፡ብእሴ፡ቅዱሰ፡ዘስሙ፡ማቴዎስ፡ወውእቱ፡ይነግረከ፡ነገረ፡ሕይወት።
8ወበሣኒታ፡ሶበ፡ዓርገ፡ውስተ፡ደብር፡ረከቦ፡ለአባ፡ማቴዎስ፡ለቢሶ፡ፀጕረ፡ከመ፡በግዕ፡ወርእዮ፡መርምህናም፡ፈርሀ፡እምኔሁ፡ወይቤሎ፡አባ፡ማቴዎስ፡ቅረብ፡ኀቤየ፡ኦ፡ወልድየ፡እስመ፡ኣነሂ፡ብእሲ፡ዘከማከ፡ፍጥረቱ፡ለእግዚአብሔር።
9ወይቤሎ፡መርምህናም፡ቦኑ፡አምላክ፡ዘእንበለ፡አማልክተ፡አቡየ። ወመሀሮ፡አባ፡ማቴዎስ፡ኵሎ፡ሃይማኖተ፡እግዚእነ፡ወምሥጢረ፡ተሠግዎቱ፡ወሞቱ፡ወትንሣኤሁ፡ወዕር፡ገቶ፡ወዕሤተ፡ጻድቃን፡ወኵነኔ፡ኀጥአን።
10ወይቤሎ፡ቅዱስ፡መርምህናም፡ሀለወተኒ፡እኅት፡ዘአኀዛ፡ሕማመ፡ለምፅ፡እምርእሳ፡እስከ፡እግራ፡ወለእመ፡ፈወስካ፡በጸሎትከ፡አነ፡አአምን፡በአምላክከ፡ወይቤሎ፡አባ፡ማቴዎስ፡ነዓ፡ንረድ፡ኀቡረ፡ወአነ፡እፌውሳ፡በስሙ፡ለአምላኪየ።
11ወወሪዶሙ፡እምደብር፡ኀደጎ፡መርህምናም፡ለአባ፡ማቴዎስ፡በፍኖት፡ወበጺሖ፡ኀበ፡እሙ፡ወነገራ፡ለእሙ፡ኵሎ፡ወእምዝ፡ነሥኣ፡ለእኅቱ፡በኅቡዕ፡ወወሰዳ፡ኀበ፡አባ፡ማቴዎስ።
12ወሶበ፡በጽሑ፡ኀቤሁ፡ገብረ፡ጸሎተ፡ነዋኀ፡ኀበ፡እግዚአብሔር፡ወጐድአ፡ምድረ፡በማዕተበ፡እዱ፡ወነቅዐ፡ማይ፡ከመ፡ማየ፡ባሕር፡ወአውረዶሙ፡ውስተ፡ማይ፡ወአንበረ፡እዴሁ፡ዲበ፡ርእሶሙ፡ወአጥመቆሙ፡በስመ፡አብ፡ወወልድ፡ወመንፈስ፡ቅዱስ፡፩፡አምላክ፡ምስለ፡፵፡ዕደው፡አግብርቲሁ፡ወወሀቦሙ፡ምሥጢራተ፡ቅድሳት፡ወበጊዜሃ፡ነጽሐት፡እኅቱ፡እምለምፃ።
13ወእምዝ፡መዐዶሙ፡ወአፅንፆሙ፡ውስተ፡ሃይማኖተ፡እግዚእነ፡ኢየሱስ፡ክርስቶስ፡ሎቱ፡ስብሐት። ከመ፡ይትወከፉ፡ኵሎ፡መቅሠፍተ፡ዘይመጽእ፡ላዕሌሆሙ፡በእንተ፡ስሙ፡ለክርስቶስ፡ጸለየ፡ላዕሌሆሙ፡ወባረኮሙ፡ወፈነዎሙ፡በሰላም።
14ወዝቢኦ፡ቅዱስ፡መርምህናም፡በጽሐ፡ኀበ፡እሙ፡ወኢሖረ፡ኀበ፡አቡሁ፡ወኢቦአ፡ቤተ፡አማልክት፡ዘአቡሁ።
15ወሶበ፡አእመረ፡አቡሁ፡ከመ፡ኀደገ፡ወልዱ፡አምልኮ፡አማልክቲሁ፡ተምዐ፡ወአዘዘ፡ይዝብጥዎ፡ወወፅአ፡ቅዱስ፡መርምህናም፡እምህየ፡ምስለ፡እኅቱ፡ወሠራዊቱ፡ወዐርገ፡መልዕልተ፡ደብር፡ዘስማ፡ቅሳር፡ወነበረ፡በህየ።
16ወሰሚዖ፡አቡሁ፡ፈነወ፡መኳንንተ፡ኀቤሁ፡ምስለ፡አልባስ፡ክቡራት፡ወአክሊለ፡መንግሥት፡ከመ፡ይበልዎ፡ንሣእ፡መንግሥትየ። ወሶበ፡ነፀሮሙ፡ተቈጥዐ፡ላዕሌሆሙ፡ወይቤሎሙ፡አንሰ፡አኀሥሥ፡መንግሥተ፡እግዚእየ፡ኢየሱስ፡ክርስቶስ፡ዘኢይበሊ፡ወኢይማስን።
17ወሶበ፡ሰምዐ፡ዘንተ፡አቡሁ፡ተምዐ፡ጥቀ፡ወአዘዘ፡ቅድመ፡ከመ፡ይቅትሉ፡አግብርቲሁ፡ከመ፡ይፍራህ፡ልቡ፡ወይትመየጥ፡ኀበ፡አቡሁ፡ወእመሰ፡ኢፈርሀ፡ወኢተመይጠ፡ኀቤሁ፡ይቅትሉ፡ኪያሁ፡ምስለ፡እኅቱ።
18ወሰሚዖ፡ቅዱስ፡መርምህናም፡ጸለየ፡ኀበ፡እግዚአብሔር፡ከመ፡የሀቦ፡ኵሎ፡ተምኔቶ። ወመጽአ፡ሎቱ፡ቃል፡እምሰማይ፡ዘይብል፡ሰማዕኩ፡ጸሎተከ፡ወሀብኩከ፡ኵሎ፡ተምኔተ፡ልብከ።
19ወሶቤሃ፡መተሩ፡አርእስቲሆሙ፡ለቅዱሳን፡በአስይፍት፡ወወርዎሙ፡ውስተ፡ግብ፡ወአምጽኡ፡ብዙኅ፡ዕፀወ፡ከመ፡ያንድዱ፡እሳተ፡ወያውዕዩ፡ሥጋሆሙ፡ለቅዱሳን፡ወረከብዎሙ፡ድኁናነ፡እስመ፡ሠወሮሙ፡እግዚእነ፡ወናሁ፡ጸልመ፡ፀሐይ፡ወአድለቅለቀት፡ምድር፡ፈርሁ፡ወጐዩ፡ሐራ፡ወቦአ፡ሰይጣን፡ውስተ፡ልበ፡ሰናክሬም፡ንጉሠ፡አቶር፡ወከልሐ፡ከመ፡ሐራውያ።
20ወሰሚዓ፡እሙ፡ለቅዱስ፡መርምህናም፡ከመ፡ዓብደ፡ምታ፡ፈነወት፡ኀበ፡አባ፡ማቴዎስ፡ወአብጽሐቶ፡ወነገረቶ፡ግብሮ፡ለንጉሥ።
21ወሶቤሃ፡ጸለየ፡ላዕለ፡ዘይት፡ወቀብዖ፡ለንጉሥ፡ወወፅአ፡እምኔሁ፡ሰይጣን፡በአምሳለ፡ሐራውያ፡ወአምነ፡ንጉሥ፡በእግዚእነ፡ኢየሱስ፡ክርስቶስ፡ሎቱ፡ስብሐት። ወተጠምቀ፡ምስለ፡ኵሉ፡ሰብአ፡ቤቱ፡ወምስለ፡ኵሎሙ፡ሰብአ፡ሀገረ፡መንግሥቱ።
22ወአዘዞ፡አባ፡ማቴዎስ፡ይሕንጽ፡ቤተ፡ክርስቲያነ፡በስመ፡እግዝእትነ፡ቅድስት፡ድንግል፡ማርያም፡ወላዲተ፡አምላክ፡ወይዝሩ፡ንዋዮ፡ለምጽዋት፡ላዕለ፡ነዳያን፡ወምስኪናን፡ወገብረ፡ኵሎ፡በከመ፡አዘዞ።
23ወገብረት፡እሙ፡ለቅዱስ፡መርምህናም፡፵፡ሣፁናተ፡እምአእባን፡ክቡራን፡ወአስተጋብኣት፡አዕፅምቲሆሙ፡ለእሙንቱ፡ሐራ፡ቅዱሳን፡ወወደየቶሙ፡ለለ፡፩ዱ፡ወገብረት፡ካዕበ፡፪ተ፡ሣፁናት፡ዘማኅው፡ለደቂቃ፡ወወደየቶሙ፡ውስቴቶን፡ወኣንበረቶሙ፡ውስተ፡ቤተ፡ክርስቲያን፡ዘሐነፀት፡ሎሙ፡ወአስተርአዩ፡ተአምራት፡ወመንክራት፡ዐበይት። በረከቶሙ፡ቅድስት፡ተሀሉ፡ምስሌነ፡ለዓለመ፡ዓለም፡አሜን።
ሰላም፡ለመርምህናም፡እንተ፡ዔለ፡በድወ፤ሃይማኖተ፡ክርስቶስ፡ይኀሥሥ፡በአምሳለ፡ይፈቅድ፡ንዒወ፤ነፂሮሙ፡ደሞ፡በእንተ፡ሃይማኖት፡ክዕወ፤ከመ፡ሐራውያ፡ንጉሥ፡ነቀወ፤ወፀሐይኒ፡ብርሃኖ፡ዓፀወ።ሰላም፡ሰላም፡ዕደወ፡ኃይል፡ሐራ፤ዘኍልቆሙ፡ካዕበተ፡፳ራ፤በእንተ፡ክርስቶ፡ዘፆሩ፡ለክበደ፡ዕለት፡ፃዕራ፤ዘመርምህና፡እግዚኦሙ፡ሶበ፡ነፀሩ፡መከራ፤ወእንተ፡ምስሌሁ፡ዘሐመት፡ሣራ።
24ወበዛቲ፡ዕለት፡ኮነ፡ተዝካሮው፡ለ፲ወ፯፡እልፍ፡ሰማዕታት፡ማኅበረ፡ቅዱስ፡መርምህናም፡ሠራዊተ፡አቶር፡አቡሁ፡ለቅዱስ፡መርምህናም።
25ወሶበ፡ነግሠ፡ካልእ፡ንጉሥ፡እምድኅረ፡ሰናክሬም፡ንጉሠ፡አቶር፡ዘአጥመቆ፡አባ፡ማቴዎስ፡ወእንዘ፡ሀሎ፡በምድረ፡ከላውዴዎን፡ሰምዐ፡ከመ፡ሞተ፡ንጉሠ፡አቶር፡ወከመ፡ነግሠ፡ወልዱ፡ንኡስ፡ሕፃን፡ዘኢይክል፡ዐቂበ፡መንግሥት። ወኮኑ፡ሎቱ፡መገብት፡እለ፡ኮኑ፡በመዋዕለ፡አቡሁ፡ወእሙንቱ፡የዓቅቡ፡መንግሥቶ። ውእቱሰ፡ኢየአምር፡ትእዛዘ፡መንግሥት፡ወኢምንተኒ፡ወባሕቱ፡ትኤዝዝ፡እመ፡ህየንቴሁ፡ወመገብትኒ፡ይትቀነዩ፡ላቲ።
26ወበእንተዝ፡ተንሥአ፡ውእቱ፡ከለዳዊ፡ወአስተጋብአ፡ሠራዊቶ፡ወመጽአ፡ከመ፡ይንግሥ፡ላዕሌሆሙ።
27ወሰሚዖሙ፡ሰብአ፡ሀገረ፡አቶር፡አስተጋብኡ፡ሠራዊቶሙ፡ወወፅኡ፡ይትቃተልዎ፡አግብርተ፡ሰናክሬም፡ወአግብርተ፡ቅዱስ፡መርምህናም፡እለ፡የዓቅቡ፡መቃብሮ፡እሉኒ፡ወፅኡ፡ለተቃትሎቱ። ሞዖሙ፡ውእቱ፡ንጉሠ፡ከላውዴዎን፡ወጐዩ፡እምቅድሜሁ፡ወአርኀዋ፡ለሀገር፡ወቦአ፡ወአኀዞ፡ለሕፃን፡ንጉሥ፡ወቀተሎ፡ምስለ፡እሙ፡ወእምዝ፡ገረሩ፡ሎቱ፡ኵሎሙ፡ሰብአ፡መንግሥተ፡አቶር፡ወነግሠ፡ላዕሌሆሙ።
28ወእምድኅረ፡ኅዳጥ፡መዋዕል፡አስተጋብኦሙ፡ለኵሎሙ፡ሰብአ፡ሀገረ፡አቶር፡ወተስእሎሙ፡በእንተ፡ሃይማኖቶሙ፡ወይቤልዎ፡ክርስቲያን፡ንሕነ፡ወአዘዞሙ፡ይስግዱ፡ለጣዖት፡ወብዙኀን፡ሰብእ፡ዓለዉ፡ሃይማኖቶሙ፡ወሰገዱ፡ለጣዖታት።
29ወአሜሃ፡መጽኡ፡አግብርተ፡ቅዱስ፡መርምህናም፡ወአግብርተ፡አቡሁ፡ወይቤልዎ፡ክርስቲያን፡ንሕነ፡ገሀደ፡አግብርቲሁ፡ለክርስቶስ፡ወዓቀብተ፡መቃብሪሁ፡ለቅዱስ፡መርምህናም፡ይቤልዎ፡ግበር፡ዘፈቀድከ፡ኢንክሕድ፡ሃይማኖተነ፡ዘመሀረነ፡እግዚእነ። ወሰሚዖ፡ተምዐ፡ላዕሌሆሙ፡ወአዘዘ፡ይቅትልዎሙ፡ለኵሎሙ፡በሰይፍ፡ወቀተልዎሙ፡ወኮነ፡ኍልቆሙ፡፲ወ፯፡እልፍ፡ወእሙንቱ፡ተሰምዩ፡ማኅበራነ፡ቅዱስ፡መርምህናም። ጸሎቶሙ፡ወበረከቶሙ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለክሙ፡አእላፈ፡መርምህናም፡ብፁዕ፤፲ሩ፡ወ፯ዑ፡እልፍ፡ቅዱሳን፡ሰብእ፤ዘተጋደልክሙ፡ገድለ፡ውስተ፡ዓውደ፡ስምዕ፤አዕጥቁኒ፡ኃይላቲክሙ፡ወአቅንቱኒ፡ለጥብዕ፤አምጣነ፡ጥብዓት፡ተብህለ፡መድኀኑ፡ለፀብዕ።
30ወበዛቲ፡ዕለት፡አዕረፈ፡አባ፡ገብረ፡ክርስቶስ፡ሊቀ፡ጳጳሳት፡ዘእስክንድርያ፡እምኍልቆሙ፡ለአበው፡ሊቃነ፡ጳጳሳት፡፷ወ፯ቱ።
31ወኮነ፡በመዋዕሊሁ፡ለዝንቱ፡ቅዱስ፡አብ፡ተአምራት፡ወመንክራት፡ብዙኃት፡ወናሁ፡ውእቱ፡ሰምዐ፡በእንተ፡አሐቲ፡ቤተ፡ክርስቲያን፡ዘተሐንፀት፡በስማ፡ለእግዝእትነ፡ቅድስት፡ድንግል፡ማርያም፡በብሔረ፡እንዱልስ፡ከመ፡ዕፀ፡ዘይት፡ይብስት፡ሀለወት፡በአንቀጸ፡ቤተ፡ክርስቲያን፡ወበዕለተ፡በዓላ፡ለእግዝእትነ፡ቅድስት፡ድንግል፡ማርያም፡ትሠርፅ፡ይእቲ፡ዕፅ፡ወትፈሪ፡ወሶበ፡ይትፌጸም፡በዓል፡ትትመየጥ፡ወትየብስ፡ከመ፡ቀዳሚ።
32ወበእንተዝ፡ሰአለ፡ወአስተብቍዐ፡ኀበ፡እግዚአብሔር፡ሊቀ፡ጳጳሳት፡ከመ፡ይክሥት፡ሎቱ፡ዘንተ፡ተአምረ፡ወበይእቲ፡ሌሊት፡መሠጦ፡መልአከ፡እግዚአብሔር፡ወአብጽሖ፡ኀበ፡ይእቲ፡ቤተ፡ክርስቲያን፡ወርእያ፡ለይእቲ፡ዕፅ፡ይብስተ፡አሜሃ፡ሠረፀት፡ወፈረየት፡ወእምዝ፡የብሰት፡ወተመይጠት፡ከመ፡ቀዳሚ፡ወገቢኦ፡ነገሮሙ፡ለሕዝብ፡ዘንተ፡መንክረ፡ወእሙንቱ፡ናፈቁ።
33ወእምድኅረ፡ኅዳጥ፡መዋዕል፡መጽአ፡ኀቤሁ፡፩፡ብእሲ፡መኰንን፡እምሀገረ፡እንዱልስ፡ዘስሙ፡ዮሐንስ፡ወተስእሎ፡ለውእቱ፡መኰንን፡በቅድመ፡ኵሎሙ፡ካህናት፡ወሕዝብ፡ወይቤሎ፡አማንኑ፡ዘሰማዕኩ፡ከመ፡ሀለወት፡ዕፀ፡ዘይት፡ይብስት፡በአንቀጸ፡ቤተ፡ክርስቲያና፡ለእግዝእትነ፡ቅድስት፡ድንግል፡ማርያም፡በሀገረ፡እንዱልስ፡ወበዕለተ፡በዓላ፡ለእግዝእትነ፡ቅድስት፡ድንግል፡ማርያም፡ትሠርፅ፡ወታፈሪ፡ወእምዝ፡ትየብስ።
34ወተሠጥዎ፡ውእቱ፡ብእሲ፡መኰንን፡ወይቤሎ፡ኦ፡አቡየ፡እሙን፡ውእቱ፡በከመ፡ትቤ። ወአነ፡ርኢክዋ፡በአዕይንትየ፡ለይእቲ፡ዕፅ፡ይብስታ። ወበዕለተ፡በዓላ፡ለእግዝእትነ፡ቅድስት፡ድንግል፡ማርያም፡ሶበ፡ይሠርቅ፡ፀሐይ፡ትሠርፅ፡ወኵሎሙ፡ሕዝብ፡ርእይዋ፡ጸገየት፡ወፈረየት፡ብዙኀ፡እስከ፡መንፈቀ፡መዓልት፡ወአውፅአት፡ፍሬ፡ውስቴታ፡ዘኢይትኌለቍ፡ግሙራ። ወሶቤሃ፡ወፅአ፡መጋቤ፡ቤተ፡ክርስቲያን፡ወነሥአ፡እምውእቱ፡ፍሬ፡ወገብሮ፡ቅብዓ፡ዘይት፡ወአኀተወ፡እምኔሁ፡ማኅቶተ፡ለቤተ፡ክርስቲያን፡ጸለዩ፡ወፈጸሙ፡ቅዳሴ፡ቍርባን፡ወመጠዉ፡ለሕዝብ፡ምሥጢራተ፡ቅድሳት፡ወአተዉ፡ኵሎሙ፡ውስተ፡በሐውርቲ፡ሆሙ።። ወኵ
35ወእምድኅረዝ፡ወፅኡ፡መጋቢ፡ወኵሎሙ፡ካህናት፡ወአስተጋብኡ፡ኵሎ፡ፍሬ፡ዘውስተ፡ይእቲ፡ዕፅ፡እምድኅረ፡ነሥኡ፡ሕዝብ፡እምኔሁ፡ለበረከት፡መጋቤኒ፡ወካህናት፡ገብርዎ፡ቅብዐ፡ለውእቱ፡ፍሬ፡ዘይት፡ዘየአክሎሙ፡ለማኅቶተ፡ቤተ፡ክርስቲያን፡ወለሲሳዮሙ፡እስከ፡ተፍጻሜተ፡ዓመት፡ወበይእቲ፡ዕለት፡የብሰት፡ይእቲ፡ዕፅ፡ወተነግፈ፡ቈጽላ። ወሶበ፡ሰምዑ፡ሕዝብ፡ዘንተ፡ተአምረ፡አንከሩ፡ወሰብሕዎ፡ለእግዚአብሔር፡ወአእኰትዋ፡ለእግዝእትነ፡ቅድስት፡ድንግል፡ማርያም።
36ወበመዋዕሊሁ፡ለዝንቱ፡አብ፡ሖረ፡፩፡ብእሲ፡ብሔረ፡ኢትዮጵያ፡ዘስሙ፡ቆሪል፡ወረሰየ፡ርእሶ፡ጳጳሰ፡በሐሰት፡ወፈነወ፡ንዋየ፡ብዙኀ፡ኀበ፡ንጉሠ፡ግብፅ፡እንዘ፡ይብሎ፡አዝዞ፡ሊተ፡ለሊቀ፡ጳጳሳት፡አባ፡ገብረ፡ክርስቶስ፡ከመ፡ይፈኑ፡መልእክተ፡ወይሢመኒ፡ጳጳሰ፡እንዘ፡ሀሎኩ፡ዝየ፡ብሔረ፡ኢትዮጵያ፡ወአነሂ፡እፌኑ፡ለከ፡ለለዓመት፡ብዙኀ፡ወርቀ፡አምኀከ።
37ወሶቤሃ፡ፀውዖ፡ንጉሠ፡ግብፅ፡ለሊቀ፡ጳጳሳት፡አባ፡ገብረክርስቶስ፡ወይቤሎ፡ፈኑ፡መልእክተ፡ኀበ፡ብሔረ፡ኢትዮጵያ፡ወሢሞ፡ለቆሪል፡ጳጳሰ። ወይቤሎ፡አባ፡ገብረ፡ክርስቶስ፡አኮ፡መፍትው፡ዝንቱ፡ዘእንበለ፡ይብጻሕ፡ዝየ፡ወይቤሎ፡ንጉሥ፡በከመ፡አዘዝኩከ፡አነ፡ግበር፡ወይቤሎ፡ፈቃድከ፡ለይኩን።
38ወወፅአ፡ሊቀ፡ጳጳሳት፡እንዘ፡የኀዝን፡እምኀበ፡ንጉሥ፡ወተከዘ፡ጥቀ፡በእንተ፡ዝንቱ፡ነገር፡ወአስተጋብኦሙ፡ለኵሎሙ፡ኤጲስቆ፡ጶሳት፡ወነገሮሙ፡ዘከመ፡ይቤሎ፡ንጉሥ፡ወሶበ፡ሰምዑ፡ኀዘኑ፡ፈድፋደ፡ወጸለየ፡ዝንቱ፡አብ፡ወአስተብቍዐ፡ኀበ፡እግዚአብሔር፡ከመ፡ያድ፡ኀኖ፡እምነ፡ስሕተቱ፡ለቆሪል።
39ወበውእቱ፡መዋዕል፡ተንሥአ፡ቆሪል፡ሐሳዊ፡ወነሥአ፡ብዙኀ፡ወርቀ፡ወጐየ፡እም፡ብሔረ፡ኢትዮጵያ፡ወበጽሐ፡ብሔረ፡ዳኅሉክ፡ወአኀዞ፡ንጉሠ፡ዳኅሉክ፡ወነሥአ፡ኵሎ፡ንዋዮ፡ወአሠሮ፡ወፈነዎ፡ኀበ፡ንጉሠ፡ግብፅ፡ወንጉሠ፡ግብፅኒ፡አሠሮ፡ተስዓተ፡አውራኀ፡ወእምዝ፡መተረ፡ርእሶ፡በሰይፍ፡ወሞተ፡እኩየ፡ሞተ። እስመ፡እግዚእነ፡ተወክፈ፡ስእለቶ፡ለዝንቱ፡አብ፡ወነበረ፡አባ፡ገብረ፡ክርስቶስ፡ዲበ፡መንበረ፡ማርቆስ፡ወንጌላዊ፡፴፡ዓመተ፡ወአሥመሮ፡ለእግዚአብሔር፡ወአዕረፈ፡በሰላም። ጸሎቱ፡ወበረከቱ፡የሀሉ፡ምስሌነ፡ለዓለመ፡ዓለም፡ኣሜን።
ሰላም፡ለገብረ፡ክርስቶስ፡በቅብዐ፡ጸጋ፡ዘተኀትመ፤አበ፡ድክቱማን፡ይኩን፡ወለመዐስባት፡ቃውመ፤ከመ፡ርእየ፡ይቤ፡በቤተ፡ማርያም፡መድምመ፤ይቡስ፡ዕፀ፡ዘይት፡እስከ፡ይፈሪ፡ጥዑመ፤ዘለለበዓላ፡ሠሪፆ፡ይየብስ፡ዳግመ።
40ወበዛቲ፡ዕለት፡ስምዐ፡ኮነ፡አባ፡አሞኔዎስ፡ክቡር፡ኤጲስቆጶስ፡ዘሀገረ፡እስና፡ወሶበ፡በጽሐ፡አርያኖስ፡መኰንን፡ሀገረ፡እስና፡ረከቦሙ፡ለኵሎሙ፡ሰብአ፡ሀገር፡ተጋቢኦሙ፡ኀበ፡አባ፡አሞኔዎስ፡እንዘ፡ይትሜሀሩ፡ነገረ፡ሃይማኖት፡ወቀተሎሙ፡ሶቤሃ፡ወለአባ፡አሞኔዎስ፡አኀዞ፡ወአሠሮ፡ወወሰዶ፡ሀገረ፡እንጽና፡ወአጎበሮ፡ብዙኀ፡ከመ፡ይዕጥን፡ለአማልክት፡ወይስግድ።
41ወይቤሎ፡አባ፡አሞኔዎስ፡ለመኰንን፡መፍትው፡ከመ፡ትስግድ፡ለእግዚአብሔር፡አምላክከ፡ወኪያሁ፡ባሕቲቶ፡ታምልክ፡ወአ፡ንሰ፡ኢይሠምር፡ተዛውፆተክሙ፡ከንቶ፡ወነገረክሙ፡በከ፡ወኢይፈቅድ፡እሬኢ፡አማልክቲክሙ፡ርኩሳነ፡ወኢያንሶሱ፡ቤተ፡ጣዖትክሙ፡ርኵስት፡ወኢይእኅዝ፡ዕጣነክሙ፡ጽዩዐ፡ወመሥዋዕተክሙ፡ፍጉገ።
42ወሶበ፡ርእየ፡አርያኖስ፡ጥብዓቶ፡ለዝንቱ፡አዘዘ፡ያውዕይዎ፡በእሳት፡እንዘ፡ሕያው፡ውእቱ፡ወሰአሎሙ፡አባ፡አሞኔዎስ፡ለሐራ፡ከመ፡ይጽንሕዎ፡ንስቲተ፡እስከ፡ይጼሊ፡ወቆመ፡እንዘ፡እሡር፡እደዊሁ፡ወእገሪሁ፡ወጸለየ፡ጸሎተ፡ወንጌል፡ወባረከ፡ሀገሮ፡ወሰብኦ፡ወኵሎ፡ምእመናነ፡ዘክርስቶስ። ወካ፡ዕበ፡ጸለየ፡በእንተ፡አርያኖስ፡መኰንን፡ወተነ፡በየ፡በእንቲአሁ፡ከመ፡ውእቱ፡ይከውን፡ሰማ፡ዕተ፡ወዓዲ፡ፈትሐ፡ኵሎ፡ዘተአሥረ፡በቃሉ፡ወፈጺሞ፡ጸሎቶ፡ወገርዎ፡ውስተ፡እሳት፡ወፈጸመ፡በድሮ፡ሠናየ።
43ወእምዝ፡ሶበ፡ጠፍአ፡እሳት፡ረከቡ፡ሥጋሁ፡ዳኅነ፡እንዘ፡አልቦ፡ዘለከፎ፡ወገነዝዎ፡በልብስ፡ሠናይ፡ወቀበርዎ፡ውስተ፡ምዕራቢሃ፡ለሀገረ፡እንጽና፡ውስተ፡ማኅፈድ፡ዘሐነጸት፡አክላወባጥራ፡ንግሥት፡ወለተ፡በጥሊሞስ፡ንጉሥ፡ወገብረ፡ኀይላተ፡ወመንክራተ፡ዘአ፡ልቦ፡ኍልቅ። በረከቱ፡ትኩን፡ምስሌነ፡ለዓለመ፡ዓለም፡አሜን።
ሰላም፡ለአሞኔዎስ፡ለአድያመ፡እስና፡ዘዖዳ፤ምስለ፡ቃለ፡ምህሮ፡ሠናይ፡ማእከለ፡ብዙኀን፡ውሉዳ፤በጊዜ፡ፈጸመ፡ስምዖ፡ለእ፡ቶነ፡እሳት፡በነዳ፤ድኅረ፡አርመመ፡ማዕበላ፡ወድኅረ፡ኀድአ፡ሞገዳ።በአምሳለ፡በረድ፡ተረ፡ክበ፡ሥጋሁ፡ፀዓዳ።
44ወበዛቲ፡ዕለት፡አዕረፈት፡ወለተ፡ንጉሠ፡ሮም፡ዘስማ፡ነሳሒት፡በከመ፡ነገረ፡በእንቲአሃ፡አባ፡ያዕቆብ፡ኤጲስቆጶስ፡ዘወሲም፡እንዘ፡ይብል፡ወኮነ፡በአሐቲ፡ዕለት፡እንዘ፡ሀሎኩ፡በዓፀደ፡ቤተ፡ክርስቲያና፡ለእግዝእትነ፡ማር፡ያም፡ቅድስት፡ድንግል፡ወላዲተ፡አምላክ፡ሰማዕኩ፡እንዘ፡ይጐደጕድ፡አንቀጸ፡ምኔት። ወተንሣእኩ፡ከመ፡እርአዮ፡ወርኢኩ፡ዲቤሁ፡ዐቢየ፡ዐጽፈ፡ብሉየ፡ወይቡስ፡ሥጋሁ፡ወግል፡ቡብ፡ገጹ።
45ወእቤሎ፡እምአይቴ፡መጻእከ፡ወኀበ፡አይቴ፡ተሐውር፡ወይቤለኒ፡መጻእኩ፡እምአ፡ድባረ፡አባ፡መቃርስ፡ወእፈቅድ፡እቢት፡በዛቲ፡ሌሊት፡ውስተ፡ዛቲ፡ምኔት፡ከመ፡እትመጦ፡ቍርባነ።
46ወኮነ፡አሜሃ፡ዕለተ፡ቀዳሚት፡ወእ፡ቤሎ፡ኢያርኁ፡ለከ፡እመ፡ኢያርአይከኒ፡ገጸከ፡ወይቤለኒ፡ኢትኅሥሥ፡ርእየተ፡ገጽየ፡እስመ፡ገጽየ፡መጽልም፡እምብዝኀ፡ኀጣው፡እየ፡እስመ፡ለኵሉ፡ዘይሬኢ፡ገጽየ፡ያስተርኢ፡ሎቱ፡ምግባርየ፡እኩይ።
47ወሶበ፡አበይክዎ፡ፈቀደ፡ይትመየጥ፡ውስተ፡መካኑ፡ወአንሰ፡ሐለይኩ፡በልብየ፡ከመ፡ውእቱ፡ርኁብ፡አው፡ጽሙእ፡ወበእንተዝ፡አርኀውክዎ፡ወአባእክዎ፡ውስተ፡ማኅደርየ፡ወአቅረብኩ፡ሎቱ፡መብልዐ፡አበየ፡ወይቤለኒ፡ኢይበልዕ፡ዘእንበለ፡ጌሠም፡እምድኅረ፡ቍር፡ባን።
48ወእምዝ፡ሖረ፡ኀበ፡ቤተ፡ክርስቲያን፡ወቆመ፡ውስተ፡መካነ፡ጽልመት፡ወሰማዕኩ፡ድምፆ፡ከመ፡ድምፀ፡መላእክት፡እስከ፡አንከሩ፡አኀው፡እለ፡ነበሩ፡ህየ፡በጊዜ፡አንብቦቱ፡መዝሙረ፡ዳዊት።
49ወበጽባሕ፡ነበረ፡በእገሪሁ፡ወንሕነ፡ቀረብነ፡ኀቤሁ፡ከመ፡ንስአሎ፡ይጸሊ፡በእንቲአነ፡ወይቤለነ፡እፎ፡እጼሊ፡በእንቲአክሙ፡እንዘ፡ኣነ፡መጽልመ፡ገጽ፡ወብዙኀ፡ጌጋይ።
50ወሶበ፡አዕረግነ፡ቍርባነ፡ቆመ፡በእገ፡ሪሁ፡ወኣኀዘ፡ይሰጠው፡ጸሎተ፡ቅዳሴ፡ወአን፡በበ፡እመልእክተ፡ጳውሎስ፡ወእመልእክተ፡ሐዋርያ፡ወግብረ፡ሐዋርያት፡ወበራብዕ፡ጊዜ፡ቆመ፡ቅድመ፡ምሥዋዕ፡ወወጠነ፡ያንብብ፡ወንጌለ፡ዮሐንስ፡ወከልአ፡ልብሰ፡እምዲበ፡ገጹ፡እስመ፡ኢይትከሀል፡ይርአይዎ፡እምዕበየ፡ብርሃን፡ዘላዕሌሁ። ወእምድኅረ፡ተመጠውነ፡ቍርባነ፡ውእቱኒ፡ተመጠወ፡እምድኅሬነ። ወተሐዘብነ፡ከመ፡ውእቱ፡እምዘመደ፡ነገሥት፡ወአቅረብነ፡ሎቱ፡መብልዐ፡ወኢነሥአ፡እምኔነ፡ወመዓደነ፡ከመ፡ንትገኀሥ፡እምፍትወተ፡ርእየተ፡ገጸ፡አንስት፡ዘያስሕት፡ቦቱ፡ሰይጣን።
51ወሀሎ፡፩፡አረጋዊ፡እምዘመደ፡ነገሥተ፡ሮም፡ወመነኮስ፡ውእቱ፡ብእሲሁ፡ይቤለኒ፡ኦ፡አቡየ፡ያዕቆብ፡እስመ፡ዛቲሰ፡ብእሲት፡ይእቲ፡እምአዋልደ፡ነገሥት፡ወበእንተዝ፡ትሤውር፡ገጻ፡እምዕደው፡ከመ፡ኢያእምርዋ፡ወእምዝ፡ሖርኩ፡ኀቤሃ፡ከመ፡አምሕላ፡በስመ፡ክርስቶስ፡ኢትኅብዓኒ፡ግብራ፡ወበጺሕየ፡ኀጣእክዋ፡ወኢረከብክዋ።
52ወእምዝ፡እምድኅረ፡፭ቱ፡አውራኅ፡መጽኡ፡ብዙኃን፡ሰብእ፡እለ፡ተፈነዉ፡እም፡ኀበ፡አቡሃ፡ንጉሥ፡እንዘ፡የኀሥሡ፡ኪያሃ፡ወእሙንቱ፡ዜነዉነ፡ግብራ፡ከመ፡ይእቲ፡ወጽአት፡በሌሊት፡እምቤተ፡አቡሃ፡እምሀገረ፡ሮም፡ወናሁ፡ኮኖሙ፡፲ወ፪ቱ፡ዓመት፡እንዘ፡የኀሥሥዋ፡ወኢረከብዋ።
53ወእምዝ፡ረከብዋ፡ሰብእ፡ፈላስያን፡በፈ፡ቃደ፡እግዚአብሔር፡በኀበ፡አዕረፈት፡ወዜነዉነ፡ለነ፡ከመ፡አዕረፈት፡በዛቲ፡ዕለት። በረከታ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለወለተ፡ንጉሥ፡ነሳሒት፡ስማ፤ከዊና፡ግኅሥተ፡እምነ፡አቡሃ፡ወእማ፤እንበለ፡ታጠይቅ፡ገጻ፡በመካነ፡ጽልመት፡ቀዊማ፤እንዘ፡ታደምፅ፡መዝሙረ፡ከመ፡ድምፀ፡መልአክ፡ዘራማ፤ፈጸመት፡ገድለ፡ወሠለጠት፡ፃማ።ሰላም፡ለብርሃን፡በዓለመ፡ጽልመት፡ዘፀደለ፤ሙቁሐነ፡ይፍታሕ፡ወይኪድ፡ሲኦለ፤እግዚአብሔር፡አቡሁ፡እንዘ፡ያጠዓጥዕ፡ቃለ፤በአፈ፡ረድኡ፡ፍቁር፡በከመ፡ይቤ፡ብሂለ።ብርሃነ፡መለኮት፡መጽአ፡ወለብሰ፡አባለ።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።