ግዕዝ
Home Formaciones Libros Biblioteca Ge'ez Contacto
Sinaxario · Sene

9 de Sene

አመ፡፱፡ለሰኔ
1በስመ፡አብ፡ወወልድ፡ወመንፈስ፡ቅዱስ፡፩ዱ፡አምላክ። አመ፡፱፡ለሰኔ፡በዛቲ፡ዕለት፡አዕረፈ፡ዓቢይ፡ነቢይ፡ሳሙኤል።
2ለዝንቱ፡ቅዱስ፡ኮነ፡ስመ፡አቡሁ፡ሕልቃና፡እምነገደ፡ሌዊ። ወስማ፡ለእሙ፡ሐና፡ወይእቲ፡መካን፡ወበእንተ፡ስእለታ፡ወአስተብቍዖታ፡ተጸገወት፡ዘንተ፡ዓቢየ፡ነቢየ፡እምኀበ፡እግዚአብሔር፡ወሐፀነቶ፡ውስተ፡ቤታ፡ሠለስተ፡ዓመተ፡ወእምዝ፡አቅረበቶ፡ኀበ፡ቤተ፡መቅደሱ፡ለእግዚአብሔር፡በከመ፡በፅዓት፡እምቅድመ፡ትጽንሶ።
3ወኮነ፡ዘይትለአክ፡ለቤተ፡እግዚአብሔር፡ወለኤሊ፡ካህን፡እስከ፡አመ፡ይልኀቅ።
4ወደቂቁሰ፡ለኤሊ፡ኮኑ፡ያማስኑ፡መልእክቶሙ፡በቅድመ፡እግዚአብሔር፡ወአኀበርዎሙ፡ለደቂቀ፡እስራኤል፡ለረባኀ፡ዚአሆሙ፡ወለፍትወቶሙ፡ዘአልቦ፡ባቍዕ።
5ወእምዝ፡መጽአ፡ብእሴ፡እግዚአብሔር፡ኀበ፡ኤሊ፡ወይቤሎ፡ከመዝ፡ይቤ፡እግዚአብሔር። አስተርእዮ፡አስተርአይኩ፡ለቤተ፡አቡከ፡እንዘ፡ሀለዉ፡ውስተ፡ምድረ፡ግብፅ፡እንዘ፡አግብርቲሁ፡እሙንቱ፡ለፈርዖን።
6ወኀረይክዎ፡ለቤተ፡አቡከ፡እምኵሉ፡ቤተ፡እስራኤል፡ከመ፡ይኩኑኒ፡ካህናተ፡ወያዕርጉ፡ሊተ፡መሥዋዕተ፡ውስተ፡ምሥዋዕየ፡ወይዕጥኑ፡ዕጣነ፡ወይፁሩ፡ኤፉደ፡ወወሀብክዎ፡ለቤተ፡አቡከ፡ወኵሎ፡ዘበእሳት፡ይትገበር፡ዘእምኀበ፡ደቂቀ፡እስራኤል።
7ወለምንት፡በእኪት፡ዓይን፡ነፀርከ፡ላዕለ፡መሥዋዕትየ፡ወላዕለ፡ዕጣንየ፡ወአብደርከ፡ደቂቀከ፡እምኔየ፡በእንተ፡በረከት፡ቀዳሜ፡ኵሉ፡መሥዋዕቶሙ፡ለእስራኤል፡ዘቡቅድሜየ።።
8ወበእንተ፡ዝንቱ፡ከመዝ፡ይቤ፡እግዚአብሔር፡አምላከ፡እስራኤል፡እቤ፡ከመ፡ቤትከ፡ወቤተ፡አቡከ፡ትከብሩ፡ቅድሜየ፡ለዓለም፡ወይእዜሰ፡ይቤ፡እግዚአብሔር፡ሐሰ፡ሊተ፡ዳዕሙ፡ለእለ፡አክበሩኒ፡አከብሮሙ፡ወለዘኒ፡አስተሐቀረኒ፡አስተሐቅሮ።
9ወናሁ፡ይመጽእ፡መዋዕል፡ወእሤርዎሙ፡ለዘርእከ፡ወለዘርአ፡ቤተ፡አቡከ፡ወኢይትረከብ፡ለከ፡በውስተ፡ቤትከ፡ልኂቅ፡በኵሉ፡መዋዕል።
10ወኢይሠዓር፡ብእሲ፡እምነ፡መሥዋዕትየ፡ዘይፌጽም፡በአዕይንቲሁ፡ወይጽሕቅ፡በነፍሱ፡ወኵሎሙ፡እለ፡ተርፉ፡እምነ፡ቤትከ፡ይወድቁ፡በኲናተ፡ዕደው።
11ወዝንቱ፡ተአምር፡ለከ፡ዘይመጽእ፡ላዕለ፡፪ሆሙ፡ደቂቅከ፡አፍኒን፡ወፊንሐስ፡፪ሆሙ፡ይመውቱ፡በኲናት፡በአሐቲ፡ዕለት።
12ወአቀውም፡ሊተ፡ካህነ፡ዘይገብር፡ኵሎ፡ዘውስተ፡ልብየ፡ወዘውስተ፡ነፍስየ፡ምእመነ፡ወአሐንፅ፡ሎቱ፡ቤተ፡ማእምነ፡ወየሐውር፡ቅድመ፡መሢሕየ፡በኵሉ፡መዋዕል።
13ወእለ፡ተርፉ፡እምነ፡ቤትከ፡ይመጽኡ፡ወይሰግዱ፡ሎቱ፡ለብሩር፡አቦሊ፡ወለፍተ፡ኅብስት፡ወይቤልዎ፡ግድፈነ፡ኀበ፡፩ዱ፡እምካህናቲከ፡ኀበ፡ንበልዕ፡እክለ።
14ወዝክቱሰ፡ወልድ፡ሳሙኤል፡ሀለወ፡ይትለአክ፡ለእግዚአብሔር፡ቅድመ፡ኤሊ፡ካህን፡ወክቡር፡ውእቱ፡ቃለ፡እግዚአብሔር፡በእማንቱ፡መዋዕል፡ወአልቦ፡ራእይ፡ዘይከውን።
15ወእምዝ፡በይእቲ፡ዕለት፡እንዘ፡ይነውም፡ኤሊ፡በውስተ፡መካኑ፡ወአዕይንቲሁኒ፡አኀዛ፡ይክብዳ፡ወኢይክል፡ርእየ።
16ወማኅቶተ፡እግዚአብሔርኒ፡ዓዲ፡ኢያሠነዩ፡ለአቢቶ። ወሳሙኤልሰ፡ይነውም፡ውስተ፡ቤተ፡መቅደስ፡ኀበ፡ታቦተ፡ቤተ፡እግዚኣብሔር።
17ወጸውዖ፡እግዚአብሔር፡ለሳሙኤል፡ወይቤሎ፡ሳሙኤል፡ሳሙኤል፣ ወይቤ፡ነየ፡አነ።
18ወሮፀ፡ኀበ፡ኤሊ፡ወይቤሎ፡ነየ፡አነ፡መጻእኩ፡እስመ፡ጸዋዕከኒ። ወይቤሎ፡ኤሊ፡ኢጸዋዕኩከ፡ግባእ፡ወስክብ፡ወሖረ።
19ወደገመ፡ዓዲ፡እግዚአብሔር፡ጸውዖቶ፡ለሳሙኤል፡ወይቤሎ፡ሳሙኤል!፡ሳሙኤል!፡ወተንሥአ፡ሳሙኤል!፡ወሖረ፡ኀበ፡ኤሊ፡ዳግመ፡ወይቤሎ፡ነየ፡መጻእኩ፡እስመ፡ጸዋዕከኒ። ወይቤሎ፡ኤሊ፡ግባእ፡ስክብ፡እስመ፡ኢጸዋዕኩከ።
20ወሳሙኤልሰ፡ዓዲሁ፡ኢያእመሮ፡ለእግዚአብሔር፡እምቅድመዝ፡ወኢተከሥተ፡ሎቱ፡ቃለ፡እግዚአብሔር።
21ወጸውዖ፡ዓዲ፡እግዚአብሔር፡በሣልስ፡ለሳሙኤል፡ወተንሥአ፡ወሖረ፡ኀበ፡ኤሊ፡ወይቤሎ፡ነየ፡መጻእኩ፡እስመ፡ጸዋዕከኒ። ወሐለየ፡ኤሊ፡ከመ፡እግዚአብሔር፡ጸውዖ፡ለውእቱ፡ወልድ።
22ወይቤሎ፡ግባእ፡ወስክብ፡ወልድየ፡ወለእመቦ፡ዘጸውዓከ፡በሎ። በል፡እግዚእየ፡እስመ፡ይሰምዓከ፡ገብርከ፡ወሖረ፡ሳሙኤል፡ወሰከበ፡ውስተ፡መካኑ።
23ወመጽአ፡እግዚአብሔር፡ወቆመ፡ቅድሜሁ፡ወጸውዖ፡ከመ፡ቀዳሚ፡ወይቤሎ፡ሳሙኤል። “በል፡እግዚእየ፡ተናገር፡እስመ፡ይሰምዓከ፡ገብርከ”።
24ወእምዝ፡ተናገሮ፡እግዚአብሔር፡ዘከመ፡ይሤርዎ፡ለቤተ፡ኤሊ፡በእንተ፡ዘገብሩ፡ደቂቁ፡እኩየ፡ላዕለ፡ሕገ፡እግዚአብሔር፡ወላዕለ፡ደቂቀ፡እስራኤል።
25ወኮነ፡ዝንቱ፡ኵሉ፡በከመ፡ነበበ፡እግዚአብሔር።
26ወእምድኅረዝ፡አዘዞ፡እግዚአብሔር፡ከመ፡ይቅብዖ፡ለሳኦል፡ወልደ፡ቂስ፡ከመ፡ይኩን፡ንጉሠ፡ላዕለ፡ደቂቀ፡እስራኤል።
27ወሶበኒ፡ተዓደወ፡ሳኦል፡ትእዛዘ፡እግዚአብሔር፡አዘዞ፡ካዕበ፡ከመ፡ይቅብፆ፡ለዳዊት፡ወልደ፡ዕሤይ፡ከመ፡ይኩን፡ንጉሥ፡ወነቢየ፡ወካህነ።
28ወእምዝ፡ኰነኖሙ፡ሳሙኤል፡ለደቂቀ፡እስራኤል፡፳፡ዓመተ፡ወአዕረፈ፡በሰላም።
29ወካዕበ፡ይገብሩ፡ተዝሮ፡አመ፡፳ወ፡ለነሐሴ። እስመ፡በይእቲ፡ዕለት፡ጸውዖ፡እግዚአብሔር።
30ወተነበየ፡ዝንቱ፡ነቢይ፡እምቅድመ፡ትስብእቱ፡ለእግዚእነ፡በ፲፻ወ፭፡ዓመት። ጸሎቱ፡ወበረከቱ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለሳሙኤል፡እንተ፡ልኅቀ፡እምንእሱ፣ለእግዚአብሔር፡ውስተ፡መቅደሱ፤እኂዞ፡በእዴሁ፡ከመ፡ኢያንሶሱ፣ሳኦል፡ቀዳሚ፡ሶበ፡ሠጠጣ፡ለልብሱ፣እግዚአብሔር፡ሠጠጣ፡ለንግሡ።
31ወበዛቲ፡ዕለት፡ኮነ፡ሰማዕተ፡ቅዱስ፡ሉክያኖስ፡ወ፬ቱ፡ሰማዕት፡ካልአን፡ምስሌሁ።
32ወዝንቱ፡ቅዱስ፡ኮነ፡ቀዳሚ፡ካህነ፡ጣዖት።
33ወሶበ፡ርእየ፡ምንዳቤሆሙ፡ለሰማዕታት፡እንዘ፡ያውዕይዎሙ፡በእሳት፡ወይመትርዎሙ፡መለያልያቲሆሙ፡ወይቀሥፍዎሙ።
34ወዓዲ፡ርእዮሙ፡ለሰማዕታት፡እንዘ፡ይዌግሮሙ፡ኡልያኖስ፡ንጉሥ፡ውስተ፡እቶን፡ዘይነድድ፡እሳቱ፡ጥቀ። ወኢለከፈቶሙ፡እሳት፡ግሙራ፡አላ፡ኮኑ፡ያንሶስዉ፡ውስቴታ፡ሕያዋነ፡ወይሴብሕዎ፡ለእግዚአብሔር።
35ወአንከረ፡ዝንቱ፡ቅዱስ፡ወጠየቀ፡ከመ፡ጣዖታት፡ዘይትለአኮሙ፡ኢይክሉ፡ይግበሩ፡ከመዝ፡ዳዕሙ፡ለእመ፡ወገዎሙ፡ለእሉ፡ውስተ፡እሳት፡እምውዕዩ፡ፍጡነ።
36ወአምላክሰ፡ዘክርስቲያን፡ዘይገብር፡ዘንተ፡መንክረ፡በአማን፡አምላክ፡ውእቱ፡ይቤ።
37ስንዝር፡ቆመ፡ቅድመ፡ንጉሥ፡ወይቤ፡አንሰ፡ክርስቲያን፡ገሀደ። ወሶቤሃ፡አቅረብዎ፡ኀበ፡ንጉሥ፡ወገሠፆ፡ንጉሥ፡በእንተ፡ኀዲጎቱ፡አምልኮ፡ጣዖት፡ወተካየዶ፡ኪዳናተ፡ብዙኃተ፡ከመ፡የሀቦ፡ክብረ፡ለእመ፡ይትመየጥ፡ኀበ፡አምልኮቱ፡ጣዖታተ። ወኢሰምዖ፡ምንተኒ፡እስመ፡ኢፈርሀ፡ኵነኔሁ።
38ወእምድኅረዝ፡ኰነኖ፡ኵነኔ፡ዓቢየ፡ወሰቀሎ፡ቍልቍሊተ፡ወሰበረ፡መንሰኮ፡በአእባን፡ወቀፎ፡መቅሠፍተ፡ጽኑዓ፡ወእምዝ፡ወደዮ፡ውስተ፡ቤተ፡ሞቅሕ፡ወነበረ፡ውስቴታ፡ብዙኀ፡መዋዕለ።
39ወእምድኅረዝ፡አብጽሕዎ፡ምስለ፡ሙቁሐን፡ክርስቲያን፡ኀበ፡ዓውድ፡ወይቤሎሙ፡ንጉሥ፡ውግሩ፡ዕጣነ፡ለአማልክት፡ወእመ፡አኮ፡እኴንነክሙ፡ኵነኔ፡ዓቢየ፡ወኢተ፡ኣዘዙ፡ሎቱ፡ወተምዐ፡ላዕሌሆሙ፡ወወደሙ፡ውስተ፡እቶነ፡እሳት፡ወሶቤሃ፡አዝነመ፡እግዚአብሔር፡ዝናመ፡ብዙኀ፡ወአጥፍአ፡እሳተ፡እምላዕሌሆሙ።
40ወእምዝ፡አዘዘ፡ንጉሥ፡ይስቅልዎ፡ለዝንቱ፡ቅዱስ፡ሉክያኖስ፡ዲበ፡ዕፀ፡መስቀል፡እንዘ፡ይብል፡ከመ፡አምላኩ፡ተሰቅለ፡ውእቱኒ፡ይሰቀል፡ወቀነውዎ፡ውስተ፡ሥጋሁ፡ቅንዋተ፡ነዋኃተ፡ወመጠወ፡ነፍሶ፡ውስተ፡እዴሁ፡ለእግዚአብሔር።
41ወለእሙንቱ፡፬ቱ፡ዕደው፡መተሩ፡አርእስቲሆሙ፡በሰይፍ፡ወነሥኡ፡አክሊለ፡ስምዕ፡በመንግሥተ፡ሰማያት፡በረከቶሙ፡ተሀሉ፡ምስሌነ፡ለዓለመ፡ዓለም፡አሜን።
ሰላም፡ለሉክያኖስ፡ዘአድምዐ፡ተወድሶ፣ምስለ፡፬ቱ፡ዕደው፡ሥቃያተ፡ስምዕ፡በተዓግሦ፣ሶበ፡ለአማልክት፡ኢሦዐ፡በተኃይሶ፣ጊዜ፡ቀነውዎ፡መጠወ፡ነፍሶ፣እምድኅረ፡ሰበሩ፡በአእባን፡መንከሶ።
42ወበዛቲ፡ዕለት፡ተዝካሩ፡ለዮሐንስ፡ኤጲስቆጶስ፡ወአርከላ፡ጳጳስ። በረከቶሙ፡የሀሉ፡ምስሌነ፡ለዓለመ፡ዓለም፡አሜን።

ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።